నిశ్చితార్థం జరిగాక పెళ్లికి నో చెప్పాడు

వైరా (ఖమ్మం జిల్లా) : నిశ్చితార్థం చేసుకుని పెళ్లికి నిరాకరించినందుకు ఓ యువకుడిపై ఆదివారం వైరా పోలీసులు కేసు నమోదు చేశారు. కొణిజర్ల మండలం లక్ష్మీపురం గ్రామానికి చెందిన నరేష్ అనే యువకుడికి కొత్తగూడెం పట్టణానికి చెందిన ఓ యువతితో ఈ నెల 3న నిశ్చితార్థం జరిగింది. అయితే నిశ్చితార్థం జరిగిన మరుసటి రోజు నుంచి పెళ్లి ఇష్టం లేదని మొండికేశాడు.

కారణమేమిటని అడిగితే.. తాను వేరొక యువతిని ప్రేమించినట్లు తెలిపాడు. ఈ విషయం యువతి తల్లిదండ్రులకు తెలియజేయగా.. నిశ్చితార్థం జరిగిన తర్వాత ఎలా రద్దు చేసుకుంటారని వారు వైరా పోలీసుస్టేషన్‌లో ఫిర్యాదు చేశారు. పోలీసులు యువకుడితోపాటు మరో ఏడుగురిపై కేసు నమోదు చేసి దర్యాప్తు చేస్తున్నారు.