కమిటీల బలోపేతంతో పూర్వవైభవం

కమిటీల బలోపేతంతో పూర్వవైభవం

తిరుత్తణి: కాంగ్రెస్‌లో కమిటీలను బలోపేతం చేయడం ద్వారా పార్టీకి పూర్వ వైభవం తీసుకురావచ్చని ఎమ్మెల్యేలు దురైచంద్రశేఖర్‌, మునిరత్నం అన్నారు. అరక్కోణం లోక్‌సభ పరధిలోని తిరుత్తణి నియోజకర్గ కాంగ్రెస్‌ కమిటీల నూతన సభ్యుల సమావేశం కేజీ.కండ్రిగలో మంగళవారం జరిగింది. తిరుత్తణి నియోజకవర్గ కన్వీనర్లు వెంకటరాజు, త్యాగరాజన్‌ స్వాగతం పలికారు. జిల్లా అధ్యక్షుడు, ఎమ్మెల్యే దురైచంద్రశేఖర్‌ అధ్యక్షత వహించారు. ఇందులో షోళింగర్‌ ఎమ్మెల్యే మునిరత్నం, మండలాల కోఆర్డినేటర్‌ గులాం మొయిద్దీన్‌, అరక్కోణం లోక్‌సభ కన్వీనర్‌ రాజేంద్రన్‌ పాల్గొన్నారు. అసెంబ్లీ ఎన్నికల నాటికి పార్టీని గ్రామస్థాయి నుంచి జిల్లా స్థాయి వరకు పటిష్టం చేసే విధంగా నూతన కమిటీలు నియమించినట్లు చెప్పారు. గ్రామ, పట్టణ, మున్సిపాలిటీ స్థాయిలో ప్రతి వార్డుకు కమిటీలు నియమించడం ద్వారా పార్టీకి పూర్వవైభవం తీసుకురావచ్చని తెలిపారు. మండల ఇన్‌చార్జ్‌లకు కమిటీ సభ్యత్వ నమోదు దరఖాస్తులు పంపిణీ చేశారు. రాష్ట్ర కార్యదర్శి గోవిందరాజన్‌, తిరుత్తణి మండల అధ్యక్షుడు ఏలుమలై, పళ్లిపట్టు పట్టణ అధ్యక్షుడు శివకుమార్‌ పాల్గొన్నారు.