న్యూఢిల్లీ: నాలుగేళ్ల తర్వాత జరగనున్న 2028 లాస్‌ ఏంజెలిస్‌ ఒలింపిక్స్‌ కోసం ప్రణాళికలు సిద్ధంగా ఉన్నాయని భారత స్టార్‌ షూటర్‌ మనూ భాకర్‌ వెల్లడించింది. పారిస్‌ ఒలింపిక్స్‌లో రెండు కాంస్య పతకాలు సాధించిన మనూ బుధవారం స్వదేశానికి తిరిగి వచి్చంది. స్థానిక ఇందిరాగాంధీ అంతర్జాతీయ విమానాశ్రయంలో మనూ భాకర్, ఆమె కోచ్‌ జస్పాల్‌ రాణాకు ఘనస్వాగతం లభించింది. 22 ఏళ్ల మనూ భాకర్‌ పారిస్‌ ఒలింపిక్స్‌లో 10 మీటర్ల ఎయిర్‌ పిస్టల్‌ వ్యక్తిగత విభాగంతో పాటు మిక్స్‌డ్‌ విభాగంలో కాంస్య పతకాలు గెలుచుకొని.. ఒకే ఒలింపిక్స్‌లో రెండు పతకాలు నెగ్గిన తొలి భారత మహిళగా రికార్డు నెలకొలి్పన విషయం తెలిసిందే. ఈ సందర్భంగా మనూ భాకర్‌ మాట్లాడుతూ. ‘పారిస్‌ ఒలింపిక్స్‌ ముగింపు దశకు చేరుకున్నాయి. నేనప్పుడే 2028 లాస్‌ ఏంజెలిస్‌ క్రీడల కోసం ప్రయాణం ప్రారంభించా. కాస్త విరామం అనంతరం సాధన మొదలుపెడతాను. భవిష్యత్తులోనూ ఇదే నిలకడ చూపేందుకు ప్రయతి్నస్తా. అందుకోసం మరింత శ్రమిస్తా. కాకపోతే ఇప్పుడు కొంతకాలం కుటుంబ సభ్యులతో గడుపుతాను. మూడు నెలల తర్వాత తిరిగి షూటింగ్‌ ప్రాక్టీస్‌ ప్రారంభిస్తా’ అని ఆమె వెల్లడించింది. విశ్వక్రీడల్లో రెండు పతకాలు సాధించడంతో పాటు 25 మీటర్ల పిస్టల్‌ వ్యక్తిగత విభాగంలో త్రుటిలో పతకం చేజార్చుకున్న మనూ భాకర్‌.. శనివారం తిరిగి పారిస్‌ వెళ్లనుంది. ఒలింపిక్స్‌ ముగింపు వేడుకల్లో మనూ భారత బృందానికి పతాకధారిగా వ్యవహరించనుంది.

ప్రపంచకప్‌ షూటింగ్‌ టోర్నమెంట్‌లో భారత్‌కు ఐదో పతకం లభించింది. కైరోలో జరుగుతున్న ఈ టోరీ్నలో మహిళల 10 మీటర్ల ఎయిర్‌ రైఫిల్‌ వ్యక్తిగత విభాగంలో సోనమ్‌ మస్కర్‌ రజత పతకం సాధించింది. మహారాష్ట్రకు చెందిన 21 ఏళ్ల సోనమ్‌కు ఇదే తొలి ప్రపంచకప్‌ టోర్నీ కావడం విశేషం. ఎనిమిది మంది షూటర్లు పోటీపడ్డ ఫైనల్లో సోనమ్‌ 252.1 పాయింట్లతో రెండో స్థానంలో నిలిచింది. అనా జాన్సెన్‌ (జర్మనీ; 253 పాయింట్లు) స్వర్ణం, అనెటా స్టాన్‌కివిజ్‌ (పోలాండ్‌; 230.4 పాయింట్లు) కాంస్యం గెలిచారు.    

భారత  షూటర్‌ దివ్యాంశ్‌ సింగ్‌ పన్వర్‌ 10 మీటర్ల ఎయిర్‌ రైఫిల్‌ ఫైనల్స్‌ విభాగంలో కొత్త ప్రపంచ రికార్డు సృష్టించాడు. కైరోలో జరుగుతున్న ప్రపంచకప్‌ షూటింగ్‌ టోరీ్నలో ఆదివారం జరిగిన ఫైనల్లో 21 ఏళ్ల దివ్యాంశ్‌ 253.7 పాయింట్లు స్కోరు చేసి స్వర్ణ పతకం నెగ్గాడు. గత ఏడాది ఆసియా క్రీడల్లో చైనా షూటర్‌ షెంగ్‌ లిహాయో 253.3 పాయింట్ల తో నెలకొల్పిన ప్రపంచ రికార్డును దివ్యాంశ్‌ బద్దలు కొట్టాడు.

ఆసియా ఒలింపిక్‌ షాట్‌గన్‌ షూటింగ్‌ టోర్నీలో భారత షూటర్‌ లక్ష్య షెరోన్‌ కాంస్య పతకం సాధించాడు. కువైట్‌ సిటీలో జరుగుతున్న ఈ టోర్నీలో పురుషుల ట్రాప్‌ ఈవెంట్‌ వ్యక్తిగత విభాగంలో లక్ష్య మూడో స్థానంలో నిలిచాడు. ఈ ఈవెంట్‌లో లక్ష్య పతకం సాధించినప్పటికీ  పారిస్‌ ఒలింపిక్స్‌ బెర్త్‌ సంపాదించలేకపోయాడు. ఒలింపిక్స్‌ బెర్త్‌ను లక్ష్య తృటిలో కోల్పోయాడు. ఆరుగురు షూటర్లు ఎలిమినేషన్‌ పద్ధతిలో పోటీపడ్డ ఫైనల్లో 25 ఏళ్ల లక్ష్య 33 పాయింట్లు స్కోరు చేశాడు. ఇరాన్‌కు చెందిన 15 ఏళ్ల కుర్రాడు మొహమ్మద్‌ బెరాన్‌వంద్‌ స్వర్ణం, 32 ఏళ్ల చైనా షూటర్‌ గువో యుహావో రజతం సాధించి పారిస్‌ ఒలింపిక్స్‌కు అర్హత సాధించారు. 

ప్రపంచ షూటింగ్‌ చాంపియన్‌షిప్‌లో భారత షూటర్‌ రిథమ్‌ సాంగ్వాన్‌ కొత్త ప్రపంచ రికార్డును సృష్టించింది. అజర్‌బైజాన్‌లోని బాకులో జరుగుతున్న ఈ పోటీల్లో మహిళల 25 మీటర్ల పిస్టల్‌ ఈవెంట్‌లో రిథమ్‌ 595 పాయింట్లు స్కోరు సాధించి రికార్డును నమోదు చేసింది. అయితే ఈ పోటీల క్వాలిఫయింగ్‌ ఈవెంట్‌లో ఆమె ఈ కొత్త ఘనతను ప్రదర్శించింది. రికార్డు స్కోరుతో ఫైనల్‌ చేరిన రిథమ్‌ అసలు సమరంలో మాత్రం విఫలమైంది. సత్తా చాటలేకపోయిన ఆమె చివరగా ఎనిమిదో స్థానంతో సరిపెట్టుకుంది. ఇదే ఈవెంట్‌ క్వాలిఫయింగ్‌ ఇతర భారత షూటర్లు ఇషాసింగ్, మను భాకర్‌ వరుసగా 13వ, 27వ స్థానాల్లో నిలిచి ఆరంభంలోనే ని్రష్కమించారు. పురుషుల 50 మీటర్ల 3 పొజిషన్‌ రైఫిల్‌ ఈవెంట్‌లో కూడా భారత షూటర్లెవరూ ఫైనల్స్‌కు అర్హత సాధించలేకపోయారు.    

ప్రపంచకప్‌ షాట్‌గన్‌ షూటింగ్‌ టోర్నమెంట్‌లో మహిళల స్కీట్‌ ఈవెంట్‌లో భారత షూటర్‌ గనీమత్‌ సెఖోన్‌ జాతీయ రికార్డును సమం చేసింది. దోహాలో జరుగుతున్న ఈ టోర్నీలో చండీగఢ్‌కు చెందిన 22 ఏళ్ల గనీమత్‌ క్వాలిఫయింగ్‌లో 125 పాయింట్లకుగాను 120 పాయింట్లు స్కోరు చేసింది. అయితే ఆమె ఫైనల్‌కు అర్హత సాధించలేకపోయింది. షూట్‌ ఆఫ్‌లో గనీమత్‌ గురి తప్పి టాప్‌–8లో నిలువలేకపోయింది. భారత్‌కే చెందిన దర్శన రాథోడ్‌ 117 పాయింట్లతో 25వ స్థానంలో, మహేశ్వరి చౌహాన్‌ 116 పాయింట్లతో 28వ స్థానంలో నిలిచారు. 

2000 సిడ్నీ ఒలింపిక్స్‌.. 18 ఏళ్ల వయసులో పతకం ఆశలతో బరిలోకి దిగిన అతనికి ఏదీ కలిసి రాలేదు. చివరకు దక్కింది 11వ స్థానం. కనీసం ఫైనల్స్‌కు కూడా అర్హత సాధించలేదు. 2004 ఏథెన్స్‌ ఒలింపిక్స్‌.. ఈసారి తన ఆట ఎంతో మెరుగైందని భావిస్తూ లక్ష్యం దిశగా ముందుకెళ్లాడు.. కానీ ఈసారి 7వ స్థానంతో సరిపెట్టుకోవాల్సి వచ్చింది! ఒక వ్యక్తిగత క్రీడాంశంలో, అదీ మానసికంగా ఎంతో దృఢంగా  ఉండాల్సిన ఆటలో, రెండు ఒలింపిక్స్‌లో వరుస వైఫల్యాల తర్వాత వెంటనే కోలుకొని తర్వాతి నాలుగేళ్ల కాలానికి లక్ష్యాలు పెట్టుకొని సిద్ధం కావడం అంత సులువు కాదు. కానీ ఆ ఆటగాడి పట్టుదల ముందు ప్రతికూలతలన్నీ తలవంచాయి.  బీజింగ్‌లో అతని బుల్లెట్‌ గురి తప్పలేదు. సరిగ్గా టార్గెట్‌ను తాకి పసిడి పతకాన్ని అతని మెడలో వేసింది. ఒలింపిక్స్‌ చరిత్రలో ఏ భారత ఆటగాడికి సాధ్యం కాని ఘనతను అందించింది. ఆ శూరుడే అభినవ్‌ బింద్రా. ఒలింపిక్స్‌లో వ్యక్తిగత విభాగంలో స్వర్ణం గెలిచిన తొలి భారతీయుడు. ఆటలో అద్భుతాలు చేయగానే మనలో చాలా మందికి సహజంగానే అతని నేపథ్యంపైనే ఆసక్తి పెరుగుతుంది. అయితే విజయగాథలన్నీ పేద కుటుంబం నుంచో, మధ్యతరగతి కుటుంబాల నుంచో మొదలు కావాలనేం లేదు.. కోటీశ్వరుడైనా క్రీడల్లోకి వెళితే స్కోరు సున్నా నుంచే మొదలవుతుంది. అందుకే ఎక్కువగా వినిపించే సాధారణ స్థాయి నుంచి శిఖరానికెదిగిన లాంటి కథ కాదు బింద్రా జీవితం. అతను ఐశ్వర్యంలో పుట్టాడు. దేశంలోనే టాప్‌ స్కూల్లో ఒకటైన ‘డూన్‌ స్కూల్‌’లో చదువుకున్నాడు. ఉన్నత విద్యను అమెరికాలోని కొలరాడో యూనివర్సిటీలో అభ్యసించాడు. తిరిగొచ్చి తండ్రి వ్యాపార సామ్రాజ్యాన్ని నడిపించడమే తరవాయి.. కానీ బింద్రా మరో బాటను ఎంచుకున్నాడు. అది కూడా సరదా కోసమో, వ్యాపారంలో అలసిపోయాక వారాంతంలో టైమ్‌ పాస్‌గా ఆడుకునేందుకో కాదు. ఆటలో అగ్రస్థానానికి చేరేందుకు అడుగు పెట్టాడు. అందుకే పగలు, రాత్రి కష్టపడ్డాడు. ఒక వ్యాపారవేత్తగా సాధించే కోట్లతో పోలిస్తే అంతకంటే విలువైన దానిని అందుకున్నాడు. కోట్లాది భారతీయుల ప్రతినిధిగా, వారంతా గర్వపడేలా తన రైఫిల్‌తో సగర్వంగా విశ్వ క్రీడా వేదికపై జనగణమన వినిపించాడు.  చిరస్మరణీయం డబ్బుంటే చాలు క్రీడల్లోకి వెళ్లిపోవడం చాలా సులువు అనే అభిప్రాయం మన దేశంలో బలంగా పాతుకుపోయింది. నిజానికి అలాంటి వాళ్లు ఆటల్లో రాణించాలంటే ఇతరులతో పోలిస్తే ఎన్నో రెట్లు ఎక్కువ ప్రేరణ ఉండాలి. అన్నీ అందుబాటులో ఉన్నప్పుడు ఏదైనా సాధించాలనే లక్ష్యం, పట్టుదల కొత్తగా పుట్టుకురావాలి. సరిగ్గా చెప్పాలంటే చుట్టూ ఉన్న సకల సౌకర్యాలు, విలాసాలకు ఆకర్షితులవకుండా ఏకాగ్రత చెదరకుండా పోటీల్లో దిగాలి. అలా చూస్తే మా అభినవ్‌ సాధించిన ఘనత అసాధారణం. దాని విలువ అమూల్యం’ బింద్రా స్వర్ణ పతకం సాధించిన తర్వాత అతని కుటుంబ మిత్రుడొకరు చేసిన వ్యాఖ్య ఇది. నిజంగానే ఆ సమయంలో గానీ, ఆ తర్వాత గానీ బింద్రా.. తన నేపథ్యం వల్లే ఎదిగాడనే మాటను చెప్పేందుకు ఏ ఒక్కరూ సాహసించలేదు. ఎందుకంటే 2008 ఆగస్టు 11న బీజింగ్‌ ఒలింపిక్స్‌లో బింద్రా స్వర్ణ పతకం గెలుచుకున్నాడనే వార్త విన్న తర్వాత హృదయం ఉప్పొంగని భారతీయుడు లేడంటే అతిశయోక్తి కాదు. ఎప్పుడో 1980 మాస్కో ఒలింపిక్స్‌లో అదీ టీమ్‌ గేమ్‌ హాకీలో భారత జట్టు చివరిసారిగా స్వర్ణం సాధించిందని జనరల్‌ నాలెడ్జ్‌ పుస్తకాల్లో, క్విజ్‌ పోటీల్లో వింటూ వచ్చిన కొత్త తరానికి ఒలింపిక్స్‌ గోల్డ్‌ మెడల్‌ విలువేమిటో అప్పుడే తెలిసింది.  ఇల్లే షూటింగ్‌ రేంజ్‌గా.. షూటింగ్‌ ధనవంతులు మాత్రమే ఆడుకునే ‘ఎలీట్‌ పీపుల్స్‌ గేమ్‌’. ఇందులో వంద శాతం వాస్తవం ఉంది. గన్స్‌ మొదలు పోటీల్లో వాడే బుల్లెట్స్, జాకెట్, అనుమతులు, పన్నులు.. ఇలా అన్నీ బాగా డబ్బులతో కూడుకున్న వ్యవహారమే. అభినవ్‌ తండ్రి అప్‌జిత్‌ బింద్రా పెద్ద వ్యాపారవేత్త. పంజాబ్‌లో ఆగ్రో ఫుడ్‌ బిజినెస్, హోటల్స్‌ వ్యాపారంలో పెద్ద పేరు గడించాడు. కొడుకు తాను షూటింగ్‌ ప్రాక్టీస్‌కు వెళతానని చెబితే తొలుత ఆయన కూడా సరదా వ్యాపకంగానే చూశాడు. కానీ అభినవ్‌ మొదటి రోజు నుంచి కూడా దానిని ప్రొఫెషనల్, కాంపిటీటివ్‌ స్పోర్ట్‌గానే భావించాడు. అందుకే సాధన మాత్రమే కాదని ఫలితాలు కూడా ముఖ్యమని అతని మనసులో బలంగా నాటుకుపోయింది. అందుకే తన అభిప్రాయాన్ని నిక్కచ్చిగా చెప్పేశాడు. దాంతో తండ్రికి కూడా కొడుకు లక్ష్యాలపై స్పష్టత వచ్చింది. అందుకే ప్రోత్సహించేందుకు సిద్ధమైపోయాడు. చండీగఢ్‌లోని తమ ఇంట్లోనే అంతర్జాతీయ స్థాయి ప్రమాణాలతో కూడిన షూటింగ్‌ రేంజ్‌ ఏర్పాటు చేసేశాడు. అభినవ్‌కు 24 గంటలు అదే అడ్డా అయింది. అన్నీ మరచి ప్రాక్టీస్‌లోనే మునిగాడు. జాతీయ స్థాయిలో వరుస విజయాలతో భారత జట్టులో చోటు దక్కింది. 1998 కామన్వెల్త్‌ క్రీడల్లో పతకం రాకున్నా, భారత్‌ నుంచి పాల్గొన్న పిన్న వయస్కుడిగా (16 ఏళ్లు) గుర్తింపు పొందాడు.   2002 కామన్వెల్త్‌ క్రీడల్లో తొలి పతకం వచ్చినా అది ‘పెయిర్స్‌’ విభాగంలో కాబట్టి అంతగా సంతృప్తినివ్వలేదు. రెండు ఒలింపిక్స్‌ వచ్చి పోయాయి కానీ ఫలితం దక్కలేదు. ఏదైనా సాధించాలనే తపన పెరిగిపోతోంది కానీ సాధ్యం కావడం లేదు. 2005కు వచ్చే సరికి వెన్ను గాయం దెబ్బ కొట్టింది. దాదాపు ఏడాది పాటు గన్‌ కూడా ఎత్తలేకపోయాడు.  ప్రాక్టీస్‌.. ప్రాక్టీస్‌.. తేదీలు మారుతున్నా పెద్ద ఘనత సాధించలేకపోవడంతో బింద్రా మనసులో మథనం మొదలైంది. తాను ఎక్కడ వెనుకబడుతున్నాడో గుర్తించాడు. అసాధారణమైన ఏకాగ్రత అవసరం ఉండే క్రీడ షూటింగ్‌. మిల్లీ సెకండ్‌ దృష్టి చెదిరినా పతకం సాధించే స్థితినుంచి నేరుగా పాతాళానికి పడిపోవచ్చు. దీనిని అధిగమించాలంటే మన దేశంలో అందుబాటులో లేని ప్రత్యేక శిక్షణ తనకు ఎంతో అవసరం అనిపించింది. అందుకే జర్మనీ చేరుకున్నాడు. ఏడాదికి పైగా విరామం లేకుండా అత్యున్నత స్థాయి కోచ్‌ల వద్ద సాధనలో రాటుదేలాడు. మొదటి ఫలితం 2006, ఆగస్ట్‌.. వరల్డ్‌ చాంపియన్‌షిప్‌లో స్వర్ణంతో వచ్చింది. ఆ ఘనత సాధించిన తొలి భారతీయుడిగా అతను నిలిచాడు. ఈ గెలుపు సరిగ్గా రెండేళ్ల తర్వాత అందుకున్న ఒలింపిక్స్‌ పతకానికి తొలి అడుగుగా నిలిచింది. ఈ రెండేళ్లలో అతను మరింతగా కష్టపడ్డాడు. బీజింగ్‌లో షూటింగ్‌ పోటీలు ఎలా ఉంటాయనేదానిపై పూర్తి స్థాయిలో అక్కడ ఉండే వాతావరణం సహా రిహార్సల్స్‌ చేశాడు. ఎంతగా అంటే మైక్‌లో అనౌన్సర్‌ పేరు చెప్పినప్పుడు తాను పోటీలో వేసుకునే షూస్‌తో ఎలా నడవాలి అనే సూక్ష్మమైన అంశాలను కూడా వదిలిపెట్టనంతగా. చివరకు తన లక్ష్యం చేరడంలో సఫలమయ్యాడు.  అవార్డులు, రివార్డులు.. సుమారు రెండు దశాబ్దాల కెరీర్‌లో బింద్రా 150కి పైగా పతకాలు గెలిచాడు. భారత ప్రభుత్వం అతడిని క్రీడా పురస్కారాలు అర్జున, ఖేల్‌రత్నలతో పాటు పౌర పురస్కారం పద్మభూషణ్‌తో సత్కరించింది. భారత ఆర్మీలో గౌరవ లెఫ్టినెంట్‌ హోదా కూడా బింద్రాకు ఉంది. ‘ఎ షాట్‌ ఎట్‌ హిస్టరీ – మై ఆబ్సెసివ్‌ జర్నీ టు ఒలింపిక్‌ గోల్డ్‌’ పేరుతో బింద్రా ఆటోబయోగ్రఫీ పుస్తకరూపంలో వచ్చింది.  ఆట తర్వాతా ఆటతోనే.. గన్‌ పక్కన పెట్టేసిన తర్వాత బింద్రా క్రీడలతో తన అనుబంధం కొనసాగిస్తున్నాడు. సాధారణంగా రిటైరయ్యేవాళ్లు ఒక కోచ్‌గానో, లేక క్రీడా సమాఖ్యల్లో పరిపాలకులుగానో తమ పాత్రను నిర్వర్తించేందుకు సిద్ధమైపోతారు. బింద్రా కూడా కోచింగ్‌ వైపు దృష్టి పెడితే స్పందన కూడా అద్భుతంగా ఉండేది. కానీ ఇక్కడా అతను భిన్నమైన మార్గాన్నే ఎంచుకున్నాడు. ఒక షూటింగ్‌కు మాత్రమే పరిమితం కాకుండా అన్ని రకాల క్రీడాంశాలకు సంబంధించి ఒక కీలక అంశాన్ని అతను ఎంచుకున్నాడు. ఎంతో ప్రతిభ, సత్తా ఉన్నా కీలక సమయాల్లో విశ్వవేదికపై మన భారతీయులు వెనుకబడుతున్న విషయాన్ని అతను గుర్తించాడు. అందుకే ఈతరం పోటీ ప్రపంచంలో ‘స్పోర్ట్స్‌ సైన్స్‌’పై దృష్టి పెట్టాడు. బింద్రా నేతృత్వంలో పని చేస్తున్న ‘అభినవ్‌ ఫ్యూచరిస్టిక్స్‌ ప్రైవేట్‌ లిమిటెడ్‌’ భారత క్రీడల్లో సైన్స్‌ అండ్‌ టెక్నాలజీ వాడకంపై సహకారం అందిస్తుంది. ‘అభినవ్‌ బింద్రా టార్గెటింగ్‌ పెర్ఫార్మెన్స్‌’ ద్వారా అడ్వాన్స్‌డ్‌ ఫిజియోథెరపీ, రీహాబిలిటేషన్‌ లో ప్రత్యేక శిక్షణ ఉంటుంది. భువనేశ్వర్‌లో అభినవ్‌ బింద్రా స్పోర్ట్స్‌ మెడిసిన్‌ అండ్‌ రీసెర్చ్‌ ఇన్‌ స్టిట్యూట్‌ కూడా పని చేస్తోంది. ఇక తన పేరుతో ఏర్పాటు చేసిన ఫౌండేషన్‌ ప్రాథమిక స్థాయిలో క్రీడలకు అత్యుత్తమ కోచింగ్‌ సౌకర్యాలు అందించడంలో కృషి చేస్తోంది. ఈ అన్ని సంస్థల్లో కలిపి వేర్వేరు క్రీడా విభాగాలకు చెందిన సుమారు 5 వేల మంది అథ్లెట్లు ప్రయోజనం పొందడం విశేషం.  అందుకే ఆపేశాను కీర్తి కనకాదులు వచ్చిన తర్వాత ఆటనుంచి తప్పుకోవడం అంత సులువు కాదు. ఆశించిన ఫలితాలు రాకపోయినా, ఏదో ఒక టోర్నీలో సీనియర్‌ ఆటగాళ్లు తలపడుతూనే ఉంటారు. ఆటపై తమకు ఉన్న ప్రేమే అందుకు కారణమని చెబుతుంటారు. ఈ విషయంలో బింద్రా భిన్నంగానే నిలబడ్డాడు.  2016 రియో ఒలింపిక్స్‌లో బింద్రా ఆఖరి సారిగా పోటీ పడ్డాడు. ఆ మెగా ఈవెంట్‌లో నాలుగో స్థానంలో నిలిచిన అతను త్రుటిలో కాంస్య పతకాన్ని చేజార్చుకున్నాడు. ఆ సమయంలో బింద్రా వయసు 34 ఏళ్లు. అందుకే అతని రిటైర్మెంట్‌ చాలా మందికి ఆశ్చర్యం కలిగించింది. ఒక అభిమాని.. ట్విట్టర్‌ ద్వారా ఇదే సందేహాన్ని వ్యక్తం చేస్తే దానికి ఏమాత్రం భేషజం లేకుండా బింద్రా స్పష్టంగా సమాధానమిచ్చాడు. ‘ఒకటి.. నా నైపుణ్యం రోజురోజుకూ తగ్గిపోతోందని అర్థమైంది. రెండు.. వరుసగా రెండు ఒలింపిక్స్‌లో విఫలమయ్యాను. మూడు.. నేను అక్కడే వేలాడుతూ ఉంటూ మరో యువ ప్రతిభావంతుడి అవకాశం దెబ్బ తీసినట్లు అవుతుంది. అలా చేయదల్చుకోలేదు’ అని అతను చెప్పాడు. -మొహమ్మద్‌ అబ్దుల్‌ హాది

చాంగ్వాన్‌ (దక్షిణకొరియా): అంతర్జాతీయ షూటింగ్‌ సమాఖ్య (ఐఎస్‌ఎస్‌ఎఫ్‌) ప్రపంచకప్‌లో భారత్‌ ఖాతాలో మరో బంగారు పతకం చేరింది. 50 మీటర్ల రైఫిల్‌ త్రి పొజిషన్‌లో ఐశ్వరి ప్రతాప్‌ సింగ్‌ తోమర్‌ పసిడి పతకంపై గురిపెట్టాడు. జూనియర్‌ ప్రపంచ చాంపియన్‌ అయిన ప్రతాప్‌కు సీనియర్‌ స్థాయిలో ఇది రెండో స్వర్ణం. గతేడాది న్యూఢిల్లీలో జరిగిన ప్రపంచకప్‌లోనూ ఈ మధ్యప్రదేశ్‌ షూటర్‌ విజేతగా నిలిచాడు. పురుషుల ఈవెంట్‌లో శుక్రవారం జరిగిన క్వాలిఫయింగ్‌లో 52 మంది తలపడగా... ప్రతాప్‌ సింగ్‌ 593 పాయింట్లతో అగ్రస్థానంలో నిలిచాడు. మరో ఇద్దరు భారత షూటర్లు చైన్‌ సింగ్‌ (586), సంజీవ్‌ రాజ్‌పుత్‌ (577)లు కూడా పోటీపడినప్పటికీ పతకం బరిలో నిలువలేకపోయారు. 

మ్యూనిక్‌ (జర్మనీ): ఇప్పటికే టోక్యో ఒలింపిక్స్‌ బెర్త్‌ ఖాయం చేసుకున్న భారత షూటర్‌ అపూర్వీ చండేలా మళ్లీ మెరిసింది. అంతర్జాతీయ షూటింగ్‌ క్రీడా సమాఖ్య (ఐఎస్‌ఎస్‌ఎఫ్‌) ప్రపంచకప్‌ టోర్నమెంట్‌లో స్వర్ణ పతకాన్ని సొంతం చేసుకుంది. ఆదివారం జరిగిన మహిళల 10 మీటర్ల ఎయిర్‌ రైఫిల్‌ వ్యక్తిగత విభాగంలో అపూర్వీ విజేతగా నిలిచింది. ఎనిమిది మంది షూటర్ల మధ్య 24 షాట్‌లతో ఎలిమినేషన్‌ పద్ధతిలో జరిగిన ఫైనల్లో అపూర్వీ 251 పాయింట్లు స్కోరు చేసి అగ్రస్థానాన్ని దక్కించుకుంది. వాంగ్‌ లుయావో (చైనా–250.8 పాయింట్లు) రజతం గెల్చుకోగా... జు హాంగ్‌ (చైనా–229.4 పాయింట్లు) కాంస్య పతకం కైవసం చేసుకుంది. ప్రపంచకప్‌ టోర్నమెంట్‌లలో ఈ ఏడాది అపూర్వీకిది రెండో స్వర్ణం. ఫిబ్రవరిలో న్యూఢిల్లీలో జరిగిన ప్రపంచకప్‌లోనూ అపూర్వీ పసిడి పతకం సాధించింది.స్వర్ణం కోసం అపూర్వీ, వాంగ్‌ లుయావో మధ్య హోరాహోరీ పోరు జరిగింది. నిర్ణీత 22 షాట్‌ల తర్వాత అపూర్వీ 230.4 పాయింట్లతో, వాంగ్‌ 229.9 పాయింట్లతో తొలి రెండు స్థానాల్లో ఉన్నారు. 23వ షాట్‌లో అపూర్వీ 10.2 పాయింట్లు... వాంగ్‌ 10.6 పాయింట్లు సాధించారు. దాంతో చివరి షాట్‌కు ముందు అపూర్వీ (240.6 పాయింట్లు), వాంగ్‌ (240.5 పాయింట్లు) మధ్య వ్యత్యాసం కేవలం 0.1 పాయింట్లుగా ఉంది. ఆఖరి షాట్‌లో అపూర్వీ 10.4 స్కోరు చేయగా... వాంగ్‌ 10.3తో సరిపెట్టుకుంది. ఫలితంగా అపూర్వీ 0.2 పాయింట్ల తేడాతో స్వర్ణ పతకాన్ని గెల్చుకుంది. ఫైనల్లో పోటీపడిన భారత్‌కే చెందిన మరో షూటర్‌ ఇలవేనిల్‌ వలారివన్‌ (208.3 పాయింట్లు) నాలుగో స్థానంలో నిలిచింది. అంతకుముందు 149 మంది షూటర్లు పాల్గొన్న క్వాలిఫయింగ్‌లో అపూర్వీ 633 పాయింట్లు సాధించి టాప్‌ ర్యాంక్‌లో, ఇలవేనిల్‌ వలారివన్‌ 632.7 పాయింట్లు సాధించి రెండో ర్యాంక్‌లో నిలిచి ఫైనల్‌కు అర్హత సాధించారు. క్వాలిఫయింగ్‌లో టాప్‌–8లో నిలిచిన వారు ఫైనల్లో పోటీపడతారు.   

న్యూఢిల్లీ: భారత మేటి షూటర్‌ హీనా సిద్ధూ తనకు సెలక్షన్స్‌లో జరిగిన అన్యాయంపై ఫిర్యాదు చేసేందుకు శనివారం జాతీయ రైఫిల్‌ అసోసియేషన్‌ (ఎన్‌ఆర్‌ఏఐ) తలుపు తట్టింది. అయితే రోజంతా నిరీక్షించిన ఆమెకు ఎన్‌ఆర్‌ఏఐ చీఫ్‌ రణీందర్‌ సింగ్‌ ఆదివారం చర్చిద్దామని హామీ ఇచ్చారు. ఆసియా క్రీడల కోసం ఎంపిక చేసిన భారత షూటింగ్‌ జట్టులో తనను మిక్స్‌డ్‌ పెయిర్‌ రైఫిల్‌ టీమ్‌ ఈవెంట్‌ నుంచి తప్పించారని 28 ఏళ్ల హీనా వాపోయింది. కేవలం వ్యక్తిగత ఎయిర్‌ పిస్టల్‌ ఈవెంట్‌లోనే ఎంపిక చేయడం అసంతృప్తికి గురిచేస్తోందని చెప్పింది. 25 మీ. పిస్టల్‌ ఈవెంట్‌లో ఆమె కామన్వెల్త్‌ గేమ్స్‌ చాంపియన్‌. 10 మీ. ఎయిర్‌ పిస్టల్‌ ఈవెంట్‌లోనూ హీనా రజతం నెగ్గింది. ‘ఎన్‌ఆర్‌ఏఐ అధ్యక్షుడు రణీందర్‌ సింగ్‌ను కలిసేందుకు రోజంతా నిరీక్షించాను. ఎట్టకేలకు ఆయన స్పందించి ఆదివారం మాట్లాడదామని చెప్పారు. ఆయన మంచి వ్యక్తి అని తెలిసే ఇక్కడికి వచ్చాను. మెరిట్‌కు విలువిస్తారని, పారదర్శకత పాటిస్తారనే నమ్మకముంది. కొందరికి ప్రయోజనం చేకూర్చేందుకు సెలక్షన్‌ కమిటీలో సాంకేతిక అవకతవకలకు పాల్పడ్డారు’ అని హీనా విమర్శించారు. మను బాకర్‌కు మేలు చేకూర్చేందుకే తనను టీమ్‌ ఈవెంట్‌ నుంచి తప్పించారని ఆమె అసంతృప్తి వ్యక్తం చేసింది. అంతర్జాతీయ పోటీల్లో పతకాలు తెస్తున్న తనలాంటి షూటర్లకే ఇలాంటి పరిస్థితి రావడం ఘోరమని ఆమె వాపోయింది. 

జూనియర్‌ ప్రపంచకప్‌ షూటింగ్‌ టోర్నమెంట్‌లో భారత యువ షూటర్‌ ఇలవేనిల్‌ వలారివాన్‌ స్వర్ణ పతకం సాధించింది. జర్మనీలో జరుగుతున్న ఈ టోర్నీలో ఆమె మహిళల 10 మీటర్ల ఎయిర్‌ రైఫిల్‌ ఈవెంట్‌లో చాంపియన్‌గా నిలిచింది. ఫైనల్లో ఆమె 251.7 పాయింట్లు స్కోరు చేసింది. ఓవరాల్‌గా ఈ టోర్నీలో భారత్‌కిది మూడో స్వర్ణం కావడం విశేషం. క్వాలిఫయింగ్‌లో ఇలవేనిల్‌ 630.5 పాయింట్లతో టాపర్‌గా నిలిచింది. భారత్‌కే చెందిన మెహులీ ఘోష్‌ ఫైనల్‌ చేరినా ఆమె ఆరో స్థానంతో సరిపెట్టుకుంది.    


 న్యూఢిల్లీ: జూనియర్ ప్రపంచ కప్ షూటింగ్ టోర్నీలో భారత షూటర్ మానవాదిత్య రాథోడ్ కాంస్య పతకం సాధించాడు. ట్రాప్ ఈవెంట్‌లో మానవాదిత్య మూడో స్థానంలో నిలిచాడు. ‘చాంపియన్ ఆఫ్ చాంపియన్స్’ స్కీట్ ఈవెంట్‌లో భారత్‌కే చెందిన అనంత్ నరూకాకు కాంస్య పతకం లభించింది.
 
 ఒలింపిక్ రజత పతక విజేత, కేంద్ర మంత్రి రాజ్యవర్థన్ సింగ్ రాథోడ్ తనయుడే మానవాదిత్య రాథోడ్. తండ్రిలా మానవాదిత్య కూడా షూటింగ్ రాణిస్తున్నాడు.


 న్యూఢిల్లీ: భారత మహిళా షూటర్ అపూర్వి చండెలా సరికొత్త రికార్డుతో స్వర్ణ పతకం గెలిచింది. స్వీడిష్ కప్ గ్రాండ్ ప్రిక్స్‌ లో మహిళల 10 మీటర్ల ఎయిర్ రైఫిల్ ఈవెంట్ లో 211.2 పాయింట్లు సాధించి సరికొత్త సృష్టించింది. చైనా ఒలింపిక్ గోల్డ్ మెడలిస్ట్ యి సిలింగ్ 211 పాయింట్ల రికార్డును బ్రేక్ చేసింది. స్వీడన్ షూటర్లు ఆస్ట్రిడ్ స్టెఫెన్ సన్(207.6), స్టినె నీల్సన్(185.0) రజత, కంచు పతకాలు గెలిచారు.
 
 రికార్డు ఫలితంతో కొత్త ఏడాదిని ప్రారంభించిన అపూర్వి ఇప్పటికే రియో ఒలింపిక్స్ అర్హత సాధించింది. స్వీడిష్ కప్ గ్రాండ్ ప్రిక్స్‌ లో గోల్డ్ మెడల్ సాధించడం పట్ల అపూర్వి ఆనందం వ్యక్తం చేసింది. రియో ఒలింపిక్స్ లో పతకం గెలవాలన్న తన సంకల్పం ఈ విజయంతో మరింత బలపడిందని పేర్కొంది. తనకు అండగా నిలిచిన వారందరికీ ధన్యవాదాలు తెలిపింది.
 
 అపూర్వి చండెలాకు రాజస్థాన్ ముఖ్యమంత్రి వసుంధరా రాజె అభినందనలు తెలిపారు. 'అభినందనలు. గొప్ప విజయం సాధించావు. నీలో ఇంకా శక్తి దాగుంది. నీకు అంతా మంచి జరగాలని కోరుకుంటున్నా' అని ఆమె ట్వీట్ చేశారు.


 ఒలింపిక్స్... ప్రపంచ చాంపియన్‌షిప్... ప్రపంచకప్... కామన్వెల్త్ గేమ్స్... ఆసియా చాంపియన్‌షిప్... ఇలా అన్ని గొప్ప వేదికలపై వ్యక్తిగత స్వర్ణ పతకాలను నెగ్గిన భారత షూటర్ అభినవ్ బింద్రా కెరీర్‌లో ఇన్నాళ్లూ ఆసియా క్రీడల్లో వ్యక్తిగత పతకం లోటుగా ఉండేది. అయితే మంగళవారం  బింద్రా తన స్థిరమైన ప్రదర్శనతో ఇంతకాలం అందని ద్రాక్షగా ఉన్న ఆసియా క్రీడల వ్యక్తిగత పతకాన్ని అందుకున్నాడు. 10 మీటర్ల ఎయిర్ రైఫిల్ ఈవెంట్‌లో అతను వ్యక్తిగత విభాగంతోపాటు టీమ్ అంశంలోనూ కాంస్య పతకాలను సాధించాడు. ఈ ప్రతిష్టాత్మక క్రీడల్లో వరుసగా నాలుగో రోజు భారత షూటర్ల పతకాల వేటను కొనసాగేలా చూశాడు.
  
  ఇంచియాన్: తన కెరీర్‌లో చివరిసారి ఆసియా క్రీడల్లో పాల్గొంటున్న భారత స్టార్ షూటర్ అభినవ్ బింద్రా అంచనాలకు అనుగుణంగా రాణించాడు. పురుషుల 10 మీటర్ల ఎయిర్ రైఫిల్ ఈవెంట్‌లో వ్యక్తిగత, టీమ్ విభాగాల్లో కాంస్య పతకాలను గెల్చుకున్నాడు. బింద్రా ప్రదర్శనతో ఆసియా క్రీడల్లో వరుసగా నాలుగో రోజూ షూటర్లు పతకాలను అందించారు. వ్యక్తిగత ఫైనల్లో అభినవ్ బింద్రా 187.1 పాయింట్లు సాధించి కాంస్యం దక్కించుకున్నాడు. ఆసియా క్రీడల్లో బింద్రాకిదే తొలి వ్యక్తిగత పతకం కావడం విశేషం. క్వాలిఫయింగ్‌లో పెద్దగా రాణించని బింద్రా ఫైనల్స్‌లో మాత్రం నిలకడను చూపెట్టాడు. 6, 12 షాట్లకు 9.9, 9.6 పాయింట్లు గెలిచి ఆధిక్యంలో నిలిచాడు. తర్వాత పేలవ షాట్స్‌తో ఐదో స్థానానికి పడిపోయాడు. కానీ కాంస్య పతకం నిర్ధారించే చివరి రెండు షాట్లకు 10.6, 10.7 పాయింట్లు నెగ్గి ప్రత్యర్థిని వెనకకు నెట్టాడు.
  టీమ్‌లోనూ హవా: అభినవ్ బింద్రా, రవి కుమార్, సంజీవ్ రాజ్‌పుత్‌ల బృందం 10 మీటర్ల ఎయిర్ రైఫిల్ టీమ్ విభాగంలోనూ సత్తా చాటింది. ఓవరాల్‌గా 1863 పాయింట్లతో మూడో స్థానంలో నిలిచి కాంస్యాన్ని సొంతం చేసుకుంది. బింద్రా 625.4 పాయింట్లు, రవి 618.9 పాయింట్లు, రాజ్‌పుత్ 618.7 పాయింట్లు నెగ్గారు. క్వాలిఫయింగ్ రౌండ్‌లో ఐదో బెస్ట్ స్కోరు నమోదు చేసిన బింద్రా జట్టు ఫైనల్స్‌కు అర్హత సాధించింది.
  మహిళల ట్రాప్ విభాగంలో శ్రేయాసి సింగ్ (66 పాయింట్లు), సీమా తోమర్ (63 పాయింట్లు), షగున్ చౌదురీ (59 పాయింట్లు)ల బృందం ఓవరాల్‌గా 188 పాయింట్లు నెగ్గి ఎనిమిదో స్థానంతో సంతృప్తిపడింది. వ్యక్తిగత విభాగంలో ఈ త్రయం నిరాశపర్చింది. పురుషుల 25 మీటర్ల ర్యాపిడ్ ఫైర్ పిస్టల్ ఈవెంట్ క్వాలిఫయింగ్-1లో హర్‌ప్రీత్ సింగ్ (290) పాయింట్లు నెగ్గి ఏడో స్థానంలో నిలవగా, గురుప్రీత్ సింగ్ (284), పెంబా తమాంగ్ (277)లు వరుసగా 14, 18వ స్థానాలతో సరిపెట్టుకున్నారు.
  
  20 ఏళ్లుగా ప్రొఫెషనల్ షూటర్‌గా కొనసాగా. అదే నా జీవితంగా బ్రతికా. అంకితభావంతో ప్రాక్టీస్ చేశా. కానీ ఇక నుంచి నేను హాబీ షూటర్‌ను. సీరియస్ కెరీర్‌కు గుడ్‌బై చెప్పాను. వారానికి రెండుసార్లు మాత్రమే ప్రాక్టీస్ చేస్తా. అయితే నేను అకస్మాత్తుగా ఈ నిర్ణయాన్ని తీసుకోలేదు. ఇప్పుడు హాబీ షూటర్‌గా ఎలా కొనసాగాలనే దానిపై ఆలోచిస్తున్నా. దేశవాళీ టోర్నీలో బరిలోకి దిగుతా. జట్టుకు ఎంపికైతే వరల్డ్‌కప్‌లో ఆడతా. అయితే అది ఒక దశ వరకు మాత్రమే. నా వల్ల కాకపోతే మరొకరికి అవకాశం ఇస్తా. ఆసియా క్రీడల్లో నా ప్రదర్శన బాగుంది. రియో ఒలింపిక్స్‌కు అర్హత సాధించేందుకు ప్రయత్నిస్తా. కానీ దాన్నే లక్ష్యంగా మాత్రం చేసుకోను.
  -బింద్రా
 
 
 
  


 ఇంచియాన్: భారత స్టార్ షూటర్ అభినవ్ బింద్రా తన క్రీడా జీవితానికి వీడ్కోలు పలకనున్నట్టు ప్రకటించి సంచలనం రేపాడు. ఆసియా క్రీడల తర్వాత ప్రొఫెనల్ గన్ పట్టబోనని ఆయన ట్విటర్ లో ప్రకటించారు. ప్రొఫెనల్ షూటింగ్ లో రేపే తనకు చివరి రోజని వెల్లడించాడు. ఆసియా క్రీడల్లో 10 మీటర్ల ఎయిర్ రైఫిల్ ఈవెంట్ లో బింద్రా పోటీపడనున్నాడు.
 
 'రేపటితో తన క్రీడా జీవితం ముగియనుంది. ఆసియా క్రీడల తర్వాత ప్రొఫెషనల్ షూటింగ్ నుంచి తప్పుకుంటున్నా' అని ట్వీట్ చేశాడు. 2008 బీజింగ్ ఒలింపిక్స్ లో బింద్రా బంగారు పతకం సాధించి చరిత్ర సృష్టించిన సంగతి తెలిసిదే. 2010 ఆసియా క్రీడల్లో వెండి పతకం సాధించిన బింద్రా ఈసారి స్వర్ణ పతకం సాధించాలన్న పట్టుదలతో ఉన్నాడు.      
  
 
 Tomorrow will mark the end of my professional shooting life ! I will however still shoot , compete as a hobby shooter training twice a week.
 — Abhinav Bindra (@Abhinav_Bindra) September 22, 2014


 న్యూఢిల్లీ: భారత షూటర్ జీతూ రాయ్ ఐఎస్‌ఎస్‌ఎఫ్ ప్రపంచకప్‌లో చరిత్ర సృష్టించాడు. స్లొవేనియాలోని మారిబోర్‌లో జరుగుతున్న ఈ ఈవెంట్ ఎయిర్ పిస్టల్ విభాగం ఫైనల్ రౌండ్‌లో 200.8 పాయింట్లతో స్వర్ణం దక్కించుకున్నాడు. ఈ పతకంతో పాటు ఇంతకుముందే ఫ్రీ పిస్టల్‌లో రజతం సాధించిన జీతూ ప్రపంచకప్‌లో రెండు పతకాలు సాధించిన తొలి భారతీయుడిగా రికార్డులకెక్కాడు. ఇదే ఈవెంట్‌లో పాల్గొన్న మరో భారత షూటర్ పీఎన్ ప్రకాశ్ ఐదో స్థానంలో నిలిచాడు. మరోవైపు మ్యూనిచ్‌లో జరిగిన చివరి ప్రపంచకప్‌లోనూ జీతూ ఎయిర్ పిస్టల్‌లో రజతం దక్కించుకున్నాడు.