హీరోయిన్‌ అన్నాక గ్లామరస్‌గా కనిపించాలని ప్రేక్షకులు కోరుకుంటారు. వాళ్ల కోసమే తాము గ్లామరస్‌గా కనిపిస్తుంటామని కొంతమంది కథానాయికలు అంటుంటారు. లిప్‌ లాక్, బికినీ సీన్స్‌ చేసినప్పుడు కథ డిమాండ్‌ చేసిందంటుంటారు. ముద్దుగుమ్మలు ఏం చెప్పినా వినడానికి బాగుంటుంది. అయితే, మంజిమా మోహన్‌ ఇలాంటివన్నీ చెప్పనే చెప్పరు.ఎందుకంటే, ఈ బ్యూటీ లిప్‌ లాక్‌ సీన్స్‌ చేయరట.
 
 ‘సాహసం శ్వాసగా సాగిపో’ సినిమాలో నాగచైతన్యతో జోడీ కట్టిన ఈ భామ ఆ తర్వాత ఏ తెలుగు చిత్రంలోనూ నటించలేదు. కాగా, ‘మంజిమా లిప్‌ లాక్‌ సీన్లకు, స్కిన్‌ షో చేయడానికి రెడీ’ అనే వార్త షికారులో ఉంది. దీని గురించి మంజిమా ఘాటుగా స్పందించారు. ‘‘ప్రేక్షకుల అభిరుచుల్లో గతానికి ఇప్పటికీ తేడా వచ్చింది. గ్లామర్‌– అశ్లీలానికి తేడా వాళ్లకు తెలుసు. అందాల ప్రదర్శనకే ఇష్టపడని నేను లిప్‌ లాక్‌ సీన్లు చేస్తానని ఎలా చెబుతాను? అలాంటివి చేస్తేనే అవకాశాలు వస్తాయంటే సినిమాలు మానేసి ఇంట్లో కూర్చోవడానికి సిద్ధమే’’ అన్నారామె.


 టైటిల్ : సాహసం శ్వాసగా సాగిపో
 జానర్ : రొమాంటిక్ థ్రిల్లర్
 తారాగణం : నాగచైతన్య, మంజిమా మోహన్, బాబాసెహగల్, సతీష్ కృష్ణన్
 సంగీతం : ఏ ఆర్ రెహమాన్
 దర్శకత్వం : గౌతమ్ మీనన్
 నిర్మాత : మిర్యాల రవీందర్ రెడ్డి
 
 ప్రేమమ్ సినిమాతో సూపర్ హిట్ కొట్టిన నాగచైతన్య హీరోగా తెరకెక్కిన లేటెస్ట్ రొమాంటిక్ యాక్షన్ థ్రిల్లర్ సాహసం శ్వాసగా సాగిపో. ఈ ప్రేమమ్ కన్నా ముందే రిలీజ్ కావాల్సి ఉన్నా తమిళ వర్షన్ షూటింగ్ ఆలస్యం కావటంతో వాయిదా పడుతూ వచ్చింది. అయితే గతంలో గౌతమ్ మీనన్, నాగచైతన్య కాంబినేషన్లో వచ్చిన ఏంమాయ చేసావే ఘనవిజయం సాధించటంతో సాహసం శ్వాసగా సాగిపో సినిమాపై కూడా భారీ అంచనాలే ఉన్నాయి. మరి ఆ అంచనాలను ఈ సినిమా అందుకుందా..
 
 
 కథ :
 రజనీకాంత్ మురళీధర్ (నాగచైతన్య).. ఇంజనీరింగ్ పూర్తి చేసి సరైన ఉద్యోగం రాకపోవటంతో ఎంబిఏ చేస్తూ ఫ్రెండ్స్తో ఎంజాయ్ చేస్తుంటాడు. అదే సమయంలో తన చెల్లెలి కాలేజ్ ఫంక్షన్లో లీలా సత్యమూర్తి(మంజిమా మోహన్) అనే అమ్మాయిని చూసి ఇష్టపడతాడు. తరువాత అదే అమ్మాయి కోర్సు చేయటం కోసం తన చెల్లితో కలిసి తన ఇంట్లోనే ఉండటంతో మరింత ఆనందపడిపోతాడు. కొద్ది రోజుల్లోనే లీలాతో రజనీకాంత్కు మంచి పరిచయం ఏర్పడుతుంది. అదే సమయంలో తాను కన్యాకుమారిలో సూర్యోదయం చూడటానికి బైక్ మీద వెళుతున్న విషయం లీలాతో చెప్తాడు రజనీకాంత్.
 
 లీలా కూడా రజనీకాంత్తో కలిసి కన్యాకుమారి బయలుదేరుతుంది. ఈ జర్నీలో ఇద్దరూ మరింత దగ్గరవుతారు. కన్యాకుమారి నుంచి తిరిగి వచ్చే సమయంలో అనుకోకుండా వాళ్ల బైక్కు యాక్సిడెంట్ అవుతుంది. ఇక తను బతకనేమో అన్న భయంతో లీలాతో తాను ప్రేమిస్తున్న విషయం చెప్పేస్తాడు రజనీకాంత్. తరువాత కళ్లు తెరిచే చూసేసరికి ఆస్పిటల్లో ఉంటాడు లీల తనతో ఉండదు. మూడు రోజుల తరువాత హస్పిటల్కు ఫోన్ చేసిన లీలా, తమ కుటుంబం ప్రమాదంలో ఉందని, బైక్ యాక్సిడెంట్ కూడా తనను చంపాడానికి కావాలని చేయించిందే అని చెపుతుంది. దీంతో తన ప్రేమించిన అమ్మాయికి తోడుగా నిలబడాలన్న ఆలోచనతో లీలా కోసం బయలుదేరుతాడు రజనీకాంత్.
 
 అప్పటికే లీలా తల్లిదండ్రుల మీద హత్యా ప్రయత్నం జరగటంలో వాళ్లు హాస్పిటల్లో ఉంటారు. నాగచైతన్య అక్కడ చేరుకున్న తరువాత మరోసారి లీలా, ఆమె కుటుంబం మీద ఎటాక్ జరుగుతుంది. మొదటి అప్పుడు చైతూ కాపాడిన తరువాత జరిగిన ఎటాక్లో లీలా కుటుంబంతో పాటు రజనీకాంత్ ఫ్రెండ్ మహేష్ కూడా చనిపోతాడు. దీంతో ఇదంతా అసలు ఎందుకు జరుగుతుంది..? వాళ్లు లీలాను ఎందుకు చంపాలనుకుంటున్నారు..? దీనికి పోలీసులు కూడా ఎందుకు సహకరిస్తున్నారు..? లాంటి విషయాలన్ని తెలుసుకోవాలనుకుంటాడు రజనీకాంత్. అందుకోసం ఏం చేశాడు అన్నదే మిగతా కథ.
 
 నటీనటులు :
 ప్రేమమ్ సక్సెస్తో మంచి ఫాంలో ఉన్న నాగచైతన్య, మరోసారి యాక్షన్ హీరోగా ప్రూవ్ చేసుకునే ప్రయత్నం చేశాడు. అయితే అదే సమయంలో తనకు స్టార్ ఇమేజ్ తీసుకొచ్చిన లవర్ బాయ్ లుక్ లోనూ అలరించాడు. తనకు బాగా అలవాటైన రొమాంటిక్ క్యారెక్టర్లో మరోసారి సూపర్బ్ అనిపించిన చైతూ, ఈ సారి యాక్షన్ హీరోగా కూడా ఆకట్టుకున్నాడు. హీరోయిన్ పాత్రలో మంజిమా మోహన్ మెప్పించింది. డీసెంట్ లుక్లో కనిపిస్తూనే సెకండ్ హాఫ్లో వచ్చే ఎమోషనల్ సీన్స్లో కూడా ఆకట్టుకుంది. నాగచైతన్య ఫ్రెండ్ మహేష్గా నటించిన సతీష్ కృష్ణన్, మంచి నటనతో పాటు డ్యాన్సర్ గానూ ప్రూవ్ చేసుకున్నాడు. విలన్గా బాబా సెహగల్ తన పరిధి మేరకు ఆకట్టుకున్నాడు.
 
 సాంకేతిక నిపుణులు :
 గతంలో రొమాంటిక్ ఎంటర్టైనర్లు, యాక్షన్ థ్రిల్లర్లు తెరకెక్కించిన దర్శకుడు గౌతమ్ మీనన్ ఈ సారి రెండు ఒకే సినిమాలో చూపించే ప్రయత్నం చేశాడు. ముందు నుంచి చెపుతున్నట్టుగా ఫస్ట్ హాఫ్ అంతా హర్ట్ టచింగ్ లవ్ స్టోరీతో నడిపించిన గౌతమ్, సెకండ్ హాఫ్ను తన మార్క్ థ్రిల్లర్గా మలిచాడు. అయితే స్లో నేరేషన్, వెంట వెంటనే వచ్చే పాటలు ఫస్ట్ హాప్లో కాస్త బోర్ కొట్టిస్తాయి.
 
 యాక్షన్ సినిమాలను ఇష్టపడేవారిని సెంకడ్ హాఫ్ కట్టిపడేస్తుంది. బలమైన ప్రతినాయక పాత్ర లేకపోయినా మంచి యాక్షన్ సీన్స్తో ఆ లోటును కవర్ చేశాడు దర్శకుడు. మ్యూజిక్ డైరెక్టర్ ఏ ఆర్ రెహమాన్ మరోసారి తన మ్యూజిక్ తో మ్యాజిక్ చేశాడు. సినిమా రిలీజ్కు ముందు చకోరి, వెళ్లిపోమాకే పాటలు సూపర్ హిట్ అయ్యాయి. బ్యాక్గ్రౌండ్ మ్యూజిక్తో సినిమా స్థాయిని పెంచాడు. సినిమాటోగ్రఫి, ఎడిటింగ్, నిర్మాణ విలువలు సినిమాలు స్థాయికి తగట్టుగా ఉన్నాయి.
 
 ప్లస్ పాయింట్స్ :
 నాగచైతన్య
 ప్రీ క్లైమాక్స్
 సంగీతం
 
 మైనస్ పాయింట్స్ :
 ఫస్ట్ హాఫ్ స్లో నేరేషన్
 స్ట్రాంగ్ విలన్ లేకపోవటం
 
 ఓవరాల్గా సాహసం శ్వాసగా సాగిపో.. టిపికల్ గౌతమ్ మీనన్ సినిమాలు ఇష్టపడేవారికి మాత్రం బాగానే కనెక్ట్ అవుతుంది.
 
 - సతీష్ రెడ్డి, ఇంటర్నెట్ డెస్క్


 ‘‘హీరో హీరోయిన్లు ప్రేమించుకున్నారు. ఆ ప్రేమకు ఓ సమస్య వచ్చింది. ఆ సమస్యను పరిష్కరించడానికి హీరో ఎలాంటి సాహసం చేశాడనేది మా సినిమా’’ అన్నారు నిర్మాత మిర్యాల రవీందర్ రెడ్డి. నాగచైతన్య, మంజిమా మోహన్ జంటగా గౌతమ్ మీనన్ దర్శకత్వంలో ఆయన నిర్మించిన ‘సాహసం శ్వాసగా సాగిపో’ ఈ నెల 11న విడుదలవుతోంది. రవీందర్‌రెడ్డి మాట్లాడుతూ - ‘‘దర్శకుడు కావాలని వచ్చా. కొన్నాళ్లు సహాయ దర్శకుడిగా చేశా. దర్శకులు శ్రీవాస్‌తో మంచి అనుబంధం ఉంది. ‘డిక్టేటర్’ షూటింగ్‌లో ఆయనను కలసినప్పుడు కోన వెంకట్ ‘సాహసం శ్వాసగా సాగిపో’ గురించి చెప్పారు. కథ నచ్చడంతో నిర్మాతగా మారా.
 
 ఫస్టాఫ్‌లో అందమైన ప్రేమకథ, సెకండాఫ్‌లో థ్రిల్లింగ్ యాక్షన్ ఉంటాయి. ‘ప్రేమమ్’ హిట్ తర్వాత చైతూ నుంచి వస్తున్న ఈ సినిమా ప్రేక్షకులను అదే స్థాయిలో అలరిస్తుంది. రామ్‌చరణ్‌తో సినిమా చేయాలనేది నా కోరిక. ఆయన చాన్స్ ఇస్తే కచ్చితంగా చేస్తా. ప్రస్తుతం బెల్లంకొండ శ్రీనివాస్-బోయపాటి శ్రీను కాంబినేషన్‌లో సినిమా నిర్మిస్తున్నా. ఫిబ్రవరిలో గోపీచంద్‌తో ఓ సినిమా ఉంటుంది. విజయ్ ఆంటోని ‘యమన్’ను తెలుగులో రిలీజ్ చేస్తున్నా. తమిళ ‘ఈట్టి’ రీమేక్ రైట్స్ తీసుకున్నాం’’ అన్నారు.


 ఘర్షణ, ఏం మాయ చేశావే, రాఘవన్ లాంటి సినిమాలతో తెలుగు ప్రేక్షకులను కూడా ఆకట్టుకున్న తమిళ దర్శకుడు గౌతమ్ మీనన్. తన ప్రతీ సినిమాను తెలుగులో కూడా రిలీజ్ చేసే గౌతమ్ మీనన్, నాగచైతన్య హీరోగా తెరకెక్కిన సాహసం శ్వాసగా సాగిపో సినిమాతో మరోసారి తెలుగు ప్రేక్షకుల ముందుకు వస్తున్నాడు. తాజాగా మరో టాలీవుడ్ యంగ్ హీరోతో సినిమా చేసేందుకు రెడీ అవుతున్నాడు.
 
 గతంలో నాని హీరోగా ఎటో వెళ్లిపోయింది మనసు సినిమాను తెరకెక్కించిన గౌతమ్ మీనన్ మరోసారి అదే హీరోతో సినిమాను ప్లాన్ చేస్తున్నాడట. సాహసం శ్వాసగా సాగిపో సినిమా తరువాత ధనుష్ హీరోగా ఓ సినిమాను రూపొందించిన గౌతమ్, ప్రస్తుతం నాని హీరోగా తెరకెక్కబోయే సినిమా స్క్రిప్ట్ ను ఫైనల్ చేసే పనిలో ఉన్నాడు.
 
 ఈ సినిమా తమిళ వర్షన్ లో హీరో ఎవరన్న విషయం తెలియాల్సి ఉంది. ఇప్పటికే నాని చేతిలో రెండు సినిమాలు ఉన్నాయి. ప్రస్తుతం నేను లోకల్ సినిమాలో నటిస్తున్న నాని ఆ సినిమా తరువాత వేణు శ్రీరామ్ దర్శకత్వంలో సినిమాకు కమిట్ అయ్యాడు. ఈ రెండు సినిమాలు పూర్తయిన తరువాతే గౌతమ్ మీనన్ సినిమా సెట్స్ మీదకు వెళ్లే అవకాశం ఉంది.


 నాగచైతన్య, గౌతమ్ వాసుదేవ్ మీనన్ కాంబినేషన్లో వచ్చిన ‘ఏమాయ చేశావె’ ఎంతటి ఘనవిజయం సాధించిందో తెలిసిందే. మరోసారి వీరిద్దరి కాంబినేషన్లో తెరకెక్కిన చిత్రం ‘సాహసం శ్వాసగా సాగిపో’. మంజిమా మోహన్ కథానాయిక. మిర్యా సత్యనారాయణరెడ్డి సమర్పణలో మిర్యాల రవీందర్ రెడ్డి నిర్మించిన ఈ చిత్రం ఈ నెల 11న విడుదలవుతోంది. గౌతమ్ మీనన్ మాట్లాడుతూ -‘‘ ‘ఏమాయ చేసావే’ నెక్ట్స్ లెవల్ మూవీ ఇది.
 
 ఆ చిత్రంలోని అబ్బాయి మగాడు అయిన తర్వాత అతడి ప్రవర్తన ఎలా ఉంటుందన్నది ఈ చిత్రంలో చూపించాం’’ అన్నారు. ‘‘గౌతమ్ మీనన్‌గారి దర్శకత్వంలో సినిమా చేస్తున్న ప్రతిసారీ ఏదో ఒక కొత్త విషయం నేర్చుకుంటున్నా. నన్ను సరికొత్త స్టయిల్‌లో చూపిస్తున్నందుకు ఆయనకు కృతజ్ఞతలు’’ అని నాగచైతన్య చె ప్పారు. నిర్మాతలు ‘దిల్’రాజు, బెల్లంకొండ సురేశ్ తదితరులు పాల్గొన్నారు.
  


 ప్రేమమ్ సినిమాతో సూపర్ హిట్ కొట్టిన నాగచైతన్య స్పీడు పెంచాడు. చాలా కాలంగా రిలీజ్ కోసం ఎదురుచూస్తున్న సాహసం శ్వాసగా సాగిపో సినిమాను వీలైనంత త్వరగా ప్రేక్షకుల ముందుకు తీసుకొచ్చే ప్లాన్లో ఉన్నాడు. గతంలో రెండు మూడు సార్లు ఈ సినిమా రిలీజ్ డేట్ ప్రకటనలు వచ్చినా.. రిలీజ్ చేయలేకపోయారు. దీంతో ఆ సినిమాను పక్కన పెట్టేసి ప్రేమమ్ పూర్తి చేసి సూపర్ హిట్ కొట్టాడు.
 
 ప్రస్తుతం ప్రేమమ్ సక్సెస్ను క్యాష్ చేసుకునే ఆలోచనలో ఉన్నారు సాహసం శ్వాసగా సాగిపో టీం. క్రియేటివ్ డైరెక్టర్ గౌతమ్ మీనన్ దర్శకత్వంలో తెరకెక్కిన ఈ సినిమాను నవంబర్ 11న రిలీజ్ అంటూ అఫీషియల్గా ప్రకటించేశారు. మరి ఈ సారైన నాగచైతన్య తన సినిమాను ఆడియన్స్ ముందుకు తీసుకువస్తాడో లేదో చూడాలి.


 రెండు సినిమాలను రిలీజ్కు రెడీ చేసిన యంగ్ హీరో నాగచైతన్య.. ఆ రెండు సినిమాల రిలీజ్ డేట్ల విషయంలో మాత్రం ఏటూ తేల్చుకోలేకపోతున్నాడు. ఇప్పటికే చాలా సార్లు వాయిదా పడిన సాహసం శ్వాసగా సాగిపో సినిమాను ముందు రిలీజ్ చేయాలా..? లేక గ్యారెంటీ హిట్ అన్న నమ్మకం ఉన్న ప్రేమమ్ సినిమాను ముందు రిలీజ్ చేయాలా అన్న విషయంలో ఇబ్బంది పడుతున్నాడు. అయితే ఫైనల్గా ఈ రెండు సినిమాల రిలీజ్ విషయంలో చైతూకు ఓ క్లారిటీ వచ్చిందన్న టాక్ వినిపిస్తోంది.
 
 ఇప్పటికే చాలా సార్లు వాయిదా పడటంతో ముందుగా సాహసం శ్వాసగా సాగిపో సినిమాను రిలీజ్ చేయాలని నిర్ణయించుకున్నాడట. ముందుగా అనుకున్నట్టుగానే సెప్టెంబర్ 9న ఈ సినిమా రిలీజ్ కానుంది. ఇక అదే రోజు రిలీజ్ అవుతుందనుకున్న ప్రేమమ్ను ఒక నెల ఆలస్యంగా అక్టోబర్ మొదటి వారంలో రిలీజ్ చేసేందుకు ప్లాన్ చేస్తున్నాడు.
 
 ఇప్పటికే ప్రేమమ్ సినిమాకు సంబందించిన ఓ సాంగ్ సోషల్ మీడియాలో సందడి చేస్తుండగా కింగ్ నాగార్జున బర్త్ డే సందర్భంగా మరో వీడియో సాంగ్ను రిలీజ్ చేసేందుకు ప్లాన్ చేస్తున్నాడు. లెజెండరీ యాక్టర్ నాగేశ్వరరావు పుట్టిన రోజున ప్రేమమ్ ఆడియోను గ్రాండ్గా రిలీజ్ చేసే ఆలోచనలో ఉన్నారు. చైతన్య సరసన శృతిహాసన్, అనుపమా పరమేశ్వరన్, మడోనా సెబాస్టియన్లు హీరోయిన్లుగా నటిస్తున్న ఈ సినిమాకు చందూ మొండేటి దర్శకుడు.


 ప్రతి శుక్రవారం రెండు మూడు సినిమాలు విడుదల కావడం సర్వ సాధారణమే. కానీ, ఒకే హీరో నటించిన రెండు సినిమాలు ఒకే రోజున విడుదల కావడమనేది చాలా అరుదుగా జరుగుతుంటుంది. అఫ్‌కోర్స్ ఒకప్పుడు జరిగాయనుకోండి. ఇప్పుడు మాత్రం చాన్సే లేదు. ఈ నేపథ్యంలో పాత ఫీట్ రిపీట్ కాబోతోందా? అనే చర్చ మొదలైంది. ఈ సెప్టెంబర్ 9న అక్కినేని నాగచైతన్య కెరీర్‌లో అటువంటి అరుదైన సంఘటన జరగబోతుందా? అనే కన్ఫ్యూజన్ క్రియేట్ అయ్యింది.
 
 చందు మొండేటి దర్శకత్వంలో చైతూ హీరోగా నటించిన ‘ప్రేమమ్’ను సెప్టెంబర్ 9న విడుదల చేస్తున్నట్టు నిర్మాతలు ప్రకటిం చారు. ఈ ప్రకటన వచ్చిన కాసేపటికి సెప్టెంబర్ 9వ తేదీనే ‘సాహసం శ్వాసగా సాగిపో’ను విడుదల చేస్తున్నట్టు దర్శకుడు గౌతమ్ వాసుదేవ్ మీనన్ ట్వీట్ చేశారు. దాంతో చైతూ రెండు సినిమాలు ఒకే రోజున రావడం ఖాయం అని చాలామంది అనుకున్నారు.
 
  కానీ, ఈ విషయం గురించి చైతూ ఫుల్ క్లారిటీ ఇచ్చేశారు. సెప్టెంబర్ 9న ‘ప్రేమమ్’ను విడుదల చేసి, కొన్ని వారాల తర్వాత ‘సాహసం శ్వాసగా సాగిపో’ను ప్రేక్షకుల ముందుకు తీసుకురావాలని అనుకుంటున్నట్లు చైతూ చెప్పారు. ‘ప్రేమమ్’ కంటే ముందే ‘సాహసం శ్వాసగా సాగిపో’ చిత్రీకరణ పూర్తిచేసినా, పలు కారణాల వల్ల విడుదల ఆలస్యమైందన్నారు. సినిమా నిర్మాణంలో ఏం జరుగుతుందో? ఊహించడం కష్టమన్నారు. మేకింగ్ ఎలా జరిగినా.. ఒక హీరో రెండు సినిమాల విడుదల మధ్య కొంత గ్యాప్ ఉండేలా చూసుకోవడం ముఖ్యం అని చైతూ పేర్కొన్నారు.
  


 నాగచైతన్య, గౌతమ్ వాసుదేవ్ మీనన్ కాంబినేషన్లో వచ్చిన ‘ఏమాయ చేశావె’ ఎంతటి ఘనవిజయం సాధించిందో తెలిసిందే. మరోసారి వీరిద్దరి కాంబినేషన్లో తెరకెక్కిన చిత్రం ‘సాహసం శ్వాసగా సాగిపో’. మంజిమా మోహన్ కథానాయిక. రచయిత కోన వెంకట్ సమర్పణలో ద్వారకా క్రియేషన్స్ పతాకంపై మిర్యాల రవీందర్ రెడ్డి నిర్మించిన ఈ చిత్రం ప్రస్తుతం పోస్ట్ ప్రొడక్షన్ పనులు జరుపుకుంటోంది. ఈ సందర్భంగా నిర్మాత మాట్లాడుతూ- ‘‘యువతతో పాటు అన్ని వర్గాల వారిని అలరించేలా తెరకెక్కించిన చిత్రమిది.
 
 ఏఆర్ రెహమాన్ స్వరపరచిన ఈ చిత్రం పాటలకు మంచి రెస్పాన్స్ వస్తోంది. నాగచైతన్య, గౌతమ్ మీనన్, రెహమాన్ కాంబినేషన్లో వచ్చిన ‘ఏమాయ చేసావె’ మ్యూజికల్ హిట్‌గా నిలిచింది. ఈ చిత్రం కూడా మరో మ్యూజికల్ హిట్‌గా నిలుస్తుందనే నమ్మకం ఉంది. ఆగస్టు 19న చిత్రాన్ని విడుదల చేసేందుకు సన్నాహాలు చేస్తున్నాం’’ అని తెలిపారు.  
  
  పంజాబీ సినిమా రీమేక్‌లో!
  మేనల్లుడు అక్కినేని నాగచైతన్య హీరోగా ఓ సినిమా నిర్మించడానికి సన్నాహాలు జరుగుతున్నాయని ప్రముఖ నిర్మాత డి.సురేశ్ బాబు ఇటీవల చెప్పిన సంగతి తెలిసిందే. ఈ సినిమా ద్వారా కృష్ణ అనే కొత్త దర్శకుణ్ణి పరిచయం చేస్తున్నారు. పంజాబీలో మంచి హిట్టయిన రొమాంటిక్ కామెడీ మూవీ ‘సింగ్ వర్సెస్ కౌర్’కి రీమేక్ ఇదని ఫిల్మ్ నగర్ వర్గాల టాక్. స్క్రిప్ట్ వర్క్ జరుగుతోందట. తెలుగు నేటివిటీకి తగ్గట్టు కథను మారుస్తున్నారట. ప్రస్తుతం నాగచైతన్య ‘ప్రేమమ్’లో నటిస్తున్న విషయం తెలిసిందే. ఈ చిత్రం తర్వాత ‘సోగ్గాడే చిన్ని నాయన’ ఫేమ్ కల్యాణ్‌కృష్ణ దర్శకత్వంలో అన్నపూర్ణ స్టూడియోస్ సంస్థ నిర్మించనున్న సినిమాలో చైతు నటించనున్నారు. కల్యాణ్‌కృష్ణ సినిమా పూర్తయిన తర్వాత ‘సింగ్ వర్సెస్ కౌర్’ షూటింగ్ ప్రారంభమవుతుందట!
  


 ఇటీవల పెళ్లి వార్తలతో సందడి చేస్తున్న నాగచైతన్య తన చేస్తున్న సినిమాల రిలీజ్ విషయంలో మాత్రం నోరుమెదపటం లేదు. ఇప్పటికే ఓ సినిమా షూటింగ్ పూర్తి కాగా.., మరో సినిమా షూటింగ్ చివరి దశలో ఉంది.. అయినా ఈ రెండు సినిమాలు ఎప్పుడు రిలీజ్ అవుతాయన్న విషయంలో మాత్రం ఇంత వరకు క్లారిటీ లేదు.
 
 ఏం మాయ చేసావే లాంటి సూపర్ హిట్ అందించిన గౌతమ్ మీనన్ కాంబినేషన్లో నాగచైతన్య హీరోగా తెరకెక్కిన సినిమా సాహసం స్వాసగా సాగిపో. ఆడియో కూడా రిలీజ్ అయిన ఈ సినిమా రిలీజ్ డేట్ విషయంలో మాత్రం చిత్రయూనిట్ క్లారిటీ ఇవ్వటం లేదు. ముందుగా జూలైలోనే రిలీజ్ చేయాలని భావించినా కబాలి ఎఫెక్ట్తో వాయిదా వేసుకున్నారు. తరువాత ఆగస్టు 12 రిలీజ్ అంటూ ప్రచారం జరిగినా ఎలాంటి ప్రకటనా రాలేదు.
 
 ఈ సినిమా రిలీజ్ కాకముందే చందూ మొండేటి దర్శకత్వంలో తెరకెక్కుతున్న మళయాల సూపర్ హిట్ రీమేక్ ప్రేమమ్ కూడా రిలీజ్కు రెడీ అవుతోంది. ప్రస్తుతం నార్వేలో సాంగ్ షూటింగ్ జరుపుకుంటున్న ఈ సినిమా ఈ షెడ్యూల్తో షూటింగ్ పూర్తవుతుంది. మరి రెండు సినిమాలను రెడీగా పెట్టిన చైతూ వాటిని ఎప్పుడు రిలీజ్ చేస్తాడో చూడాలి.


 చాలా కాలంగా వాయిదా పడుతూ వస్తున్న అక్కినేని నాగచైతన్య మూవీ సాహసం శ్వాసగా సాగిపో. చైతూకి ఏం మాయ చేశావే లాంటి బిగ్ హిట్ అందించిన గౌతమ్ మీనన్ దర్శకత్వంలో తెరకెక్కుతున్న ఈ సినిమా తెలుగు, తమిళ భాషల్లో ఒకేసారి రూపొందుతోంది. అయితే తమిళంలో హీరోగా నటిస్తున్న శింబు కారణంగా ఈ సినిమా షూటింగ్ చాలా ఆలస్యమైంది.
 
 ఇటీవల షూటింగ్ పూర్తిచేసుకున్న ఈ సినిమాను జూలైలో రిలీజ్ చేయడానికి ప్లాన్ చేస్తున్నారు. అయితే ఇప్పటికీ ఈ అక్కినేని హీరోకి కష్టాలు తీరేలా లేవు. అదే నెలలో రెండు భారీ చిత్రాల రిలీజ్ ఉండటంతో రిలీజ్కు సరైన డేట్ కోసం ఆలోచనలో పడ్డారు. ముందుగా సినిమాను జూలై మొదటివారంలో రిలీజ్ చేయాలని భావించినా, అదే సమయంలో రజనీకాంత్ హీరోగా తెరకెక్కిన కబాలి రిలీజ్ అవుతుండటంతో ఆ ఆలోచనను విరమించుకున్నారు.
 
 రజనీ సినిమా అంటే తమిళంతో పాటు తెలుగులో, ఓవర్సీస్లో కూడా భారీ ఎఫెక్ట్ ఉంటుందని సాహసం శ్వాసగా సాగిపో సినిమాను జూలై నెలాఖరున రిలీజ్ చేయాలని ప్లాన్ చేశారు. కాని అదే సమయంలో చైతూ మామయ్య వెంకటేష్ హీరోగా తెరకెక్కిన బాబు బంగారం రిలీజ్కు రెడీ అవుతోంది. దీంతో మరోసారి నాగచైతన్య సినిమా వాయిదా పడే అవకాశం ఉందన్న టాక్ వినిపిస్తోంది.


 తన కుమారుడు నాగచైతన్యకు అక్కినేని నాగార్జున పుట్టినరోజు శుభాకాంక్షలు తెలిపారు. చైతన్య సినిమా కెరీర్ ఉజ్వలంగా సాగాలని ఆకాంక్షించారు. ఇలాంటి బర్త్ డేలు మరెన్నో జరుపుకోవాలని దీవించారు. నాగచైతన్య పుట్టినరోజును పురస్కరించుకుని అతడి తాజా చిత్రం 'సాహసమే శ్వాసగా సాగిపో' ట్రైలర్ ను విడుదల చేశారు. ట్రైలర్ లో బ్యాక్ గ్రౌండ్ స్కోరు వాడకుండా, రియల్ సౌండ్స్ వాడినట్టు నాగార్జున-  వెల్లడించారు. ట్రైలర్ యూట్యూబ్ లింకును తన ట్విటర్ పేజీలో పోస్టు చేశారు.
 
 ప్రముఖ దర్శకుడు గౌతమ్ వాసుదేవ్ మీనన్ ఈ సినిమాకు దర్శకత్వం వహిస్తున్నారు. ఏఆర్ రెహ్మాన్ సంగీతం అందిస్తున్నారు. చైతన్య సరసన మంజిమా మోహన్ నటిస్తోంది. ప్రముఖ రచయిత కోన వెంకట్ తెలుగులో సంభాషణలు సమకూర్చడమే కాక, ఈ చిత్రాన్ని సమర్పిస్తున్నారు. తమిళంలో శింబు హీరోగా నటిస్తున్న ఈ సినిమాకు 'అచ్చమ్ ఎన్బదు మడమయడ...' అనే టైటిల్ ఇప్పటికే ఖరారు చేశారు.


 పాపులర్ సినిమా పాటల పల్లవుల నుంచి సినిమా టైటిల్స్ పెట్టడం దర్శకుడు గౌతమ్ మీనన్ తరచూ అనుసరించే పద్ధతి. తాజాగా తెలుగు, తమిళ భాషల్లో రూపొందిస్తున్న సినిమాకు కూడా ఆయన ఆ బాణీనే అనుసరించారు. తమిళంలో శింబు అభినయిస్తున్న ఈ తాజా చిత్రానికి పాపులర్ పాత తమిళ పాట నుంచి తీసుకొన్న ‘అచ్చమ్ ఎన్బదు మడమయడ...’ అనే టైటిల్ ఇప్పటికే ఖరారు చేశారు. అదే స్క్రిప్ట్ తెలుగులో యువ హీరో నాగచైతన్యతో తెరకెక్కుతోంది. ఈ తెలుగు వెర్షన్‌కు తాజాగా ‘సాహసమే శ్వాసగా సాగిపో!’ అనే టైటిల్ ఖరారు చేశారు.
 
 గతంలో గౌతమ్ మీనన్ - నాగచైతన్యల కాంబినేషన్‌లో వచ్చిన సినిమాకు మహేశ్‌బాబు ‘ఒక్కడు’లోని ‘నువ్వేం మాయ చేశావొగానీ...’ పాటను స్ఫూర్తిగా తీసుకుని ‘ఏం మాయ చేశావే’ అనే టైటిల్ పెట్టారు. ఆ సినిమా హిట్టయిన సంగతి తెలిసిందే. అది సెంటిమెంట్‌గా తీసుకొనో ఏమో ఇప్పుడు కూడా మళ్ళీ ‘ఒక్కడు’లోని ‘సాహసం శ్వాసగా సాగిపో...’ అనే హిట్ పాట ప్రేరణతో టైటిల్ ఖరారు చేయడం గమనార్హం. ఈ సినిమా ఒక రొమాంటిక్ థ్రిల్లర్.
 
 ఈ ప్రేమకథకు రెండు వెర్షన్స్‌లోనూ మంజిమా మోహన్ కథానాయిక. అప్పటి ‘ఏం మాయ చేశావే’ సినిమా లాగానే దీనికీ ఏ.ఆర్. రెహమాన్ సంగీతం అందిస్తున్నారు. ఇటీవలి కాలంలో గౌతమ్‌కు సన్నిహితుడైన ఆస్ట్రేలియన్ కెమేరామన్ డాన్ మెక్‌కార్థర్ ఛాయాగ్రహణం సమకూరుస్తున్నారు. ప్రముఖ రచయిత కోన వెంకట్ తెలుగులో సంభాషణలు సమకూర్చడమే కాక, ఈ చిత్రాన్ని సమర్పిస్తున్నారు. ఎం. రవీందర్‌రెడ్డి నిర్మాత.  
 
 తెలుగు, తమిళ వెర్షన్స్ రెండింటినీ ఏకకాలంలో రూపొందిస్తున్న ఈ చిత్రం షూటింగ్ ఇప్పటికే 60 శాతానికి పైగా పూర్తయింది. కాగా, ఈ నెల 29న నాగార్జున పుట్టినరోజు. తండ్రికి బర్త్‌డే గిఫ్ట్‌గా కుమారుడు నాగచైతన్య నటిస్తున్న ఈ సినిమా ఫస్ట్ లుక్‌ను విడుదల చేయనున్నట్లు దర్శకుడు గౌతమ్ మీనన్ తెలిపారు. మిగిలిన షూటింగ్‌ను త్వరలోనే పూర్తి చేసి, దీపావళి పండుగకు సినిమాను రిలీజ్ చేయాలని భావిస్తున్నారు.
 
 యువ హీరో నాగచైతన్య గత ఏడాది ఘనవిజయం సాధించిన ‘మనం’ తర్వాత మళ్ళీ సరైన హిట్ కోసం చూస్తున్నారు. ఆ మధ్య చేసిన సినిమాలు అంతగా కలిసి రాకపోవడంతో ఆయన ఈ కొత్త సినిమా మీద ఆశలు పెట్టుకున్నారు. వరుస చూస్తుంటే, కలిసొచ్చిన దర్శకుడు గౌతమ్ మీనన్ కాంబినేషన్‌లో మళ్ళీ హిట్ వచ్చేలా ఉంది.