తాటిచెట్టు పైనుంచి పడి గీత కార్మికుడి మృతి

తాటిచెట్టు పైనుంచి పడి గీత కార్మికుడి మృతి

రామగిరి(నల్లగొండ): తాటిచెట్టు పైనుంచి జారి పడి గీత కార్మికుడు మృతిచెందాడు. ఈ ఘటన గురువారం నల్లగొండ మండలం రాములబండ గ్రామ సమీపంలో జరిగింది. రాములబండ గ్రామానికి చెందిన గీత కార్మికుడు చామకూరి వెంకన్న(51) గ్రామ సమీపంలో క్రషర్‌ మిల్లు వద్ద కల్లు గీసేందుకు తాటిచెట్టు ఎక్కగా.. ప్రమాదవశాత్తు చెట్టు పైనుంచి జారి కిందపడ్డాడు. తీవ్రంగా గాయపడిన వెంకన్న అక్కడికక్కడే మృతిచెందాడు. వెంకన్న మృతదేహానికి నల్లగొండ ప్రభుత్వ ఆస్పత్రిలో పోస్టుమార్టం నిర్వహించారు. మృతుడి భార్య ధనమ్మ ఇచ్చిన ఫిర్యాదు మేరకు కేసు నమోదు చేసినట్లు ఎస్‌ఐ డి. సైదాబాబు తెలిపారు.

తుంగతుర్తిలో..

తుంగతుర్తి: తుంగతుర్తి మండలంలోని అన్నారం గ్రామానికి చెందిన గీత కార్మికుడు తండ రాజయ్య(43) గురువారం తాటిచెట్టు ఎక్కి కల్లు గీస్తుండగా.. ప్రమాదవశాత్తు జారి కిందపడి మృతిచెందాడు. మృతుడికి భార్య, కుమారుడు, కుమార్తె ఉన్నారు.

రైలు నుంచి జారిపడి

ఇద్దరు హిజ్రాలు మృతి

యాదగిరిగుట్ట రూరల్‌: రైలు నుంచి ప్రమాదవశాత్తు జారిపడి ఇద్దరు హిజ్రాలు మృతిచెందారు. ఈ ఘటన భువనగిరి జిల్లా యాదగిరిగుట్ట మండలంలోని వంగపల్లి–రాయగిరి ప్రాంతంలో బుధవారం అర్ధరాత్రి చోటుచేసుకుంది. వెస్ట్‌ బెంగాల్‌, బిహార్‌ రాష్ట్రాలకు చెందిన ఆకాశ్‌ కుమార్‌(24) నంద(25) అనే ఇద్దరు హిజ్రాలు సికింద్రాబాద్‌ నుంచి వరంగల్‌ వైపు వెళ్తున్న దక్షిణ్‌ ఎక్స్‌ప్రెస్‌ రైలులో రాత్రి ఒంటి గంట సమయంలో ప్రయాణిస్తున్నారు. ఈ క్రమంలో రైలు వంగపల్లి సమీపంలోకి రాగానే 250 మైలు రాయి సమీపంలో ఇద్దరు హిజ్రాలు ప్రమాదవశాత్తు రైలు నుంచి జారి కింద పడిపోయి అక్కడికక్కడే మృతిచెందారు. రైలు డోర్‌ వద్ద కూర్చుని ప్రయాణం సాగించడం వల్లనే హిజ్రాలు కింద పడి మృతిచెందారని జీఆర్‌పీ సిబ్బంది భావిస్తున్నారు. ఈ ఘటనపై కేసు నమోదు చేసి, మృతదేహాలను వారి కుటుంబ సభ్యులకు అందజేసినట్లు రైల్వే పోలీసులు తెలిపారు.