‘అలా చూపిస్తే అమ్మాయిలు రేప్‌ కోరుకున్నట్లే’

క్లాస్‌లో పాఠాలు బోధిస్తున్న టీచర్‌ (ప్రతీకాత్మక చిత్రం)

రాయ్‌పూర్‌ : కేంద్ర విద్యాలయంలో పాఠ్యాంశాలు బోధించే బయాలజీ టీచర్‌ ఒకరు వివాదాస్పద వ్యాఖ్యలు చేశారు. అందాన్ని చూపించే వస్త్రాలు ధరిస్తే తమపై లైంగిక దాడికి ఆహ్వానించినట్లేనంటూ సంచలన వ్యాఖ్యలు చేశారు. పొట్టి వస్త్రాలు వేసుకుంటే, అందాన్ని ప్రదర్శిస్తే నిర్భయలాంటి ఘటనలు జరుగుతాయని, ఇష్టం వచ్చినట్లు బయట తిరిగే వాళ్లకు నిర్భయకు పట్టిన గతే పడుతుందంటూ వ్యాఖ్యానించారు. ఈ సంచలన సూచనలతో భయపడిన విద్యార్థులు ఈ విషయాన్ని తమ తల్లిదండ్రులకు చెప్పడంతో వారంతా కలిసి ఆ టీచర్‌పై స్కూల్‌ ప్రిన్సిపాల్‌కు ఫిర్యాదు చేశారు. వివరాల్లోకి వెళితే..

రాయ్‌పూర్‌లోని ఓ కేంద్రీయ విద్యాలయంలో స్నేహలత శంఖ్వార్‌ అనే బయాలజీ టీచర్‌ తొమ్మిది, ఇంటర్‌ ఫస్టియర్‌ చదివే విద్యార్థులకు ఇచ్చే కౌన్సెలింగ్‌ సెషన్‌ నిర్వహించారు. ఈ క్రమంలో విద్యార్థినులకు ఆమె సలహాలు ఇస్తూ అమ్మాయిలు జీన్స్‌ వేసుకుంటే, లిప్‌స్టిక్‌ పెట్టుకుంటే ప్రమాదం అన్నారు. అలా చేసేవారిపై నిర్భయ దాడి ఘటనలు జరుగుతాయని, పరోక్షంగా వారే లైంగిక దాడికి ఆహ్వానించిన వాళ్లవుతారని అన్నారు.

‘అందమైన ముఖాలు లేనప్పుడు మాత్రమే అమ్మాయిలు తమ శరీరాన్ని బయటకు చూపించాలి. అమ్మాయిలు మరీ సిగ్గు లేకుండా తయారవుతున్నారు. తన భర్త కూడా కానీ ఒకబ్బాయితో నిర్భయ అంతరాత్రి వేళ ఎందుకు బయటకు వెళ్లాల్సి వచ్చింది? ఇలాంటివి ఎందుకు చేస్తారో అర్థం చేసుకోవడానికే కష్టంగా ఉంది. ఎజెన్సీ ప్రాంతాల్లోనే అలాంటి ఘటనలు తరుచుగా జరుగుతుంటాయి. రాత్రిపూట నిర్భయతల్లి ఆమెను బయటకు వెళ్లనీయొద్దు. నా ఉద్దేశంలో తప్పు నిర్భయదే.. అలా చేసే అమ్మాయిలదే.. అబ్బాయిల తప్పుకాదు.

ఇలాంటి సంఘటనలు ఒకవేళ అమ్మాయిలు ఎదుర్కొంటున్నారంటే అది వారు చేసిన పాపాలకు అనుభవించే శిక్ష తప్ప మరొకటి కాదు. ఏ అమ్మాయి తన శరీరాన్ని బయటకు చూపాలని ఆరాటపడుతుందో ఆ అమ్మాయిని ఒకబ్బాయి క్యారెక్టర్‌ లేని అమ్మాయనే అనుకుంటాడు’ అంటూ పలు సంచలన వ్యాఖ్యలు చేశారు. కాగా, పూర్తి వివరాలు తెలుసుకొని ఆ టీచర్‌పై చర్యలు తీసుకుంటామని పోలీస్‌ కమిషనర్‌ కూడా హామీ ఇచ్చారు.