విద్యుత్‌ కొలువులు 1,201

సాక్షి, హైదరాబాద్‌: దక్షిణ తెలంగాణ విద్యుత్‌ పంపిణీ సంస్థ(టీఎస్‌ఎస్పీడీసీఎల్‌)లో 1000 జూనియర్‌ లైన్‌మెన్‌ (జేఎల్‌ఎం), 201 సబ్‌ ఇంజనీర్‌(ఎలక్ట్రి కల్‌) పోస్టుల భర్తీకి నోటిఫికేషన్‌ విడుదలైంది. జిల్లా (విద్యుత్‌ సర్కిల్‌) పోస్టులుగా భర్తీ చేయనున్నారు. కొత్త జోనల్‌ విధానం ప్రకారం దక్షిణ తెలంగాణలోని 5 ఉమ్మడి జిల్లాల అభ్యర్థులకు 95% ఉద్యోగాలను రిజర్వ్‌ చేశారు. 

► జేఎల్‌ఎం అభ్యర్థుల వయోపరిమితి 2022, జనవరి 1 నాటికి 18–35 ఏళ్లు కలిగి ఉండాలి. ఎస్సీ, ఎస్టీ, బీసీ, ఈడబ్ల్యూఎస్‌లకు మరో ఐదేళ్ల వయోపరిమితి సడలింపు వర్తించనుంది. గరిష్ట వయోపరిమితిని 10 ఏళ్లకు సడలిస్తూ రాష్ట్ర ప్రభుత్వం తీసుకున్న నిర్ణయం జేఎల్‌ఎం పోస్టులకు వర్తింపజేయలేదు. ట్రాన్స్‌కో/ టీఎస్‌ఎస్పీడీసీఎల్‌/ టీఎస్‌ఎన్పీడీసీఎల్‌ సంస్థల్లో ఆర్టిజన్లు, ఔట్‌ సోర్సింగ్‌ పద్ధతిలో పనిచేస్తున్న ఉద్యోగులకు ప్రత్యేక వయోసడలింపు కల్పించారు. వారు ఆయా సంస్థల్లో చేరినప్పుడున్న వయసును పరిగణనలోకి తీసుకోనున్నారు. ఎలక్ట్రికల్‌/వైర్‌మెన్‌ ట్రేడ్‌లో ఐటీఐ లేదా ఎలక్ట్రికల్‌ ట్రేడ్‌లో రెండేళ్ల ఇంటర్‌ వొకేషనల్‌ కోర్సులు పూర్తి చేసిన అభ్యర్థులు జేఎల్‌ఎం పోస్టులకు అర్హులు. అప్రెంటిస్‌ అవసరం లేదు.


► సబ్‌ ఇంజనీర్‌ అభ్యర్థులు 2022, జనవరి 1 నాటికి 18–44 ఏళ్లు వయోపరిమితి కలిగి ఉండాలి. ఎస్సీ, ఎస్టీ, బీసీ, ఈడబ్ల్యూఎస్‌ అభ్యర్థులకు ఐదేళ్లు, శారీరక వికలాంగులకు పదేళ్ల గరిష్ట వయోపరిమితి సడలింపు లభించనుంది. ఎలక్ట్రికల్‌/ ఎలక్ట్రికల్‌ అండ్‌ ఎలక్ట్రానిక్స్‌ ఇంజనీరింగ్‌లో డిప్లమో చేసిన వాళ్లు దరఖాస్తు చేసుకోవడానికి అర్హులు. డిప్లమా తర్వాత ఇవే విభాగాల్లో ఇంజనీరింగ్‌ డిగ్రీలు చేసిన వాళ్లు కూడా అర్హులే.