నారాయణపురం (ఉంగుటూరు) : జిల్లా ఒలింపిక్‌ అసోసియేషన్‌ ఎన్నిక ఏప్రిల్‌ 4న నిర్వహించనున్నట్టు అసోసియేషన్‌ తాత్కాలిక అధ్యక్షుడు బడేటి వెంకట్రామయ్య తెలిపారు. బుధవారం స్థానిక సమతా గేమ్స్‌ అండ్‌ స్పోర్ట్స్‌లో అసోసియేషన్‌ అడ్‌హాక్‌ కమిటీ సమావేశం నిర్వహించారు. ఈ సందర్భంగా వెంకట్రామయ్య మాట్లాడుతూ రాష్ట్ర ఒలింపిక్‌ అసోసియేషన్‌ పరిశీలకులు సమక్షంలో ఎన్నిక నిర్వహించనున్నట్టు చెప్పారు. జిల్లా క్రీడా సంఘాలన్నీ గుర్తింపు పత్రాలను మార్చి 10వ తేదీలోపు అడ్‌హాక్‌ కమిటీ కన్వీనర్‌ ఆదిరెడ్డి సత్యనారాయణకు అందజేసి నమోదు చేయించుకోవాలన్నారు. 
 అడ్‌హాక్‌ కమిటీ ఎన్నిక ..ఈ సందర్భంగా జిల్లా ఒలింపిక్‌ అసోసియేషన్‌ అడ్‌హాక్‌ కమిటీని ఎన్నుకున్నారు. అధ్యక్షుడిగా బడేటి వెంకట్రామయ్య, కన్వీనర్‌గా ఆదిరెడ్డి సత్యనారాయణ, సభ్యులుగా వి.శ్రీనివాసరాజు, డి.నారాయణరాజు, పీఎస్‌ సుధాకర్‌ ఎన్నికయ్యారు. 


 ఏలూరు రూరల్‌ :  జిల్లాలోని పట్టణ, గ్రామీణ ప్రాంతాల్లో ఉన్న క్రీడాకారుల్లో ప్రతిభ వెలికితీసి శిక్షణ ఇవ్వాలని జిల్లా ఒలింపిక్‌ అసోసియేషన్‌ సభ్యులు కోరారు. జిల్లా క్రీడాప్రాధికార సంస్థ అధికారి ఎస్‌ఏ అజీజ్‌ ఆధ్వర్యంలో శుక్రవారం ఏలూరు ఇండోర్‌ స్టేడియంలో జిల్లా ఒలింపిక్‌ అసోసియేషన్‌ సమావేశం నిర్వహించారు. ముఖ్య అతిధిగా విచ్చేసిన అసోసియేషన్‌ చైర్మన్‌ బడేటి వెంకట్రామయ్య మాట్లాడుతూ వివిధ పోటీలకు వెళ్లే క్రీడాకారులకు టీఏ, డీఏ చెల్లించాలని సూచించారు. జిల్లాలో క్రీడల అభివృద్ధి, మౌళిక వసతులు కల్పనపై త్వరలో కలెక్టర్‌ సమక్షంలో వివిధ క్రీడా సంఘాల ప్రతినిధుల విస్తృత స్థాయి సమావేశం నిర్వహించాలని సభ్యులు కోరారు. పలువురు సభ్యులు పాల్గొన్నారు.