ఆస్తి కోసం తండ్రి తల పగులగొట్టిన కిరాతకుడు

జియాగూడ (హైదరాబాద్) : కన్న తండ్రి కంటే కాసులే అతడికి పరమార్థమయ్యాయి. తండ్రి పేరుతో ఉన్న ఇంటిని అమ్మాలని ఒత్తిడి తెచ్చాడు. కాదన్నందుకు తండ్రిపై కిరాతకంగా దాడి చేశాడు. హైదరాబాద్ జియాగూడ ప్రాంతంలో చోటుచేసుకున్న ఈ ఘటన వివరాల్లోకి వెళ్తే... కిషన్‌బాగ్‌లో నివాసం ఉండే అబ్దుల్ మన్నాన్(80)కు మెహదీపట్నంలో ఇల్లు ఉంది. దానిపై కుమారుడు అక్బర్(46) కన్ను పడింది. దాన్ని అమ్మాలంటూ కొంత కాలంగా అక్బర్ మన్నాన్పై ఒత్తిడి తెస్తున్నాడు. ఈ క్రమంలో శుక్రవారం రాత్రి మన్నాన్ జియాగూడలో ఉండే తన కూతురు ఇంట్లో ఓ కార్యక్రమానికి వచ్చాడు. దీనికి అక్బర్ కూడా రావడంతో ఇంటిని అమ్మే విషయంలో తండ్రీ కొడుకుల మధ్య వాదన జరిగింది. ఆవేశానికి గురైన అక్బర్ గొడ్డలి తీసుకుని తండ్రి తలపై వేటు వేశాడు. తీవ్ర గాయాలైన అతడ్ని ఉస్మానియా ఆస్పత్రికి తరలించారు.