మిమ్స్‌ విద్యార్థినికి రజత పతకం

మిమ్స్‌ విద్యార్థినికి రజత పతకం

నెల్లిమర్ల: జాతీయస్థాయి పవర్‌ లిఫ్టింగ్‌ పోటీలలో మిమ్స్‌ కళాశాలలో పిజియోథెరపీ విద్యార్థిని సత్తాచాటింది. ఈనెల 19 నుంచి 22 వరకూ ఛత్తీస్‌గఢ్‌లో నిర్వహించిన జాతీయస్థాయి పవర్‌ లిఫ్టింగ్‌ పోటీలలో వందన పాల్గొని రజత పతకం సాధించింది. పవర్‌ లిఫ్టింగ్‌ పోటీలలో ద్వితీయ స్థానం సాధించిన ఆర్‌.వందనను ఆమె తల్లిదండ్రులు లక్ష్మీగాయత్రి, శంకరరావు, కోచ్‌ మహేష్‌లను మిమ్స్‌ చైర్మన్‌ అల్లూరు సత్యనారాయణ, మిమ్స్‌ మేనేజింగ్‌ ట్రస్టీ డాక్టర్‌ ప్రవీణ్‌ వర్మ, డీన్‌ డాక్టర్‌ లక్ష్మీకుమార్‌ మంగళవారం అభినందించారు. వందన అంతర్జాతీయ పోటీలలో రాణించాలని అకాంక్షించారు. వందనను అభినందించిన వారిలో మెడికల్‌ డైరెక్టర్‌ డాక్టర్‌ రఘురాం, అకడమిక్‌ డైరెక్టర్‌ వేణుగోపాల్‌ రావు, ఫిజియోథెరపీ ప్రిన్సిపాల్‌ డాక్టర్‌ రవికుమార్‌, వ్యాయామ అధ్యాపకులు కళావెంకట రావు, ఏఓ గణేష్‌ ఉన్నారు.

అంగన్వాడీల అంత్యక్రియలకు రూ.15 వేలు

సాలూరు: సర్వీసులో ఉంటూ మరణించిన అంగన్వాడీ వర్కర్లు, హెల్పర్లకు అంత్యక్రియల నిమిత్తం రూ.15 వేలు మంజూరుచేయనున్నట్లు సీ్త్రశిశుసంక్షేమం, గిరిజన సంక్షేమశాఖ మంత్రి గుమ్మడి సంధ్యారాణి తెలిపారు. ఈ మేరకు మంగళవారం ఆమె సాలూరు పట్టణంలోని తన క్యాంపు కార్యాలయంలో మాట్లాడుతూ, జీఓఆర్‌టీ నంబర్‌ 9తో ఉత్తర్వులు జారీచేశామని వివరించారు. మరణించిన అంగన్వాడీ వర్కర్లు, హెల్పర్లకు చెందిన చట్టబద్ధమైన వారసులకు ఈ సొమ్ము అందించనున్నట్లు పేర్కొన్నారు.

తిరుచనాపల్లిలో జిల్లా గైడ్స్‌ ప్రదర్శన

విజయనగరం అర్బన్‌: తమిళనాడులోని తిరుచనాపల్లిలో మంగళవారం జరిగిన జాతీయ జంబోరీ స్కౌట్‌ అండ్‌ గైడ్స్‌ విద్యార్థుల ప్రదర్శనకు ప్రశంసలు లభించాయి. వచ్చే నెల 3వ తేదీ వరకు తిరుచనాపల్లిలో జరుగుతున్న భారత స్కౌట్స్‌ అండ్‌ గైడ్స్‌ జాతీయ జంబోరీ ప్రదర్శనలో జిల్లాకు చెందిన 49 మంది విద్యార్థులు పాల్గొంటారని జిల్లా కార్యదర్శి వాక చిన్నంనాయుడు తెలిపారు. రాష్ట్ర ప్రతినిధులుగా జిల్లా నుంచి 49 మంది సభ్యులతో జిల్లా కమిషనర్‌ బీపీరాజు, వైస్‌ ప్రెసిడెంట్‌ చోడవరపు నారాయణ మూర్తి, ఏఎస్‌ఓసీ దుర్గా నాగేశ్వరరావు, గైడ్‌ కెప్టెన్‌ నయా మున్నిసా, స్కౌట్‌ మాస్టార్లు పి.రమేష్‌ నాయుడు, ఎం.భాస్కరరావు, రాంకాశ్యప్‌, సోంపురం, లక్కిడాం, మెయిద, రెల్లివలస, కుమరాం జిల్లా పరిషత్‌ ఉన్నత పాఠశాలల స్కౌట్స్‌ 30 మంది, గైడ్స్‌ 19 మంది పాల్గొంటారని చెప్పారు.