మానవ విలువలపై ఇంటర్‌ విద్యార్థులకు పరీక్ష

మానవ విలువలపై ఇంటర్‌ విద్యార్థులకు పరీక్ష

నల్లగొండ: ఇంటర్‌ విద్యార్థులు బుధవారం నైతిక విద్య, మానవ విలువలు అనే అంశాలపై బ్యాక్‌లాగ్‌ పరీక్షలు జరిగాయి. జిల్లా వ్యాప్తంగా ఈ పరీక్షలకు మొత్తం 15 మంది హాజరైనట్లు జిల్లా ఇంటర్‌ బోర్టు అధికారులు వెల్లడించారు. ఈ నెల 30న పర్యావరణ విద్య, 31, ఫిబ్రవరి 1న ఇంగ్లిష్‌ ప్రాక్టికల్స్‌ జరగనున్నాయి.

ఉన్నత విద్యను వ్యాపారంగా మార్చొద్దు

నల్లగొండ టూటౌన్‌: ఉన్నత విద్యను వ్యాపారంగా మార్చొద్దని, ఇందుకు ప్రభుత్వం ప్రత్యేక చర్యలు తీసుకోవాలని ఏఐఎస్‌ఎఫ్‌ యూనివర్సిటీల కన్వీనర్‌ రెహమాన్‌ అన్నారు. బుధవారం మహాత్మాగాంధీ యూనివర్సిటీలో జరిగిన ఏఐఎస్‌ఎఫ్‌ నూతన కమిటీ ఎన్నిక సమావేశంలో ఆయన మాట్లాడారు. దేశంలో ప్రభుత్వ యూనివర్సిటీల్లో ప్రొఫెసర్సు, అసిస్టెంట్‌ ప్రొఫెసర్లు, నాన్‌ టీచింగ్‌ పోస్టులను భర్తీ చేయకుండా ప్రభుత్వం నిర్లక్ష్యం చేస్తోందన్నారు. సంఘం రాష్ట్ర ఉపాధ్యక్షుడు బరికల వెంకటేష్‌ మాట్లాడుతూ ప్రైవేట్‌ యూనివర్సిటీలను పూర్తిగా రద్దు చేయాలని డిమాండ్‌ చేశారు. ఏఐఎస్‌ఎఫ్‌ యూనివర్సిటీ కన్వీనర్‌గా రేవెల్లి స్వామి, కోకన్వీనర్లుగా రాగం పవన్‌, ఎర్ర ప్రభాస్‌, సభ్యులుగా ఎం.వెంకటేష్‌, కోటేష్‌, గురుత్వ నాయక్‌, శ్రీనివాస్‌ ఎన్నుకున్నారు. ఈ సమావేశంలో జిల్లా అధ్యక్ష కార్యదర్శులు వలమల్ల ఆంజనేయులు, ముదిగొండ మురళీకృష్ణ, కోశాధికారి గాదెపాక సూర్యతేజ పాల్గొన్నారు.

యాసంగికి సరిపడా ఎరువులు ఉన్నాయి

నల్లగొండ అగ్రికల్చర్‌: జిల్లాలో యాసంగి సీజన్‌కు అవసరమైన ఎరువులు అందుబాటులోనే ఉన్నాయని, రైతులు ఎలాంటి ఆందోళన చెందాల్సిన అవసరం లేదని జిల్లా వ్యవసాయాధికారి (డీఏఓ) పాల్వాయి శ్రవణ్‌కుమార్‌ అన్నారు. బుధవారం నల్లగొండలోని జిల్లా వ్యవసాయ శాఖ కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు. ఈ యాసంగి సీజన్‌కు సంబంధించి రైతులు ఇప్పటి వరకు 3,92,250 ఎకరాల్లో వరినాట్లు వేసుకోగా 24,110 ఎకరాల్లో వేరుశనగ, 2,057 ఎకరాల్లో ఇతర పంటలు సాగు చేసుకున్నారని పేర్కొన్నారు. ఇందుకు గాను యూరియా 17,475 మెట్రిక్‌ టన్నులు, కాంప్లెక్స్‌ ఎరువులు 13,500 మెట్రిక్‌ టన్నులు, ఇతర ఎరువులు 7,008 మెట్రిక్‌ టన్నులతో కలిపి మొత్తం 38,683 మెట్రిక్‌ టన్నుల ఎరువులు అందుబాటులో ఉన్నాయని తెలిపారు. డీలర్లు కృత్రిమ కొరత సృష్టించకుండా ఎప్పటికప్పుడు ఆకస్మిక తనిఖీలు నిర్వహిస్తామన్నారు. వరిలో తల్లికర్ర ముందుగా ఈనుతుందని దాని నివారణకు బూస్టర్‌ డోస్‌ ఎకరానికి 30 నుంచి 35 కిలోల యూరియాను వెంటనే వేసుకోవాలన్నారు. పొలంలో జింక్‌ లోపం గమనిస్తే వెంటనే 2 గ్రాముల జింక్‌ సల్ఫేట్‌ను లీటర్‌ నీటిలో కలిపి 10 రోజుల్లో రెండుసార్లు పిచికారీ చేయాలని రైతులకు సూచించారు.

నేత్రపర్వంగా సంప్రదాయ పూజలు

యాదగిరిగుట్ట: యాదగిరిగుట్ట శ్రీలక్ష్మీనరసింహస్వామి ఆలయంలో బుధవారం సంప్రదాయ పూజలు నేత్రపర్వంగా కొనసాగాయి. వేకుజామున ఆలయాన్ని తెరిచిన అర్చకులు.. సుప్రభాత సేవతో స్వామివారిని మేల్కొలిపారు. అనంతరం గర్భాలయంలోని స్వయంభూలు, ప్రతిష్ఠా అలంకారమూర్తులను అభిషేకం, తులసీదళ అర్చనతో కొలిచారు. ఇక ప్రథమ ప్రాకార మండపం, ముఖ మండపంలో సుదర్శన నారసింహహోమం, గజవాహన సేవ, నిత్యకల్యాణం, బ్రహ్మోత్సవం తదితర పూజలు నిర్వహించారు. సాయంత్రం స్వామి, అమ్మవారి జోడు సేవలను మాడ వీధుల్లో ఊరేగించారు. వేడుకల్లో భక్తులు పాల్గొని మొక్కులు తీర్చుకున్నారు. రాత్రి స్వామి, అమ్మవారికి శయనోత్సవం జరిపించి ఆలయాన్ని మూసివేశారు.

1/2

మానవ విలువలపై ఇంటర్‌ విద్యార్థులకు పరీక్ష

2/2

మానవ విలువలపై ఇంటర్‌ విద్యార్థులకు పరీక్ష