పోలీసుల అదుపులో ఆర్కే?

మావోయిస్టు అగ్రనేత, కేంద్ర కమిటీ సభ్యుడు అక్కిరాజు హరగోపాల్ (ఆర్కే)ను పోలీసులు అదుపులోకి తీసుకున్నారా? ఆంధ్రా ఒడిషా సరిహద్దులలోని మల్కన్‌గిరి జిల్లా అటవీ ప్రాంతంలో జరిగిన భారీ ఎన్‌కౌంటర్ సందర్భంగానే ఆర్కే సహా పలువురు అగ్రనేతలను పోలీసులు అదుపులోకి తీసుకున్నారని విరసం నాయకుడు వరవరరావు ఆరోపించారు. వాళ్లందరినీ వెంటనే కోర్టులో హాజరు పరచాలని ఆయన డిమాండ్ చేశారు. ఆర్కేకు ఏం జరిగినా తెలుగుదేశం ప్రభుత్వానిదే బాధ్యత అవుతుందని ఆయన హెచ్చరించారు. తెలంగాణ డెమొక్రాటిక్ ఫోరం కన్వీనర్లు ప్రొఫెసర్ హరగోపాల్, పీఎపల్ విశ్వేశ్వరరావు, జైని మాలయ్య, జస్టిస్ చంద్రకుమార్, చిక్కుడు ప్రభాకర్, బండి దుర్గాప్రసాద్, బళ్ల రవీందర్, కోట శ్రీనివాస్ తదితరులు కూడా ఆర్కేను వెంటనే కోర్టులో ప్రవేశపెట్టాలని డిమాండ్ చేశారు.  అయితే.. ఆర్కే తమ అదుపులో లేరని ఆంధ్రప్రదేశ్ డీజీపీ సాంబశివరావు ఇంతకుముందు చెప్పారు.