TV
మాదిగలది న్యాయమైన డిమాండ్: కేశవరావు
సాక్షి, న్యూఢిల్లీ: వర్గీకరణ కోసం మాదిగలు 23 ఏళ్లుగా పోరాటం చేస్తున్నారని, వారిది న్యాయమైన డిమాండ్ అని టీఆర్‌ఎస్ పార్ల మెంటరీ పార్టీ నేత కె.కేశవరావు పేర్కొన్నారు. 2 రోజులుగా ఢిల్లీలోని జంతర్‌మంతర్‌లో తెలంగాణ మాదిగ జేఏసీ ఆధ్వర్యంలో జరుగుతున్న ధర్నాకు మంగళవారం ఆయన హాజరై సంఘీభావం ప్రకటించారు.
తెలంగాణ మాదిగ జేఏసీ చైర్మన్, తెలంగాణ ఎస్సీ కార్పొరేషన్ చైర్మన్ డాక్టర్ పిడమర్తి రవి అధ్యక్షతన ధర్నా కార్యక్రమం జరిగింది. ఈ ధర్నాలో రవి మాట్లాడుతూ.. బీజేపీపై ఒత్తిడి తెచ్చి వర్గీకరణకు కృషి చేస్తామన్నారు. ధర్నాకు సంఘీభావం తెలిపిన ఎంపీల బృందంలో జి.నగేశ్, బీబీ పాటిల్ తదితరులు ఉన్నారు.
