అండర్సన్‌కు సింగిల్స్‌ టైటిల్‌ ... 

టాటా ఓపెన్‌లో పురుషుల సింగిల్స్‌ టైటిల్‌ను ప్రపంచ ఆరో ర్యాంకర్‌ కెవిన్‌ అండర్సన్‌ (దక్షిణాఫ్రికా) సాధించాడు. 100వ ర్యాంకర్‌ ఇవో కార్లోవిచ్‌ (క్రొయేషియా)తో 2 గంటల 44 నిమిషాలపాటు జరిగిన ఫైనల్లో అండర్సన్‌ 7–6 (7/4), 6–7 (2/7), 7–6 (7/5)తో గెలుపొందాడు. 6 అడుగుల 8 అంగుళాల ఎత్తు, 95 కేజీల బరువున్న అండర్సన్‌ మ్యాచ్‌లో 21 ఏస్‌లు... 6 అడుగుల 11 అంగుళాల ఎత్తు, 105 కేజీల బరువున్న కార్లోవిచ్‌ 36 ఏస్‌లు సంధించడం విశేషం. మ్యాచ్‌ మొత్తంలో ఒక్క బ్రేక్‌ పాయింట్‌ కూడా నమోదు కాకపోవడం విశేషం. చివరి సెట్‌ టైబ్రేక్‌లో 39 ఏళ్ల కార్లోవిచ్‌ 5–2తో ఆధిక్యంలో ఉన్నప్పటికీ... ఆ తర్వాత తడబడి వరుసగా ఐదు పాయింట్లు కోల్పోయి ఓటమి చవిచూశాడు. విజేత అండర్సన్‌కు 90,990 డాలర్ల (రూ. 63 లక్షల 29 వేలు) ప్రైజ్‌మనీ లభించింది.