సాక్షి, హైదరాబాద్‌: టాలీవుడ్‌ తెర మీద తెలుగు అమ్మాయిలు అరుదే. దీనికి తెలుగు సినిమాలో హీరోయిన్లకు, వారి పాత్రలకు ఉన్న ప్రాధాన్యత కూడా ఒక కారణం. అయితే కొంత కాలంగా తెలుగులో సందేశాత్మక చిత్రాల నిర్మాణం పెరిగింది. దీంతో ఇప్పుడిప్పుడే తెలుగు అమ్మాయిలు వెండితెర వైపు చూస్తున్నారు. నగరంలో పుట్టి పెరిగిన ప్రగతి యాధాటి... విమర్శకుల ప్రశంసలకు నోచుకున్న స్క్రీన్‌ప్లే సినిమాతో తెలుగు తెరకు పరిచయమవుతున్నారు. టాలీవుడ్‌ తెరపై సందేశాత్మక చిత్రాల వెల్లువలో భాగంగా ‘స్క్రీన్‌ ప్లే’ సినిమా రూపుదిద్దుకుంది. ఇప్పటికే 5 అంతర్జాతీయ ఫిల్మ్‌ ఫెస్టివల్స్‌కు ఎంపికైంది. జైపూర్‌లో నిర్వహించిన ఫిలింఫెస్టివల్‌లో ఉత్తమ చిత్రంగా నిలిచింది. కొన్ని అవార్డులూ దక్కించుకున్న ఈ సినిమాను మహిళా దినోత్సవం సందర్భంగా థియేటర్లలో విడుదల చేస్తున్నారు. ఈ సినిమాలో మొదటిసారి హీరోయిన్‌గా చేస్తూనే నటనలో సహజత్వంతో అందరి ప్రశంసలు పొందింది ప్రగతి ‘సాక్షి’తో ప్రత్యేకంగా ముచ్చటించారు. తన గురించిన విశేషాలు పంచుకున్నారు. ఆమె మాటల్లోనే... న్యూయార్క్‌లో నటిగా.. చిన్నప్పటి నుంచి నటన ఇష్టం. 4 సంవత్సరాల వయసులో బాగా డాన్స్‌ చేసేదాన్ని. సమాజంలో ఏదైనా మార్పు కోసం ప్రయత్నించాలంటే దానికి రచన లేదా నటన ద్వారానే సాధ్యం అని నా నమ్మకం. అందుకే సినిమా రంగంలోకి ప్రవేశించాలని నిర్ణయించుకున్నా. ఆ తర్వాత న్యూయార్క్‌లోని లీస్ట్‌ రాస్ట్‌బర్గ్‌ థియేటర్‌ అండ్‌ ఫిల్మ్‌ ఇన్‌స్టిట్యూట్‌ స్కూల్‌లో 2 సంవత్సరాలు కన్సర్వేటరీ ప్రోగ్రామ్‌ చేశాను. దానికి ముందే ఎమ్‌సీఎస్‌ థియేటర్‌లో మైసినల్‌ టెక్నిక్‌లో శిక్షణ పొందాను. అక్కడే కొన్ని శక్తివంతమైన పాత్రల్లో నటించాను. ‘సెవన్‌’ అనే అవార్డ్‌ విన్నింగ్‌ డాక్యూమెంట్రీ ప్లేలో ముక్తాన్‌ మహి అనే పాకిస్తానీ మహిళ పాత్రలో నటించాను. అదొక సామూహిక అత్యాచారానికి గురైన మహిళ నిజ జీవిత కథ. తను ఇప్పుడు చదువు నేర్చుకొని ఒక స్కూల్‌ ప్రారంభించి, మహిళా విద్యకు కృషి చేస్తోంది.   ఇండియాకి తిరిగి వచ్చి.. నాన్న చనిపోవడంతో ఇండియా వచ్చేశా.. నాన్న (యాధాటి కాశీపతి) మొదటి నుంచి అభ్యుదయవాది. ఆలోచనా విధానం మార్పు కోసం తన పోరాటం, తపన నాపై చాలా ప్రభావం చూపింది. ఇండియా వచ్చాక సినిమాల్లో కొన్ని అవకాశాలుగా వచ్చినా నా ఆలోచనా విధానానికి దగ్గరగా ఉండే ఒక మంచి బలమైన కథాంశం కోసం కొన్ని కమర్షియల్‌ సినిమాలను రిజెక్ట్‌ చేశా. గంగి గోవు పాలు గరిటెడైన చాలు, కడివెడైన నేమి కరము పాలు అన్నట్టు, మంచి పాత్ర ఒక్కటి చేసినా చాలు అనుకుంటాను. అందుకే ఈ సినిమాను ఒప్పకున్నా. ఈ సినిమా అర్థం పర్థం లేని చెత్త ఆలోచనలు జనాల మీద రుద్దదు. ఈ సినిమాలో రాధికగా నా పాత్ర ప్రేమ, కోపం, బాధ, అమాయకత్వం ఇలా పలు రకాల భావోద్వేగాలు ప్రదర్శించాలి. ఈ పాత్రకి న్యాయం చేయడం కోసం బాగా రీసెర్చ్‌ చేశా. నా నటనను చాలా మంది మెచ్చుకున్నారు. ఫిల్మ్‌ ఇన్‌స్టిట్యూట్‌లో పడ్డ కష్టం తాలూకు ప్రతిఫలం ఇక్కడ ఆవిష్కృతమైంది. నిజానికి నా మొదటి సినిమా ఒక పెద్ద దర్శకుడితో చేయాల్సింది, తన గురుంచి తెలిశాక వద్దనుకున్నా. ఏదేమైనా కమర్షియల్‌ సినిమాలైనా సరే.. అర్ధవంతమైన పాత్రలు అయితే చేయాలనుంది. (చదవండి: కాజల్‌ అగర్వాల్‌కు సమన్లు?) మార్పు అంటే అదే.. గాంధీజీ అన్నట్టుగా అర్ధరాత్రి ఒక అమ్మాయి ఒంటరిగా తిరగగలిగే రోజు వస్తుందా? మానసికంగా, శారీరకంగా అమ్మాయిలపైన జరిగే దాడులు ఆగుతాయా? ఇలాంటి సినిమాలు వస్తే జనంలో ఆలోచన పెరుగుతుంది. వినోదం కంటే ఆలోచనే ముఖ్యం అని నా అభిప్రాయం. అన్ని విషయాల్లో సామాజిక సృహ పెరగాలి. అది సినిమాలు, సోషల్‌ మీడియా ద్వారా జరిగినప్పుడే మార్పు మొదలవుతుంది. తల్లిదండ్రులు ఎంత చెప్పినా సమాజంలో అశ్లీలత, ఉమెన్‌ని ఒక ఆబ్జెక్ట్‌గా చూపించడం లాంటివి పోవాలి. ఆమె మనసులోని ఆలోచనకు విలువ ఇవ్వాలి. ఎంతసేపు శారీరక అందాలకు ప్రాముఖ్యత ఇవ్వడం వలన మాకు తెలీకుండానే మాపై ఒత్తిడి పెరుగుతుంది. అందం కావాలంటే తెల్లగా మారిపోవచ్చు. కానీ వ్యక్తిత్వాన్ని మాత్రం కృత్రిమంగా ఏర్పర్చలేం. (నీ మీద ప్రేమ ఇంకా పెరుగుతూనే ఉంది)


 ముషీరాబాద్‌: యాధాటి కాశీపతి చదువు పూర్తి చేసిన తరువాత డిప్యూటీ కలెక్టర్‌గా ఉద్యోగం వచ్చింది. ఉద్యోగంలో చేరడానికి ముందు విజయవాడలో ఉన్న చండ్రపుల్లారెడ్డిని కలిసి వెల్దామని నాయకులు పేర్కొన్నారు. అన్నా.. నాకు డిప్యూటీ కలెక్టర్‌ ఉద్యోగం వచ్చిందని చెప్పగా మనకు కావాల్సింది కలెక్టర్‌ కాదు... కామ్రేడ్‌ అని  వారు చెప్పగా.. మరో మాట మాట్లాడకుండా వచ్చిన కారును పంపించి విప్లవ ఉద్యమానికి అంకితమయ్యారు కాశీపతి. ఆనంతపురానికి చెందిన కాశీపతి ఉస్మానియా యూనివర్సిటీలో  ఎంఏ(జర్నలిజం) చేశారు. అంతేకాక గోల్డ్‌ మెడల్‌ను కూడా సాధించారు.
 తరిమెల నాగిరెడ్డి నాయకత్వంలో 1967 నుండి విప్లవ ఉద్యమంలో పని చేశారు. సీపీఐఎంఎల్‌ ఏర్పడక ముందు కో–ఆర్టినేషన్‌ కమిటీలో, చంద్రపుల్లారెడ్డి నాయకత్వంలో సీపీఐఎంఎల్‌లో చురుకైన పాత్ర పోషించారు. రామనర్సయ్య, జంపాల చంద్రశేఖర్‌ ప్రసాద్‌లు బూటకపు ఎన్‌కౌంటర్‌లో పోలీసులు చంపినప్పుడు ఆయన ‘ఉయ్యాలో...జంపాలో’ అనే పాట రాసి తనలో గొప్ప కవి కూడా ఉన్నాడని నిరూపించారు. అంతే కాకుండా పీడీఎస్‌యూ సంస్థ గీతం ‘ బిగించిన పడికిలి –పీడీఎస్‌యూ చిహ్నం’ పాటను కూడా రాశారు. 1972లో గుంటూరులో జరిగిన విరసం మహాసభల్లో  కార్యవర్గ సభ్యులుగా ఎన్నికయ్యారు.
 భారత చైనా మిత్ర మండలి, ఎపీసీఎల్‌సీ వ్యవస్థాపకుల్లో కాశీపతి ఒకరు. వేలాది మందికి పండు ఒలిచిపెట్టినట్లుగా రాజకీయ అర్థశాస్త్రాన్ని బోధించడంలో ఆయనకు ఆయనే సాటి. చండ్రపుల్లారెడ్డి, తరిమెల నాగిరెడ్డి, రామనర్సయ్య తదితర ఎంతో మంది విప్లవ కారులతో పని చేసిన అనుభవం అయనది. ఎమర్జెన్సీ సమయంలో  21 నెలల పాటు ముషీరాబాద్‌లో జైలు జీవితం గడిపారు. జైల్లో ఈయనతో పాటు ఉన్న వరవరరావు, ఇతర ముఖ్యనేతలేందరికో రాజకీయ తరగతులను బోధించారు.  సీపీఐఎంఎల్‌ పార్టీ తరపున సిరిసిల్లా నుంచి ఎమ్మెల్యేగా పోటీ చేశారు. శ్రీశ్రీకి అత్యంత ఆప్తుడు.
 శ్రీశ్రీ కవిత్వం ఎప్పుడూ కాశీపతి పెదాలపై ఆడుతూ ఉండేది. శ్రీశ్రీ  చలసాని తరువాత చెప్పే పేరు కాశీపతి. తెలుగు సమాజానికి ఎంతో మంది జాతీయ అంతర్జాతీయ విప్లవ బుద్ధి జీవులను పరిచయం చేసిన వ్యక్తి కాశీపతి. 1978లో శ్రీకాకుళం జిల్లా పాతపట్నంలో అక్కడే పాటలు పాడే ఓ గిరిజన యువతిని పెళ్లి చేసుకొని ఆదర్శంగా నిలిచారు. ఆరోగ్యం క్షిణించిన తరువాత పార్కిన్స్‌సన్‌ వ్యాధితో బాధపడుతూనే ‘ మధ్యతరగతి మందుహాసం’ అనే పుస్తకాన్ని శ్రీశ్రీ సాహిత్యంపై విమర్శనాత్మకంగా రాయడం అయనేకే చెందింది. పార్టీ పత్రిక ‘విమోచన’కువర్కింగ్‌ ఎడిటర్‌గా 1977 నుంచి 1979 వరకు పని చేశారు.
 విప్లవ ఉద్యమం 1980 దశకంలో విప్లవ నాయకుడు సత్యనారాయణ సింగ్‌ ఉపాన్యాసం, దానిని తెలుగులో తర్జుమా చేసే కాశీపతి మాట, అరుణోదయ రామారావు పాటలు,  సభలుసమావేశాల్లో ఉర్రూతలూగించాయి. పెదవుల మధ్య సిగరెట్‌ పెట్టుకొని ఆయన మాట్లాడుతూ ఉంటే లయబద్దంగా కదిలే సిగరెట్, తూటాల్లాంటి మాటలు అప్పటి పాతతరం విప్లవాభిమానులకు నేటికీ గుర్తుంటాయి. తరువాత కాలంలో ఇండియన్‌ ఎక్స్‌ప్రెస్‌లో, ఆంధ్రప్రభ, వార్తలలో 20 సంవత్సరాల పాటు జర్నలిస్టుగా పనిచేశారు.  కలర్‌ చిప్స్‌లో కొంత కాలం పని చేశారు. ఆనంతరం అనారోగ్యానికి గురై తుది శ్వాస విడిచారు.
 ప్రముఖ కవి గజ్జెల మల్లారెడ్డి రాసినట్లు కాశీపతి  కూసేపతి అన్నాడంటే ఆయన ఉపన్యాసం, వాగ్దాటి ఎంత గంభీరంగా ఉంటుందో అర్థం చేసుకోవచ్చు. అందుకే కూత నేర్పినవాడు, రాత నేర్పిన వాడు సీతాకోకచిలుకలాంటి వాడు, వేలాది మందిని కదిలించినవాడు కాశీపతి అంటూ అరుణోదయ కళాకారులు ఆయనకు కితాబునిచ్చారు.