మారమ్మకు విశేష పూజలు

మారమ్మకు విశేష పూజలు

బొమ్మనహళ్లి: నగరంలోని బొమ్మనహళ్ళిలోని పరంగిపాళ్యలో గ్రామదేవత మారమ్మ దేవి ఆలయంలో సోమవారం విశేష పూజలు జరిగాయి. అమ్మవారి విగ్రహానికి అర్చకులు అభిషేకం చేసి పుష్పహారాలతో అలంకరించారు. వందలాదిగా భక్తులు అమ్మవారిని దర్శించుకున్నారు.

మాకు టీడీఆర్‌ ఇవ్వండి:

ఎంపీ యదువీర్‌

మైసూరు: బెంగళూరు నగరంలో ఉన్న బెంగళూరు ప్యాలెస్‌ స్థలం విషయంలో రాష్ట్ర ప్రభుత్వం మాకు పరిహారం ఇవ్వకపోయినా, అందుకు బదులుగా టీడీఆర్‌ను ఇస్తే చాలని రాజ వంశీకుడు, ఎంపీ యదువీర్‌ కృష్ణదత్త చామరాజ ఒడెయార్‌ కోరారు. సోమవారం నంజనగూడు వద్దనున్న సుత్తూరు మఠంలో ఆయన మీడియాతో మాట్లాడారు. ప్రభుత్వం టీడీఆర్‌ ను ఒక సర్టిఫికెట్‌ రూపంలో ఇవ్వాలి తప్ప ఒక్క పైసా కూడా పరిహారం ఇవ్వాల్సిన పని లేదన్నారు. కానీ ప్రభుత్వం టీడీఆర్‌ను ఇవ్వడం లేదని, దానికి బదులుగా ప్రజలను తప్పు దారి పట్టించే పనిలో ఉందని దుయ్యబట్టారు. ఇందులో చట్టపరంగా పోరాటానికి సిద్ధమని అన్నారు.

రుణ సంస్థల

వేధింపులను ఆపాలి

మండ్య: మండ్య నగరంతో పాటు జిల్లాలో మైక్రో ఫైనాన్స్‌ సిబ్బంది వేధింపులు ఎక్కువవయ్యాయి. పేద కుటుంబాలవారు ఇబ్బందులు పడుతున్నారని, వారిని ప్రభుత్వమే ఆదుకోవాలని కర్ణాటక రక్షణ వేదిక కార్యకర్తలు డిమాండ్‌ చేశారు. మండ్య నగరంలోని కలెక్టరేట్‌ ముందు ధర్నా చేసి మైక్రో ఫైనాన్స్‌ సంస్థలకు వ్యతిరేకంగా నినాదాలు చేశారు. అనంతరం జిల్లాధికారిని కలిసి వినతిపత్రం ఇచ్చారు. మైక్రో ఫైనాన్స్‌ సిబ్బంది వేధింపులకు అడ్డుకట్ట వేయాలని కోరారు.

బాలున్ని అమ్మేశారు

● ముఠా అరెస్టు

దొడ్డబళ్లాపురం: ఐదేళ్ల బాలున్ని విక్రయించిన కేసులో హుక్కేరి పోలీసులు ఇద్దరు మహిళలను, మరొక వ్యక్తిని అరెస్టు చేశారు. సంగీత హమ్మనవర్‌, మోహన్‌ తావడె, ఇతని భార్య సంగీత అరెస్టయిన నిందితులు. వీరి ముఠాలో ఉన్న నందకుమార్‌, నందిని పరారీలో ఉన్నారు. బెళగావి జిల్లా సుల్తాన్‌పురకు చెందిన అర్చన, రాజు దంపతుల కుమారుడైన బాలున్ని నిందితులు అపహరించారు. మహారాష్ట్రలోని రత్నగిరి జిల్లాకు చెందిన నందకుమార్‌, నందిని దంపతులకు రూ.3.50 లక్షలకు బాలున్ని అమ్మేశారు. బాలుని తల్లిదండ్రుల ఫిర్యాదు పోలీసులు దర్యాప్తు చేసి నిందితులను అరెస్టు చేశారు. వీరు గతంలోనూ పిల్లలను కిడ్నాప్‌ చేసి విక్రయించారని ఆరోపణలున్నాయి.

బడిలో బాలిక

గుండెపోటుతో మృతి

మైసూరు: ప్రాణాంతక కరోనా విపత్తు వచ్చాక గుండెపోటు చిన్నవయసు వారిని సైతం కబళిస్తోంది. బాలిక ఒకరు మరణించిన ఘటన మైసూరు జిల్లాలోని పిరియాపట్టణ తాలూకా కళ్లూరులో జరిగింది. నాగరాజు, వసంతల కుమార్తె దీపిక (15) రావందూరులోని కర్ణాటక పబ్లిక్‌ పాఠశాలలో 10వ తరగతి చదువుతోంది. ఆమెకు ఎలాంటి అనారోగ్యం లేదు, సోమవారం బడికి వెళ్ళిన బాలిక తరగతిలోనే కుప్పకూలిపోయింది. వెంటనే సిబ్బంది బాలికను ఆస్పత్రికి తరలించారు. కానీ దారిలో బాలిక కన్నుమూసిందని వైద్యులు తెలిపారు. చలాకీగా బడికి వెళ్లిన కూతురు విగతజీవిగా మారడం చూసి తల్లిదండ్రులు కన్నీరుమున్నీరుగా విలపించారు.

1/3

మారమ్మకు విశేష పూజలు

2/3

మారమ్మకు విశేష పూజలు

3/3

మారమ్మకు విశేష పూజలు