ముంబై: ఇటీవల విడుదలైన బాలీవుడ్ చిత్రం 'హౌస్ఫుల్ 3' సినిమా బాక్సాఫీసు వద్ద మంచి కలెక్షన్లు రాబడుతోంది. విడుదలైన తొలి రెండు రోజుల్లో 30 కోట్ల రూపాయలకు పైగా వసూలు చేసింది.
 
 శుక్రవారం విడుదలైన ఈ సినిమాకు తొలి రోజు 15.21 కోట్లు, రెండో రోజు 16.30 కోట్ల రూపాయల కలెక్షన్లు వచ్చాయి. రెండు రోజులు కలిపి మొత్తం 31.51 కోట్ల రూపాయలు (నెట్) వసూలు చేసింది. బాలీవుడ్ దర్శక ద్వయం సాజిద్‌-ఫర్హాద్‌ తాజా సినిమా 'హౌస్‌ఫుల్-3‌'లో అక్షయ్‌కుమార్, రితేశ్‌ దేశ్‌ముఖ్‌, అభిషేక్‌ బచ్చన్‌ హీరోలుగా నటించారు. ఈ కామెడీ సినిమాకు భిన్నమైన టాక్ వచ్చినా బాక్సాఫీసు వద్ద భారీ కలెక్షన్లతో దూసుకెళ్తోంది.
 
 గతంలో సూపర్ హిట్ అయిన 'హౌస్‌ఫుల్‌' సినిమాకు థర్డ్ పార్ట్‌గా ఈ సినిమా ప్రేక్షకుల ముందుకు వచ్చింది. అక్షయ్, రితేశ్, అభిషేక్‌ లకు జోడీగా జాక్వలిన్ ఫెర్నాండెజ్‌, లిసా హేడన్‌, నర్గీస్‌ ఫక్రీ నటించారు. అక్షయ్‌, రితేశ్‌ 'హౌస్‌ఫుల్‌' తొలి రెండు పార్ట్‌లలో కనిపించగా.. మూడో పార్టులో అభిషేక్ ఎంట్రీ ఇచ్చాడు.