ప్రేమిస్తే తర్వాత అలాంటి అనుభూతి కలిగింది

మణికందన్, శ్రీ గౌరీప్రియ, మారుతి, ఎస్‌కేఎన్‌

‘‘ప్రేమిస్తే’ అనే డబ్బింగ్‌ మూవీతో నా కెరీర్‌ ఆరంభమైంది. ‘ప్రేమిస్తే’ చూసి బాగుందనిపించి రిలీజ్‌ చేసి, హిట్‌ సాధించాం. ఇన్నాళ్లకు ‘ట్రూ లవర్‌’ చిత్రం చూడగానే మళ్లీ అలాంటి అనుభూతి కలిగింది. ఈ సినిమాను ప్రేమలో ఉన్నవాళ్లు, లేనివాళ్లు, ప్రేమలో పడాలనుకుంటున్న వాళ్లు.. ఇలా అందరూ చూడొచ్చు’’ అని డైరెక్టర్‌ మారుతి అన్నారు. మణికందన్, శ్రీ గౌరీప్రియ, కన్న రవి ప్రధాన పాత్రల్లో ప్రభురామ్‌ వ్యాస్‌ దర్శకత్వం వహించిన చిత్రం ‘ట్రూ లవర్‌’.

నజేరత్‌ పసీలియన్, మగేష్‌ రాజ్‌ పసీలియన్, యువరాజ్‌ గణేశన్‌ నిర్మించిన ఈ చిత్రం ఫిబ్రవరి 9న విడుదలవుతోంది. ఈ చిత్రాన్ని నిర్మాత ఎస్‌కేఎన్‌ సమర్పణలో దర్శకుడు మారుతి విడుదల చేస్తున్నారు. సోమవారం ఈ సినిమా టీజర్‌ని విడుదల చేశారు. ప్రభురామ్‌ వ్యాస్‌ మాట్లాడుతూ– ‘‘ప్రేమికుల మధ్య ఉంటున్న మోడ్రన్‌ డే రిలేషన్స్‌ నేపథ్యంలో ‘ట్రూ లవర్‌’ ఉంటుంది’’ అన్నారు.

‘‘ఫిబ్రవరి 9న వస్తున్న పెద్ద సినిమాలతో మేము పోటీలో లేము. ‘ట్రూ లవర్‌’ చిన్న క్యూట్‌ సినిమా.. మా సినిమాని విడుదల చేస్తే ఎవరికీ అభ్యంతరం ఉండదని భావిస్తున్నాం’’ అన్నారు ఎస్‌కేఎన్‌. ‘‘మా సినిమాలోని భావోద్వేగాలు ప్రేక్షకులకు కనెక్ట్‌ అవుతాయని ఆశిస్తున్నాం’’ అన్నారు మణికందన్‌.