ఔరంగాబాద్: నిందితులను వెతికి పట్టుకోవడానికి పోలీసులు ప్రదర్శించిన అతి తెలివి..  మరోసారి ఓ బాలిక అత్యాచారానికి గురైంది.  మహారాష్ట్రలోని జాల్నా  పట్టణంలో శుక్రవారం సాయంత్రం జరిగిన ఈ సంఘటన  పోలీసుల ఉద్యోగానికి  ముప్పు తెచ్చింది.  సినీ లెవల్లో  నిందితులకు ట్రాప్ వేసిన పోలీసులు చివరికి అభాసుపాలయ్యారు.  
 
 వివరాల్లోకి వెడితే  ఈనెల 7వ తేదీన ఇద్దరు వ్యక్తులు కత్తితో బెదిరించి, తనపై అత్యాచారం చేశారని ఓ బాలిక పోలీసులకు ఫిర్యాదు చేసింది.  దీంతోపాటు తన దగ్గరున్న  మొబైల్తో ఈ దృశ్యాలను వీడియో తీసి, ఫోన్  ఎత్తుకుపోయారని కూడా ఆమె తన ఫిర్యాదులో పేర్కొంది.   ఈ మేరకు కేసు నమోదు చేసిన  పోలీసులు  దర్యాప్తు మొదలు పెట్టారు.
 
 ఇంతలో అత్యాచారం చేసిన వ్యక్తులు బాధితురాలు తల్లికి  ఫోన్ చేయడం మొదలుపెట్టారు.  ఫోన్  తిరిగి ఇవ్వాలంటే, రూ.2000 ఇవ్వాలని , లేదంటే ఆ దృశ్యాలను ఇంటర్ నెట్లో పెడతామని  బెదిరించారు.  దీంతో నిందితులను ట్రాప్ చేసి ఎలాగైనా పట్టుకోవాలని ఎస్ఐ  వినోద్  తదితర పోలీసులు పథకం వేశారు. బాధితురాలితో వాళ్ళకి  ఫోన్ చేయించి.. ఓ ప్రదేశానికి రమ్మని చెప్పించారు.  దానికి నిందితులు కూడా సరేనన్నారు.
 
 అనుకున్నట్టుగానే  ఆ అమ్మాయికి అక్కడికి బయలుదేరింది. కానీ మార్గమధ్యలోనే ఆమెను అటకాయించిన ఇద్దరు వ్యక్తులు మరోసారి ఆమెపై దారుణానికి  తెగబట్టారు.   విషయం తెలుసుకున్న పోలీసులు ఎట్టకేలకు ఆ ఇద్దర్నీ అరెస్ట్ చేశారు. వారి వద్దనుంచి మొబైల్ను స్వాధీనం చేసుకున్నారు. కానీ  అప్పటికే ఆ వీడియోను  డిలిట్ చేశారు. దీంతో  తెల్ల మొఖం వేయటం పోలీసుల వంతైంది.
 
 అయితే ఈ వ్యవహారాన్ని సీరియస్గా తీసుకున్న  పోలీసు ఉన్నతాధికారి విశ్వాస్ నాంగ్రే పాటిల్ ...ఎస్ఐని విధుల నుంచి సస్పెండ్ చేశారు. దీనిపై విచారణ నిమిత్తం ఓ పోలీస్ అధికారిని నియమించారు.  అయితే నిందితుల వివరాలను వెల్లడించడానికి నిరాకరించిన పోలీసులు వారికి గతంలో ఇలాంటి నేరాలకు పాల్పడిన చరిత్ర ఉందన్నవిషయాన్ని మాత్రం వెల్లడించారు.