రజనీ చాయ్‌

సూపర్‌స్టార్‌ రజనీకాంత్‌ ఒక్కోసారి విసుగుపుట్టి హిమాలయాలకు వెళుతుంటారు. ఈసారి కొచ్చిన్‌లో టీ అమ్ముకుంటున్నారా? అవుననే కొంతమంది కంగారు పడ్డారు. తీరా చూస్తే ‘దక్కేది దక్కకుండా పోదు... దక్కనిది ఎప్పటికీ దక్కదు’ అని డైలాగ్‌ కొడుతూ తనకు దక్కిన టీ స్టాల్‌ను నడుపుకుంటున్న ఓ వ్యక్తి... ఇంకేముంది... నెట్‌లో హల్‌చల్‌.

కొచ్చిన్‌లో ఏదో షూటింగ్‌ కోసం వెళ్లిన సినిమా యూనిట్‌ వారు అతణ్ణి చూసి ఆగిపోయారు. రజనీకాంత్‌! టీ అమ్ముతూ. రజనీకాంత్‌ సాధారణ జీవితాన్ని ఇష్టపడతాడని అందరికీ తెలుసు. కొంపదీసి టీ అమ్ముతున్నాడా? పరిశీలించి చూశారు. కాదు. రజనీకాంత్‌లానే ఉన్నాడు. పలకరిస్తే అచ్చు రజనీకాంత్‌లానే నవ్వుతున్నాడు. పేరు సుధాకర్‌ ప్రభు. ఫోర్ట్‌ కొచ్చిన్‌ పట్టాలం రోడ్డులో ‘వెంకటేశ్వర హోటల్‌’ అనే ప్యూర్‌ వెజిటేరియన్‌ హోటల్‌ నడుపుతున్నాడు. లెమన్‌ టీ చేయడంలో దిట్ట.

మొన్న మొన్నటి వరకూ ఎవరూ అతణ్ణి రజనీకాంత్‌తో పోల్చలేదు కాని ఈ మధ్య గెడ్డానికి రంగేయడం మాని, కళ్లద్దాలు మార్చేసరికి అచ్చు రజనీ గెటప్‌లోకి వచ్చేశాడు. నాదిర్‌షా అనే మలయాళం డైరెక్టర్‌ ఇతణ్ణి ఫేస్‌బుక్‌లో పెట్టేసరికి వైరల్‌ అయ్యాడు. అప్పటినుంచి ఇతని వీడియోలు వైరల్‌ అవుతున్నాయి. కేరళలో ఇతణ్ణి ఫంక్షన్స్‌కు కూడా ఆహ్వానిస్తున్నారు. ‘మా పిల్లలు పెద్దగా పట్టించుకోరుగాని నేను రజనీ అన్ని సినిమాలు చూస్తుంటా’ అంటాడు. ఈ పాపులారిటీ పెరిగి అతని హోటల్‌కు కస్టమర్లు పెరిగితే అదే పది ప్లేట్లు.