Malavika Menon: కథ డిమాండ్‌ చేస్తే అలాంటి సన్నివేశాల్లోనూ నటిస్తా

‘‘నేను మలయాళం, తెలుగు, తమిళ చిత్రాల్లో నటించాను. అయితే ఇప్పటివరకు ముద్దు సన్నివేశాలు చేయలేదు. కథ డిమాండ్‌ చేస్తే గ్లామర్‌ పాత్రలు, ముద్దు సన్నివేశాలు చేసేందుకు నాకు ఎలాంటి అభ్యంతరం లేదు’’ అంటున్నారు హీరోయిన్‌ మాళవికా మీనన్‌. అందం, అభినయంతో దక్షిణాదిలో తనకంటూ ప్రత్యేక గుర్తింపు తెచ్చుకున్నారు ఈ మలయాళ బ్యూటీ. తెలుగులో మాళవికా మీనన్‌ ‘లవ్‌ కే రన్‌’ (2016), ‘అమ్మాయిలు అంతే అదో టైపు’ (2018) వంటి చిత్రాల్లో నటించారు. 

అయితే పలు కారణాల వల్ల ఆ సినిమాలు ఇప్పటికీ విడుదలకు నోచుకోలేదు. తాజాగా ఆమె నటించిన మలయాళ సినిమాలు ‘తంగమణి, వన్స్‌ అపాన్‌ ఏ టైమ్‌ ఇన్‌ కొచ్చి’ ఇటీవల విడుదలై ప్రేక్షకాదరణ పొందాయి. 

ఈ సందర్భంగా ఆమె మాట్లాడుతూ– ‘‘నేను మొదటిసారి నటించిన మలయాళ చిత్రం ‘నిద్ర’ (2011). అందులో హీరో చెల్లెలి పాత్ర చేశాను. అప్పుడు నా వయసు 14 ఏళ్లు. ‘916’ (2012) అనే మలయాళ మూవీ ద్వారా కథానాయికగా పరిచయమయ్యాను. మలయాళ సినిమాల్లో గ్లామర్‌ పాత్రలకు అవకాశం ఉండదు. అయితే తెలుగు, తమిళ భాషల్లో ఆ అవకాశాలు బాగుంటాయి... ఈ రెండు భాషల్లోనూ గ్లామరస్‌ హీరోయిన్‌గా నటించడానికి స్కోప్‌ ఉంటుంది’’ అన్నారు.