వైఎస్సార్‌ సీపీ జిల్లా అనుబంధ సంఘాల అధ్యక్షుల నియామకం

వైఎస్సార్‌ సీపీ జిల్లా అనుబంధ సంఘాల అధ్యక్షుల నియామకం

రాజమహేంద్రవరం సిటీ: వైఎస్సార్‌ సీపీ అధ్యక్షుడు జగన్‌మోహన్‌రెడ్డి ఆదేశాల మేరకు తూర్పుగోదావరి జిల్లాలో పార్టీ అనుబంధ విభాగాలకు అధ్యక్షులుగా పలువురిని నియమిస్తూ పార్టీ కేంద్ర కార్యాలయం బుధవారం ఉత్తర్వులు జారీ చేసింది. జిల్లాలోని కొవ్వూరు నియోజకవర్గంలో కంఠమనేని రమేష్‌ (యూత్‌ వింగ్‌), సీతారామయ్య సూరెడ్డి (ఎస్టీ సెల్‌) ఇంటి వీర్రాజు (ఆర్టీ్‌ఐ వింగ్‌), రాజానగరం నియోజకవర్గంలో కొండపల్లి దుర్గారావు (బీసీ సెల్‌), వల్లభశెట్టి వెంకట సత్యనారాయణ (సోషల్‌ మీడియా వింగ్‌), అడపాల వీర సత్యనారాయణ (పబ్లిసిటీ వింగ్‌ )రాజమహేంద్రవరం రూరల్‌ నియోజక వర్గంలో గొందేసి శ్రీనివాసులురెడ్డి (గ్రీవెన్స్‌ సెల్‌), పట్టా ఉత్తేజ్‌ (వలంటరీ వింగ్‌), ముత్యాల పోసికుమార్‌ (దివ్యాంగుల విభాగం) అనపర్తి నియోజకవర్గంలో పోలాటి వీర నాగేశ్వరరావు (పంచాయతీరాజ్‌ వింగ్‌) వల్లభశెట్టి రామసతీష్‌ (వాణిజ్య విభాగం), పెనుకొండ శ్రీనివాసరావు (వీవర్స్‌ వింగ్‌), కూసుమంచి కృష్ణంరాజు (కల్చరల్‌ వింగ్‌), నిడదవోలు నియోజకవర్గంలో మానుకొండ చంద్రబాబు (స్టూడెంట్స్‌ వింగ్‌), గోపిరెడ్డి శ్రీనివాసులు (మున్సిపల్‌ వింగ్‌), వేదల వెంకటేష్‌ (ఇంటెలెక్చ్యువల్స్‌ ఫోరం), గోపాలపురం నియోజకవర్గంలో సాలివేణు (ఎస్సీ సెల్‌), గుర్రాల లక్ష్మణరావు (బూత్‌ కమిటీ వింగ్‌)లకు జిల్లా అధ్యక్షులుగా నియమిస్తూ ఉత్తర్వులు జారీ అయ్యాయి.

ఈవీఎంల గోడౌన్‌ తనిఖీ

సీటీఆర్‌ఐ (రాజమహేంద్రవరం): కేంద్ర ఎన్నికల కమిషన్‌ ఆదేశాల మేరకు సాధారణ తనిఖీల్లో భాగంగా బుధవారం ఈవీఎం గోడౌన్‌ తనిఖీ చేశామని కలెక్టర్‌ పి.ప్రశాంతి తెలిపారు. రాజమహేంద్రవరంలోని లాలాచెరువు వద్ద గల ఎఫ్‌సీఐ గోడౌన్‌లో భద్రపరిచిన ఈవీఎం కేంద్రాన్ని ఆర్డీవో ఆర్‌.కృష్ణనాయక్‌ తో కలిసి కలెక్టర్‌ తనిఖీ నిర్వహించారు. ఈ సందర్భంగా కలెక్టర్‌ పి ప్రశాంతి ఈవీఎం భద్రతలో భాగంగా ఏర్పాటు చేసిన సీసీ కెమెరాల వివరాలను, సీసీటీవీ ఫుటేజ్‌ను పరిశీలించారు. ఈవీఎం గోడౌన్‌ వద్ద సెక్యూరిటీ షిఫ్ట్‌ల వివరాలను అడిగి తెలుసుకుని అనంతరం రిజిస్టర్‌లో సంతకం చేశారు. కలెక్టర్‌ వెంట రాజకీయ పార్టీ ప్రతినిధులు, అధికారులు ఉన్నారు.

బ్రిడ్జి కోర్సుకు

దరఖాస్తుల ఆహ్వానం

రాజమహేంద్రవరం రూరల్‌: పాలిటెక్నిక్‌ డిప్లమా కోర్సులో నేరుగా రెండవ సంవత్సరంలో చేరడానికి ఎస్‌బీటీఈటీ నిర్వహించే ప్రవేశ పరీక్షకు రాజమహేంద్రవరం ప్రభుత్వ ఐటీఐలో బ్రిడ్జి కోర్సు నిర్వహిస్తున్నారు. ఈ మేరకు జిల్లా ఐటీఐల కన్వీనరు, ప్రిన్సిపాల్‌ ఎల్‌.ఆర్‌.ఆర్‌. క్రిష్ణన్‌ బుధవారం ఒక ప్రకటనలో తెలిపారు. రెండు సంవత్సరాల ఐటీఐ కోర్సును చదివి ఉత్తీర్ణులైన వారిని ప్రామాణికంగా తీసుకొంటామన్నారు. కోర్సులో అభ్యర్థులకు ఫిజిక్స్‌, కెమిస్ట్రీ మ్యాథమెటిక్స్‌, సంబంధిత ల్యాబ్‌ ప్రాక్టికల్స్‌లో ఫిబ్రవరి 21వ తేదీ వరకు రాజమహేంద్రవరం ప్రభుత్వ ఐటీఐలో ఉచితంగా శిక్షణ ఇస్తామన్నారు. బ్రిడ్జి కోర్సు ప్రాక్టికల్‌ పరీక్షలు ఫిబ్రవరి 25, 26వ తేదీలలో నిర్వహిస్తామన్నారు. ఆసక్తి గల అభ్యర్థులు తమ అన్ని సర్టిఫికెట్స్‌ జిరాక్స్‌ కాపీలతో పాటు, ఆధార్‌, పాస్‌పోర్ట్‌ ఫొటోతో వెంటనే తమ కార్యాలయంలో సంప్రదించాలని తెలిపారు.

లెప్రసీ నివారణే లక్ష్యంగా

ప్రజలకు అవగాహన

కడియం: లెప్రసీ, క్షయ నివారణే లక్ష్యంగా ఆరోగ్య కార్యకర్తలు ప్రజలకు అవగాహన కల్పించాలని, అనుమానం ఉన్న వ్యక్తులు వెంటనే వైద్యులను సంప్రదించాలని జిల్లా అదనపు వైద్యాధికారి, జిల్లా టీబీ, లెప్రసీ, ఎయిడ్స్‌నివారణ అధికారి డాక్టర్‌ ఎన్‌.వసుంధర వైద్య సిబ్బందికి సూచించారు. బుధవారం ఆమె కడియంలోని ఇమ్మానుయేల్‌ లెప్రసీ కాలనీ సందర్శించి అక్కడ పేషెంట్లకు వైద్య పరీక్షలు నిర్వహించి, మందులు పంపిణీ చేశారు. ఏఎన్‌ఎంలు, ఆశా కార్యకర్తలు పాల్గొన్నారు.

ఘనంగా ప్రత్యంగిర హోమం

అన్నవరం: రత్నగిరి వనదేవత వనదుర్గ అమ్మవారికి పుష్య అమావాస్య పర్వదినం సందర్భంగా బుధవారం ప్రత్యంగిర హోమం ఘనంగా నిర్వహించారు. వనదుర్గ అమ్మవారి ఆలయంలో ఉదయం తొమ్మిది గంటలకు పండితులు ప్రత్యేక పూజలు చేసిన అనంతరం ప్రత్యంగిర హోమం ప్రారంభించారు. అనంతరం 11–15 గంటలకు హోమగుండంలో హోమ ద్రవ్యాలను సమర్పించి పూర్ణాహుతి నిర్వహించారు.