క్రీడల్లోనూ రాణించాలి

క్రీడల్లోనూ రాణించాలి

ఆదిలాబాద్‌: విద్యార్థులు చదువుతోపాటు క్రీడల్లోనూ రాణించాలని కలెక్టర్‌ రాజర్షి షా అన్నారు. జిల్లా కేంద్రంలోని ఇందిరా ప్రియదర్శిని స్టేడియంలో మంగళవారం నిర్వహించిన ఎస్సీ వసతి గృహ విద్యార్థుల క్రీడా పోటీల ముగింపు కార్యక్రమానికి ఆయన హాజరయ్యారు. విజేతలకు బహుమతి ప్రదానం చేశారు. ఈ సందర్భంగా కలెక్టర్‌ మాట్లాడుతూ, క్రీడలు శారీరక దృఢత్వంతో పాటు మానసిక ఆరోగ్యానికి దోహదం చేస్తాయన్నారు. నిరంతర సాధనతోనే విజయం సాధ్యమన్నారు. డీఎస్డీవో సునీత మాట్లాడుతూ, కబడ్డీ, వాలీబాల్‌, ఖోఖో, క్యారమ్స్‌, రన్నింగ్‌, స్కిప్పింగ్‌ పోటీలు నిర్వహించగా 250 మంది పాల్గొన్నట్లు తెలిపారు. కార్యక్రమంలో అదనపు కలెక్టర్‌ శ్యామలాదేవి, డీవైఎస్‌వో వెంకటేశ్వర్లు తదితరులు పాల్గొన్నారు..

రాష్ట్రస్థాయిలో మొదటి స్థానం అభినందనీయం

ఆదిలాబాద్‌టౌన్‌: రక్త సేకరణలో రిమ్స్‌ బ్లడ్‌ బ్యాంక్‌ రాష్ట్రస్థాయిలో అగ్రస్థానంలో నిలవడం అభినందనీయమని రిమ్స్‌ డైరెక్టర్‌ జైసింగ్‌ రాథోడ్‌ అన్నారు. మంగళవారం బ్లడ్‌బ్యాంక్‌ సిబ్బందిని ఆయన చాంబర్‌లో అభినందించారు. ఇదే స్ఫూర్తిని కొనసాగిస్తూ జాతీయ స్థాయిలోనూ అవార్డు పొందాలని ఆకాంక్షించారు. ఇందులో బ్లడ్‌ బ్యాంక్‌ మెడికల్‌ ఆఫీసర్‌ సుధాకర్‌, ప్రశాంత్‌, నర్సింగ్‌ సూపరింటెండెంట్‌ రమాదేవి, సంధ్యారాణి, సునిల్‌ కుమార్‌, సతీష్‌ రెడ్డి, షర్జిల్‌, సులేమాన్‌ పాల్గొన్నారు.