TV
మానవాళి రక్షకుడు క్రీస్తు
పెదకాకాని: మానవాళి రక్షకుడు క్రీస్తు అని బైబిల్‌ మిషన్‌ అధ్యక్షులు రెవరెండ్‌ జె.శామ్యేల్‌ కిరణ్‌ చెప్పారు.పెదకాకాని మండలంలోని ఆచార్య నాగార్జున యూనివర్సిటీ ఎదుట జరిగిన బైబిల్‌ మిషన్‌ మహోత్సవాలు బుధవారంతో ముగిశాయి. బైబిల్‌ మిషన్‌ అధ్యక్షులు, మహోత్సవాల కన్వీనర్‌ రెవరెండ్‌ జె.శామ్యేల్‌ కిరణ్‌ వాక్యోపదేశం చేశారు. దైవజనులు ఫాదర్‌ ఎం దేవదాస్‌ అయ్య చూపిన సువార్త మార్గంలో పయనిద్దామని, క్రైస్తవ రాజ్య స్థాపనకు నడుంబిగిద్దామని వివరించారు. వచ్చే ఏడాది బైబిల్‌ మిషన్‌ మహోత్సవం జనవరి 25 నుంచి 28వ తేదీ వరకు జరుగుతుందని వెల్లడించారు. మహోత్సవాల నిర్వహణకు సహకరించిన అందరికీ కృతజ్ఞతలు తెలిపారు. అనంతరం బైబిల్‌ మిషన్‌ మహోత్సవాల నివేదికను అందజేశారు.ముందుగా పశ్చిమగోదావరి జిల్లా సంగీత బృందం ప్రత్యేక గీతాలను ఆలపించింది. బైబిల్‌ మిషన్‌ జాయింట్‌ సెక్రెటరీ రెవరెండ్‌ ఎం. రవి, రెవరెండ్‌ డి.ఉజ్జీవం, రెవరెండ్‌ ఎ.తిమోతి రాజు, పాస్టర్‌ ఆర్‌.షాలేము రాజు దైవ సందేశాలు అందించారు. బైబిల్‌ మిషన్‌ వైస్‌ ప్రెసిడెంట్‌ రెవరెండ్‌ పి.జాన్‌ దేవదాసు మహోత్సవాల ఆఖరి ప్రార్థన చేశారు. మహోత్సవాల కన్వీనర్‌ రెవరెండ్‌ జె.శామ్యేల్‌ కిరణ్‌ ఆశీర్వాదంతో విజయోత్సవ శబ్దంతో మహోత్సవాలు ముగిశాయి. కార్యక్రమంలో బైబిల్‌ మిషన్‌ అధికారులు సెక్రటరీ కె.ప్రశాంత్‌ కుమార్‌, జాయింట్‌ సెక్రటరీలు డి.సుధాకర్‌, జె.ఆగమనరావు, ఎం రవి తదితరులు పాల్గొన్నారు.
Comments
Please login to add a commentAdd a comment