లైఫ్‌ ఆఫ్‌ పై సినిమా గుర్తుందా? ఓ బాలుడు పులితో పాటు చిన్న పడవపై సముద్రంలో చిక్కుకుపోతాడు. ప్రాణాలు కాపాడుకోవడానికి పెద్ద సాహసమే చేస్తాడు. పులి, పడవ లేవు గానీ హవాయి దీవుల్లోనూ ఇలాంటి ఘటనే జరిగింది. 17 ఏళ్ల బాలుడు సముద్రంలో చిక్కుకుపోయాడు. చిన్న కయాక్‌ ఆసరాతో 12 గంటలపాటు ప్రాణాలు కాపాడుకున్నాడు. అతని పేరు కహియావ్‌. హైస్కూల్‌ కయాకింగ్‌ బృందంలో సభ్యుడు. హవాయి దీవుల్లోని వై బోట్‌ హార్బర్‌ నుంచి డైమండ్‌ హెడ్‌ దాకా మిత్రులతో కలిసి కయాకింగ్‌ చేశాడు. తిరుగు ప్రయాణంలో కనిపించకుండాపోయాడు. దాంతో సహచరులు అత్యవసర సిబ్బందికి ఫోన్‌ చేశారు. వెంటనే హోనోలులు అగ్నిమాపక శాఖ, అమెరికా కోస్ట్‌ గార్డ్‌ సహా 50 మందికి పైగా సిబ్బంది పడవలు, విమానాలతో గాలింపు చేపట్టారు.ఏం జరిగిందంటే... ఇంతకీ జరిగిందేమిటంటే కహియావ్‌ సముద్రంలో ప్రాక్టీస్‌ చేస్తూ ప్రమాదవశాత్తు సర్ఫ్‌ స్కీ నుంచి కింద పడ్డాడు. దాంతో అది కాస్తా మునిగిపోయింది. చూస్తే తనకు లైఫ్‌ జాకెట్‌ కూడా లేదు. అలలేమో ఈడ్చి కొడుతున్నాయి. సముద్రం అల్లకల్లోలంగా ఉంది. మరోవైపేమో చీకటి పడుతోంది. కష్టమ్మీద ఈదుతూ ఎలాగోలా తన 20 అడుగుల సర్ఫ్‌ స్కీ కయాక్‌ను అందుకోగలిగాడు. అయితే ఎటు చూసినా సముద్రం. కటిక చీకటి. కాసేపు కయాక్‌ మీదే పడుకుంటూ, మరికాసేపు దాని ఆసరాతో నీళ్లలో ఈదుతూ గడిపాడు. సమయం గడుస్తున్న కొద్దీ అతనిలో ఆశలూ సన్నగిల్లుతూ వచ్చాయి. సరిగ్గా అప్పుడే దూరంగా పడవలు కనిపించాయి. కాపాడాలంటూ కేకలు వేసినా దురదృష్టవశాత్తూ వారికి వినిపించలేదు. దాంతో అవి దూరంగా వెళ్లి కనుమరుగయ్యాయి. ఒకానొక దశలో ఇక ఈదలేనని నిర్ధారించుకున్నాడు. ఏదేమైనా సరే ప్రశాంతంగా ఉండాలని, అలల వేగం తగ్గగానే వీలైనంతగా ఈదాలని నిర్ణయించుకున్నాడు. ఎవరో ఒకరు తనను కనిపెట్టేదాకా ప్రాణాలు కాపాడుకోవాలనుకున్నాడు. గుండె నిబ్బరంతో కొన్ని గంటలపాటు గడిపాడు. చ‌ద‌వండి: బండరాళ్ల తలకిందులుగా ఇరుక్కున్న మహిళ.. ఏం జ‌రిగింది?ఇక తెల్లారుతుందనగా సముద్ర జలాలపై హెలికాప్టర్ల చప్పుడు విని కహియావ్‌కు ఒక్కసారిగా ప్రాణం లేచొచ్చింది. కయాక్‌ సాయంతో సముద్రంలో తేలియాడుతున్న బాలుడిని అమెరికా కోస్ట్‌ గార్డ్‌ విమాన సిబ్బంది ఎట్టకేలకు గుర్తించారు. అప్పటికే వెదుకులాటలో ఉన్న కోస్ట్‌గార్డు సిబ్బందికి సమాచారమివ్వడంతో వారొచ్చి కాపాడారు. అలా 8 గంటల ఆపరేషన్‌ చివరికి సుఖాంతమైంది. ఒంటికి గాయాలతో అతి చల్లని వాతావరణంలో గంటల కొద్దీ గడిపిన అతన్ని హుటాహుటిన ఆస్పత్రికి తరలించి చికిత్స అందించారు. శనివారం ఆసుపత్రి నుంచి డిశ్చార్జ్‌ అయ్యాడు.జీవితాంతం గుర్తుంచుకుంటా తన భయానక అనుభవాన్ని కహియావ్‌ మీడియాతో పంచుకున్నాడు. ‘‘నాకు ఏమవుతుందనే బాధ కంటే నా గురించి అమ్మ ఎంత ఆందోళన చెందుతుందోనని ఆవేదన చెందా. బయటపడతానని అనుకోలేదు. ఇదో గొప్ప అనుభవం. ఎలాంటి పరిస్థితినైనా ఎదుర్కొగ‌ల‌న‌నే ధైర్యాన్నిచ్చింది. కయాకింగ్‌ కొనసాగిస్తా. ఈ అనుభవాన్ని జీవితాంతం గుర్తుంచుకుంటా’’ అని చెప్పుకొచ్చాడు. బాలునిది మామూలు ధైర్యం కాదని కోస్ట్‌ గార్డ్‌ సిబ్బంది అన్నారు. ‘‘అంతటి బలమైన గాలులు, కల్లోలంలో అత్యంత శిక్షణ పొందిన మాకే సముద్రంలో చాలా కష్టంగా ఉంటుంది. అలాంటిది చిన్న కయాక్‌ సాయంతో 17 ఏళ్ల బాలుడు అంత ధైర్యంగా గడపడం గొప్ప విషయం’’ అంటూ మెచ్చుకున్నారు.


 ముంబై:  గ్లోబల్ ట్రావెల్ సర్చ్ ఇంజన్ కయాక్  భారత మార్కెట్లో ఎంట్రీ  ఇస్తోంది.  ఈ విషయాన్ని బుధవారం సంస్థ  అధికారికంగా ప్రకటించింది. తమ వెబ్సైట్, ట్రావెల్ యాప్ ద్వారా  భారత్ లోని వినియోగదారులకు  మరింత సమాచారాన్ని అందించేందుకు  సిద్ధమవుతోంది.  బహుళ వెబ్సైట్లకు వెళ్ళకుండా, ధరలు,  ప్రైస్ ఎలర్ట్స్, సహా  ప్రయాణాల ఉచిత నిర్వహణ వంటి సేవలను కయాక్  అందించనుంది.
 ప్రజలకు  వినూత్న ప్రయాణ  సౌకర్యాలను అందించే దిశగా , వారి వారి  ట్రిప్ లను ప్లాన్ చేసుకునేందుకు  సహాయం చేసేలా  పనిచేయనున్నట్టు కయాక్ డైరెక్టర్ (ఆగ్నేయ ఆసియా మరియు భారతదేశం)  ఫంగ్ పిటిఐకి తెలిపారు.  భారతదేశం లో ట్రావెల్ మార్కెట్ కు పెరుగుతున్న ఆదరణ నేపథ్యంలో  భారత మార్కట్లో ప్రవేశానికి ఇదే  సరైన సమయంగా తాము భావిస్తున్నామన్నారు.  ప్రజల పర్యటనకు  అవసరమైన సమాచారాన్ని పొందడానికి తమ సంస్థ సహాయపడుతుందన్నారు.  అనేక వెబ్ సైట్లను దర్శించాల్సిన అవసరం లేకుండానే  కయాక్ వినియోగదారులు కేవలం కొన్ని క్లిక్ లతో వందల సైట్ల సమాచారాన్ని పొందొచ్చని చెప్పారు.
 ఈ  మేరకు  డిజిటల్ సహా  సోషల్ మీడియా, ఈ కామర్స్, ఇతర  అన్ని మీడియాల్లో భారీ ప్రచారం నిర్వహించనున్నట్టు చెప్పారు.  ఆసియా పసిఫిక్ దేశాల్లో అగ్రస్థానంలో ఒకటిగా  ఉన్న భారత్  వినియోగదారులకు మరింత అదనపు  ప్రయోజనాలను అందించే యోచనలో ఉన్నట్టు చెప్పారు. కొరియా, ఆస్ట్రేలియా, హాంగ్ కాంగ్ మరియు సింగపూర్ ఇతర టాప్ మార్కెట్లుగా ఉన్నాయని ఆయన తెలిపారు.
 
 కాగా కయాక్ 20భాషల్లో 40  అంతర్జాతీయ సైట్లను నిర్వహిస్తోంది. 2016 సం.లో 1.5  మిలియన్ల సెర్చ్ లను  నమోదు చేసింది.
 
 
 
  


 ఒకప్పుడు అతను ఓ ప్రముఖ కంపెనీ సీఈవోగా ఉన్నాడు. అయితే ఇప్పుడు మాత్రం ఉబర్ క్యాబ్ డ్రైవర్గా పనిచేస్తున్నాడు. బండ్లు ఓడలు.. ఓడలు బండ్లవడం అంటే ఇదేనేమో అనుకోకండి. అతనేమీ బిజినెస్లో నష్టపోయి క్యాబ్ డ్రైవర్గా పనిచేయటం లేదు. మరో కొత్త బిజినెస్ స్టార్ట్ చేయడానికి కావాల్సిన బ్యాక్గ్రౌండ్ రెడీ చేసుకుంటున్నాడంతే.
 
 ఫ్లైట్లకు సంబంధించిన సమాచారంతో పాటు విహార యాత్రలకు సంబంధించిన.. హోటల్స్ తదితర సేవలు అందించే 'కాయక్' వెబ్సైట్ కో ఫౌండర్ పాల్ ఇంగ్లిష్.. 2012లో సుమారు 1400 కోట్లకు కాయక్ను ప్రిన్స్లైన్ సంస్థకు అమ్మేశాడు. ఆ తరువాత ఉబర్ సంస్థలో క్యాబ్ డ్రైవర్గా చేరాడు. అయితే క్యాబ్ డ్రైవర్ డ్రెస్లో ఉన్నా ఇంగ్లిష్ను మాత్రం కస్టమర్లు ఈజీగానే గుర్తుపడుతున్నారట. అంతేకాదు.. క్యాబ్ డ్రైవర్గా కస్టమర్లకు ఎంత బాగా సేవలందించినా ఫైవ్ స్టార్ రేటింగ్ రాలేదని వాపోతున్నాడు. 4.97 స్టార్ రేటింగ్ క్యాబ్ డ్రైవర్గా ఉన్న ఇంగ్లిష్.. తనకు ఫైవ్ స్టార్ రేటింగ్ ఇవ్వని కస్టమర్ ఎందుకు అసంతృప్తితో ఉన్నాడా అని ఆలోచిస్తున్నాడట.
 
 పాల్ ఇంగ్లిష్ ఇటీవలే ఓ కొత్త సంస్థను ప్రారంభించారు. లోలా పేరుతో ప్రారంభించిన ఆ వెంచర్లో ట్రావెల్ బుకింగ్ సేవలను అందుబాటులోకి తెచ్చారు. ట్రావెల్ బుకింగ్ విధానాన్ని సులభతరం చేసేందుకు లోలా ఉపయోగపడుతోందని ఇంగ్లిష్ వెల్లడించారు. దీని కోసం ఇంగ్లిష్ స్వయంగా క్యాబ్ డ్రైవర్ అవతారం ఎత్తి మరీ వినియోగదారుల అభిప్రాయాలను తెలుసుకోవడానికి ప్రాజెక్ట్ వర్క్ చేశాడన్నమాట.