ఢిల్లీ మహిళపై 23మంది దారుణం..

(ప్రతీకాత్మక చిత్రం)

సాక్షి,న్యూఢిల్లీ : బికనీర్‌లో దారుణం చోటుచేసుకుంది. తన ఫ్లాట్‌ను చూసేందుకు వెళ్లిన ఓ మహిళను కారులోకి ఈడ్చుకెళ్లి వివిధ ప్రాంతాల్లో తిప్పుతూ ఏకంగా 23మంది కొన్ని గంటలపాటు లైంగిక దాడికి పాల్పడ్డారు. ఈ ఘటనలో పోలీసులు ఇద్దరిని అరెస్టు చేసి విచారణ ప్రారంభించారు. బాధితురాలు పోలీసులకు తెలిపిన వివరాల ప్రకారం ఈ నెల(సెప్టెంబర్‌) 25న ఢిల్లీకి చెందిన ఆమె రాజస్థాన్‌ బికనీర్‌లోని రిద్‌మల్సార్‌ పురోహితన్‌ ప్రాంతానికి వెళ్లింది. అక్కడ తనకు సొంత ఫ్లాట్‌ ఉండటంతో తనిఖీ చేసేందుకు వెళ్లి తిరిగొచ్చే క్రమంలో ఖాటు శ్యామ్‌ మందిర్‌ అనే ఓ ఆలయం వద్ద వాహనం కోసం ఎదురుచూస్తోంది.

అదే సమయంలో అటుగా వచ్చిన ఓ ఎస్‌యూవీ వాహనంలో నుంచి కొంతమంది వచ్చి ఆమెను వాహనంలోకి ఈడ్చుకెళ్లారు. ఆ తర్వాత కొన్ని గుట్టలు ఉన్న ప్రాంతానికి తీసుకెళ్లి లైంగికదాడికి పాల్పడ్డారు. తొలుత ఇద్దరు ఆ తర్వాత ఆరుగురు ఈ వికృతచర్యకు దిగారు. అటుపిమ్మట ఓ ప్రభుత్వ పవర్‌ సబ్‌ స్టేషన్‌ వద్దకు తీసుకెళ్లగా అక్కడకు మరికొంతమంది వచ్చి మరోసారి లైంగికదాడికి దిగారు. ఇలా మొత్తం 23మంది ఈ దమన చర్యకు పాల్పడినట్లు బాధితురాలు పోలీసులతో వాపోయింది. వారిలో ఇద్దరు తిరిగి తనను 26న ఉదయం 4గంటల ప్రాంతంలో అంతకుముందు ఆమె వాహనం కోసం ఎదురుచూసిన చోటే దింపేసి వెళ్లారు. ప్రస్తుతం బాధితురాలు ఇద్దరిని గుర్తించగా మరో 21మందిని పట్టుకోవాల్సి ఉంది.