‘‘ముంబయ్‌లో అడుగుపెట్టిన వేళా విశేషం బాగుందో ఏమో.. అక్కడికి అలా వెళ్లానో లేదో ఇలా ఓ సినిమాకు సంతకం చేసేశాను. పైగా, ఇప్పటివరకు నేను తెలుగు, తమిళ, హిందీ భాషల్లో చేసిన పాత్రలకు పూర్తి భిన్నమైన పాత్రను ఈ సినిమాలో చేస్తున్నాను’’ అన్నారు తాప్సీ. ‘చష్మే బద్దూర్’ చిత్రం ద్వారా హిందీ రంగానికి పరిచయమైన ఈ ఢిల్లీ బ్యూటీ ప్రస్తుతం అక్కడ ‘రన్నింగ్ షాదీ డాట్‌కామ్’ అనే చిత్రంలో నటించారు. ఈ చిత్రం విడుదలకు సిద్ధమవుతోంది. ఇక, ముంబయ్‌కి మకాం మారగానే ఆమె అంగీకరించిన చిత్రం పేరు ‘బేబీ’. అక్షయ్‌కుమార్ హీరోగా నీరజ్ పాండే దర్శకత్వంలో ఈ చిత్రం రూపొందుతోంది. ఇందులో పోషిస్తున్న పాత్ర గురించి తాప్సీ చెబుతూ - ‘‘హిందీలో మొదటి సినిమా ‘చష్మే బద్దూర్’లో నేను చురుకైన అమ్మాయిలా నటించాను.
  
  రెండో సినిమా ‘రన్నింగ్ షాదీ డాట్‌కామ్’లో కూడా దాదాపు నా పాత్ర అలానే ఉంటుంది. ఈ రెండు పాత్రలకు భిన్నమైన పాత్రను ‘బేబీ’లో చేస్తున్నా. ఈ సినిమాలో నా పాత్ర తక్కువ మాట్లాడుతుంది. అలాగే ఎప్పుడూ సీరియస్‌గా కనిపిస్తుంది నా శారీరక భాష, హిందీ భాష ఉచ్చారణ అన్నీ విభిన్నంగా ఉంటాయి. ‘బేబీ’ చిత్రం షూటింగ్‌లో పాల్గొన్న మర్నాడు ‘రన్నింగ్ షాదీ డాట్‌కామ్’ షూటింగ్‌లో పాల్గొంటే, ఆ చిత్రదర్శకుడు అమిత్ రాయ్ తెగ కంగారుపడిపోయేవారు. ఎందుకంటే, ఆ షూటింగ్ లొకేషన్లో కూడా ‘బేబీ’కి మాట్లాడిన యాసలోనే మాట్లాడేదాన్ని.
  
  షూటింగ్ విరామంలో సీరియస్‌గా కూర్చునేదాన్ని. దాంతో అమిత్ ‘నువ్వు ఉన్నది రన్నింగ్ షాదీ డాట్‌కామ్’ షూటింగ్’లో అనేవారు. అప్పుడు ఈ సినిమా పాత్రకు తగ్గట్టుగా మారేదాన్ని. ‘బేబీ’ పాత్ర అంతగా నన్ను ప్రభావితం చేసింది. ‘రన్నింగ్...’లో కూడా నా పాత్ర చాలా బాగుంటుంది. ఈ సినిమా విడుదల కోసం ఆసక్తిగా ఎదురు చూస్తున్నా. ‘చష్మే బద్దూర్’ తెచ్చిన పేరుని ఈ చిత్రం రెట్టింపు చేస్తే, దీని ద్వారా వచ్చిన పేరు ‘బేబీ’తో రెట్టింపు అవుతుంది’’ అని చెప్పారు.
  


  కొన్ని అనుభూతులను ఎప్పటికీ మర్చిపోలేం. అది కూడా ఊరు కాని ఊరిలో మంచి అనుభవాలు ఎదురైతే దగ్గరవాళ్లకి చెప్పి, ఆనందపడిపోతాం. ప్రస్తుతం తాప్సీ ఆ ఆనందంలోనే ఉన్నారు. ఆమె కథానాయికగా నటిస్తున్న  హిందీ చిత్రం ‘రన్నింగ్ షాదీ డాట్ కామ్’ షూటింగ్ ఇటీవల పంజాబ్‌లో జరిగింది. అక్కడి పటియాలాకి సమీపంలో ఉన్న ఓ పల్లెటూరిలో పది రోజుల పాటు ఈ యూనిట్ సభ్యులు బస చేశారు. ఆ ప్రాంతంలో ఉన్న రాజుల కాలం నాటి  కోటలో ఈ చిత్రం షూటింగ్ చేశారు. కాగా, రాజ వంశానికి చెందిన వారసులు అక్కడ నివసిస్తున్నారట. 
  
  ప్రతిరోజూ వాళ్లు ఈ షూటింగ్‌ని సందర్శించడంతో పాటు రుచికరమైన వంటకాలు తయారు చేసిచ్చేవారని తాప్సీ పేర్కొన్నారు. ఆ పంజాబీ వంటకాలను ఓ పట్టు పట్టామని కూడా ఆమె తెలిపారు. అతిథి దేవో భవ అనే తరహాలో రాజ వంశ వారసులు తమకు రాచమర్యాదలు చేశారని, రాయల్ బ్యాక్‌గ్రౌండ్‌కి చెందినవారైనా కొంచెం కూడా భేషజం చూపించలేదని, ఎంతో నిరాడంబరంగా ఉన్నారని తాప్సీ అన్నారు. అక్కడ షూటింగ్ చేసిన పది రోజులూ వారి మర్యాదలు అందుకున్నామని, ఆ షెడ్యూల్‌ని ఇప్పట్లో మర్చిపోలేనని ఆమె చెప్పారు. ప్రస్తుతం ఆమె ‘ముని 3’ షూటింగ్‌లో పాల్గొంటున్నారు.