బీజేపీ, టీడీపీ అభ్యర్థుల ఖరారు

సాక్షి ప్రతినిధి, ఆదిలాబాద్ :  సార్వత్రిక ఎన్నికల్లో పోటీ చేయనున్న బీజేపీ, టీడీపీ అభ్యర్థుల జాబితాను ఆయా పార్టీల అధిష్టానాలు మంగళవారం అర్ధరాత్రి ప్రకటించాయి. టీడీపీతో పొత్తులో భాగంగా జిల్లాలోని మంచిర్యాల, ఆదిలాబాద్, ముథోల్ నియోజకవర్గాలు బీజేపీకి దక్కాయి. మంచిర్యాల నుంచి బీజేపీ అభ్యర్థిగా మల్లారెడ్డిని బరిలోకి దింపుతోంది. ఆదిలాబాద్ నుంచి పాయల శంకర్, ముథోల్ నుంచి రమాదేవిల అభ్యర్థిత్వాన్ని బీజేపీ ఖరారు చేసింది.

అయితే బోథ్ నియోజకవర్గానికి సంబంధించి ఇరు పార్టీలు తమ అభ్యర్థులను బరిలోకి దింపుతున్నాయి. బీజేపీ నుంచి మడావి శ్రీలత పోటీ చేస్తున్నట్లు బీజేపీ ప్రకటించగా, ఇదే స్థానం నుంచి సోయం బాపురావును టీడీపీ బరిలోకి దించుతోంది. కాగా,  తెలుగుదేశం పార్టీ అభ్యర్థుల జాబితాను మంగళవారం రాత్రి ప్రకటించింది. పెద్దపల్లి లోక్‌సభ స్థానానికి టీడీపీ అభ్యర్థిగా జనపాటి శరత్‌బాబు పేరును ఖరారు చేసింది. బెల్లంపల్లి స్థానానికి పాటి సుభద్ర, సిర్పూర్ స్థానానికి రావి శ్రీనివాస్, ఖానాపూర్‌కు రితేశ్ రాథోడ్‌లను బరిలోకి దించాలని టీడీపీ నిర్ణయించింది.