భార్యను చంపిన భర్త అరెస్టు

సాక్షి, శ్రీరాంపూర్‌(మంచిర్యాల) : భార్యను హత్య చేసిన కేసులో భర్తను శ్రీరాంపూర్‌ పోలీసులు అరెస్టు చేశారు. శనివారం పోలీస్‌స్టేషన్‌లో ఏర్పాటు చేసిన విలేకరుల సమావేశంలో ఏసీపీ సీతారాములు వివరాలు వెల్లడించారు. శ్రీరాంపూర్‌ గాంధీనగర్‌కు చెందిన సింగరేణి కార్మికు డు ఉగ్గ కొమురయ్య కూతురు శారదకు, ఆర్కే 6 కొత్తరోడ్‌కు చెందిన కాళీ పోశం కుమారుడు కాళీ మహేందర్‌తో 6 నెలల  క్రితం వివాహమైంది. ఈ దంపతులిద్దరు ఇక్కడి కటిక దుకాణాల వద్ద ఓ ఇంట్లో అద్దెకు ఉంటున్నారు. ఈ నెల 18న అర్ధరాత్రి తాగి ఇంటికి వచ్చిన మహేందర్‌ భార్యతో కట్నం విషయమై గొడవ పడ్డాడు.

ఈ క్రమంలో కోపోద్రిక్తుడైన మహేందర్‌ అక్కడున్న డంబెల్‌ను తీసి శారద మొఖంపై మోదడంతో తీవ్ర రక్తంస్రావం జరిగి ఆమె అక్కడిక్కడే మృతి చెందింది. ఈ మేరకు కేసు నమోదు చేసిన పోలీసులు శనివారం తన ఇంటికి సమీపంలో తిరుగుతుండగా అరెస్ట్‌ చేశారు. హత్యకు ఉపయోగించిన డంబెల్‌ను స్వాధీన పరుచుకున్నారు. నిందితున్ని ఘటన స్థలం వద్దకు తీసుకెళ్లగా ఎలా హత్య చేశాడో పోలీసులకు వివరించారు. ఈ కేసులో ప్రధాన నిందితుడిగా మహేందర్‌తోపాటు కట్నం కోసం వేధించిన కేసులో అతని తల్లిదండ్రులు కాళీ మల్లక్క, పోశం, అతని బావ పెగిడి బాపుపై కూడా కేసు నమోదు చేసి అరెస్టు చూపించారు.. సమావేశంలో సీఐ ప్రవీణ్‌నాయక్, ఎస్సై రవిప్రసాద్‌ పాల్గొన్నారు.