శక్తిమాన్‌.. హనుమాన్‌

శక్తిమాన్‌.. హనుమాన్‌

తెనాలి: రూరల్‌ మండల గ్రామం పెదరావూరు శివారులోని వ్యవసాయ క్షేత్రంలో నిర్మాణంలో ఉన్న శ్రీగణపతి సచ్చిదానంద ఆశ్రమం, కార్యసిద్ధి హనుమాన్‌ టెంపుల్‌ను మైసూరు దత్తపీఠాధిపతి శ్రీఅవధూత గణపతి సచ్చిదానందస్వామి సోమవారం సందర్శించారు. అప్పటికే సర్వాంగ సుందరంగా నిర్మితమైన ‘గురు నిలయం’ను దర్శించారు. హనుమాన్‌ ఆలయం కోసం ఏకశిలతో తీర్చిదిద్దిన 18 అడుగుల హనుమంతుని విగ్రహాన్ని శ్రీగణపతి సచ్చిదానందస్వామి ఆవిష్కరించారు. పెదరావూరుకు చెందిన కొడాలి విఠల్‌బాబు భార్య రాధ, కుమారుడు శివతేజ దత్తస్వామి ఆశ్రమం కోసం నాలుగు ఎకరాల వ్యవసాయ క్షేత్రాన్ని స్వామివారికి సమర్పించారు. అదే ఆశ్రమంలో హనుమాన్‌ ఆలయాన్ని నిర్మిస్తారు. అప్పుడే విగ్రహ ప్రతిష్ట జరుగుతుందని తెలిపారు. ఈ సందర్భంగా భక్తులు శ్రీగణపతి సచ్చిదానంద స్వామికి ఘనంగా స్వాగతం పలికారు. స్వామీజీ పీఠానికి గృహ సమర్పణ చేశారు. అనంతరం రామలింగేశ్వరపేటకు చెందిన కొడవటిగంటి భరతశాస్త్రి నివాసానికి వెళ్లి, కుటుంబ సభ్యులకు ఆశీస్సులు అంద జేశారు.

మానవ జన్మ కదిలే వృక్షం

సాయంత్రం తెనాలి చెంచుపేటలోని శ్రీపద్మావతి కల్యాణ మండపంలో భక్తులనుద్దేశించి స్వామి అనుగ్రహభాషణ చేశారు. మానవ జన్మ కదిలే వృక్షంగా చెబుతూ, ఎంతో విలువైన వృక్షమే మానవజన్మ అన్నారు. దేవుడు ప్రసాదించిన మానవ జన్మను ఆధ్యాత్మిక కార్యక్రమాలతో ముందుకు నడిపించాలని సూచించారు. హనుమంతుడు గొప్ప స్వయం సేవకుడని చెప్పారు. మనకు సేవ విధానాన్ని, భక్తిని నేర్పించారని తెలిపారు. అందరూ ఆ సేవాభక్తి మార్గంలో ముందుకు వెళ్లాలని సూచించారు. డబ్బు ఉండి ఏం ప్రయోజనం లేదని, భగవంతుడి అనుగ్రహం ఉండాలని చెప్పారు. కొంత మందికి చేతికి అందినది నోటికి రాదని చెబుతూ డబ్బులు ఉన్నా సేవ చేయలేరని తెలిపారు. పెదరావూరులోని అద్భుతమైన ఆంజనేయస్వామి ఆలయాన్ని దర్శించుకుని ప్రతి ఒక్కరూ ఆయన కృపకు పాత్రులై మంచి మార్గంలో నడవాలని శ్రీ గణపతి సచ్చిదానంద స్వామి సూచించారు.దత్త ఆశ్రమానికి పెదరావూరులో నాలుగు ఎకరాల స్థలం ఇచ్చిన కొడాలి విఠల్‌ బాబు సతీమణి రాధ, కుమారుడు శివతేజకు స్వామీజీ ఆశీస్సులు అందజేశారు. 18 అడుగుల ఆంజనేయ స్వామి విగ్రహాన్ని ఇచ్చిన గవిని రాజేంద్ర, ప్రసూనను ఆశీర్వదించారు. స్థానిక ప్రముఖులు కల్లూరి వెంకట సూర్యనారాయణమూర్తి, కుమార్‌ పంప్స్‌ కొత్త సుబ్రహ్మణ్యం, నన్నపనేని రాజకుమారి, శశి గ్రూప్‌ అధినేత వుప్పల వరదరాజులు, డీఎస్పీ బి.జనార్దనరావు, పరిసర ప్రాంతాలకు చెందిన భక్తులు పాల్గొన్నారు.

పెదరావూరు ఆశ్రమంలో 18 అడుగుల ఏకశిలా విగ్రహం ఆవిష్కరించిన గణపతి సచ్చిదానందస్వామి