భారత హాకీ జట్లకు నిరాశ

భువనేశ్వర్‌: అంతర్జాతీయ హాకీ సమాఖ్య (ఎఫ్‌ఐహెచ్‌) ప్రొ లీగ్‌ రెండో రౌండ్‌ మ్యాచ్‌ల్లో భారత పురుషుల, మహిళల జట్లకు నిరాశ ఎదురైంది. మంగళవారం జరిగిన రెండో రౌండ్‌ మ్యాచ్‌ల్లో భారత పురుషుల జట్టు 1–4 గోల్స్‌ తేడాతో ప్రపంచ మాజీ చాంపియన్‌ జర్మనీ  జట్టు చేతిలో... భారత మహిళల జట్టు 3–4 గోల్స్‌ తేడాతో స్పెయిన్‌ జట్టు చేతిలో ఓడిపోయాయి. 

జర్మనీతో జరిగిన మ్యాచ్‌లో భారత్‌ తరఫున గుర్జంత్‌ సింగ్‌ (13వ నిమిషంలో) ఏకైక గోల్‌ చేశాడు. జర్మనీ తరఫున ఫ్లోరియన్‌ స్పెర్లింగ్‌ (7వ నిమిషంలో), థీస్‌ ప్రింజ్‌ (14వ నిమిషంలో), మైకేల్‌ స్ట్రుతోఫ్‌ (48వ నిమిషంలో), రాఫెల్‌ హార్ట్‌కోప్‌ (55వ నిమిషంలో) ఒక్కో గోల్‌ సాధించారు. 

స్పెయిన్‌తో జరిగిన మ్యాచ్‌లో భారత మహిళల జట్టు తరఫున బల్జీత్‌ కౌర్‌ (19వ నిమిషంలో), సాక్షి రాణా (38వ నిమిషంలో), రుతుజా (45వ నిమిషంలో) ఒక్కో గోల్‌ నమోదు చేశారు. స్పెయిన్‌ జట్టుకు సోఫియా (21వ నిమిషంలో), లూసియా (52వ నిమిషంలో) ఒక్కో గోల్‌ చేయగా... ఎస్తెల్‌ (25వ, 49వ నిమిషాల్లో) రెండు గోల్స్‌ అందించింది.