సూర్యేశ్వర ఆలయంలో ‘కార్తిక’ పూజలు

సూర్యేశ్వర ఆలయంలో ‘కార్తిక’ పూజలు

బాసర: కార్తిక మాసాన్ని పురస్కరించుకుని బాసరలోని సూర్యేశ్వర ఆలయంలో సోమవారం కార్తిక పూజలు నిర్వహించారు. ఈ సందర్భంగా విశేష అభిషేకం, రుద్ర త్రిశతి నామార్చన, మహా హారతి పూజలు చేశారు. అంతకుముందు భక్తులు గోదావరినదిలో పుణ్యస్నానాలు ఆచరించి సూర్యేశ్వర ఆలయాన్ని దర్శించుకున్నారు.

నేడు గిరి ప్రదక్షిణ

బాసర(ముధోల్‌): ఏకాదశి తిథిని పురస్కరించుకుని బాసర శ్రీ జ్ఞాన సరస్వతీ అమ్మవారి ఆలయంలో మంగళవారం ఉదయం 5 గంటలకు అఖండనామ కీర్తనలతో గిరి ప్రదక్షిణ చేయనున్నట్లు ఆలయ వైదిక బృందం తెలిపింది. భక్తులు అధికసంఖ్యలో హాజరై స్వామివారి కృపకు పాత్రులు కాగలరని వారు కోరారు.

నేడు హుండీ లెక్కింపు

బాసర: ప్రసిద్ధ పుణ్యక్షేత్రమైన బాసర శ్రీ జ్ఞాన సరస్వతి అమ్మవారికి భక్తులు కానుకల రూపంలో చెల్లించిన హుండీని మంగళవారం లెక్కించనున్నట్లు ఆలయ కార్యనిర్వహణాధికారి విజయ రామారావు తెలిపారు.

గుర్తుతెలియని మృతదేహం లభ్యం

నిర్మల్‌రూరల్‌: మండలంలోని ముఠాపూర్‌ గ్రామ శివారులోని వాగులో సోమవారం గుర్తు తెలియని వ్యక్తి మృతదేహం లభ్యమైనట్లు రూరల్‌ ఎస్సై లింబాద్రి తెలిపారు. మృతునికి సుమారు 45 సంవత్సరాలు ఉంటాయని, మృతదేహం కుళ్లిపోయి గుర్తుపట్టలేనంతగా ఉందన్నారు. వివరాలకు రూరల్‌ పోలీస్‌ స్టేషన్లో సంప్రదించాలని సూచించారు.