సాక్షి, అమరావతి: ‘మార్గదర్శి తోడుంటే ఆనందం మీవెంటే.. ఇళ్లు, కార్లు, ఫర్నీచర్, నగలు అన్నీ కొనుక్కోవచ్చు..’ ఇదీ టీవీ చానళ్లలో, హోర్డింగుల్లో మార్గదర్శి చిట్‌ ఫండ్స్‌ ఊదరగొట్టే ప్రచారం. అది నిజమేనని నమ్మి మార్గదర్శి చిట్‌ఫండ్స్‌లో చేరిన చందాదారుల ఇళ్లల్లో ఆనందం ఆవిరవుతోందన్నది పచ్చి నిజం. కొత్త ఇళ్లు, కార్లు కొనుక్కోవడం దేవుడెరుగు.. ఉన్న ఇళ్లు, భూములు, బంగారం అమ్ముకుంటున్నా అప్పుల ఊబి నుంచి బయట పడటం లేదు. అందమైన కలలు చూపిస్తూ రామోజీరావు సామాన్యుల మెడకు చిట్టీల ఉచ్చు బిగిస్తున్నారు. ఒక చిట్టీ అప్పు తీర్చడం పేరిట మరో చిట్టీలో చేర్పిస్తూ అప్పుల ఊబిలో కూరుకుపోయేలా చేస్తున్నారు. ఆస్తులు తెగనమ్ముకున్నా అప్పులు తీరవు.. సరికదా కాల్‌మనీ రాకెట్‌ను తలపిస్తూ మార్గదర్శి సిబ్బంది వేధింపులతో చందాదారుల కుటుంబాలు మానసిక క్షోభ అనుభవిస్తుండటం రామోజీ ఆర్థిక అరచాకాలకు నిదర్శనం. విజయవాడకు చెందిన ఓ ప్రభుత్వ వెటర్నరీ డాక్టర్‌ కుటుంబానికి ఇలాంటి క్షేభే మిగిలింది. ఈ వెటర్నరీ వైద్యుడి కుటుంబ సభ్యులు కోళ్ల ఫారం నిర్వహిస్తున్నారు. ఆయన భార్య మార్గదర్శి చిట్‌ ఫండ్స్‌లో ఒక గ్రూపులో చందాదారుగా చేరారు. ఆ తర్వాత ఆమెకు తెలియకుండానే మరికొన్ని చిట్టీ గ్రూపుల్లో సభ్యురాలిగా చేర్చారు. ఆ చిట్టీ గ్రూపుల చందాలు చెల్లించడం కోసమంటూ మరికొన్ని చిట్టీ గ్రూపుల్లో చేర్పిస్తూ ఏకంగా 90 చిట్టీ గ్రూపుల్లో సభ్యురాలిగా చూపించారు. నిబంధనల ప్రకారం ఇచ్చిన ష్యూరిటీలను కూడా గుర్తించకుండా ఏకంగా 17 చిట్టీ గ్రూపుల్లో డిఫాల్టర్‌గా చూపించారు. అనంతరం ఆ కుటుంబం ఆస్తులను గుంజుకున్నారు. ఆ వెటర్నరీ వైద్యుడు జీపీఎఫ్‌ డబ్బులు రూ.35 లక్షలతోపాటు పిల్లల పెళ్లి కోసం దాచుకున్న బంగారం కూడా అమ్మి చెల్లించినా ఇంకా అప్పులు తీరనే లేదు. కాల్‌మనీ రాకెట్‌ గుండాల మాదిరిగా మార్గదర్శి చిట్‌ఫండ్స్‌ సిబ్బంది వచ్చి అల్లరి చేసి మరీ వారి ఇంటిని వేలం వేయించారు. అంతటితో రామోజీ ఆగడాలు ఆగలేదు. విదేశాల్లో చదువుతున్న ఆ వెటర్నరీ డాక్టర్‌ కుమార్తె సంతకాన్ని కూడా ఫోర్జరీ చేసి చందాదారుగా చేర్చారు. ఆమె చిట్టీ పాట పాడినట్టు చూపించారు. రూ.9 లక్షల నష్టానికి చిట్టీ పాట పాడినట్టు చూపించి బకాయిలు మినహాయించుకుని కేవలం రూ.210 మాత్రమే ఇస్తామని రికార్డుల్లో సర్దుబాటు చేశారు. ఆ చిట్టీ గ్రూపునకు సంబంధించి వాయిదాల బకాయిలు చెల్లించాలని మళ్లీ వేధింపులు మొదలు పెట్టారు. అసలు ఈ దేశంలోనే లేని మా కుమార్తె ఎలా చందాదారుగా చేరింది.. ఎలా వేలం పాటలో పాల్గొంది.. అసలు తను వచ్చి ఎప్పుడు సంతకం చేసింది.. ఈ ప్రశ్నలన్నింటికీ సమాధానమే లేదు. ఆమె పేరుతో మార్గదర్శి చిట్‌ ఫండ్స్‌ ఉద్యోగులే మోసం చేశారు.  తలలు అమ్ముకున్నా తీరని అప్పులు జాతీయ బ్యాంకులుగానీ ప్రైవేటు బ్యాంకులుగానీ తమ ఖాతాదారుల ఆర్థిక పరిస్థితిని సహేతుకంగా అంచనా వేసి తదనుగుణంగా రుణాలు ఇస్తాయి. రుణాలు చెల్లించే స్థోమతను బట్టి ఒక పరిమితి విధిస్తాయి. దేశంలో ఏ ఆర్థిక సంస్థ అయినా ఈ నిబంధనను పాటించాలి. కానీ మార్గదర్శి చిట్‌ఫండ్స్‌ మాత్రం అవేవీ పట్టించుకోదు. చిరు వ్యాపారులు, చేతి వృత్తుల వారికి కూడా వారి ఆదాయం, ఆర్థిక స్థోమతను మించి ఎన్నో చిట్టీ గ్రూపుల్లో సభ్యులుగా చేర్పిస్తోంది. దాంతో వాయిదాలు చెల్లించలేక వారు అప్పుల ఊబిలో కూరుకుపోయి తమకున్న కొద్దిపాటి ఆస్తులను తమకు ధారాదత్తం చేసే పరిస్థితిని సృష్టిస్తున్నారు. అందుకు విజయవాడకు చెందిన ఓ టాక్సీ డ్రైవర్‌ దీనగాధే తార్కాణం. ఇతను మార్గదర్శి చిట్‌ఫండ్స్‌లో రూ.2 లక్షల చిట్టీ గ్రూపులో సభ్యునిగా చేరారు. తర్వాత మరిన్ని చిట్టీ గ్రూపుల్లో చేరితే ఆర్థికంగా కలసి వస్తుందని చెప్పడంతో మరో రెండు గ్రూపుల్లో సభ్యుడిగా చేరాడు. తర్వాత ఆయనకు తెలియకుండానే ఏకంగా 20 గ్రూపుల్లో సభ్యునిగా చేర్పించేశారు. నెలకు రూ.50 వేలు వాయిదాల కిందే చెల్లించాల్సిన పరిస్థితి సృష్టించారు. చిట్టీ పాట పాడిన తర్వాత ప్రైజ్‌మనీ తీసుకునేందుకు ఆయన ఇచ్చిన ష్యూరిటీలను మార్గదర్శి చిట్‌ఫండ్స్‌ ఉద్దేశ పూర్వకంగానే కొర్రీలు వేసి తిరస్కరించింది. వాయిదాల బకాయిలు చెల్లించేందుకు తమకున్న ఇల్లు అమ్ముకోవాల్సిన పరిస్థితి సృష్టించారు. అసలు ఓ టాక్సీ డ్రైవర్‌ నెలకు రూ.50 వేలు చిట్టీ వాయిదాలు ఎలా చెల్లించగలరని మార్గదర్శి చిట్‌ఫండ్స్‌ విచక్షణతో యోచించి ఉంటే ఆయనకు అంతటి దుస్థితి ఏర్పడేది కాదు. కానీ రామోజీ లక్ష్యం ఆయనకు ఉన్న ఒక్క ఇంటిని గుంజుకోవడమే.  బరితెగించి రామోజీ ఆర్థిక ఆగడాలు  మార్గదర్శి చిట్‌ఫండ్స్‌ చందాదారుల్లో అత్యధికులది ఇలాంటి దుస్థితే. రాజకీయంగా ఎలాంటి అండాదండా లేని వారు, ప్రభుత్వ ఉద్యోగులు, చిరు వ్యాపారులు, ఇతర మధ్య తరగతి వర్గాలను లక్ష్యంగా చేసుకుని రామోజీరావు పక్కాగా తన కుట్రను అమలు చేస్తూ వారి ఆస్తులను కొల్లగొడుతున్నారు. అటువంటి చందాదారుల్లో చిట్టీల చందాలు చెల్లింపులో ఇబ్బంది పడుతున్న వారిని గుర్తించి, వారిని మరికొన్ని చిట్టీ గ్రూపుల్లో సభ్యులుగా చేర్పిస్తున్నారు. కొత్త చిట్టీ గ్రూపులో ప్రైజ్‌ మనీతో పాత చిట్టీ గ్రూపు వాయిదాలు చెల్లించవచ్చని ఆశ చూపిస్తున్నారు. మళ్లీ కొత్త చిట్టీ దగ్గరకు వచ్చేసరికి ష్యూరిటీల పేరుతోనో మరో రకంగానో కొర్రీలు వేసి మరిన్ని చిట్టీ గ్రూపుల్లో చేర్పిస్తున్నారు. చాలా మంది చందాదారులకు తెలియకుండానే వారి పేరిట మార్గదర్శి చిట్‌ఫండ్స్‌ మేనేజర్లు చిట్టీ పాటలు పాడేస్తున్నారు. ఆ ప్రైజ్‌మనీని మరో చిట్టీ గ్రూపులో సర్దుబాటు చేసినట్టు రికార్డుల్లో చూపిస్తున్నారు. అలా చందాదారులు తమకు తెలియకుండానే లెక్కకు మించి చిట్టీ గ్రూపుల్లో సభ్యులుగా చేరి అప్పుల ఊబిలో కూరుకుపోతున్నారు. ఇక అప్పులు తీర్చడం వారి తరం కాదని నిర్ధారించుకున్న తర్వాత వారి ఇళ్లపై మార్గదర్శి చిట్‌ఫండ్స్‌ ఉద్యోగులు దాడులు చేస్తున్నారు. వారిని వేధిస్తూ.. సామాజిక గౌరవానికి భంగం కలిగిస్తూ మానసిక క్షోభకు గురి చేస్తున్నారు. దాంతో తమ ఆస్తులను మార్గదర్శి చిట్‌ఫండ్స్‌ పరం చేసి కట్టుబట్టలతో బయటకు వెళ్లిపోవాల్సిన అనివార్యత సృష్టిస్తున్నారు. కొందరి నుంచి ఆస్తి పత్రాలు, ఎల్‌ఐసీ బాండ్లు తీసుకుని మరీ డబ్బులు ఇవ్వకుండా వేధిస్తున్నారు. మరికొందరిని.. చిట్టీలు పాడినా పాట మొత్తం (ప్రైజ్‌మనీ) ఇచ్చేందుకు నెలల తరబడి తిప్పుతున్నారు. ఇంకొందరి సంతకాలను ఫోర్జరీ చేసి మరొకరికి ష్యూరిటీలో చూపిస్తూ చిట్టీ మొత్తం ఇవ్వకుండా వేధిస్తున్నారు. చిట్టీ వాయిదా ఒక్క రోజు ఆలస్యమైనా రూ.500 జరిమానా వసూలు చేస్తున్న మార్గదర్శి చిట్‌ఫండ్స్‌.. తాము చెల్లించాల్సిన చిట్టీ పాట మొత్తాన్ని మాత్రం నెలల తరబడి జాప్యం చేస్తున్నా సరే ఒక్క రూపాయి వడ్డీ చెల్లించడం లేదు. ఇలా ఒకరు కాదు ఇద్దరు కాదు.. వేలాది మంది మార్గదర్శి చిట్‌ఫండ్స్‌ చందాదారులు గగ్గోలు పెడుతున్నారు. మార్గదర్శి చిట్‌ఫండ్స్‌లో 50 శాతం వరకు ఇటువంటి బాధితులే ఉండటం రామోజీ మోసాల తీవ్రతకు నిదర్శనంగా నిలుస్తోంది.  యథేచ్ఛగా చట్టం ఉల్లఘన ► ఎవరైనా ఓ చందాదారుడు చిట్టీ పాట పాడిన తర్వాత తగిన ష్యూరిటీలు చూపించకపోతే... ఆ చిట్టీ పాటను రద్దు చేయాలి. ఆ చిట్టీ గ్రూపునకు మళ్లీ పాట(వేలం) నిర్వహించాలి. కానీ మార్గదర్శి చిట్‌ఫండ్స్‌ ఆ నిబంధనను పాటించడం లేదు. ఆ చిట్టీ పాటను రద్దు చేయడం లేదు. కొత్తగా పాటను నిర్వహించడమూ లేదు. ఆ చిట్టీ పాట సక్రమంగా నిర్వహించినట్టు చూపిస్తూ ఆ ప్రైజ్‌మనీని వేరే ఖాతాల్లోకి మళ్లించేస్తోంది. ఆ చిట్టీ గ్రూపును యథావిథిగా కొనసాగిస్తోంది. దాంతో ఆ డిఫాల్టర్‌ చందాదారుడు తర్వాత నెలల వాయిదాలు కూడా చెల్లించాల్సినట్టు చూపిస్తూ అప్పుల ఊబిలోకి కురుకుపోయేలా చేస్తోంది.  ► వాయిదాలు చెల్లించలేని చందాదారుడిని డిఫాల్టర్‌గా చూపించాలి. అంతవరకు ఆ చందాదారు చెల్లించిన మొత్తాన్ని ప్రత్యేక ఖాతాలో వేసి కమీషన్‌ పోగా వెనక్కి ఇచ్చేయాలి. కానీ మార్గదర్శి చిట్‌ఫండ్స్‌ అలా చేయడం లేదు. ఆ డిఫాల్టర్‌ చందాదారు మొత్తాన్ని మరో చిట్టీ బకాయి కింద జమ చేసినట్టు చూపిస్తూ.. ఇంకా బకాయిలు చెల్లించాలని రికార్డుల్లో ఆ చందాదరుని రుణగ్రస్తునిగా చూపిస్తోంది.  ► ఎవరైనా ప్రైజ్‌మనీ తీసుకోని చందాదారు వాయిదాలు చెల్లించలేకపోతే డిఫాల్టర్‌గా ప్రకటించాలి. ఆ చందాదారునికి 14 రోజుల నోటీసు ఇచ్చి డిఫాల్టర్‌గా ప్రకటించినప్పటి వరకు చెల్లించిన వాయిదాలను ప్రత్యేక బ్యాంకు ఖాతాలో జమ చేయాలి. ఆ తర్వాత ఏడు రోజుల్లో ఆ మొత్తాన్ని నిర్దేశిత వడ్డీ రేటుతో కలిపి చెల్లించాలి. కానీ మార్గదర్శి చిట్‌ఫండ్స్‌ ఈ నిబంధనను పాటించడం లేదు. అటువంటి చందాదారులను ఉద్దేశ పూర్వకంగా డిఫాల్టర్లుగా ప్రకటించకుండా కొనసాగిస్తూ వారు మరింతగా అప్పుల ఊబిలో కూరుకుపోయేలా చేస్తోంది.  ► చిట్‌ఫండ్‌ చట్టం ప్రకారం ప్రతి చిట్టీ గ్రూపు దేనికదే ప్రత్యేకం. ప్రతి చిట్టీ గ్రూపు ఒక ప్రత్యేక కంపెనీ వంటిది. ఒక చిట్టీ గ్రూపు చందాదారుగా చెల్లించిన మొత్తాన్ని మరో చిట్టీ గ్రూపులో సర్దుబాటు చేసినట్టు చూపించకూడదు. ఈ నిబంధనను మార్గదర్శి చిట్‌ఫండ్స్‌ ఉల్లంఘిస్తూ చందాదారులను ఎన్నో చిట్టీ గ్రూపుల్లో సభ్యునిగా చూపిస్తూ... అన్ని చిట్టీ గ్రూపుల మొత్తాన్ని ఒకదానికి ఒకటి అనుసంధినిస్తూ చందాదారులను ఉద్దేశ పూర్వకంగా అప్పుల ఊబిలో కూరుకుపోయేలా చేస్తోంది.  బాధితులకు అండగా చట్టం, ప్రభుత్వం చిట్‌ఫండ్‌ కంపెనీల మోసాలు, ఆగడాల నుంచి బాధితులకు రక్షణ కల్పించి న్యాయం చేసేందుకు కేంద్ర చిట్‌ఫండ్స్‌ చట్టం సరైన వ్యవస్థను ఏర్పాటు చేసింది. చిట్టీ గ్రూపుల డిఫాల్టర్‌ సభ్యుల విషయంలో అనుసరించాలిన నిబంధనలను కేంద్ర చిట్‌ఫండ్‌ చట్టంలోని సెక్షన్‌ 22లో విస్పష్టంగా పేర్కొంది. అయితే దశబ్దాలుగా ప్రభుత్వాలు పట్టించుకోని ఆ చట్టాన్ని వైఎస్సార్‌సీపీ పటిష్టంగా అమలు చేస్తోంది. చిట్‌ రిజిస్ట్రార్‌లతోపాటు ప్రభుత్వం వరకు వివిధ స్థాయిల్లో అప్పీలు చేసుకునే అవకాశాన్ని సద్వినియోగం చేసుకుంటే మార్గదర్శి అక్రమాలు, వేధింపులకు చెక్‌ పెట్టవచ్చని నిపుణులు సూచిస్తున్నారు. మార్గదర్శి చిట్‌ఫండ్స్‌తోపాటు ఇతర చిట్‌ఫండ్‌ కంపెనీల బాధితులు తమ సమస్యను తెలియజేసి న్యాయం పొందేందుకు ప్రత్యేక వ్యవస్థే ఉంది. కేంద్ర చిట్‌ఫండ్‌ చట్టంలోని సెక్షన్‌ 64 నుంచి 68 వరకు జిల్లా అసిస్టెంట్‌ చిట్‌ రిజిస్ట్రార్‌కు విస్తృత అధికారాలున్నాయి. ఆయనకు జ్యుడీషియరీ అధికారాలను చట్టం కల్పించింది. చందాదారులు తమకు చిట్‌ఫండ్‌ కంపెనీ మోసం చేసిందీ.. వేధిస్తోంది.. అని భావిస్తే తగిన ఆధారాలతో జిల్లా అసిస్టెంట్‌ చిట్‌ రిజిస్ట్రార్‌కు ఫిర్యాదు చేయవచ్చు. తాము సరైన ష్యూరిటీలు సమర్పించినా ఆమోదించడం లేదని, తమను డిఫాల్టర్‌గా ప్రకటించి అప్పటి వరకు చెల్లించిన వాయిదాలను వెనక్కి ఇవ్వాలని.. తమ సమ్మతి లేకుండానే ఎన్నో చిట్టీ గ్రూపుల్లో సభ్యులుగా చేర్పించారని... తమ సంతకాలను ఫోర్జరీ చేశారని.. ఇలా ఎటువంటి సమస్యలపైన అయినా ఫిర్యాదు చేయవచ్చు. దానిపై జిల్లా అసిస్టెంట్‌ రిజిస్ట్రార్‌ విచారించి తగిన చర్యలు తీసుకుంటారు. ఆమేరకు ఆదేశాలు జారీ చేస్తారు. జిల్లా అసిస్టెంట్‌ చిట్‌ రిజిస్ట్రార్‌ ఇచ్చిన ఆదేశాలతో సంతృప్తి చెందకపోతే బాధితులు రాష్ట్ర స్థాయిలో కూడా ఫిర్యాదు చేసేందుకు అవకాశం కల్పించారు. చిట్‌ఫండ్‌ చట్టంలోని సెక్షన్లు 69, 70 ప్రకారం రాష్ట్ర చిట్స్‌ రిజిస్ట్రార్‌కు ఫిర్యాదు చేయవచ్చు. అసిస్టెంట్‌ రిజిస్ట్రార్‌ ఆదేశాలు ఇచ్చిన రెండు నెలల్లో రాష్ట్ర ప్రభుత్వానికి అప్పీల్‌ చేసి తగిన న్యాయం పొందవచ్చు.   

సాక్షి, హైదరాబాద్‌: ఆర్థిక అవసరాలను ఆసరాగా చేసుకొని వేధింపులకు, ఆర్థిక మోసాలకు పాల్పడే ఫేక్‌ లోన్‌యాప్‌ల విషయంలో జాగ్రత్తగా ఉండాలని సైబర్‌ భద్రత నిపుణులు హెచ్చరిస్తున్నా­రు. కొన్ని ఆన్‌లైన్‌ రుణ యాప్‌లు ప్రముఖ కంపెనీల పేర్లను సైతం వాడుకొని ఆన్‌లైన్‌లో ప్రకటన­లు ఇస్తున్నా­యని వారు పేర్కొన్నారు. రూపీ ప్రో అనే ఆన్‌లైన్‌ రుణ యాప్‌ బజాజ్‌ ఫైనాన్స్‌ పేరును వినియోగించినట్లు కేంద్ర హోంశాఖ ఇప్పటికే గుర్తించింది. ఫేక్‌ యాప్‌ల వివరాలను ఎక్స్‌ (ట్విట్టర్‌) ద్వారా వెల్లడిస్తోంది. చైనా సహా శత్రుదేశాల నుంచి కొన్ని సంస్థలు ఆన్‌లైన్‌ రుణ యాప్‌లను నిర్వహిస్తున్నట్లు అధికారులు పేర్కొంటున్నారు. వాటి సర్వర్లు ఆయా దేశాల్లో ఉంటున్నందున బాధితులు మోసపోయినప్పుడు కేసుల దర్యాప్తు సైతం కష్టసాధ్యమని వారు పేర్కొంటున్నారు. ఆన్‌లైన్‌లో రుణం తీసుకొనే ముందు యాప్‌ల వివరాలు క్షుణ్ణంగా తెలుసుకోవాలని సూచిస్తున్నారు.  ఫేక్‌ రుణ యాప్‌ల బారిన పడకుండా ఈ జాగ్రత్తలు తప్పనిసరి...  ♦ వెరిఫై చేయని ఆన్‌లైన్‌ రుణ యాప్‌లనుప్లే స్టోర్‌ నుంచి డౌన్‌లోడ్‌ చేసుకోవద్దు.   ♦ ఆర్బీఐ రిజిస్టర్డ్‌ బ్యాంకులు లేదా నాన్‌ బ్యాంకింగ్‌ ఫైనాన్షియల్‌ కంపెనీలతో అఫిలియేషన్‌ లేకపోయినా అది మోసపూరిత ఆన్‌లైన్‌ లోన్‌ యాప్‌గా గుర్తించాలి.  ♦ తక్కువ మంది యూజర్లు, ప్రతికూల రేటింగ్స్‌ ఉన్న యాప్‌ల జోలికి వెళ్లవద్దు.  ♦  రుణం ఇచ్చేందుకు నిబంధనలేమీ లేకుండా వెంటనే సొమ్ము ఖాతాలో జమ చేస్తామని పేర్కొనే యాప్‌లు నకిలీవేనని తెలుసుకోవాలి.   ♦ బ్యాక్‌గ్రౌండ్‌ వెరిఫికేషన్‌ లేకుండా, ఎలాంటి ధ్రువపత్రాలు లేకుండానే లోన్‌ ఇస్తామంటే అనుమానించాలి.   కేంద్ర హోంశాఖ గుర్తించిన నకిలీ రుణ యాప్‌లు -  ఐవొరి లెండ్స్, క్యాష్‌ పార్క్, ఆన్‌లైన్‌ రూపీ ప్రో, మొబాబా కాయిన్స్, ఫిన్‌కాష్, లోన్‌బడ్డీ. 

మహారాణిపేట (విశాఖ దక్షిణ): అవినీతి చక్రవర్తి చంద్రబాబునాయుడు అధికారంలో ఉన్నప్పుడు పాల్పడిన ఆర్థికనేరాలు ఒక ఆంగ్లపత్రిక ద్వారా బహిర్గతమయ్యాయని రాష్ట్ర పరిశ్రమలశాఖ మంత్రి గుడివాడ అమర్‌నాథ్‌ చెప్పారు. ఇవన్నీ తప్పని, తాను నిజాయితీపరుడినని ఈ కథనాలు రాసిన పత్రికపై కేసు వేయడానికి ముందుకొస్తారా? అని ప్రశ్నించారు. విశాఖపట్నంలో శుక్రవారం ఏర్పాటు చేసిన విలేకరుల సమావేశంలో ఆయన మాట్లాడుతూ లోకేశ్‌ తల్లిని తాము పల్లెత్తుమాట అనకపోయినా తమపై కేసులు పెట్టడానికి ముందుకొచ్చాడని, ఇప్పుడు తన తండ్రిపై వచ్చిన కథనాలు తప్పని ఆయా పత్రికలపై కేసులు వేయడానికి ముందుకొస్తాడా? లేక తన తండ్రికి తనకు సంబంధం లేదని వదిలేస్తాడా? అని నిలదీశారు. చంద్రబాబు అధికారంలో ఉన్నప్పుడు చేసిన ఆర్థికనేరాలన్నీ రుజువులతో సహా బహిర్గతమయ్యాయని చెప్పారు. చంద్రబాబు ముడుపుల వ్యవహారాలు పత్రికల్లో వచ్చాయని, వాటిని ఆయన ఖండించకపోవడాన్ని బట్టి చూస్తే అవన్నీ నిజమేనని స్పష్టమవుతోందని పేర్కొన్నారు. గతంలో తాను అసెంబ్లీలో ఇదే అంశంపై అన్ని ఆధారాలతో సుమారు 45 నిమిషాలు మాట్లాడానని గుర్తుచేశారు. చంద్రబాబు ఆస్తులపై దాడులు నిర్వహించినప్పుడు లెక్కల్లోలేని రూ.2 వేలకోట్లు దొరికినట్లు ఆదాయపన్ను శాఖ ఆధారాలతో సహా బహిర్గతం చేసిందని తెలిపారు. 2016 సంవత్సరానికి ముందు నుంచే చంద్రబాబు కాంట్రాక్టర్ల దగ్గర కిక్‌ బ్యాక్స్‌ తీసుకున్న చంద్రబాబు అమరావతి నిర్మా­ణాల్లో అవినీతి సొమ్మును డొల్ల కంపెనీలకు ఏ విధంగా బ­ద­లాయించాడో ఆయన పర్సనల్‌ సెక్ర­టరీ ద్వారా ఆ­దాయపన్ను అధికారులు తెలుసుకున్నారని చె­ప్పా­రు. అవినీతి అంటే ఏంటో తనకి తెలియదని, అవి­నీతి డబ్బు తాను ఎప్పుడూ చూడలేదని చెప్పుకొనే చంద్రబాబు పత్రికల్లో వచ్చిన కథనాలకు ఎందుకు జవాబు చెప్పలేకపోతున్నాడని ప్రశ్నించారు. చంద్రబాబు పూర్తిగా అవినీతి ఊబిలో కూరుకుపోయాడని, తన అవినీతి సామ్రాజ్యం కూలిపోతుందని తెలిసి ఢిల్లీ పెద్దల కాళ్లు పట్టుకుంటున్నాడ­ని చెప్పారు. చంద్రబాబు ఎంత ప్రయత్నించినా శేష జీవితంలో శిక్ష అనుభవించాల్సిందేనన్నారు. చంద్రబాబు ఈ జన్మలో చేసిన పాపాలకు శిక్ష ఈ జన్మలోనే అనుభవిస్తాడని పేర్కొన్నారు.  రెండెకరాల నుంచి లక్షల కోట్లకు ఎలా ఎదిగాడో చెప్పాలి  భవిష్యత్తుకి గ్యారెంటీ అంటూ కొత్త నినాదంతో ప్రజల ముందుకు వస్తున్న చంద్రబాబు గత ఎన్నికల సమయంలో ఇచ్చిన ఒక్క వాగ్దానమైనా నెరవేర్చడా? అని మంత్రి ప్రశ్నించారు. రైతులను, మహిళలను పూర్తిగా మోసం చేసిన చంద్రబాబును నమ్మవద్దని ప్రజల్ని కోరారు. చంద్రబాబు తన బుర్ర ఉపయోగించి ఒక కొత్త పథకాన్నైనా ప్రకటించగలిగాడా అని ప్రశ్నించారు. రెండెకరాల నుంచి లక్షల కోట్లకు ఎలా ఎదిగారో చంద్రబాబు చెప్పాలన్నారు. చంద్రబాబుకు రాజకీయాల్లోకి రాకముందు ఆస్తులు, ఇప్పుడున్న ఆస్తులు ప్రజలకు తెలుసని చెప్పారు. 

ముంబై:  సామాన్యులే కాదు, ప్రముఖులు సైతం ఆర్థిక నేరాల బారినపడుతున్నారు. ఇదే తరహాలో బాలీవుడ్‌ నటుడు వివేక్‌ ఒబెరాయ్‌ రూ.1.55 కోట్లు పోగొట్టుకున్నారు. ఈవెంట్, సినీ నిర్మాణ సంస్థలో పెట్టుబడులు పెట్టాలని, మంచి లాభాలు వస్తాయంటూ ఓ సినీ నిర్మాత, వివేక్‌ ఒబెరాయ్‌ ఇద్దరు వ్యాపార భాగస్వాములు నమ్మించారు. ఒబెరాయ్‌ రూ.1.55 కోట్లు పెట్టుబడిగా పెట్టారు. కానీ, ఆ సొమ్మును ముగ్గురు వ్యక్తులు సొంతానికి వాడుకున్నారు. ఈ మోసంపై  పోలీసులకు ఫిర్యాదు చేయగా ముగ్గురు నిందితులపై కేసు నమోదు చేశారు.  సదరు ఈవెంట్, సినీ నిర్మాణ సంస్థలో వివేక్‌ ఒబెరాయ్‌ భార్య కూడా భాగస్వామిగా ఉన్నారు.

గాందీనగర్‌: ఆర్థిక నేరాలు, మనీలాండరింగ్, క్రిప్టో కరెన్సీలతో సహా వివిధ అసెట్‌ క్లాస్‌ల గురించి సమాచారాన్ని పంచుకోవడం, ఆయా సవాళ్లను నిరోధించడం కోసం గ్లోబల్‌ ఆర్కిటెక్చర్‌ను మరింత బలోపేతం చేయాలని ఆర్థిక మంత్రి నిర్మలా సీతారామన్‌ పిలుపునిచ్చారు. ఇందుకు అనుగుణంగా చట్ట అమలు సామర్థ్యం పెరగాలని ఉద్ఘాటించారు.  పన్ను ఎగవేతలు, అవినీతి, అక్రమ ధనార్జన నిరోధంపై ఇక్కడ జరిగిన జీ20 అత్యున్నత స్థాయి సమావేశంలో ఆమె ప్రసంగించారు.  జీ20 ప్రెసిడెన్సీ కింద, ఓఈసీడీ సహకారంతో దక్షిణాసియా ప్రాంతంలో పన్ను, ఆర్థిక నేర పరిశోధనలో సామర్థ్యాన్ని పెంపొందించడంలో భారతదేశం ముందుందని సీతారామన్‌ అన్నారు.   కీలక భేటీలు.. ఇండోనేíÙయా ఆర్థిక మంత్రి శ్రీ ముల్యాని ఇంద్రావతి,  కెనడా డిప్యూటీ ప్రధాన మంత్రి, ఆర్థిక మంత్రి క్రిస్టియా ఫ్రీలాండ్‌లతో కూడా ఆమె ఈ సందర్భంగా సమావేశమై, ద్వైపాక్షిక ఆర్థిక, వాణిజ్య అంశాలపై చర్చించారు.  3వ జీ20 ఆర్థిక మంత్రులు, సెంట్రల్‌ బ్యాంక్‌ గవర్నర్ల సమావేశం సందర్భంగా ఆసియాన్‌ ఇన్‌ఫ్రాస్ట్రక్చర్‌ ఇన్వెస్ట్‌మెంట్‌ బ్యాంక్‌ (ఏఐఐబీ)ప్రెసిడెంట్‌ జిన్‌ లిక్వెన్‌ నేతృత్వంలోని ప్రతినిధి బృందంతో సమావేశం నిర్వహించారు. జీ20 ఆర్థిక మంత్రులు, సెంట్రల్‌ బ్యాంక్‌ గవర్నర్ల భేటీలో పాల్గొనడానికిగాను అమెరికా ఆర్థికమంత్రి జానెత్‌ యెల్లెన్, ప్రపంచ బ్యాంక్‌ ప్రెసిడెంట్‌ అజయ్‌ బంగా తదితరులు కూడా గాంధీనగర్‌కు విచ్చేశారు. ఈ సందర్భంగా వారు ఇరువురూ స్కూల్‌ ఆఫ్‌ ఎక్సలెన్స్‌ ఫెసిలిటీని సందర్శించారు.    పట్టణ మౌలిక రంగంపై పెట్టుబడులు కాగా, జీ20 ఇన్‌ఫ్రాస్ట్రక్చర్‌ ఇన్వెస్ట్‌మెంట్‌పై జరిగిన మరో కార్యక్రమంలో ఆమె మాట్లాడుతూ, పట్టణ ప్రాంతాల్లో మౌలిక రంగం అభివృద్ధికి ప్రైవేటు పె ట్టుబడులను ఆకర్షించడం అవసరమని పేర్కొన్నా రు. అభివృద్ధి చెందుతున్న పలుదేశాల్లో కఠిన ద్రవ్య విధానాలు అవలంభిస్తున్న నేపథ్యంలో పట్టణాభివృద్ధి కీలక సవాలుగా మారిందని కూడా అన్నారు. 

సాక్షి, న్యూఢిల్లీ: దేశంలో ఆర్థిక నేరాలు పెరిగిపోతున్న నేపథ్యంలో అవకతవకల సత్వర గుర్తింపునకు వీలుగా ఇతర ఏజెన్సీల డేటాతో సులభంగా యాక్సెస్‌ చేసుకునేలా ఎన్‌ఫోర్స్‌మెంట్‌ డైరెక్టరేట్‌(ఈడీ) ప్రత్యేక సాఫ్ట్‌వేర్‌ను సిద్ధంచేసుకుంది. సీబీఐ, నేషనల్‌ ఇంటెలిజెన్స్‌ గ్రిడ్‌ (ఎన్‌ఐజీ), ఫైనాన్షియల్‌ ఇంటెలిజెన్స్‌ యూనిట్‌ (ఎఫ్‌ఐయూ), కేంద్ర ప్రత్యక్ష పన్నుల బోర్డు(సీబీడీటీ)తో పాటు ఇతర ఏజెన్సీల వద్ద ఉన్న వివరాలను సరిపోల్చుకునే వ్యవస్థను సిద్ధంచేసుకుంది.  కోర్‌ ఈడీ ఆపరేషన్‌ సిస్టమ్‌ పేరుతో అభివృధ్ధి చేసిన ఈ సాఫ్ట్‌వేర్‌ ద్వారా నేర ఆరోపణలు ఎదుర్కొంటున్న వ్యక్తులు, వారి ఆర్థిక లావాదేవీలు, వారిపై నమోదైన కేసులు, అనుబంధ పత్రాలను ఆన్‌లైన్‌ ద్వారా పొందటం సులభం కానుంది. ఆర్థిక నేరాల పరిశోధనలో వేగాన్ని పెంచేందుకు, ఇతర ఏజెన్సీలతో సమన్వయం చేసుకునేందుకు ఇది దోహదపడనుంది. 

సాక్షి, హైదరాబాద్‌: ఆర్థిక నేరాలపై పోలీసు స్టేషన్‌ అధికారులకు(ఎస్‌హెచ్‌వో)లకు అవగాహన ఉండా లని రాష్ట్ర డీజీపీ పి.మహేందర్‌రెడ్డి స్పష్టం చేశారు. గతంలో ఆర్థిక నేరాలు అరుదుగా జరిగేవని, వాటిని సీసీఎస్‌ లేదా సీఐడీకి బదిలీ చేసేవాళ్లమని, మారిన పరిస్థితుల్లో ఆర్థిక నేరాలు అధికమైనందున వాటి దర్యాప్తు బాధ్యతను సంబంధిత పోలీసుస్టేషన్లకు అప్పగిస్తున్నట్లు చెప్పారు. గురువారం మాసబ్‌ట్యాంక్‌లోని పోలీసు ఆఫీ సర్స్‌ మెస్‌లో ప్రత్యేక రక్షణ దళం(ఎస్‌పీఎఫ్‌) డీజీ ఉమేష్‌ష్రాఫ్‌ రచించిన ‘ఎకనామిక్‌ అఫెన్సెస్‌–హ్యాండ్‌ బుక్‌ ఫర్‌ ఇన్వెస్టిగేషన్‌’ను డీజీపీ ఆవిష్కరించారు. అడిషనల్‌ డీజీ జితేందర్‌ అధ్యక్షతన జరిగిన ఈ కార్యకమ్రంలో డీజీపీ మాట్లాడుతూ..యువ పోలీస్‌ అధికారులకు మార్గ దర్శకంగా ఉండేందుకు సర్వీసులో ఉన్న ప్రతీ సీనియర్‌ పోలీస్‌ అధికారి తమ అనుభవాలతో రచనలు చేయాల్సిన అవసరం ఉందని అన్నారు. పెరుగుతున్న సాంకేతిక అభివృద్ధికి అనుగుణంగా నేరాల స్వభావాలలో మార్పులు కూడా వస్తున్నాయని పేర్కొన్నారు. దీనిలో భాగంగా, ఇటీవల కాలంలో ఆర్థిక పరమైన నేరాలు అధికమయ్యాయన్నారు. ఉమేష్‌ ష్రాఫ్‌ రచించిన పుస్తకాన్ని రాష్ట్రంలోని అన్ని పోలీస్‌ స్టేషన్లకు పంపిస్తామని, ఇది ఎంతో ఉపయుక్తంగా ఉంటుందని డీజీపీ తెలిపారు. మాజీగవర్నర్, రిటైర్డ్‌ డీజీ పి.ఎస్‌ రామ్మోహన్‌ రావు మాట్లాడుతూ, తాను క్షేత్ర స్థాయిలో పనిచేస్తున్నప్పుడు ఆర్థికపరమైన అవకతవకలు, నేరాలు సహకార సంఘాల నుంచే ప్రారంభమయ్యాయని గుర్తుచేశారు. ఉమేష్‌ ష్రాఫ్‌ రాసిన మరో పుస్తకం క్రిమినాలజీ అండ్‌ క్రైమ్‌ ప్రివెన్షన్‌ పరిచయ కార్యక్రమం జరిగింది. రిటైర్డ్‌ పోలీస్‌ అధికారులు ఎంవీ కృష్ణారావు, అరవింద్‌ రావు, సాంబశివరావు, ఉమేష్‌ కుమార్, రాజీవ్‌ త్రివేది, రత్నారెడ్డిలతోపాటు అడిషనల్‌ డీజీలు గోవింద్‌ సింగ్, అంజనీకుమార్, శివధర్‌రెడ్డి, రాజీవ్‌ రతన్, సంజయ్‌ జైన్, విజయ్‌ కుమర్, అభిలాష బిష్త్, నాగిరెడ్డి, కమలహాసన్‌ రెడ్డి హాజరయ్యారు.   

న్యూఢిల్లీ: 2021లో తెలంగాణలో క్రైం రేటు విపరీతంగా పెరిగింది. అంతేకాదు మహిళలపై దాడులు, చిన్నారులపై లైంగిక వేధింపులు సైతం భారీగా పెరిగాయి. సైబర్‌ నేరాల్లోనూ తెలంగాణ దేశంలోనే తొలిస్థానలో ఉందని జాతీయ నేర గణాంక సంస్థ వెల్లడించింది. ఈ మేరకు జాతీయ నేర గణాంక సంస్థ 2021 నివేదిక ప్రకటించింది. దీని ప్రకారం మానవ అక్రమ రవాణా, ఆహార కల్తీ కేసుల్లోనూ తెలంగాణ మళ్లీ టాప్‌గా నిలిచింది. ఇక రైతుల ఆత్మహత్యల్లో తెలంగాణ నాలుగో స్థానంలో ఉంది  2019లో 2,691 సైబర్‌ నేరాలు నమోదవ్వగా. .2020లో ఈసంఖ్య 5,024కు చేరింది. కాగా 2021లో సైబర్‌​ నేరాలు 200 శాతం పెరిగి ఏకంగా 10,303కు చేరాయి.  దేశ వ్యాప్తంగా 52, 430 సైబర్‌ నేరాల కేసులు వెలుగు చూస్తే అత్యధికంగా తెలంగాణలోనే 20 శాతం నమోదవుతున్నాయి. సైబర్‌ నేరాల్లో 8, 829 కేసులతో ఉత్తర ప్రదేశ్‌ రెండో స్థానంలో ఉంది. ఇక తెలంగాణలో  ఆర్థిక నేరాలు కూడా పెరిగిపోతున్నాయి. 2019లో 11, 465.. 2020లో 12.985..కేసులు నమోదయితే 2021లో ఏకంగా 20,759 కేసులు వచ్చాయి.  23, 757 ఆర్థిక నేరాల కేసులతో రాజస్థాన్‌ అగ్ర స్థానంలో ఉంది. వృద్ధులపై దాడుల్లో తెలంగాణ మూడు, రైతు ఆత్మహత్యల్లో తెలంగాణ నాలుగో స్థానంలో ఉంది. ఏటీఎం, ఆన్‌లైన్‌ బ్యాంకింగ్‌, ఓటీపీ, మార్ఫింగ్‌ మోసాలు, ఫేక్‌ ప్రొఫైల్‌ తయారీ తెలంగాణలో అధికమని ఎన్‌సీఆర్‌బీ నివేదికలో తేలింది.  చదవండి: హతవిధీ!..పదేళ్ల తర్వాత విధులకు..గుండెపోటుతో

న్యూఢిల్లీ: తీవ్ర ఆర్థిక నేరాలకు పాల్పడి విదేశాలకు పారిపోయిన నేరస్థులను రప్పించి చట్టం ముందు నిలబెట్టడం తమకు అత్యంత ప్రాధాన్యాంశమని ఇంగ్లండ్‌కు భారత్‌ స్పష్టం చేసింది. దీన్ని తాను అర్థం చేసుకున్నానని భారత పర్యటనలో ఉన్న ఆ దేశ ప్రధాని బోరిస్‌ జాన్సన్‌ చెప్పారు. భారత చట్టాలను తప్పించుకునేందుకు తమ న్యాయవ్యవస్థను వాడుకోవాలనుకునే నేరగాళ్లను ఎన్నటికీ స్వాగతించబోమని స్పష్టం చేశారు. ఆర్థిక నేరాలకు పాల్పడి ఇంగ్లండ్‌లో తలదాచుకుంటున్న విజయ్‌మాల్యా, నీరవ్‌ మోదీలను అప్పగించాలని చాలారోజులుగా భారత్‌ ఒత్తిడి తెస్తోంది. శుక్రవారం ప్రధాని మోదీతో చర్చల అనంతరం ఉమ్మడి మీడియా సమావేశంలో జాన్సన్‌ మాట్లాడారు. ఆర్థిక నేరగాళ్లను భారత్‌కు అప్పగించేందుకు బ్రిటన్‌ ప్రభుత్వం ఆదేశాలిచ్చిందని చెప్పారు. న్యాయపరమైన కారణాల వల్ల ఈ ప్రక్రియ క్లిష్టంగా మారిందని వివరించారు. మోదీ, జాన్సన్‌ చర్చల్లో ఆర్థిక నేరగాళ్ల అప్పగింత అంశం ప్రస్తావనకు వచ్చిందని విదేశాంగ కార్యదర్శి హర్షవర్ధన్‌ ష్రింగ్లా చెప్పారు. ఈ విషయంలో భారత్‌ వైఖరిని జాన్సన్‌కు మోదీ వివరించారని చెప్పారు. దీనిపై జాన్సన్‌ సానుకూలంగా స్పందించినట్లు తెలిపారు. ఉగ్ర మూకలను సహించం ఇంగ్లండ్‌ వేదికగా ఇతర దేశాలను లక్ష్యంగా చేసుకునే ఉగ్ర మూకలను సహించబోమని బోరిస్‌ హెచ్చరించారు. బ్రిటన్‌లో ఖలిస్తాన్‌ మద్దతుదారులు ఇండియా వ్యతిరేక కార్యకలాపాలకు పాల్పడుతున్న విషయం ప్రధానుల చర్చల్లో ప్రస్తావనకు వచ్చిందని ష్రింగ్లా చెప్పారు. దీనిపై భారత్‌ ఆందోళనను బోరిస్‌ అర్ధం చేసుకున్నారని తెలిపారు. ఇలాంటి గ్రూపులను ఎదుర్కొనేందుకు సంయుక్త ంగా ఒక టాస్క్‌ఫోర్స్‌ ఏర్పాటు చేసేందుకు ఇరు దేశాలు అంగీకరించాయి. ఉక్రెయిన్‌ సంక్షోభంపై నేతలు చర్చించారన్నారు. అక్కడ సత్వరమే శాంతి నెలకొనాలని మోదీ ఆకాంక్షించారని చెప్పారు. రష్యాపై ఆంక్షల విషయంలో భారత్‌పై యూకే ఎలాంటి ఒత్తిడి తీసుకురాలేదన్నారు. కీవ్‌లో వచ్చేవారం తమ రాయబార కార్యాలయాన్ని పునఃప్రారంభిస్తామని బోరిస్‌ వెల్లడించారు. అఫ్గాన్‌లో శాంతి స్థాపన జరగాలని ఇరువురు నేతలు ఏకాభిప్రాయం వ్యక్తం చేశారు. భారత్‌–ఇంగ్లండ్‌ బంధం.. అత్యంత పటిష్టం భారత్, ఇంగ్లండ్‌ మధ్య అన్ని విషయాల్లోనూ బంధం ముందెన్నడూ లేనంత బలోపేతంగా మారిందని ఆ దేశ ప్రధాని బోరిస్‌ జాన్సన్‌ అన్నారు. రెండు రోజుల భారత పర్యటనలో భాగంగా ప్రధాని మోదీతో శుక్రవారం ఆయన సుదీర్ఘంగా చర్చలు జరిపారు. రక్షణ భాగస్వామ్యాన్ని మరింత విస్తరించేందుకు అంగీకరించారు. దీపావళి నాటికి రెండుదేశాల మధ్య స్వేచ్ఛావాణిజ్య ఒప్పందాన్ని ఖరారు చేయాలని నిర్ణయించారు. 2030 నాటికి ఇరుదేశాల మధ్య వాణిజ్యం రెట్టింపవుతుందని, వినిమయ వస్తువుల ధరలు తగ్గుముఖం పడతాయని చెప్పారు. ఎఫ్‌టీఏలోని 26 అంశాల్లో నాలుగింటిపై గతంలో జరిగిన చర్చల్లో అంగీకారం కుదిరిందని, మిగతా వాటిపై పురోగతి కనిపించిందని అధికారులు తెలిపారు. ఇండియాకు ఒజీఈఎల్‌ (ఓపెన్‌ జనరల్‌ ఎక్స్‌పోర్ట్‌ లైసెన్స్‌) ఇస్తామని, దాంతో రక్షణ రంగ వాణిజ్యానికి అడ్డంకులు తొలగుతాయని జాన్సన్‌ చెప్పారు. భూ, జల, వాయు, సైబర్‌ మార్గాల్లో సవాళ్లను ఉమ్మడిగా ఎదుర్కోవాలని నిర్ణయించామన్నారు. నూతన ఫైటర్‌ జెట్‌ టెక్నాలజీని భారత్‌తో పంచుకుంటామన్నారు. చర్చల్లో మంచి పురోగతి కనిపించిందని మోదీ చెప్పారు. రక్షణ రంగంలో స్వయంసమృద్ధికి యూకే సాయం చేస్తుందన్నారు. ఇండో పసిఫిక్‌ ప్రాంతంలో స్వేచ్ఛపై యూకే ఆరంభించిన ఐపీఓఐని స్వాగతించారు. విద్య, వైద్యం, పునర్వినియోగ ఇంధనం తదితర అంశాలపై కీలక ఒప్పందాలు కుదిరాయి. సచిన్, అమితాబ్‌లా ఫీలవుతున్నా: జాన్సన్‌ భారత్‌లో తనకు అత్యంత ఆదరణపూర్వక స్వాగతం లభించిందని బ్రిటన్‌ ప్రధాని బోరిస్‌ జాన్సన్‌ సంతోషం వ్యక్తం చేశా రు. ప్రధాని నరేంద్ర మోదీని తన ఖాస్‌ దోస్త్‌ (బెస్ట్‌ ఫ్రెండ్‌)గా అభివర్ణించారు. పలుమార్లు నరేంద్ర అని ప్రస్తావిస్తూ తమ సాన్నిహిత్యాన్ని తెలియజేశారు. బ్రిటీష్‌ ఇండియన్లలో దాదాపు సగంమందికి పుట్టిల్లైన గుజరాత్‌ రావడం ఆనందంగా ఉందన్నారు. ఇక్కడ తనకు లభించిన ఆదరణ చూస్తే సచిన్‌ టెండూల్కర్‌లాగా ఫీలవుతున్నానని, ఎక్కడచూసినా అమితాబ్‌ బచ్చన్‌ లాగా తన పోస్టర్లే కనిపిస్తున్నా యని సరదాగా వ్యాఖ్యానించారు. ప్రపంచంలోని పురాతన ప్రజాస్వామ్యం, అతిపెద్ద ప్రజాస్వామ్యాల మధ్య బంధం ఎంతో కీలకమన్నారు. అంతకుముందు రాష్ట్రపతి భవన్‌ వద్ద జాన్సన్‌కు ఘనంగా గార్డ్‌ ఆఫ్‌ ఆనర్‌ స్వాగతం లభించింది. నా భుజానికున్నది భారతీయ టీకానే! తనతో సహా వందకోట్లమందికి పైగా ప్రజలకు భారత్‌ కోవిడ్‌ టీకా అందించిందని బోరిస్‌ ప్రశంసించారు. ‘ నా భుజానికున్నది ఇండియన్‌ టీకా, అది నాకు ఎంతో మేలు చేసింది. భారత్‌కు కృతజ్ఞతలు’ అని వ్యాఖ్యానించారు. మోదీ ఆశించినట్లు ప్రపంచానికి ఔషధ కేంద్రంగా భారత్‌ మారిందని కొనియాడారు. ఆస్ట్రాజెనెకా, సీరమ్‌ సహకారంతో కోవిడ్‌ టీకా రూపొందించడాన్ని ప్రస్తావించారు. 

సాక్షి, హైదరాబాద్‌: నేషనల్‌ క్రైమ్‌ రికార్డ్స్‌ బ్యూరో (ఎన్సీఆర్బీ) 2020 సంవత్సరానికి సంబంధించిన జాతీయ స్థాయి గణాంకాలు విడుదల చేసింది. 20 లక్షల కంటే ఎక్కువ జనాభా ఉన్న 19 నగరాలను పోల్చినప్పుడు హైదరాబాద్‌ నగరం ఆర్థిక నేరాలకు సంబంధించిన కేసుల్లో మూడో స్థానంలో ఉంది. అలాగే మహిళలపై జరిగే నేరాల్లో ఐదో స్థానం, కిడ్నాప్‌ కేసుల నమోదులో ఏడో స్థానంలో నిలిచినట్లు ఎన్నీఆర్బీ గణాంకాలు స్పష్టం చేస్తున్నాయి. మరోపక్క నగరంలో 2018 నుంచి హత్య కేసుల సంఖ్య పెరుగుతూ వచ్చింది. వీటితో అత్యధికం వివాదాల నేపథ్యంలో జరిగినవే. హత్యకు గురైన వారిలో 18–30 ఏళ్ల మధ్య వయస్కులే ఎక్కువగా ఉన్నారు. ఇతర నగరాలతో పోలిస్తే హత్య కేసుల విషయంలో హైదరాబాద్‌ 11వ స్థానంలో ఉంది. ►ఆర్థిక నేరాలకి వస్తే.. నగరంలో 2020 సంవత్సరంలో మొత్తం 3,427 కేసులు నమోదయ్యాయి. 4,445 కేసులతో ఢిల్లీ, 3,927 కేసులతో ముంబై రెండో స్థానంలో ఉన్నాయి. వీటిలో ఫోర్జరీ, చీటింగ్, ఫ్రాడ్‌ కేసులే 3,307 ఉన్నాయి.   ►సైబర్‌ నేరాల నమోదులో నగరానికి రెండో స్థానం. ఇక్కడ 2018లో 428, 2019లో 1379 కేసులు నమోదయ్యాయి. గతేడాది విషయానికి వచ్చేసరికి ఈ సంఖ్య అమాంతం 2553కు చేరింది. వీటిలో ఫ్రాడ్‌ కేసులు 2020 ఉండగా వాటిలో బ్యాంకింగ్‌ ఫ్రాడ్స్‌ 1366.   ►మహిళలపై జరిగే నేరాలకు సంబంధించిన కేసుల్లో హైదరాబాద్‌ ఐదో స్థానంలో ఉంది. 9,782 కేసులతో ఢిల్లీ, 4583 కేసులతో ముంబై, 2730 కేసులతో బెంగళూరు, 2636 కేసులతో లక్నో మొదటి నాలుగు స్థానాల్లో ఉన్నాయి.   ►నగరంలో నమోదైన కేసుల్లో భర్తలు చేసిన దాషీ్టకాలకు సంబంధించినే 1226 కేసులు ఉన్నాయి. మిగిలిన వాటిలో 21 వరకట్న చావులు, 17 ఆత్మహత్యకు ప్రేరేపించడాలు, 131 కిడ్నాప్‌లు నమోదయ్యాయి.   ► 4011 కిడ్నాపులతో దేశ రాజధాని మొదటి స్థానంలో ఉంది. 1173 కేసులతో ముంబై రెండు, 735 కేసులతో లక్నో మూడో స్థానంలో ఉండగా... 451 కేసులతో హైదరాబాద్‌ ఏడో స్థానంలో నిలవడం ఆందోళన కలిగించే అంశం.   ► కిడ్నాప్‌ బాధితుల్లో మైనర్లకు సంబంధించినవి 95 ఉదంతాలు నమోదు కాగా... వీరంతా బాలికలే కావడం గమనార్హం. మొత్తం 451 ఉదంతా ల్లోనూ 352 కేసులు బాలికలు, మహిళలకు సంబంధించినవే.    ►నగరంలో 2018లో 81, 2019లో 86 హత్యలు జరగ్గా... 2020లో ఆ సంఖ్య 71గా నమోదైంది. వీటిలో వ్యక్తిగత కక్షల వల్ల 10, సొత్తు కోసం 4, ప్రేమ వ్యవహారాలతో 3 హత్యలు జరిగాయి. అత్యధికంగా 39 ఉదంతాలు విభేదాల కారణంగా జరిగాయి.  ►హతుల్లో పురుషులు 63 మంది, స్త్రీలు 8 మంది ఉన్నారు. అత్యధికంగా 18–30 ఏళ్ల మధ్య వయసు్కలు 41 మంది ఉండగా... వీరిలో 35 మంది పురుషులు, ఆరుగురు స్త్రీలు.   ►చిన్నారులపై నేరాలకు సంబంధించి నగరంలో 467 కేసులు నమోదు కాగా... ఇతర నగరాలతో పోలిస్తే 11వ స్థానంలో ఉంది. వీటిలో 318 ఉదంతాలతో పోక్సో యాక్ట్‌ కేసులో అత్యధికంగా ఉన్నాయి. ఆ తర్వాత 95 కేసులు కిడ్నాప్‌లకు సంబంధించినవి.   ►2020లో నగర పోలీసులు వివిధ క్రిమినల్‌ కేసులకు సంబంధించి మొత్తం 4,855 మందిని అరెస్టు చేశారు.   

సాక్షి, అమరావతి: ఆర్థిక నేరాలకు పాల్పడే సంస్థలపై నమోదైన కేసుల దర్యాప్తు సత్వరమే పూర్తి చేసి బాధితులకు న్యాయం అందించాలని రాష్ట్ర ప్రభుత్వ ప్రధాన కార్యదర్శి నీలం సాహ్ని ఆదేశించారు. 19వ స్టేట్‌ లెవల్‌ కో– ఆర్డినేషన్‌ కమిటీ వర్చువల్‌ సమావేశం సీఎస్‌ అధ్యక్షతన సచివాలయంలోని మొదటి బ్లాక్‌ లో వారి కార్యాలయంలో గురువారం జరిగింది. తొలుత ఆర్థిక శాఖ ముఖ్య కార్యదర్శి ఎస్‌.ఎస్‌.రావత్‌ మాట్లాడుతూ, 19వ స్టేట్‌ లెవల్‌ కో– ఆర్డినేషన్‌ కమిటీ ఉద్దేశాన్ని వివరించారు. అనంతరం సీఎస్‌ నీలం సాహ్ని మాట్లాడుతూ, ఈ ఏడాది జనవరి 29న జరిగిన 18వ స్టేట్‌ లెవల్‌ కో– ఆర్డినేషన్‌ కమిటీలో తీసుకున్న నిర్ణయాల ప్రగతిని అడిగి తెలుసుకున్నారు. ఆర్థిక నేరాలకు పాల్పడిన పలు సంస్థలపై నమోదైన కేసుల వివరాలు ఏయే దశల్లో ఉన్నాయో ఆరా తీశారు. ప్రజల కష్టాన్ని దోచుకునే సంస్థలపై కఠినంగా వ్యవహరించాలని, బాధితులకు తక్షణమే పరిష్కారం చూపాలని ఆదేశించారు.  ►మోసాలకు పాల్పడక ముందే, చిట్‌ ఫండ్, ఫైనాన్స్‌ సంస్థలు ఆర్బీఐ నిబంధనలకు లోబడి ఉన్నాయా? సంస్థల కార్యకలాపాల నిర్వహణకు అనుమతులు ఉన్నాయా....లేదా? అనే విషయాలు గుర్తించాలన్నారు. ►అగ్రిగోల్డ్, అక్షయ్‌ గోల్డ్, అభయ్‌ గోల్డ్, హీరా గ్రూప్, సహారా సహా పలు సంస్థలపై వివిధ కోర్టుల్లో ఉన్న కేసుల వివరాలను సీఎస్‌ కు సీఐడీ, పోలీస్‌ అధికారులు వివరించారు. ►ఎక్కువ కేసులు విజయవాడ, విశాఖపట్నం, గుంటూరు వంటి నగరాల్లో నమోదవుతున్నట్లు సీఎస్‌ దృష్టికి అధికారులు తీసుకొచ్చారు.  ►ఎక్కువ వడ్డీల పేరుతో ప్రజల కష్టాన్ని దోచుకుంటున్న ఆర్థిక సంస్థలపై నమోదైన కేసుల దర్యాప్తు సత్వరమే పూర్తి చేసి, బాధితులకు న్యాయమందించాలని సీఎస్‌ ఆదేశించారు.  ►సమావేశంలో ఆర్థిక శాఖ కార్యదర్శి సునీత, ఆర్బీఐ ఏపీ, తెలంగాణ రీజనల్‌ డైరెక్టర్‌ సుబ్రతా దాస్, సీఐడీ, పోలీసు అధికారులు తదితరులు పాల్గొన్నారు.   

సాక్షి, హైదరాబాద్‌: మల్టీ లెవల్‌ మార్కెటింగ్‌ పేరుతో దేశవ్యాప్తంగా మోసాలకు పాల్పడిన ‘క్యూనెట్‌’సంస్థ మాదిరిగానే అక్రమాలకు పాల్పడిన మరో సంస్థ ‘సెర్ఫా’బాగోతం బట్టబయలైంది. క్యూనెట్‌ సంస్థలో చేరి నష్టపోయిన బాధితుడే సెర్ఫా సంస్థ యజమానిగా అవతారమెత్తి దేశవ్యాప్తంగా మల్టీలెవల్‌ మార్కెటింగ్‌ మోసాలకు పాల్పడుతున్నాడు. నగరంలోని మియాపూర్‌ వాసి ఫిర్యాదుతో సైబరాబాద్‌ ఆర్థిక నేరాల దర్యాప్తు విభాగం పోలీసులు బుధవారం వలపన్ని నిందితుడ్ని పట్టుకున్నారు.   నాడు మోసాలకు బాధితుడు.. నేడు సూత్రధారి  శ్రీకాకుళం పొందూరు మండలం తానెం గ్రామానికి చెందిన బక్కి శ్రీనివాసరెడ్డి బీఎస్సీ పూర్తి చేసి ఉద్యోగరీత్యా 2012లో హైదరాబాద్‌ వచ్చాడు. ఈక్రమంలో క్యూనెట్‌ సంస్థలో చేరి రూ.13 లక్షలు పెట్టుబడి పెట్టి నష్టపోయాడు. దీంతో 2018లో క్యూనెట్‌ సంస్థ తరహాలోనే విశాఖపట్టణంలో సెర్ఫా మార్కెటింగ్‌ ప్రైవేట్‌ లిమిటెడ్‌ పేరుతో ఆఫీస్‌ ప్రారంభించి మల్టీ లెవల్‌ మార్కెటింగ్‌ మొదలెట్టాడు. దీని బ్రాంచ్‌ ఆఫీసును నగరంలోని కూకట్‌పల్లిలో ప్రారంభించిన బక్కి శ్రీనివాస్‌రెడ్డి అనతి కాలంలోనే లక్షలు సంపాదించవచ్చంటూ తన మాయమాటలతో విద్యార్థులు, గృహిణులు, నిరుద్యోగులను ఆకర్షించాడు. తన కంపెనీలో చేరే వినియోగదారులు డీడీ ద్వారా కంపెనీ బ్యాంక్‌ ఖాతాకు డబ్బులు చెల్లించాలని, ఆ తర్వాత యూజర్‌నేమ్, పాస్‌వర్డ్‌ ఇస్తామని నమ్మపలికాడు. రూ.12,000 చెల్లించి సభ్యుడిగా చేరితే రూ.1,000, మరో ఇద్దరిని చేర్పిస్తే రూ.4,000 కమీషన్‌ వస్తుం దని ఆశచూపాడు. సంస్థలో చేరిన వారికి వెకేషన్‌ టూర్‌ ప్యాకేజీలు, నాసిరకమైన వాచ్‌లు, నాణ్యతలేని హెల్త్, డైటరీ, బ్యూటీ ఉత్పత్తులు ఇచ్చేవారు. వాస్తవానికి హోల్‌సేల్‌ మార్కెట్‌లో లభించిన ధరకు పదింతలు రేట్లు చెప్పి వీటిని వారి చేతికి అంటగట్టేవారు. కమీషన్‌ వస్తుందన్న ఆశతో ఈ కంపెనీలో చేరిన సభ్యులు మరికొంతమందిని ఈ సంస్థలో చేర్పించారు. ఇలా తెలుగు రాష్ట్రాలతోపాటుగా కర్ణాటక, ఒడిశా, మహారాష్ట్ర, జార్ఖండ్, బిహార్, చత్తీస్‌గఢ్, ఢిల్లీ, కేరళ, మధ్యప్రదేశ్, మణిపూర్, నాగాలాండ్, తమిళనాడు, ఉత్తరప్రదేశ్, పశ్చిమబెంగాల్‌తో పాటు లక్షద్వీప్‌ అండ్‌ అండమాన్‌ నికోబార్‌ దీవుల్లోనూ ఈ కంపెనీలో ఐదువేల మంది వరకు సభ్యులుగా చేరారు.   నగరవాసి ఫిర్యాదుతో..  అప్పటివరకు సెర్ఫా సంస్థ కార్యకలాపాలు సాఫీగానే సాగిపోవడంతో ఏ ఇబ్బందిలేకుండా పోయింది. అయితే ఈ కంపెనీలో సభ్యురాలిగా చేరిన నగరంలోని మియాపూర్‌వాసి కన్నెకంటి తులసి సంస్థ మోసాలపై కూకట్‌పల్లి పోలీసులకు ఫిర్యాదు చేయడంతో సెర్ఫా డొంకంతా కదిలింది. సైబరాబాద్‌ ఆర్థిక నేరాల దర్యాప్తు విభాగం పోలీసులు రంగంలోకి దిగి సంస్థ యజమాని శ్రీనివాస్‌రెడ్డిని వలపన్ని కూకట్‌పల్లిలోని అతడి కార్యాలయంలోనే అరెస్టు చేశారు. కార్యాలయాన్ని సీజ్‌ చేయడంతో పాటుగా కంప్యూటర్‌లను కూడా స్వాధీనం చేసుకున్నారు. ఈ కేసులో సంబంధమున్న ఇతర నిందితుల్ని కూడా అరెస్టు చేయాల్సి ఉందని సైబరాబాద్‌ పోలీసుల కమిషనర్‌ వీసీ సజ్జనార్‌ తెలిపారు.  

సాక్షి, హైదరాబాద్‌: ‘మీరు అధిక కొవ్వుతో బాధపడుతున్నారా? అయితే మీ బరువును తగ్గిస్తాం.. బక్క పలుచగా ఉంటే మీ బరువును పెంచుతాం.. శరీరంలో రోగనిరోధక స్థాయిని పెంచుతాం...కీళ్ల నొప్పులను హెర్బల్‌ మందులతో తగ్గుముఖం పట్టిస్తాం‘అంటూ 2 తెలుగు రాష్ట్రాల్లో 40వేల మందిని పంపిణీదారులుగా చేర్చుకొని దాదాపు రూ.30 కోట్లు మోసం చేసిన 9మంది సభ్యుల ముఠాను సైబరాబాద్‌ ఆర్థికనేరాల విభాగం(ఈవోడబ్ల్యూ) పోలీసులు శనివారం అరెస్టు చేశారు. హైదరాబాద్‌ లోని మలక్‌పేట గంజ్‌లో ‘ప్రో హెల్తీవే ఇంటర్నేషనల్‌ ఎల్‌ఎల్‌పీ’ కంపెనీ పేరుతో కార్యక లాపాలు చేస్తున్న ముగ్గురు డైరెక్టర్లతోపాటు మరో ఆరుగురిని పట్టుకున్నారు. వీరి నుంచి 3 ఖరీదైన కార్లతోపాటు బ్యాంక్‌ ఖాతాల్లోని 40 లక్షలను ఫ్రీజ్‌ చేశారు. కేసు వివరాలను గచ్చిబౌలిలోని సైబరాబాద్‌ పోలీసు కమిషనరేట్‌ కార్యాలయంలో ఈవోడబ్ల్యూ ఇన్‌చార్జ్‌ విజయ్‌కుమార్‌తో కలసి పోలీసు కమిషనర్‌ వీసీ సజ్జనార్‌ శనివారం మీడియాకు తెలిపారు.   ముఠా కట్టిన వారంతా తెలుగువారే...  ఐఐటీ ఖరగ్‌పూర్‌లో చదువును మధ్యలోనే ఆ పేసిన చార్మినార్‌ దబీర్‌పురాకు చెందిన మహమ్మద్‌ రిజ్వాన్‌ యూనస్, కుత్బుల్లాపూర్‌లో నివాసముంటున్న కర్నూలు వాసులు భట్టు సాయికొండ హర్షవర్ధన్‌ రాజు, అలూరు నరేశ్, విశాఖకు చెందిన పప్పల సాయిచరణ్, వరం గల్‌ వాసులు వంకుడోతు వేణు నాయక్‌లు మల్టీలెవల్‌ మార్కెటింగ్‌ వైపు అడుగులు వేశా రు. వివిధ మార్కెటింగ్‌ కంపెనీల్లో పనిచేసిన అనుభవంతో సులభంగా డబ్బు సంపాదించాలని ఆరోగ్యకర ఉత్పత్తుల పేరిట మల్టీ లెవల్‌ మార్కెటింగ్‌ కంపెనీ ప్రారంభించారు. ఇలా రిజ్వాన్‌ యూనస్‌ తండ్రి మహమ్మద్‌ ఇషాక్‌ సహకారంతో మలక్‌పేటలో ‘ప్రో హెల్తీవే ఇంటర్నేషనల్‌ ఎల్‌ఎల్‌పీ కంపెనీ’ రెండేళ్ల క్రితం ఏర్పాటైంది. ఈ ఆరుగురికి తోడు, విశాఖపట్నానికి చెందిన ఎర్రగంటి సత్య మణికంఠ, వరంగల్‌ వాసిభుక్యా అనిల్‌కుమార్, కర్నూలుకు చెంది న కొండా శ్రీనివాసులు కలిశారు. ఈ కంపెనీకి సీఈవోగా రిజ్వాన్‌ యూనస్, డైరెక్టర్లుగా హర్ష వర్ధన్‌రాజు, మహమ్మద్‌ ఇషాక్‌లు ఉండగా, మిగతావారు డిస్ట్రిబ్యూటర్లుగా పనిచేశారు.   కమీషన్ల వల.. టైటిళ్లతో ఆకర్షణ: ఈ గొలుసు కట్టు పథకంలో 4వేలు చెల్లించి సభ్యు డిగా చేరినవారికి వారి కంపెనీ పేరిట ఆరోగ్యకర ఉత్పత్తులు ఇచ్చేవారు. ఒకరు మరో ఇద్దరిని చేర్పిస్తే 25శాతం కమీషన్, వారు మరో ఇద్దరిని చేర్పిస్తే 25శాతం కమీషన్‌ ఇచ్చేవారు. ఇలా దశలవారీగా వెళ్లేది. 6 వేల నుంచి రూ.10 కోట్ల వరకు వ్యాపారం చేసిన వారికి క్లబ్, రూబీ , స్టార్‌ రూబీ మెంబర్‌...ఇలా క్రౌన్‌ బ్లాక్‌ డైమండ్‌ టైటిల్‌ ఇచ్చి ప్రోత్సహించారు. పథకంలో భాగంగా గోవా విహారయాత్రనూ ఆఫర్‌ చేశారు. అలావారు ఉత్పత్తులు కొనేలా చేశారు. నెలకు రూ.90వేలు వంతున ఏడాది పాటు అమ్మకాలు జరిపిస్తే ఎఫ్‌టీబీ కింద రూ. కోటీ 18లక్షల95వేలు గెలుచుకోవచ్చంటూ ఆశ చూపించారు. ఆదిలాబాద్, వరంగల్, కరీంనగర్, వైజాగ్, కర్నూలు జిల్లాల్లో సమావేశాలు పెట్టి నిరుద్యోగులు, వృద్ధులను మోస గించారు. నెలకు 1,500 మందిని చేర్పిస్తూ ముందుకెళుతున్న ఈ ముఠా కార్యకలాపాలపై శామీర్‌పేట పోలీసుస్టేషన్‌కు ఫిర్యాదు అంద డంతో ఈవోడబ్ల్యూ అధికారులు నిఘా వేసి మలక్‌పేటలోని కంపెనీ కార్యాలయంలో నిందితులను పట్టుకున్నారు. ఒక్కరు మినహా మిగిలిన వారంతా 23 నుంచి 27 ఏళ్లలోపు వారు కావడం గమనార్హం.   రూ.300 వస్తువులు.. రూ.4వేలు రాజస్తాన్‌ బిల్వారాలోని హెచ్‌ఏఎస్‌ హెర్బల్‌ కంపెనీ, హైదరాబాద్‌లోని మహబూబ్‌ హెర్బల్స్, పంజాబ్‌ లూథియానా లోని కేవా ఇండస్ట్రీస్‌లో తక్కువ ధరకు వేద్‌ గెయిన్, వేద్‌ ఫిట్, గిలాయ్‌ జ్యూస్, ఆర్థో ఆయిల్, హార్ట్‌ కేర్, 42 హెర్బ్స్‌ ఆయిల్, హెర్బల్‌ టూత్‌ పేస్ట్, వేద్‌ లైఫ్‌ హెర్బల్‌ పౌడర్, జస్ట్‌ వేద్‌ మాయిశ్చరైజర్, టాన్‌ జెల్, అక్నీ లోషన్, షాంపూ, యాంటీ రాడియంట్‌ చిప్స్‌ పేరుతో ఉత్పత్తులు కొనుగోలు చేసేవారు. రూ.300 నుంచి రూ.500 లకు కొనుగోలు చేసిన ఈ ఉత్పత్తులను రూ.4వేలకు ఇచ్చేవారు. గడియారాలు, బె ల్ట్‌లు బహుమతిగా ఇచ్చి 40వేల మంది స భ్యులను ఆకర్షించారు. రూ.30కోట్ల వ్యా పారం చేశారు. ఈ ఆరోగ్య ఉత్పత్తులు అను మతి లేనివని, నాసిరకమైనవిగా పోలీసులు గుర్తించారు.లైసెన్స్‌లు తీసుకోకుండా వ్యా పారం చేస్తున్న సంస్థలపై చర్యలు తీసుకోవల్సిందిగా లేఖ రాస్తామని సీపీ తెలిపారు.

న్యూఢిల్లీ: టెక్నాలజీ తోడ్పాటుతో భారత్‌లో భారీ స్థాయిలో కొత్త ఆవిష్కరణలు జరుగుతున్నాయని ప్రధాని నరేంద్ర మోదీ చెప్పారు. దీంతో ప్రపంచంలోనే ఫైనాన్షియల్‌ టెక్నాలజీకి (ఫిన్‌టెక్‌) సంబంధించి దిగ్గజ దేశాల్లో ఒకటిగా భారత్‌ ఎదిగిందన్నారు. స్టార్టప్‌ సంస్థలకు హబ్‌గా నిలుస్తున్న భారత్‌.. పెట్టుబడులకు ఆకర్షణీయ కేంద్రంగా మారిందని కూడా చెప్పారాయన. సింగపూర్‌లో జరుగుతున్న 3వ ఫిన్‌టెక్‌ సదస్సులో కీలకోపన్యాసం చేసిన మోదీ... ‘‘భారత్‌లో పాలనా స్వరూపాన్ని, ప్రజలకు అందించే సేవలను టెక్నాలజీ సమూలంగా మార్చేసింది. కొంగొత్త ఆవిష్కరణలు, ఆకాంక్షలను సాధించుకునేందుకు అపార అవకాశాలు కల్పిస్తోంది. ప్రస్తుతం ప్రపంచ ఎకానమీ స్వరూపం మారింది. పోటీని, అధికారాన్ని టెక్నాలజీయే నిర్దేశిస్తోంది. ప్రజల జీవితాలను మెరుగుపర్చేందుకు అపార అవకాశాలు కల్పిస్తోంది. బలహీనులకు సాధికారత కల్పించి, వారిని ప్రధాన స్రవంతిలోకి తెచ్చేందుకు తోడ్పడుతోంది. ఆర్థిక ప్రయోజనాలు మరింత మందికి చేరువయ్యేలా ఉపయోగపడుతోంది‘ అని వివరించారు. భవిష్యత్‌లో నాలుగో తరం ఫైనాన్షియల్‌ టెక్నాలజీలు, పరిశ్రమలు భారత్‌ నుంచే వస్తాయని చెప్పారాయన. 2016 నుంచి ఏటా నిర్వహిస్తున్న ఫిన్‌టెక్‌ సదస్సులో ప్రసంగించిన తొలి దేశాధినేత ప్రధాని మోదీయే. గతేడాది జరిగిన ఫిన్‌టెక్‌ ఫెస్టివల్‌లో 100 దేశాల నుంచి 30,000 మంది పైగా పాల్గొన్నారు. ఈ ఫెస్టివల్‌లో భాగంగా మూడు రోజుల పాటు సదస్సులు, ఫిన్‌టెక్‌ సంస్థల ఎగ్జిబిషన్, పోటీలు మొదలైనవి నిర్వహిస్తారు.   వైవిధ్యమైన సవాళ్లు.. పరిష్కార మార్గాలు  భారత్‌లో వైవిధ్యమైన పరిస్థితులు, సవాళ్లు ఉంటా యని, వాటికి అనుగుణంగా పరిష్కార మార్గాలూ వైవిధ్యంగానే ఉండాలని మోదీ తెలిపారు. ప్రతి ఒక్కరి అవసరాలకు అనుగుణంగా చెల్లింపు సాధనాలను అందుబాటులోకి తేవడం వల్ల డిజిటైజేషన్‌ ప్రక్రియ విజయవంతమైందన్నారు. సులభంగా అందుబాటులో ఉండటం, అవకాశాలు కల్పించడం, జీవనాన్ని సులభతరం చేయడం, జవాబుదారీతనాన్ని పెంచడం వంటి ప్రయోజనాలు ఫిన్‌టెక్‌తో ఉన్నాయని, భారత్‌లో చేసిన ప్రయోగాలే దీనికి నిదర్శనమని ప్రధాని చెప్పారు. డిజిటల్‌ టెక్నాలజీతో పారదర్శకత పెరుగుతోందని, గవర్నమెంట్‌ ఈ–మార్కెటర్‌ వంటి నూతన ఆవిష్కరణలతో అవినీతిని అంతమొందించే అవకాశాలు ఉంటున్నా యని ఆయన పేర్కొన్నారు.  ‘130 కోట్ల మంది భారతీయులను ఆర్థిక సేవల పరిధిలోకి తేవాలన్న ఆకాంక్ష .. సాంకేతికత తోడ్పాటుతో వాస్తవరూపం దాల్చింది. కేవలం కొన్నేళ్ల వ్యవధిలోనే 120 కోట్లకు పైగా బయోమెట్రిక్‌ ధృవీకరణలను(ఆధార్‌) రూ పొందించగలిగాం‘ అని ఆయన చెప్పారు. ‘టెక్నాల జీ ఊతంతో చారిత్రక మార్పులు చోటు చేసుకుంటున్నాయి. అనతికాలంలోనే డెస్క్‌ టాప్‌ నుంచి క్లౌడ్‌ దాకా, ఇంటర్నెట్‌ నుంచి సోషల్‌ మీడియా దాకా, ఐటీ సర్వీసుల నుంచి ఇంటర్నెట్‌ ఆఫ్‌ థింగ్స్‌ దాకా ఎంతో పురోగతి సాధించాం‘ అని మోదీ చెప్పారు.   ఎపిక్స్‌ టెక్నాలజీ ఆవిష్కరణ..  ప్రపంచవ్యాప్తంగా దాదాపు రెండు వందల కోట్ల మందికి బ్యాంకింగ్‌ సేవలను అందుబాటులోకి తెచ్చేందుకు ఉద్దేశించిన ఎపిక్స్‌ (అప్లికేషన్‌ ప్రోగ్రామింగ్‌ ఇంటర్‌ఫేస్‌ ఎక్సే్చంజ్‌) బ్యాంకింగ్‌ టెక్నాలజీ ప్లాట్‌ఫాంను సింగపూర్‌ డిప్యూటీ ప్రధాని టి.షణ్ముగరత్నంతో కలిసి మోదీ ఆవిష్కరించారు. బ్యాంకింగ్‌ సేవలకు దూరంగా ఉన్న 170 కోట్ల మందిని సంఘటిత ఫైనాన్షియల్‌ మార్కెట్‌ పరిధిలోకి తీసుకురావాల్సిన అవసరం ఉందని, ప్రపంచవ్యాప్తంగా అసంఘటిత రంగంలోని వంద కోట్ల మంది పైగా వర్కర్లకు బీమా, పింఛను భద్రత కల్పించాల్సి ఉందని మోదీ చెప్పారు. అంతర్జాతీయ ఫైనాన్షియల్‌ సంస్థలతో దేశీ కంపెనీలను అనుసంధానించేందుకు ఎపిక్స్‌ తోడ్పడగలదని విదేశీ వ్యవహారాల శాఖ ప్రతినిధి రవీష్‌ కుమార్‌ ట్వీట్‌ చేశారు. హైదరాబాద్, కొలంబో, లండన్‌లోని సాఫ్ట్‌వేర్‌ నిపుణులు డిజైన్‌ చేసిన ఈ అత్యాధునిక టెక్నాలజీని అమెరికాలోని బోస్టన్‌ కేంద్రంగా పనిచేసే వర్చుసా సంస్థ అభివృద్ధి చేసింది. భారత్‌ వంటి పెద్ద మార్కెట్‌తో పాటు ఫిజి వంటి మొత్తం 23 దేశాల్లో ఖాతాల్లేని ప్రజలకు చేరువయ్యే క్రమంలో చిన్న బ్యాంకులకు ఎపిక్స్‌ ఉపయోగపడుతుందని వర్చుసా సీనియర్‌ వైస్‌ ప్రెసిడెంట్‌ నిఖిల్‌ మీనన్‌ చెప్పారు. సదస్సులో ఏర్పాటు చేసిన ఇండియన్‌ పెవిలియన్‌లో 18 కంపెనీలను మోదీ సం దర్శించారు. మహారాష్ట్ర ఇన్ఫర్మేషన్‌ టెక్నాలజీ కార్పొరేషన్‌ ఏర్పాటు చేసిన ఈ పెవిలియన్‌లో ముంబైకి చెందిన 8 కంపెనీలు స్టాల్స్‌ ఏర్పాటు చేశాయి. 

సాక్షి, హైదరాబాద్‌: ‘మీరు రూ.7,500 చెల్లిస్తే చాలు... రూ.2,500 ఫీజును మినహాయించి రూ.5 వేలకు డ్రెస్సులు లేదంటే ఆరోగ్యకర ఉత్పత్తులిస్తాం. మీరు మరో ఇద్దరు సభ్యులను చేర్పిస్తే రూ.500 బోనస్‌తో పాటు రెండేళ్ల పాటు నెలకు రూ.2,500 అంటే రూ.60,000 సంపాదించుకోవచ్చు’అంటూ దేశవ్యాప్తంగా లక్షల మందికి ఆశచూపి దాదాపు రూ.1,200 కోట్లకు టోకరా వేశాడు హరియాణాకు చెందిన రాధేశ్యామ్‌. 34 ఏళ్ల ఇతడు ఏడో తరగతి వరకే చదవడం గమనార్హం. రాధేశ్యామ్, అతడికి సహకరించిన సురేందర్‌ సింగ్‌ను సైబరాబాద్‌ ఆర్థిక నేరాల విభాగ పోలీసులు గుర్గావ్‌లో పట్టుకొని శనివారం నగరానికి తీసుకొచ్చారు. ఫ్యూచర్‌ మేకర్‌ లైఫ్‌ కేర్‌ గ్లోబల్‌ మార్కెటింగ్‌ ప్రైవేట్‌ లిమిటెడ్‌కు చెందిన ఆరు బ్యాంక్‌ ఖాతాల్లోని రూ.200 కోట్లను పోలీసులు ఫ్రీజ్‌ చేశారు. ఈ కేసు వివరాలను గచ్చిబౌలిలోని సైబరాబాద్‌ పోలీసు కమిషనరేట్‌లో ఆర్థిక నేరాల విభాగం పర్యవేక్షిస్తున్న డీసీపీ విజయ్‌కుమార్, మాదాపూర్‌ డీసీపీ వెంకటేశ్వరరావుతో కలసి కమిషనర్‌ వీసీ సజ్జనార్‌ మీడియాకు తెలిపారు. హరియాణా రాష్ట్రం హిస్సార్‌కు చెందిన రాధేశ్యామ్, ఫతేబాద్‌ తహసీల్‌కు చెందిన సురేందర్‌ సింగ్, బన్సీలాల్‌కు గుడ్‌వే, రైట్‌ కనెక్ట్‌ మార్కెటింగ్‌ సంస్థల్లో పనిచేసినప్పుడు పరిచయం ఏర్పడింది. అక్కడ నేర్చుకున్న మల్టీ లెవల్‌ మార్కెటింగ్‌ అనుభవంతో స్వతహాగా ముగ్గురూ కలసి 2015లో ఫ్యూచర్‌ మేకర్‌ లైఫ్‌ కేర్‌ గ్లోబల్‌ మార్కెటింగ్‌ ప్రైవేట్‌ లిమిటెడ్‌ పేరుతో కంపెనీని ప్రారంభించారు. హరియాణాలోని హిస్సార్‌ కేంద్రంగా కంపెనీ కార్యకలాపాలు ప్రారంభించారు.   ఉత్తర భారతీయులే లక్ష్యంగా...  నెలకు రూ.20 వేల నుంచి రూ.పది లక్షల వరకు సంపాదించవచ్చు.. కేవలం రూ.7,500తో ‘ఫ్యూచర్‌ మేకర్‌’గా మారవచ్చని అన్ని పత్రికల్లో క్లాసిఫైడ్స్‌ ఇచ్చారు. 2015–2017 నవంబర్‌ వరకు కేవలం వేల సంఖ్యలో ఉన్న కస్టమర్ల సంఖ్య.. గత పది నెలల్లోనే ఏకంగా 20 లక్షల వరకు దాటింది. సెప్టెంబర్‌ 2న కంపెనీ చీఫ్‌ రాధేశ్యామ్‌ జన్మదినం సందర్భంగా ‘మాన్‌సూన్‌ బొనాంజా’అంటూ ప్రకటనలు బాగా ఇచ్చి కస్టమర్లను ఆకర్షించే ప్రయత్నం చేశారు. వీరిని అరెస్టు చేసిన శుక్రవారం ఒక్కరోజే.. కంపెనీ పేరు మీదున్న బ్యాంక్‌ ఖాతాలకు రూ.75 కోట్లు వచ్చి చేరాయి. ట్రస్టు పేరుతోనూ సేవా కార్యక్రమాలు చేసిన వీరు ముఖ్యంగా ఉత్తర భారతీయులపై గురిపెట్టారు. హరియాణా, ఢిల్లీ, మధ్యప్రదేశ్, మహారాష్ట్ర, ఒడిశాతో పాటు తెలంగాణ, ఆంధ్రప్రదేశ్‌లోని నిరుద్యోగులు, గృహిణులు, రిటైర్డ్‌ ఉద్యోగులకు పార్ట్‌టైమ్‌ ఆదాయం పేరిట కుచ్చుటోపీ పెట్టారు. గత 6 నెలల నుంచి రాష్ట్రంలో ఊపందుకున్న ఈ వ్యాపారంలో దాదాపు రూ.29 కోట్లు మోసపోయారని సైబరాబాద్‌ పోలీసుల దృష్టికి వచ్చింది. దీన్ని ఆర్థిక నేరాల విభాగం తీవ్రంగా పరిగణించింది. ప్రత్యేక బృందం గుర్గావ్‌ వెళ్లి రాధేశ్యామ్, సురేందర్‌ సింగ్‌ను పట్టుకుంది. మరో నిందితుడు బన్సీలాల్‌ పరారయ్యాడు. వీరిని న్యాయస్థానంలో హాజరుపరిచి జ్యుడీషియల్‌ రిమాండ్‌కు తరలించారు. తదుపరి విచారణ కోసం పోలీసు కస్టడీకి పిటిషన్‌ దాఖలు చేయనున్నారు.   ఎంత మందిని చేరిస్తే అన్ని డబ్బులు...  దుస్తులు, ఆరోగ్యకర ఉత్పత్తులను విక్రయించేందుకు ఈ గొలుసు వ్యాపారం సాగుతున్నట్లుగా కనిపించినా  సభ్యుల చేరికపైనే సంస్థ నిర్వాహకులు ప్రధాన దృష్టి సారించారు. ఒక్కొక్కరూ ఇద్దరిని చేర్పిస్తే, ఆ ఇద్దరు మరో నలుగురు, ఆ నలుగురు మరో ఎనిమిది మందిని... ఇలా గొలుసుకట్టుగా సభ్యులను చేర్పించే ప్రక్రియ మొదలుపెట్టారు. ఎక్కువ సభ్యులను చేర్పించేలా ప్రోత్సహించేందుకు టైటిల్‌ కూడా ప్రదానం చేసేవారు. 10 మందిని చేర్పిస్తే స్టార్‌ టైటిల్‌ ఇవ్వడంతో పాటు రూ.5వేలు ఇచ్చేవారు. ఇలా సిల్వర్‌ స్టార్‌ (30 మంది), పెరల్‌ స్టార్‌ (80 మంది), గోల్డ్‌ స్టార్‌ (180 మం ది), ఎమరాల్డ్‌ స్టార్‌ (430 మంది), ప్లాటినమ్‌ స్టార్‌ (1,43 0 మంది), డైమండ్‌ స్టార్‌ (4,430 మంది), రాయల్‌ డైమండ్‌ స్టార్‌ (11,930 మంది), క్రోన్‌ డైమండ్‌ స్టార్‌ (26,930 మంది), క్రోన్‌ అంబాసిడర్‌ స్టార్‌ (61,930 మంది) టైటిల్‌ దక్కించుకున్నవాళ్లకు రూ.8 వేల నుంచి రూ.కోటి వరకు ఇస్తామంటూ భారీ మొత్తంలో సభ్యులను చేర్పించేలా స్కెచ్‌ వేశారు. ఇలా దాదాపు రూ.1,200 కోట్ల మోసపూరిత వ్యాపార లావాదేవీలు చేశారు. వీరిచ్చే ఆరోగ్యకర ఉత్పత్తులను ల్యాబ్‌కు పంపడంతో అవి నకిలీవని తేలింది. ఈ కేసు ఛేదనలో కీలకపాత్ర పోషించిన సైబర్‌ క్రైమ్స్‌ ఏసీపీ శ్రీనివాస్, ఆర్థిక నేరాల విభాగ బృంద సభ్యులు సుధీర్, ఆనంద్‌రెడ్డి, గోపీనాథ్, శ్రీనివాస్, చంద్రశేఖర్‌రెడ్డి, శ్యామ్, కూకట్‌పల్లి సీఐ ప్రసన్నకుమార్‌ను సీపీ ప్రశంసించారు.   చేరినా.. చేర్పించినా నేరమే ‘సులభ పద్ధతిలో ఆదాయం వస్తుందని మల్టీ లెవల్‌ మార్కెటింగ్‌(ఎంఎల్‌ఎం)లో పెట్టుబడులు పెట్టినా, పెట్టుబడులు పెట్టించినా అది నేరమవుతుంది. 1978, ప్రైజ్‌ చిట్స్‌ అండ్‌ మనీ సర్క్యులేషన్‌ స్కీమ్‌ బ్యానింగ్‌ యాక్ట్‌ ప్రకారం చట్టపరమైన చర్యలు తీసుకుంటాం. ఇంట్లో కూర్చొనే డబ్బులు సంపాదించుకోవడం అంటూ పత్రికల్లో వచ్చే క్లాసిఫైడ్స్‌ను నమ్మకండి. మీడియా కూడా ఇటువంటి ప్రకటనల విషయాల్లో ఆయా సంస్థలను అది ఎలా సాధ్యమనే వివరాలు తెలుసుకోవాలి. పోయింది చిన్న మొత్తం కాబట్టి పోలీసు స్టేషన్‌కు పోవాలా అని ఆలోచన చేస్తున్నారు. ఈ చిన్నచిన్నవి మోసగాళ్లకు కోట్లు తెచ్చిపెడుతున్నాయి. సులభంగా డబ్బులు సంపాదించొచ్చని ప్రకటన మీ దృష్టికి వస్తే వెంటనే పోలీసులకు సమాచారమివ్వండి’అని సీపీ సజ్జనార్‌ అన్నారు. 

దేశవ్యాప్తంగా కొన్నేళ్ల క్రితం వరకు దోపిడీలు, దొంగతనాలు, బ్యాంకు లూటీలు తదితర నేరాలు భారీ స్థాయిలో జరిగేవి. టెక్నాలజీ పెరగడం, కమ్యూనికేషన్‌ వ్యవస్థ విస్తరించడంతో దోపిడీ గ్యాంగ్‌లు రూట్‌మార్చి ఆర్థిక నేరాల ద్వారా వందల కోట్లు సునాయసంగా కొట్టేస్తున్నాయి. గడిచిన నాలుగేళ్లలో రాష్ట్రంలో దోపిడీ, దొంగతనాలు తగ్గి ఆర్థిక నేరాలు విపరీతంగా పెరిగిపోయాయి. కొన్ని చోట్ల ప్రతీ ఏటా ఏకంగా 100% పెరిగితే మరికొన్ని చోట్ల 50% పెర గడం ఆందోళన కలిగిస్తోంది. ఇలా రాష్ట్రంలో 2017 ఒక్క ఏడాదిలోనే రూ.2,739 కోట్ల మేర ప్రజలు ఆర్థిక నేరస్తుల ద్వారా నష్టపోయినట్లు రాష్ట్ర నేరపరిశోధన విభాగం తేల్చింది. వేల కోట్ల దోపిడీ... సాధారణ దోపిడీలు, దొంగతనాలు కాకుండా బ్యాంక్‌ మోసాలు, పబ్లిక్‌ ప్రైవేట్‌ పార్ట్‌నర్‌ షిప్, చిట్స్, మనీ సర్క్యులేషన్‌ స్కీములు, టెలీ మార్కెటింగ్, క్రెడిట్‌ కార్డ్‌ ఫ్రాడ్, హెల్త్‌కేర్‌ ఫ్రాడ్స్, ఇన్యూరెన్స్‌ ఫ్రాడ్స్, సాఫ్ట్‌వేర్‌ పైరసీ, హక్కు సంబంధిత మోసాలు, డిమాండ్‌ డ్రాఫ్ట్, ఎఫ్‌డీ రిసీట్, వీడియో పైరసీ, బహుమతులు, లక్కీ లాటరీ మోసాలు, ఎంప్లాయిమెంట్‌ చీటింగ్, సైబర్‌ క్రైమ్‌.. ఇలా అనేక రకాల వైట్‌ కాలర్‌ నేరాలు ఆర్థిక నేరాల్లో కీలకంగా మారుతూ వస్తున్నాయి. వీటి ద్వారా వందల నుంచి వేల కోట్ల వరకు మాఫియా దోపిడీకి పాల్పడుతోంది. అప్రమత్తత, ఆలోచన తప్పనిసరి.. ఆర్థిక నేరాల్లో మోసపోతున్న ప్రజలకు అప్రమత్తతే శ్రీరామ రక్ష అని సీఐడీ ఉన్నతాధికారులు సూచిస్తున్నారు. డిపాజిట్లు, లాటరీలు, చిట్‌ఫండ్, బ్యాంకింగ్, క్రెడిట్‌ కార్డు, షేర్‌ మార్కెటింగ్‌ మోసాల పట్ల అప్రమత్తంగా ఉండాలని పేర్కొంటున్నారు. ఒకటికి రెండుసార్లు ప్రకటనలిస్తున్న సంస్థ, దాని వెనకున్న జిమ్మిక్కులను అర్థం చేసుకోవాలని, కంపెనీ సంబంధించిన వివరాలు, అందులో తక్కువ కాలంలో ఎక్కువ డబ్బు సంపాదిస్తామని చెప్పే వాటిపై జాగ్రత్త వహించాలని సీఐడీ అవగాహన కల్పిస్తోంది. ఆర్థిక నేరాల్లో నిందితులు టెక్నాలజీని వాడుకుని మోసం చేస్తున్న కేసులే ఎక్కువగా ఉంటున్నాయని సీఐడీ అభిప్రాయపడింది. ఎక్కడో ఇతర దేశాల్లో ఉంటూ ఫోన్‌కాల్స్, ఈ–మెయిల్స్, లాటరీ పేరుతో బురిడీ కొట్టిస్తున్నారని, వీటి వల్లే నష్టం వందల కోట్లకు చేరుతోందని ఆందోళన వ్యక్తం చేశారు. సైబరాబాద్‌కు మొదటిస్థానం... రాష్ట్రవ్యాప్తంగా అన్ని పోలీస్‌ యూనిట్లలో ఆర్థిక నేరాల నమోదులో సైబరాబాద్‌ కమిషనరేట్‌ మొదటి స్థానంలో ఉంది. రెండో స్థానంలో హైదరాబాద్, మూడో స్థానంలో రాచకొండ కమిషనరేట్లు ఉన్నాయి. రాజధాని ప్రాంతం చుట్టూ వైట్‌కాలర్‌ నేరగాళ్లు రెచ్చిపోతున్నారు. కేసులు నమోదవుతున్నా వాటిని ఛేదించడంలో సాంకేతిక సమస్యలు, సిబ్బంది కొరత, ట్రాకింగ్‌ లోపంతో నిందితులను పట్టుకోవడం కష్టసా«ధ్యమవుతోందని అధికారులు పేర్కొంటున్నారు.

న్యూఢిల్లీ: బ్యాంకింగ్, ఆర్థిక నేరాలు, ఉగ్ర కార్యకలాపాల కట్టడికి ఆధార్‌ దోహదపడుతుందన్న కేంద్రం వాదనలతో సుప్రీంకోర్టు విభేదించింది. బ్యాంకింగ్‌ మోసాలకు ఆధార్‌తో పరిష్కారం లభించదంది. ఆధార్‌ చట్టబద్ధత, చెల్లుబాటుపై గురువారం సీజేఐ జస్టిస్‌ దీపక్‌ మిశ్రా నేతృత్వంలోని రాజ్యాంగ ధర్మాసనం, ప్రభుత్వ తరఫు లాయర్ల మధ్య ఆసక్తికర వాదనలు జరిగాయి.  ‘బ్యాంకులను మోసగిస్తున్న వారెవరో అంతా బహిరంగంగానే తెలిసిపోతోంది. ఎవరెవరికి రుణాలు మంజూరు అవుతున్నాయో బ్యాంకులకు తెలియదా? అధికారులే మోసగాళ్లతో చేతులు కలిపి కుంభకోణాలకు పాల్పడుతున్నారు. ఇలాంటి పరిస్థితుల్లో ఈ సమస్యకు ఆధార్‌ పరిష్కారం చూపదు’ అని బెంచ్‌ పేర్కొంది.   లబ్ధిదారుల గుర్తింపునకే ప్రయోజనకరం సంక్షేమ పథకాల అసలు లబ్ధిదారులను గుర్తించడంలో మాత్రమే ఆధార్‌ ప్రభుత్వానికి సహాయపడుతుందని బెంచ్‌ పేర్కొంది. మొబైల్‌ ఫోన్లను ఆధార్‌తో అనుసంధానం చేసుకోవడం వల్ల ఉగ్రవాదులను పట్టుకోవడంతో పాటు, బాంబు దాడులను నివారించొచ్చని అటార్నీ జనరల్‌ కేకే వేణుగోపాల్‌ అన్నారు. దీనికి ప్రతిగా బెంచ్‌ స్పందిస్తూ.. ‘ఉగ్రవాదులు సిమ్‌ కార్డులకు దరఖాస్తు చేసుకుంటారా? కొంత మంది ఉగ్రవాదులను పట్టుకోవడానికి 120 కోట్ల మంది భారతీయులు మొబైల్‌ నంబర్లను ఆధార్‌తో అనుసందానం చేసుకోవాలని అడుగుతున్నారు. కేవలం చట్టబద్ధ జాతీయ ప్రయోజనాల రీత్యా అలా కోరడం సబబేనా?’ అని ధర్మాసనం ప్రశ్నించింది. దారిద్య్రరేఖకు దిగువన ఉన్న పేదల బతుకులు బాగుచేయడంలో ఆధార్‌ దోహద పడుతుందని వేణుగోపాల్‌ పేర్కొనగా.. ధనికులు, పేదల మధ్య అంతరం పెరుగుతోందని, 67% సంపద ఒక శాతం ధనికుల వద్దే పోగైందని బెంచ్‌ పేర్కొంది. ప్రతిదానికీ ఆధార్‌ను తప్పనిసరి చేయడం వల్లే అనవసర సమస్యలు తలెత్తుతున్నాయని పేర్కొంది.


 న్యూఢిల్లీ: ఆర్థిక నేరాల గురించి పోలీసులు, ఎన్‌ఫోర్స్‌మెంట్, ఇన్వెస్టిగేటివ్ ఏజెన్సీలలో అవగాహన పెంచడం కోసం మార్కెట్ నియంత్రణ సంస్థ సెబీ.. ఫైనాన్షియల్ మార్కెట్ ట్రైనింగ్ ప్లాట్‌ఫామ్‌ను ఏర్పాటు చేయడానికి ప్రణాళికలు రూపొందిస్తోంది. కొన్ని ఆర్థిక కార్యకలాపాలకు సంబంధించి నేరాలు చాలా వరకు సంక్లిష్టంగా ఉంటాయని, ఏజెన్సీలు వాటిని అర్థం చేసుకోవడం కొంత కష్టసాధ్యమని ఒక సీనియర్ అధికారి తెలిపారు.
 
 ఏజెన్సీలకు ఫైనాన్షియల్ క్రైమ్ గురించి వివరిస్తే.. అవి నేరాలను సమర్థంగా ఎదుర్కోడానికి ఆస్కారం ఏర్పడుతుందన్నారు. ఈ చర్య పోంజి స్కీమ్స్ వంటి తదితర క్యాపిటల్ మార్కెట్ సంబంధిత ఆర్థిక నేరాల త్వరితగతి పరిష్కారానికి  ఉపయోగపడుతుందని తెలిపారు. కాగా సెబీ తన సొంత సిబ్బందికి కూడా టెక్నికల్, బిహేవియరల్ ట్రైనింగ్ ప్రోగ్రామ్‌ను ఏర్పాటు చేస్తోంది.