పకడ్బందీగా ఇంటర్మీడియట్‌ పరీక్షలు

పకడ్బందీగా ఇంటర్మీడియట్‌ పరీక్షలు

పార్వర్వతీపురం/పాలకొండ రూరల్‌: జిల్లాలో మార్చి 1 నుంచి ప్రారంభం కానున్న ఇంటర్మీడియట్‌ పరీక్షలను పకడ్బందీగా నిర్వహించాలని జిల్లా రెవెన్యూశాఖాధికారి కె.హేమలత సూచించారు. ఇంటర్మీయట్‌ పరీక్షల నిర్వహణపై డీఆర్‌ఓ అధ్యక్షతన మంగళవారం నిర్వహించిన సమన్వయ కమిటీ సమావేశంలో ఆమె మాట్లాడారు. జిల్లా పరిధిలో 34 పరీక్ష కేంద్రాల్లో 5,126 మంది విద్యార్థులు పరీక్షలకు హాజరవుతారన్నారు. ప్రతి కేంద్రం వద్ద 144 సెక్షన్‌ అమలులో ఉంటుందన్నారు. విద్యార్థులు సకాలంలో పరీక్ష కేంద్రాలకు చేరుకొని తిరిగి స్వగ్రామాలకు వెళ్లేలా ఆర్టీసీ ప్రత్యేక సర్వీసులు నడపాలన్నారు. పరీక్ష కేంద్రాల వద్ద వైద్యం, తాగునీటి సదుపాయాలు కల్పించాలన్నారు. సమావేశంలో జిల్లా ఇంటర్‌ విద్యాశాఖాధికారిణి డి. మంజులావీణ, ఆరోగ్యశాఖ ప్రోగ్రాం మేనేజర్‌ డాక్టర్‌ పి.జగన్‌మోహన్‌రావు, మున్సిపల్‌ కమిషనర్‌ శ్రీనివాసరాజు, ప్రత్యేకాధికారి నాగేశ్వరరావు, తదితరులు పాల్గొన్నారు.

జిల్లా రెవెన్యూ అధికారి హేమలత