డయాబెటిస్‌ బాధితులు ప్రతినిత్యం చక్కెర స్థాయి తెలుసుకుంటూ ఉండాలి. చక్కెర స్థాయి తెలుసుకోవాల్సి వచ్చినప్పుడల్లా వేలిని సూదితో గుచ్చి నెత్తుటిచుక్కలు బయటకు తీయాల్సి ఉంటుంది. ఈ నెత్తుటిచుక్కల ద్వారానే ఇప్పుడు అందుబాటులో ఉన్న గ్లూకోమీటర్లు చక్కెర స్థాయిని నిర్ధారించగలుగుతున్నాయి. ఇప్పటి వరకు డయాబెటిస్‌ బాధితులకు ప్రతిరోజూ ఈ నొప్పి తప్పడంలేదు. ఎలాంటి నొప్పి లేకుండానే, నెత్తుటి చుక్క చిందించకుండానే చక్కెర స్థాయిని కచ్చితంగా చెప్పగలిగే స్మార్ట్‌వాచీని కొరియన్‌ కంపెనీ ‘సామ్‌సంగ్‌’ అందుబాటులోకి తెచ్చింది. ఈ స్మార్ట్‌వాచీ మీటల మీద చేతి మధ్యవేలు, ఉంగరంవేలు కొద్ది క్షణాలు అదిమిపెట్టి ఉంచితే చాలు, శరీరంలో చక్కెర స్థాయి ఎంత ఉందో స్క్రీన్‌ మీద చూపిస్తుంది. ‘సామ్‌సంగ్‌’ రూపొందించిన ఈ గెలాక్సీ స్మార్ట్‌వాచ్‌ చక్కెర స్థాయితో పాటు శరీరంలో కొవ్వు పరిమాణం, కండరాల పరిమాణం వంటి వివరాలను కూడా చెబుతుంది. దీని ధర 81.26 డాలర్లు (సుమారు రూ.6750) మాత్రమే!

సాక్షి, సిటీబ్యూరో: భద్రత ప్రమాణాలే ప్రాముఖ్యతగా వినూత్న సాంకేతికతతో తయారు చేసిన దేశంలోనే మొట్ట మొదటి శక్తివంతమైన సోడియం అయాన్‌ బ్యాటరీలను ‘సోడియం ఎనర్జీ సంస్థ’ విడుదల చేసింది. బుధవారం నగరంలోని మెర్క్యూరీ హోటల్‌ వేదికగా నిర్వహించిన కార్యక్రమంలో సోడియం ఎనర్జీ సహ–వ్యవస్థాపకులు బాల పచియప్ప బ్యాటరీలను భారతీయ మార్కెట్‌లోకి విడుదల చేశారు. ఈ సందర్భంగా ఆయన మాట్లాడుతూ., ప్రస్తుతం మార్కెట్‌లో అందుబాటులో ఉన్న లెడ్‌ యాసిడ్‌, లిథియం అయాన్‌ బ్యాటరీల కంటే సోడియం అయాన్‌ బ్యాటరీలు అధిక శక్తి సామర్థ్యాలను కలిగి ఉంటాయన్నారు. 2026 నాటికి విద్యుత్‌ నిల్వల అవసరం 5 రెట్లు పెరుగుందని, అధిక జనాభా ఎలక్ట్రిక్‌ వాహనాల వైపు మొగ్గుచూపుతున్నారన్నారు. భద్రత, నాణ్యత, వేగవంతమైన చార్జింగ్‌తో ఈ బ్యాటరీలు అధునాతన సేవలందిస్తాయని పేర్కొన్నారు. లిథియం కన్నా సోడియం 500 రెట్లు అధిక సామర్థ్యాలతో పర్యావరణానికి హాని లేకుండా రికవరీ, రీసైక్లింగ్‌కు అనుకూలంగా ఉంటాయన్నారు. అనంతరం సోడియం అయాన్‌ బ్యాటరీలతో నడిచే వాహనాల పనితీరును ప్రత్యక్షంగా ప్రదర్శించారు.

వాస్తవం కన్నా కల్పనే అందంగా ఉంటుంది! ప్రాక్టికాలిటీ కన్నా భ్రమే ఆనందాన్నిస్తుంది! నిజానికి బంధనాలుంటాయి..  ఊహలకు ఆకాశం కూడా హద్దు కాదు! అందుకే వర్చువల్‌ వరల్డ్‌లో  అందరూ హీరోలే..  అసలు ఆ కిక్కే వేరప్పా! కల చెదిరి..  స్పృహలోకొచ్చాక  రియాలిటీ ఇచ్చే షాక్‌ కూడా వేరప్పా! వర్చువల్‌ ప్రభావాలు.. రియాల్టీ ప్రమాదాలు  ఇప్పుడు చర్చనీయాంశాలు!  పాతికేళ్ల కిందట.. మ్యాట్రిక్స్‌ అనే హాలీవుడ్‌ సినిమా ప్రపంచాన్ని ఊపేసింది. ఇంటెలిజెంట్‌ మెషిన్లు అందులో మనుషుల శరీరాలను ఎనర్జీ సోర్స్‌గా ఉపయోగించుకుని.. అచ్చంగా వారిని పోలిన రూపాలతో వర్చువల్‌ వరల్డ్‌ని రూపొందించి తామనుకున్న సంఘ వ్యతిరేక పనులు చేస్తుంటాయి. ఈ వర్చువల్‌ బాడీకి ఏదైనా ప్రమాదం జరిగితే దాని తాలుకు ప్రభావం ఎనర్జీ సోర్స్‌ రూపంలో ఉన్న అసలైన మనిషిపై కనిపిస్తుంటుంది. ఆఖరికి వర్చువల్‌ వరల్డ్‌ కారణంగా ఎనర్జీ సోర్సెస్‌ చనిపోతాయి కూడా! పన్నెండేళ్ల కిందట.. వచ్చిన ‘అవతార్‌’ సినిమా కూడా అలాంటిదే. పండోరా గ్రహంలో ఉన్న అపార సహజ వనరులపై కన్నేసిన మనుషులు వాటిని సొంతం చేసుకునేందుకు తమ శరీరాలను ఎనర్జీ సోర్స్‌గా ఉపయోగించుకుంటూ వర్చువల్‌ మనుషులను తయారు చేస్తారు. ఆ పండోరా గ్రహవాసులు, వర్చువల్‌ మనుషుల మధ్య ప్రేమానుబంధాలు, కుట్రకుతంత్రాలతో పండోరా మీద మనుషుల ఆధిపత్య పోరుతో సాగుతుంది సినిమా. తాజాగా.. ఓటీటీలో హల్‌చల్‌ చేస్తోన్న హారర్‌ కామేడీ.. ‘కంజూరింగ్‌ కన్నప్పన్స్‌’ అనే తమిళ సినిమా ‘డ్రీమ్‌ క్యాచర్‌’ పాయింట్‌ చుట్టూ తిరుగుతుంది. నిజ జీవితంలో సాధ్యంకాని విషయాలను కలలో సాధ్యం చేసుకోవడమనే అంశంపైనే ఈ సినిమా నడుస్తుంది. అయితే ఇందులోని క్యారెక్టర్స్‌కి ఆ కలలో అనుకోకుండా ఎదురయ్యే ప్రమాదాల వల్ల నిజ జీవితంలోనూ ముప్పు వాటిల్లుతుంది. చివరకు జీవితం భయానకం అవుతుంది. కలల మీద అంతకుముందే హాలీవుడ్‌లో ‘ఇన్స్‌సెప్షన్స్‌ ’ పేరుతో ఒక సినిమా వచ్చింది. పై చిత్రాలన్నీ ఫాంటసీ, సైన్స్‌ ఫిక్షన్స్‌ ఆధారంగా ‘వర్చువల్‌ వరల్డ్‌’ కేంద్రంగా  వచ్చినవే. మన జీవితాల్లో వర్చువల్‌ వరల్డ్‌ ఎలాంటి ప్రభావం చూపుతుందనే అంశాలను కళ్లకుకట్టే ప్రయత్నం చేసినవే. అలా సిల్వర్‌స్క్రీన్స్‌కే పరిమితమైన వర్చువల్‌ వరల్డ్‌ మెల్లమెల్లగా రియల్‌ వరల్డ్‌లోకీ చేరింది. అందరూ ఊపయోగించే వాట్సాప్‌ నుంచి పబ్‌జీ వంటి గేమ్స్, స్నాప్‌చాట్‌ వంటి యాప్‌ల దాకా ప్రత్యేకంగా అవతార్‌లు పుట్టుకొస్తున్నాయి. ఆ యాప్‌లను వాడే కొద్దీ తమ రియల్‌ వరల్డ్‌లోని బాడీ కంటే యాప్‌లలో ఉపయోగించే అవతార్‌లనే మనుషులు మానసికంగా సొంతం చేసుకోవడం మొదలైంది. గంటల తరబడి వాటితోనే గడుపుతున్నారు, లక్షల కొద్ది డబ్బులు ఖర్చు చేస్తున్నారు. ఆఖరికి ఆ వర్చువల్‌ అవతార్‌కి ఏమైనా అయితే దాని తాలుకు లక్షణాలతో మనుషులు రియల్‌ వరల్డ్‌లో మంచం పడుతున్నారు. ఇలాంటి సంఘటనలు ఇటీవల ఎక్కువయ్యాయి. అయితే ఇంగ్లండ్‌లో జరిగిన ఘటన వర్చువల్‌ వరల్డ్‌పై మరింత చర్చకు కారణమైంది.  సరికొత్త ఐడెంటిటీ రియల్‌ వరల్డ్‌లో.. పుట్టిన ఊరు, కుటుంబం వంటి తదితర వివరాలతో సామాజికంగా మనుషులకు ఒక గుర్తింపు ఉంటుంది. ప్రభుత్వ పరంగా అయితే ఆధార్, ఓటర్‌ ఐడీ, డ్రైవింగ్‌ లైసెన్స్‌ పాస్‌పోర్ట్‌తో వ్యక్తిగత గుర్తింపు లభిస్తుంది. కానీ డిజిటల్‌ వరల్డ్‌ దీనికి భిన్నం. నిర్ధారిత తనిఖీ, పరిశీలన, విచారణ వంటివేమీ లేకుండానే గుర్తింపును పొందే వీలుంటుంది. సోషల్‌ మీడియాలోని ఒక్కో ఫ్లాట్‌ఫామ్‌లో.. ఓక్కో యాప్‌లో ఒకే మనిషి పదుల సంఖ్యలో ఐడెంటిటీలు పొందవచ్చు. దీంతో డిజిటల్‌ వరల్డ్‌లో అసలైన ఊరు, పేరు తెలియకుండానే చలామణి కావొచ్చు. సామాజిక కట్టుబాట్లు, ఇంట్లో వాళ్ల ఆంక్షలు లేకుండా స్వేచ్ఛగా విహరించవచ్చు. ఈ వెసులుబాటు కారణంగానే యువతరం మొదలు పెద్దల వరకు అంతా డిజిటల్‌ ఐడెంటిటీ వైపు అడుగులు వేస్తున్నారు. నిజమైన గుర్తింపులేని ఈ తీరే మోసాలకు కారణమవుతోంది. డీపీలతో గిట్టని వ్యక్తులను అప్రతిష్ఠపాలు చేయడానికి ఫేక్‌ ఫొటోలతో ఫేక్‌ అకౌంట్లను క్రియేట్‌ చేసి అభాసుపాలు చేయడం చూస్తూనే ఉన్నాం. ఈ చర్యలు ముఖ్యంగా మహిళలను ఇబ్బందిపెడుతున్నాయి. అవమానాలకు గురిచేస్తున్నాయి. పరిచయస్తులు, మొన్నటి వరకు మనతో ఉన్న వాళ్లే.. స్పర్థల కారణంగా దూరమైతే చాలు టార్గెట్‌ మహిళల ఫొటోలు, ఫోన్స్‌ నంబర్లను పోర్న్స్‌ సైట్లలో పెడుతూ తీవ్రమైన మానసిక హింసకు పాల్పడుతున్నారు. లేదా ఫేక్‌ డీపీలతో చాటింగ్‌ చేస్తూ మోసాలకు దిగుతున్నారు. స్త్రీ, పురుష స్నేహాలతోనే కాకుండా మరోరకం నకిలీ ఖాతాలకూ ఫేస్‌బుక్‌ ప్లాట్‌ఫామ్‌గా మారింది. ఆ నకిలీ ఖాతాలు చక్కగా మనతో ఇన్స్‌బాక్స్‌ లేదా డైరెక్ట్‌ మెసేజెస్‌తోనే స్నేహాన్ని పెంచుకుంటాయి. హఠాత్తుగా.. చాలా అవసరం పడిందని.. ఫలానా అంత నగదు పంపాలంటూ వేడుకుంటాయి. తిరిగి చెల్లిస్తామని నమ్మబలుకుతాయి. నమ్మి నగదు పంపిన వెంటనే డిసపియర్‌ అయిపోతాయి. ఫేస్‌బుక్‌లో దాదాపు అందరూ ఈ నకిలీ ఖాతాలు – మనీ రిక్వెస్ట్‌లకు బాధితులుగా మారారు. దీన్ని అరికట్టేందుకు ఎన్ని చర్యలు తీసుకున్నా లాభం లేకుండాపోతోంది. నకిలీ గుర్తింపు ఆధారంగా మోసగాళ్లు చెలరేగిపోతున్నారు.  డీప్‌ ఫేక్‌తో ఇటీవల సినిమా నటి రష్మికా మందన్న డీప్‌ ఫేక్‌ వీడియో దేశవ్యాప్తంగా సంచలనం రేపిన సంగతి తెలిసిందే. గత నాలుగేళ్లుగా అమెరికా, యూరప్‌ దేశాల్లో ఈ డీప్‌ ఫేక్‌ వీడియోలు కలకలం సృష్టిస్తూనే ఉన్నాయి. ముఖ్యంగా అమెరికా మాజీ అధ్యక్షుడు డోనాల్డ్‌ ట్రంప్‌కి సంబంధించి.. డీప్‌ ఫేక్‌ వీడియోలు కోకొల్లలుగా వచ్చాయి. రెండు వేర్వేరు వీడియోలను కలుపుతూ నిఖార్సైన నకిలీని క్రియేట్‌ చేయడంలో డీప్‌ ఫేక్‌లు ఆరితేరిపోయారు. దశబ్దాల కిందటే మార్ఫింగ్‌ అనేది ఉనికిలోకి వచ్చినా దాన్ని గుర్తించడం తేలికే. ఎక్కడో కంప్యూటర్‌ గ్రాఫిక్స్, వీఎఫెక్స్‌ వాడితే తప్ప సహజంగా అనిపించేది కాదు అది. కానీ అడ్వాన్స్‌డ్‌ టెక్నాలజీ.. చేతిలోని స్మార్ట్‌ ఫోన్స్‌తో ఫేక్‌ని క్రియేట్‌ చేయగలుగుతుండటంతో సమస్య తీవ్రమైంది. నకిలీ వర్సెస్‌ అవతార్‌ డిజిటల్‌ దునియా/వర్చువల్‌ వరల్డ్‌లో నకిలీ ఖాతాలను సృష్టించడం వెనుక కచ్చితమైన ఉద్దేశం అర్థమవుతోంది. ఆర్థికంగా దోచుకోవడం, పరువు ప్రతిష్ఠలను దెబ్బతీసి మానసికంగా కుంగదీయడం వాటి ప్రధాన లక్ష్యాలు. కొన్నిసార్లు ఎదుటి వారితో ఆడుకోవడానికీ నకిలీ ఖాతాలు వస్తున్నాయి. వీటిని సృష్టించే వారు తమకు సంబంధించిన వివరాలను ఆ ఖాతాలో పొందుపరచరు. ఇందుకు భిన్నం అవతార్‌. పూర్తిగా మనకు సంబంధించిన మరో రూపమే అవతార్‌ అన్నట్టుగా ఉంటుంది. మన అవతార్‌కు ఎలాంటి హెయిర్‌ స్టైల్‌ ఉండాలి, ఎలాంటి దుస్తులు ధరించాలి, శరీరం రంగు ఎలా ఉండాలి.. వంటి అన్ని విషయాల్లో మన ఇచ్ఛకు తగ్గట్టుగా వర్చువల్‌ అవతార్‌ను రెడీ చేసుకోవచ్చు. ఆ తర్వాత ఆ అవతార్‌తోనే సోషల్‌ మీడియా, డిజిటల్‌ ఫ్లాట్‌ఫామ్, ఆన్స్‌లైన్స్‌ గేమ్స్‌లో పాల్గొనవచ్చు. ఈ పాల్గొనడమే చెలరేగే స్థాయికి చేరితే వర్చువాలిటీ రియాల్టీకి మధ్య ఉండే గీత చెరిగిపోతుంది. ఆ తర్వాత వర్చువల్‌గా జరిగే విషయాలకు రియాల్టీలో నష్టపోవాల్సి వస్తుంది. మానసిక ఆనందం కోసం వచ్చిన వర్చువల్‌ వరల్డ్‌ చివరకు మానసిక వేదనకు దారి తీస్తోంది. ఇలా ఇబ్బందులకు గురవుతున్న వారిలో టీనేజర్లు, మహిళలే అధికంగా ఉండటం గమనార్హం. అసలు కంటే ఎక్కువ రియల్‌ వరల్డ్‌లో ఉన్న గుర్తింపు కంటే డిటిజల్‌ దునియాలో దక్కే గుర్తింపే ఎక్కువ అనుకునే వారు పెరుగుతున్నారు. ఉదాహరణకు మోస్ట్‌ పాపులర్‌ పబ్‌జీ గేమ్‌. ఈ గేమ్‌ను.. ఆన్స్‌లైన్స్‌లో ఎవరికి వారు తమ ‘అవతార్‌’ను ఎంచుకుని ఏక కాలంలో ఆడుకునే వీలుంది. అవతార్‌ ధరించే డ్రెస్‌లు, వాడే ఆయుధాలకు ఇక్కడ రేట్‌ ఫిక్స్‌ అయి ఉంటుంది. ఒక్కో లెవెల్‌ను దాటుకుంటూ ఈ అవతార్‌లు గేమ్‌లో ముందుకు వెళ్తుంటాయి. ఆయా లెవెల్స్‌ ఆధారంగా ఆ ఆటగాడు ఎంతటి మొనగాడనే గుర్తింపును డిజిటల్‌ దునియా ఇస్తుంది. ఈ రికగ్నిషన్స్‌ ఇచ్చే కిక్‌ కోసం  పరీక్ష ఫీజులు మొదలు.. తల్లిదండ్రుల అకౌంట్ల దాకా డబ్బును స్వైప్‌ చేయడానికి ఏ మార్గం దొరికినా వదలకుండా లక్షల రూపాయలను ఈ గేమ్స్‌ కోసం ధారపోసే గేమర్లు ఉన్నారంటే ఆశ్చర్యమూ అతిశయోక్తీ ఎంతమాత్రం లేదు.. కాదు.  చిక్కులు వాస్తవ ప్రపంచంలో.. మనుషులు తప్పులో.. నేరాలో చేస్తే వాటిని అరికట్టేందుకు, శిక్షించేందుకు చట్టాలు, శిక్షాస్మృతులున్నాయి. కానీ రోజురోజుకూ విస్తరిస్తున్న డిజిటల్‌ దునియాలో జరుగుతున్న మోసాలు, నేరాలకు అడ్డుకట్ట వేసేదెలా అన్నదే అంతు చిక్కని ప్రశ్న. దీనిపై ఇప్పటికే కొన్ని దేశాలు చట్టాలను తయారుచేసుకున్నాయి. మరికొన్ని పకడ్బందీ చట్టాలను రూపొందించే పనిలో ఉన్నాయి. అయితే డిజిటల్‌ దునియాలో..  ప్రపంచంలోని ఓ మూలనున్న వారు మరో మూలనున్న వారిని మోసం చేసేందుకు, వేధించేందుకు అవకాశం ఎక్కువ. సైబర్‌ క్రైమ్‌కి సంబంధించిన చట్టాలు వేర్వేరు దేశాల్లో వేర్వేరుగా ఉంటాయి. దీంతో నేరాలు, మోసాలకు పాల్పడిన వారిని పట్టుకోవడమే కష్టం అనుకుంటే వారిని ఏ చట్టాల పరిధిలో శిక్షించాలనేది మరో తలనొప్పిగా మారింది.  మెటావర్స్‌ డిజిటల్‌ దునియా కారణంగా ఇలాంటి సమస్యలు ఒకొక్కటిగా ముందుకు వస్తున్నా టెక్నోక్రాట్స్‌ మాత్రం ఎక్కడా వెనుకడుగు వేయడంలేదు. సోషల్‌ మీడియా దిగ్గజం మార్క్‌ జుకర్‌బర్గ్‌.. మనం జీవిస్తున్న యూనివర్స్‌కి పోటీగా ఫేస్‌బుక్, వాట్సాప్, ఇన్స్‌స్టాగ్రామ్‌లో మెటావర్స్‌ను అందుబాటులోకి తెస్తామని ఇప్పటికే ప్రకటించారు. రెండేళ్ల కిందట ఆయన మెటావర్స్‌ను పరిచయం చేశారు కూడా. అది ఆశించిన స్థాయిలో జనాల్లోకి చొచ్చుకుపోలేదు. అయితే మరింత సాంకేతిక పరిజ్ఞానం అందుబాటులోకి వస్తే యూనివర్స్‌కి పోటీగా మెటావర్స్‌ లేదా మరోవర్స్‌ రావొచ్చు. ఇలాంటి ప్రత్యామ్నయ ‘వర్స్‌’ల కారణంగా ఏర్పడే దుష్పరిణామాలకు ఎలా చెక్‌ పెట్టాలన్నది ఇటు టెక్నోక్రాట్స్, అటు దేశాధినేతల ముందున్న సవాల్‌. ఎప్పటి నుంచో నిజ జీవితంలో సాధ్యం కాని విషయాలను ఊహల్లో సాధ్యం చేసుకోవడం మనిషి పుట్టుక నుంచీ ఉన్నదే. దానికి కథలు, కవితలు ఇతర కళారూపాలను సాధనాలుగా మలచుకోవడం నాగరికత నేర్పిందే. అయితే ఆధునిక సాంకేతిక పరిజ్ఞానం వర్చువల్‌ టెక్నాలజీ రూపంలో మనుషులకు కొత్త కొత్త అవతార్‌లను సృష్టించి ఇస్తోంది. ఆనందలోకంలో తిప్పుతోంది. కానీ క్రమంగా సీన్స్‌ రివర్స్‌ అవుతోంది. డిజిటల్‌ అవతార్‌ రూపంలో ఉన్న మనిషి ‘టార్గెట్‌’ అవుతున్నాడు. వర్చువల్‌ వరల్డ్‌లో జరిగిన సంఘటనలకు ఇచ్చే ప్రతి స్పందనలతో భౌతిక ప్రపంచంలో ప్రాణాల మీదకు తెచ్చుకుంటున్నాడు. వర్చువల్‌ వరల్డ్‌లో దాడికి గురైన వ్యక్తులు రియల్‌ వరల్డ్‌లో అసలైన బాధితులుగా మారుతున్నారు. ఈ తరహా ఘటనలు చోటు చేసుకున్నప్పుడు నిందితులను ఎలా పట్టుకోవాలి ? వారిని ఎలా శిక్షించాలి ? రియల్‌ వరల్డ్‌ తరహాలోనే వర్చువల్‌ వరల్డ్‌ విషయంలోనూ చట్టాలు తయారు చేయాలనే ప్రశ్నలు ఉత్నన్నమవుతున్నాయి. పరిష్కారమార్గాల అన్వేషణలో కాలయాపన తగదని ఇంగ్లండ్‌ అవతార్‌ రేప్‌ ఘటన చెబుతోంది. చట్టాల రూపకల్పన వేగంవంతం కావాలని హెచ్చరిస్తోంది. వర్చువల్‌ రేప్‌ ఇంగ్లండ్‌లో ఓ మైనర్‌ బాలిక ఆన్స్‌లైన్స్‌లో వర్చువల్‌ గేమ్‌కు బాగా అలవాటు పడింది. ఆ గేమ్‌లో తన అవతార్‌తో మమేకమైపోయింది. గ్రూప్‌గా ఆడే ఆ గేమ్‌లో కొందరు మగ అవతార్‌లు ఈ మైనర్‌ బాలిక అవతార్‌పై కన్నేశారు. గేమ్‌ ఆడుతూ ఆ బాలిక అవతార్‌పై గ్యాంగ్‌రేప్‌కు పాల్పడ్డారు. గేమ్‌లో పూర్తిగా లీనమైపోయిన ఆ అమ్మాయి ఆ వర్చువల్‌ గ్యాంగ్‌ రేప్‌కు కంపించిపోయింది. వాస్తవంగానే తనపై లైంగికదాడి జరిగినట్టుగా ట్రామాలోకి వెళ్లిపోయింది. విషయం తెలుసుకున్న తల్లిదండ్రులకు ఏం చేయాలో పాలుపోలేదు. వెంటనే పోలీసులను ఆశ్రయించి ఫిర్యాదు చేశారు. అమల్లో ఉన్న చట్టాల ద్వారా ఆ వర్చువల్‌ గ్యాంగ్‌ రేప్‌ని ఎలా నిర్ధారించాలి? దానికి కారణమైన నిందితులను ఎలా గుర్తించాలి? ఏ గ్రౌండ్‌ మీద  వారిని  శిక్షించాలనేది అంతుచిక్కని వ్యవహారంగా మారింది. మొత్తానికి విషయం వైరల్‌ అయింది. వర్చువల్‌ వరల్డ్‌కి సంబంధించి తీసుకోవాల్సిన జాగ్రత్తలపై ఇంకా అలసత్వం తగదంటూ  ఒకరకంగా ప్రపంచాన్ని హెచ్చరించిందీ సంఘటన. ఏకాభిప్రాయం ఉండాలి ఫేస్‌బుక్, యూట్యూబ్‌లో అసభ్య పదజాలంతో దూషించే వారిని పట్టుకుని శిక్షించడమే కష్టమవుతుంటే.. డిజిటల్‌ వరల్డ్‌లో వ్యక్తిగత గోప్యత, వ్యక్తిగత డిజిటల్‌ రైట్స్‌ అనే సమస్యలకు పరిష్కారం చూపడమనేది ఇంకా బాలారిష్టాలనే దాటలేకపోతుంటే.. వీటి తర్వాత లెవెల్‌లోని డిజిటల్‌ వరల్డ్, వర్చువల్‌ రియాల్టీలో జరుగుతున్న .. జరిగే అరచాకాలను అరికట్టడం సాధ్యమయ్యే పనేనా అనిపిస్తోంది. వాటిని నిలువరించే సమర్థవంతమైన వ్యవస్థలు, చట్టాలు ఇంకా రాలేదనే చెప్పాలి. ఇది అనేక సంక్లిష్టతలతో కూడుకున్నది.  డిజిటల్‌ వరల్డ్, వర్చువల్‌ రియాల్టీలో క్రియేట్‌ అవుతున్న సమస్యలపై  ప్రపంచ దేశాలు ఒక్క తాటిపైకి రావాల్సిన అవసరం కచ్చితంగా ఉంది. ట్రోలింగ్, బులీయింగ్, డిఫమేషన్స్‌ వంటి అంశాలపై అందరికీ ఏకాభిప్రాయం ఉండాలి. నేరం/ఘటన ఎక్కడ జరిగినా అందుకు సంబంధించిన వ్యక్తులను పట్టుకోవడం, విచారణ చేయడంలో దేశాల మధ్య ఒప్పందాలు జరగాలి. అదేవిధంగా వర్చువల్‌ /డిజిటల్‌ వరల్డ్‌కి సంబంధించిన అంశాలపై సామాన్యులకూ అవగాహన కలిగేలా కెపాసిటీ బిల్డింగ్‌ జరగాలి. కనీసం అవతార్‌ ఇంటలెక్చువల్‌ ప్రాపర్టీగా మారాలి. అప్పుడే జరగబోయే అనర్థాలకు అడ్డుకట్ట వేయడం సాధ్యమవుతుంది.     – అనిల్‌ రాచమల్ల, సైబర్‌ క్రైమ్‌ పట్ల అవగాహన కలిగిస్తున్న సాంకేతిక నిపుణులు కేసులు పెరుగుతున్నాయి నేషనల్‌ క్రైమ్‌ బ్యూరో రికార్డ్స్‌ ప్రకారం 2022లో.. సైబర్‌ క్రైమ్‌కి సంబంధించి  దేవశ్యాప్తంగా 65,843 కేసులు నమోదు అయ్యాయి. వాటిల్లో అత్యధికంగా చీటింగ్‌ కేసులు 42,710 (64.8 శాతం) ఉండగా బెదిరింపులకు పాల్పడిన కేసులు 3,648 (5.5 శాతం) ఉన్నాయి. ఇక సెక్సువల్‌ ఎక్స్‌ప్లాయిటేషన్స్‌కి సంబంధించి 3,434 (5.2 శాతం) కేసులు నమోదయ్యాయి. సైబర్‌ కేసుల పెరుగుదలను పరిశీలిస్తే 2012లో దేశవ్యాప్తంగా 3.693 కేసులు నమోదుకాగా 2022కి వచ్చేసరికి ఈ సంఖ్య 65,893కి చేరుకుంది. నమోదు కాని కేసులు సంఖ్య ఇంతకు నాలుగింతలు ఉండొచ్చని అంచనా. గత దశాబ్దకాలంగా స్మార్ట్‌ఫోన్లు, ఇంటర్నెట్‌ వాడకం పెరగడంతో అదే స్థాయిలో సైబర్‌ కేసుల తీవ్రతా పెరుగుతోంది. 2012లో దేశవ్యాప్తంగా మొబైల్‌ ఫోన్లు ఉపయోగిస్తున్నవారు 12.5 శాతం ఉండగా 2022 చివరికి అది 76.6 శాతానికి పెరిగింది. హై స్కూల్‌ పిల్లలు మొదలు వృద్ధుల వరకు ప్రతి ఒక్కరికీ మొబైల్‌ ఫోన్స్‌ ఉంటోంది. ప్రస్తుతమైతే సైబర్‌ నేరాల్లో ఆర్థిక నేరాలదే అగ్రస్థానం. సరైన జాగ్రత్తలు, నియంత్రణ లేని పక్షంలో లైంగిక వేధింపులు, మానసిక సమస్యలకూ డిజిటల్‌ దునియానే ప్రధాన కారణం కావడానికి అవకాశాలు కోకొల్లలుగా కనిపిస్తున్నాయి. పేరెంట్స్‌పైనే భారం ఇంటర్నెట్‌ వినియోగం నేడు అనివార్యమైపోయింది. చిన్నా, పెద్దా అందరికీ అత్యవసరం అయింది. అయితే అవసరానికి.. వ్యసనానికి మధ్య ఉన్న హద్దును అందరూ మరచిపోతున్నారు. ముందు తేరుకోవాల్సింది పెద్దలే. ఇంటర్నెట్‌నే ఇల్లులా భ్రమపడుతున్న పిల్లలను ఆ మాయజాలం నుంచి బయటకు తేవాల్సిన బాధ్యత పెద్దలదే. అవసరానికి.. వ్యసనానికి మధ్య ఉన్న గీత మీద అవగాహన కల్పించాలి. వ్యక్తిగత విషయాలకు సంబంధించిన గోపత్యను పాటించడం ఇప్పుడు చాలా అవసరం. అన్నీ గూగుల్లోనే ఉన్నాయిశ వేవ్‌లో పడిపోయిన నేటి తరం అంతర్జాలంలో తమ వ్యక్తిగత వివరాలను ప్రూవ్స్‌తోసహా (ఫొటోలు, వీడియోలు వగైరా) ఎంత తక్కువగా అప్‌ డేట్‌ చేస్తే అంత సేఫ్‌గా ఉండొచ్చనే ఫ్యాక్ట్‌ని బ్రెయిన్స్‌ చిప్‌లోకి ఎక్కించాలి. ‘వర్చువల్‌ వరల్డ్‌ అనేది ఒక భ్రాంతి.. అదొక కాలక్షేపం..’ అనే సత్యాన్నీ వీలైనన్ని సార్లు మెదడులో సేవ్‌ చేయించాలి. ఇదీ పేరెంటింగ్‌లో భాగం కావాలి. -కృష్ణగోవింద్‌

‘‘రెండేరెండు గంటల్లో హైదరాబాద్‌ నుంచి అటవీ ప్రాంతమైన ములుగుకు ఎయిర్‌ ట్యాక్సీలో గుండెను తీసుకెళ్లి రోగి ప్రాణాలు కాపాడొచ్చు’’. ‘‘తొమ్మిది గంటల్లో ఆదిలాబాద్‌ నుంచి తిరుపతికి ఎంచక్కా ఎగురుతూ వెళ్లిపోవచ్చు’’.  అనుకున్నవి అనుకున్నట్టు జరిగితే 2025లోనే ఇవన్నీ నిజమవుతాయి. జపాన్‌కు చెందిన ఫ్లయింగ్‌ కార్ల తయారీ సంస్థ స్కై డ్రైవ్‌ పరిశోధనలు తుది దశకు చేరుకున్నాయి. మనదేశంలో వాణిజ్య కార్యకలాపాలు విస్తరించేందుకు హైదరాబాద్‌కు చెందిన డ్రోన్‌  తయారీ సంస్థ మారుత్‌ డ్రోన్స్‌తో ఒప్పందం చేసుకుంది. సాక్షి, హైదరాబాద్‌: భూమి ఉపరితలం నుంచి 5 వేల అడుగుల ఎత్తులో ఎగురుతూ ప్రయాణించడం ఎయిర్‌ ట్యాక్సీల ప్రత్యేకత. గ్రామీణ, గిరిజన ప్రాంతాల్లో వైద్యసేవలు అందించడంతోపాటు కొండ ప్రాంతాలు, తీర్థయాత్రలు, పర్యాటక ప్రదేశాలకు ప్రయాణికులను తీసుకెళ్లడమే లక్ష్యమని మారుత్‌డ్రోన్‌ సీఈఓ ప్రేమ్‌కుమార్‌ విస్లావత్‌ ‘సాక్షి’కి తెలిపారు. ఎయిర్‌ ట్యాక్సీ ప్రత్యేకతలు ఆయన మాటల్లోనే.. వాయు రవాణారంగంలో సరికొత్త శకం మొదలుకానుంది. పెరుగుతున్న జనాభా, పట్టణీకరణ, ఈ–కామర్స్‌ వృద్ధి వంటి కారణంగా ప్రజలు, వస్తువులకు వేగవంతమైన, సురక్షితమైన, సరసమైన రవాణావిధానం అవసరం. దీనికి అర్బన్‌ ఎయిర్‌ మొబిలిటీ (యూఏఎం) పరిష్కారం చూపిస్తుంది. 2030 నాటికి యూఏఎం ఎయిర్‌క్రాఫ్ట్‌ మార్కెట్‌ దాదాపు 25–30 బిలియన్‌ డాలర్లకు పెరుగుతుందని పరిశ్రమవర్గాల అంచనా.  ఎయిర్‌ ట్యాక్సీ అంటే..  ఎలక్ట్రిక్‌ వర్టికల్‌ టేకాఫ్‌ మరియు ల్యాండింగ్‌ (ఈవీటీఓఎల్‌) ఎయిర్‌క్రాఫ్ట్‌లను ఎయిర్‌ ట్యాక్సీలని పిలుస్తారు. ఇవి ఎలక్ర్టిక్‌ బైక్‌లు, కార్ల లాగా బ్యాటరీలతో నడుస్తాయి. వీటికి హెలికాప్టర్‌ ఫిక్స్‌డ్‌ వింగ్‌ ఎయిర్‌క్రాఫ్ట్‌ సామర్థ్యంతో మిళితమై ఉంటాయి. కాలుష్య ఉద్గారాలను విడుదల చేయని ఈ ఎయిర్‌ ట్యాక్సీలతో ట్రాఫిక్‌ రద్దీ, రణగొణ ధ్వనుల వంటి సమస్యలు ఉండవు.  రాజేంద్రనగర్‌లో టెస్టింగ్‌ సెంటర్‌  ఎయిర్‌ ట్యాక్సీలను స్కైడ్రైవ్‌ జపాన్‌లో తయారు చేస్తుంది. పరిశోధనలు, అనుమతులు పూర్త­య్యాక.. విడిభాగాలను ఇండియాకు తీసుకొచ్చి హైదరాబా­ద్‌లోని రాజేంద్రనగర్‌లో ఉన్న టెస్టింగ్‌ సెంటర్‌లో బిగిస్తామని మారుత్‌ డ్రోన్స్‌ సీఈఓ ప్రేమ్‌కుమార్‌ చెప్పారు. భవిష్యత్‌ అవసరాలకు సెంటర్‌ను విస్తరించేందుకు ప్రభుత్వాన్ని సంప్రదిస్తాం. ఎయిర్‌ ట్యాక్సీ ప్రత్యేకతలివే.. సీటింగ్‌ సామర్థ్యం : 3 సీట్లు (ఒక పైలెట్‌+ ఇద్దరు ప్రయాణికులు)  కొలతలు: 13 మీటర్లు*13 మీటర్లు*3 మీటర్లు యంత్రాలు: 12 మోటార్లు/రోటర్లు గరిష్ట టేకాఫ్‌ బరువు: 1.4 టన్నులు (3,100 ఎల్‌బీఎస్‌) గరిష్ట వేగం: గంటకు వందకిలోమీటర్లు గరిష్ట ఫ్లయిట్‌ రేంజ్‌: 15 కి.మీ.  ఇదీ స్కైడ్రైవ్‌ కథ..  జపాన్‌కు చెందిన స్కైడ్రైవ్‌ 2018లో ప్రారంభమైంది. ప్రపంచవ్యాప్తంగా ప్రతి ఒక్కరూ తమ రోజువారీ రవాణాగా ఈవీటీఓఎల్‌ను వినియోగించేలా చేయడం దీని లక్ష్యం. 2019లో జపాన్‌లో జరిగిన తొలి ఈవీటీఓఎల్‌ విమాన పరీక్షలో స్కైడ్రైవ్‌ విజయం సాధించింది. వచ్చే ఏడాది జపాన్‌లోని ఒసాకాలో జరగనున్న అడ్వాన్స్‌డ్‌ ఎయిర్‌ మొబిలిటీ (ఏఏఎం) ప్రాజెక్ట్‌ పాల్గొనేందుకు స్కైడ్రైవ్‌ అర్హత సాధించింది. ఈ ఏడాది సుజుకి మోటార్‌ కంపెనీకి చెందిన ప్లాంట్‌లో స్కైడ్రైవ్‌ ఎయిర్‌ ట్యాక్సీల ఉత్పత్తిని ప్రారంభించేందుకు ఏర్పాట్లు చేస్తుంది.  మారుత్‌ డ్రోన్‌ కథ.. సామాజిక సమస్యలకు డ్రోన్‌ ఆధారిత పరిష్కారాలను అభివృద్ధి చేయడమే మారుత్‌ డ్రోన్స్‌ ప్రత్యేకత. ముగ్గురు ఐఐటీ గ్రాడ్యుయేట్లు 2019లో దీనిని ప్రారంభించారు. తాజా ఒప్పందంలో ప్రదర్శన, వాణిజ్య విమానాల కార్యకలాపాలకు స్థానిక ప్రభుత్వం నుంచి మినహాయింపులు, ధ్రువీకరణ పత్రాలు పొందడంతోపాటు పైలెట్, మెకానిక్‌ శిక్షణ వంటి వాటిల్లో మారుత్‌ డ్రోన్స్‌ది కీలకపాత్ర. ఎయిర్‌ ట్యాక్సీలకు నెట్‌వర్క్‌లను కనెక్ట్‌ చేయడం, కస్టమర్లను గుర్తించడం, ఎయిర్‌ఫీల్డ్‌ల భద్రత, అవసరమైన మౌలిక సదుపాయాలకు సహకరించడం వంటివి వాటిలోనూ భాగస్వామ్యమవుతుంది. 

ముందువైపు నుంచి చూస్తే ఈ వాహనం అధునాతనమైన కారులాగానే కనిపిస్తుంది. ఈ వాహనానికి ముందువైపు రెండు చక్రాలు ఉంటాయి. వెనుకవైపు చూస్తే మాత్రం ఒకే చక్రం ఉంటుంది. ఈ విచిత్ర త్రిచక్ర వాహనాన్ని జపాన్‌కు చెందిన బహుళజాతి ఆటోమొబైల్‌ కంపెనీ ‘యమాహా’ ఇటీవల దీనిని ‘ట్రైకెరా’ పేరుతో రూపొందించింది. ఇది పూర్తిగా ఎలక్ట్రిక్‌ వాహనం. ఇందులో డ్రైవర్‌ సహా ఇద్దరు కూర్చుని ప్రయాణించడానికి వీలుంటుంది. దీని డ్రైవింగ్‌ విధానం కారు డ్రైవింగ్‌ మాదిరిగానే ఉంటుంది. దీనిని ఒకసారి చార్జింగ్‌ చేసుకుంటే, ఏకధాటిగా వంద కిలోమీటర్లు ప్రయాణించగలదు. దీని గరిష్ఠవేగం గంటకు 80 కిలోమీటర్లు. దీనిని త్వరలోనే జపాన్‌లో విడుదల చేయనున్నట్లు ‘యమాహా’ కంపెనీ ప్రకటించింది. ఆ తర్వాత మిగిలిన దేశాల్లో కూడా దీనిని అందుబాటులోకి తేనున్నట్లు తెలిపింది. దీని ధరను మాత్రం ఇంకా ప్రకటించలేదు. ఫోల్డింగ్‌ వాషింగ్‌ మెషిన్‌ ఉతికిన తర్వాత బట్టలను మడతపెట్టి దాచుకోవడం మామూలే! ఉతుకుడు పని పూర్తయ్యాక వాషింగ్‌ మెషిన్‌ను ఇంచక్కా మడతపెట్టి, సూట్‌కేసులో దాచుకోవడాన్ని ఊహించగలమా? ఊహాతీతమైన ఈ వాషింగ్‌ మెషిన్‌ను హాంకాంగ్‌కు చెందిన పీక్యూపీ డిజైన్‌ కంపెనీ రూపొందించింది. దూర ప్రయాణాలకు వెళ్లేటప్పుడు సులువుగా తీసుకుపోయేందుకు వీలుగా దీనిని తయారు చేసింది. ఇది రీచార్జబుల్‌ బ్యాటరీతో పని చేస్తుంది. దీనిని ఎక్కడ కావాలంటే అక్కడ వాడుకోవచ్చు. ఇందులో ఉతకాల్సిన దుస్తులు వేసుకుని, తగినంత నీరు, డిటర్జెంట్‌ నింపుకొని ఆన్‌ చేసుకుంటే, అడుగున ఉండే వైబ్రేటర్స్‌ నిర్దిష్టమైన వేగంతో పనిచేస్తూ, దుస్తుల మీద ఉండే మురికిని తేలికగా వదలగొడుతుంది. పని పూర్తయిన తర్వాత దీనిలోని నీటిని బయటకు వంపేసి, నీరంతా ఆరిన తర్వాత దీనిని మడిచేసి సూట్‌కేసులో లేదా బ్యాక్‌ప్యాక్‌లో పెట్టేసుకోవచ్చు. దీని ధర 26.97 డాలర్లు (రూ. 2,248) మాత్రమే! భలే రోబో వాక్యూమ్‌ క్లీనర్‌ ఇప్పటికే మార్కెట్‌లో పలు రకాల రోబో వాక్యూమ్‌ క్లీనర్లు ఉన్నాయి. ఇవన్నీ నేల మీద, గోడల మీద ఉన్న దుమ్ము ధూళి కణాలను సమర్థంగానే తొలగిస్తాయి. చైనాకు చెందిన బహుళ జాతి సంస్థ టీసీఎల్‌ తాజాగా మార్కెట్‌లోకి తెచ్చిన ఈ ‘స్వీవా’ రోబో వాక్యూమ్‌ క్లీనర్‌ దుమ్ము ధూళి కణాలను తొలగించడమే కాకుండా, ఉపరితలంపై వ్యాపించి ఉన్న బ్యాక్టీరియా, వైరస్‌ వంటి సూక్ష్మజీవులను పూర్తిగా నాశనం చేస్తుంది. దీని నుంచి వెలువడే అల్ట్రావయొలెట్‌–సి కిరణాలను ఎలాంటి రోగకారక సూక్ష్మజీవులనైనా క్షణాల్లో నాశనం చేసేస్తాయి. ఇది గూగుల్‌ అసిస్టెంట్‌ లేదా అమెజాన్‌ అలెక్సా వాయిస్‌ అసిస్టెంట్‌ ద్వారా కూడా పని చేస్తుంది. ‘స్వీవా’ రోబో వాక్యూమ్‌ క్లీనర్స్‌ 1000, 2000, 6000, 6500 అనే నాలుగు మోడల్స్‌లో దొరుకుతాయి. ఎంపిక చేసుకున్న వేగాన్ని బట్టి 1500పీఏ నుంచి 2700పీఏ సక్షన్‌ స్పీడ్‌తో పనిచేస్తాయి. మోడల్‌ను బట్టి వీటి 104.99 నుంచి 499.99 వరకు (రూ. 8,752 నుంచి రూ.41,680 వరకు) ఉంటాయి. 

సాంకేతికతతో సకల సౌలభ్యాలను అందుకోవడం ఈ రోజుల్లో పెద్ద కష్టమేం కాదు. అయితే వినియోగదారులు తాము కొనుగోలు చేసే మెషిన్స్‌.. ట్రెండ్‌కి తగ్గట్టుగా ఆకర్షణీయమైన లుక్‌తో పాటు, లేటెస్ట్‌ వెర్షన్స్‌ తో ఉండాలని కోరుకుంటున్నారు. అలాంటి వారి కోసమే ఈ లేటెస్ట్‌ 3 ఇన్‌  1 హెయిర్‌ రిమూవల్‌ డివైస్‌. ఇన్సులేటెడ్‌ గేట్‌ బైపోలార్‌ ట్రాన్సిస్టర్‌ టెక్నాలజీతో రూపొందిన ఈ మెషిన్‌ .. సూపర్‌ ఫాస్ట్‌ డివైస్‌గా పని చేస్తుంది. లాంగ్‌ లాస్టింగ్‌ రిజల్ట్స్‌ను ఇస్తుంది. ఈ పెయిన్‌లెస్‌ లేజర్‌ హెయిర్‌ రిమూవర్‌ సిస్టమ్‌.. స్త్రీలతో పాటు పురుషులకు కూడా చక్కగా ఉపయోగపడుతుంది. వినియోగించడం చాలా తేలిక. ఇది బాడీ, ఫేస్, బికినీ అనే మూడు ప్రత్యేకమైన మోడ్స్‌ని కలిగి ఉంటుంది. ప్రతి మోడ్‌లో 5 లెవెల్స్‌ చొప్పున ఉంటాయి. వాటిని తగ్గించుకోవచ్చు లేదా పెంచుకోవచ్చు. 2 నెలల పాటు ఉపయోగించిన తర్వాత, వెంట్రుకల ఎదుగుదల పూర్తి స్థాయిలో తగ్గిపోతుంది. 98% వరకు ఫలితం కనిపిస్తుంది. అయితే ఈ ట్రీట్‌మెంట్‌కి ముందు.. వెంట్రుకలు రిమూవ్‌ చెయ్యాల్సిన భాగంలో షేవ్‌ చేసుకోవాల్సి  ఉంటుంది. స్కిన్‌  టోన్‌ని బట్టి.. హెయిర్‌ కలర్‌ని బట్టి ఇది యూజ్‌ అవుతుంది. ఇక దీన్ని వినియోగించిన చోట చర్మం పొడిబారి, గరుకుగా మారడం వంటి సమస్యలు తలెత్తవు. ఈ డివైస్‌ను కళ్లకు సమీపంలో వాడుతున్నప్పుడు దీనితో పాటు లభించే కళ్లజోడును కచ్చితంగా పెట్టుకోవాలి. ధర 118 డాలర్లు. అంటే 9,781 రూపాయలు. ఈ లేటెస్ట్‌ ట్రెండీ మెషిన్‌ వెంట ఉంటే.. వ్యాక్సింగ్, థ్రెడింగ్‌ల కోసం ప్రతినెలా బ్యూటీ పార్లర్ల చుట్టూ తిరగాల్సిన పని ఉండదు. దీన్ని వినియోగించి.. కేవలం ఎనిమిది లేదా పది నిమిషాల్లో మొత్తం బాడీ మీదున్న వెంట్రుకలను తొలగించుకోవచ్చు.  (చదవండి: ఈ కిట్‌ మీవద్ద ఉంటే..పార్లర్‌కి వెళ్లాల్సిన పని ఉండదు!

ఇండోర్‌: అత్యాధునిక సాంకేతికతలను వినియోగించడంలో ఉద్యోగులకు, కార్మికులకు తగిన శిక్షణ ఇవ్వాలని, వారిలో నైపుణ్యాలను అభివృద్ధి చేయాల్సిన అవసరం ఉందని ప్రధానమంత్రి నరేంద్ర మోదీ చెప్పారు. కొత్త తరం కార్మికులకు కొత్త తరం విధానాలను అందుబాటులోకి తీసుకురావాలని పిలుపునిచ్చారు. శుక్రవారం మధ్యప్రదేశ్‌లోని ఇండోర్‌లో జి–20 దేశాల కార్మిక, ఉద్యోగ కల్పన శాఖ మంత్రుల సదస్సులో ప్రధాని మోదీ వర్చువల్‌గా ప్రసంగించారు. ప్రపంచవ్యాప్తంగా భవిష్యత్తులో మొబైల్‌ వర్క్‌ఫోర్స్‌ అనేది వాస్తవ రూపం దాల్చబోతోందని ఉద్ఘాటించారు. ప్రస్తుతం కొనసాగుతున్న నాలుగో పారిశ్రామిక విప్లవ హయాంలో ఉద్యోగాల సృష్టికి టెక్నాలజీకి ఒక ముఖ్యమైన సాధనంగా మారిందని గుర్తుచేశారు. నూతన ఉద్యోగాల కల్పనలో ఇకపైకూడా టెక్నాలజీ కీలక పాత్ర పోషిస్తుందని వివరించారు. భవిష్యత్తులో ఉద్యోగులకు, కార్మికులకు స్కిల్లింగ్, రీ–స్కిల్లింగ్, అప్‌స్కిల్లింగ్‌ అనేది కీలకం కాబోతోందని అభిప్రాయపడ్డారు. ఆధునిక సాంకేతికతల వినియోగంలో నైపుణ్యాలు తప్పనిసరిగా పెంచుకోవాలని సూచించారు. వర్క్‌ఫోర్స్‌ను నైపుణ్యవంతులుగా తీర్చిదిద్దాలని పేర్కొన్నారు. ఇందులో భాగంగా భారత్‌లో ‘స్కిల్‌ ఇండియా మిషన్‌’ ప్రారంభించామని తెలియజేశారు.   నైపుణ్యాలను పంచుకోవాలి   నైపుణ్యాలను అభివృద్ధి చేయడంతోపాటు వాటిని ఇతర దేశాలతో పంచుకొనే విషయంలో జి–20 దేశాలు చొరవ తీసుకోవాలని ప్రధాని మోదీ విజ్ఞప్తి చేశారు. దీనివల్ల ఎన్నో ప్రయోజనాలు ఉంటాయని తెలిపారు. నైపుణ్యాల సమాచారం ఇచి్చపుచ్చుకోవాలన్నారు. భారత్‌లో కోవిడ్‌–19 వ్యాప్తి ఉధృతంగా ఉన్న సమయంలో ఫ్రంట్‌లైన్‌ ఆరోగ్య సిబ్బంది, ఇతర ఉద్యోగులు, కార్మికులు ఎనలేని సేవలు అందించారని, వారు తమ నైపుణ్యాలను, అంకితభావాన్ని ప్రదర్శించారని మోదీ కొనియాడారు. సేవా సంస్కృతిని చాటిచెప్పారని, సాటి మనుషుల పట్ల కరుణ కురిపించారని ప్రశంసించారు. నైపుణ్యం కలిగిన కార్మికులను ప్రపంచానికి అందించగల అతిపెద్ద దేశంగా ఎదిగే సామర్థ్యం భారత్‌కు ఉందని స్పష్టం చేశారు. సాంకేతికతలో వేగంగా మార్పులు చోటు చేసుకుంటున్నాయని, టెక్నాలజీ ఆధారిత ఉద్యోగాలను సృష్టించడంలో భారత్‌కు అపార అనుభవం ఉందని వెల్లడించారు. నైపుణ్యాభివృద్ధిపై తాము ప్రత్యేకంగా దృష్టి పెట్టామని చెప్పారు. కౌశల్‌ వికాస్‌ యోజన కింద కృత్రిమ మేధ, రోబోటిక్స్, ఇంటర్నెట్‌ ఆఫ్‌ థింగ్స్, డ్రోన్స్‌ వంటి రంగాల్లో నైపుణ్యాలు పెంచుతున్నామని పేర్కొన్నారు. ఈ–శ్రమ్‌ పోర్టల్‌లో 21.8 కోట్ల మంది కార్మికులు నమోదయ్యారని మోదీ తెలిపారు.

వ్యవసాయ రంగంలో లాభాల గుట్టు పట్టాలన్న ఓ యువరైతు ఆలోచన తోటి రైతులను సైతం జట్టు కట్టేలా చేసింది. ఒక్కొక్కరుగా చేయి కలుపుతూ ఆ రైతులంతా దళారులను తరిమికొట్టి.. సాగులో లాభాల పంట పండిస్తున్నారు. కేంద్ర, రాష్ట్ర ప్రభుత్వాల సహకారంతో సాంకేతిక పద్ధతుల్ని అవలంబిస్తూ.. తమకు అవసరమైన సదుపాయాలను తామే సమకూర్చుకుంటున్నారు. పొలం బడుల్లో ప్రగతి దారులు పరుచుకుంటున్న ఆ రైతులను చూడాలంటే.. నెల్లూరు జిల్లా లేగుంటపాడు వెళ్లాల్సిందే..! సాక్షి, నెల్లూరు:  నెల్లూరు జిల్లా కోవూరు మండలం లేగుంటపాడు గ్రామానికి చెందిన రైతులు 2016లో చేయిచేయి కలిపి సంఘటితమయ్యారు. ఎంబీఏ చదివిన యువరైతు భూపేష్‌రెడ్డితో కలిసి నాబార్డు సహకారంతో రైతు ఉత్పత్తిదారులు సంఘం (ఎఫ్‌పీవో) తరఫున ప్రగతి యువ కేంద్రాన్ని ఏర్పాటు చేశారు. తొలుత 20 ఎకరాల పొలంతో 100 మంది రైతులు రైతు ఉత్పత్తిదారుల సంఘం ఏర్పాటు కాగా.. ఆ తర్వాత కోవూరు మండలంతో పాటు ఇందుకూరుపేట మండలంలోని పల్లెపాడు, జగదేవీపేట, కొత్తూరు, లేబూరు, కొడవలూరు మండలంలోని తలమంచి గ్రామ రైతులు కూడా వారితో జత కలిశారు. ఇలా దాదాపు 2,500 మంది పండ్లు, పూలు, కూరగాయలు సాగు చేసే రైతులు ఎఫ్‌పీవోలో సభ్యులుగా చేరారు. ఒక్కో సభ్యుడు రూ.100 చొప్పున సభ్యత్వ రుసుం, షేర్‌ క్యాపిటల్‌ రూ.వెయ్యి వంతున చెల్లించి దాదాపు రూ.25 లక్షల వరకు సమకూర్చుకున్నారు. ఆ సొమ్ముతో వసతుల కల్పన దిశగా అడుగులు వేస్తున్నారు. సభ్యుల్లో అత్యధికులు కౌలు రైతులే కావటం విశేషం.    అల్లికల కోసం అరటి నార తీస్తున్న రైతులు యంత్రాల బాటపట్టి..  ఉద్యాన శాఖ, నాబార్డు ద్వారా సబ్సిడీ రుణం పొంది రవాణా వాహనాన్ని, తూకంలో మోసపోకుండా విద్యుత్‌ తూకం యంత్రాలను, వీడర్లను సమకూర్చుకున్నారు. అంతేకాకుండా కలెక్షన్‌ సెంటర్లు, సోలార్‌ కోల్డ్‌ రూమ్, సోలార్‌ డ్రయ్యర్, పోర్టబుల్‌ కోల్డ్‌ స్టోరేజ్‌ యూనిట్లతోపాటు ఎలక్ట్రిక్‌ వాహనాలను సైతం సమకూర్చుకున్నారు. సోలార్‌ కోల్డ్‌ రూమ్‌ నిర్మాణానికి దాదాపు రూ.14.5 లక్షల వ్యయం కాగా.. ప్రభుత్వం రూ.11 లక్షల సబ్సిడీ ఇచ్చింది. రైతులకు కొత్త వంగడాలు అందించడం, గిట్టుబాటు ధరకే పంట ఉత్పత్తులు అమ్ముకునేలా అధికారులు అవకాశం కల్పిస్తున్నారు. ఒకవేళ పంట ఉత్పత్తులకు  ధర లేకపోయినా కోల్డ్‌ స్టోరేజ్‌లో నిల్వ చేసి ధర వచ్చినప్పుడే మార్కెట్‌కు పంపిస్తున్నారు.   జేఎల్‌జీ గ్రూపులకు రుణ సదుపాయం  ఐదుగురు చొప్పున రైతులను జాయింట్‌ లయబిలిటీ గ్రూపులుగా (జేఎల్‌జీ) ఏర్పాటు చేసి అధికారులు వారికి రుణాలు అందేలా సహకారం అందిస్తున్నారు. ఇప్పటికే దాదాపు 500 గ్రూపులను ఏర్పాటు చేశారు. ఒక్కో గ్రూపునకు రూ.5 లక్షల వరకు పెట్టుబడుల కోసం రుణం మంజూరు చేయిస్తున్నారు. చిన్న, సన్నకారు రైతులకు గ్రీన్‌హౌస్‌ టెక్నాలజీ అందించేందుకు కృషి జరుగుతోంది. 10 సెంట్ల విస్తీర్ణంలో సైతం రూ.లక్ష వ్యయంతో ఇజ్రాయెల్‌ టెక్నాలజీ ఉపయోగించి పంటల సాగు చేసేలా కృషి చేస్తున్నారు. పచ్చి మిర్చి గ్రేడింగ్‌ చేస్తున్న రైతులు విదేశాలకు ఎగుమతులు చేసే లక్ష్యంతో..  రైతులకు అన్ని అవసరాలు తీర్చడంతో పాటు రైతులే సొంతంగా మార్కెటింగ్‌ చేసుకునే స్థాయికి చేరుకున్నాం. ఆధునిక పద్ధతులతో సేంద్రియ పంటలు పండించే పరిస్థితి తీసుకొచ్చాం. ప్రభుత్వ సహకారంతో పంట ఉత్పత్తులు నిల్వ చేసుకునేందుకు సోలార్‌ కోల్డ్‌ స్టోరేజ్‌లు, మార్కెటింగ్‌ కోసం వారాంతపు సం­త ఏర్పాటు చేసుకున్నాం. విదేశాలకు ఎగుమతులు చేయాలనే లక్ష్యంతో ఉన్నాం  – భూపేష్‌రెడ్డి , రైతు ఉత్పత్తిదారుల సంఘ రూపకర్త  ఆధునిక పద్ధతులతో సాగు   రైతులంతా ఐకమత్యంతో రైతు ఉత్పత్తిదారుల సంఘంలో చేరాం. మాకు పంటల సాగుపై శిక్షణ కూడా ఇస్తున్నారు. ఆ«ధునిక పద్ధతులతో సాగు చేస్తున్నాం. ఏటా భూసార పరీక్షలు చేయించి అవసరమైన ఎరువులు మాత్రమే వాడుతున్నాం. దీనివల్ల పంటల దిగుబడి పెరిగి వ్యయం తగ్గింది.  – రాజశేఖర్, యువ రైతు, లేగుంటపాడు చదవండి: ప్రీ వెడ్డింగ్ ఫొటోషూట్‌లో నవ్వులు పూయించిన తాత.. వీడియో వైరల్..

న్యూఢిల్లీ: తమ ప్రభుత్వం దివ్యాంగులు తమ ప్రతిభను చాటుకునేందుకు, వారికి అవకాశాలు కల్పించేందుకు ఎన్నో కార్యక్రమాలను ప్రవేశపెట్టిందని ప్రధాని మోదీ చెప్పారు. దివ్యాంగులు ప్రదర్శిస్తున్న ధైర్యాన్ని, వారు సాధిస్తున్న విజయాలను ఆయన ప్రశంసించారు. అంతర్జాతీయ దివ్యాంగుల దినోత్సవాన్ని పురస్కరించుకుని శనివారం ఆయన ఈ మేరకు ట్వీట్‌ చేశారు. దివ్యాంగులకు సమాన అవకాశాలు కల్పించేందుకు ప్రభుత్వం శ్రద్ధ చూపుతుందనటానికి తీసుకువచ్చిన ప్రతిష్టాత్మక కార్యక్రమాలు, కల్పిస్తున్న అత్యాధునిక సౌకర్యాలే తార్కాణం. దివ్యాంగుల జీవితాల్లో సానుకూల మార్పు కోసం అట్టడుగు స్థాయిలో పనిచేస్తున్న కృషి వారందరికీ కృతజ్ఞతలు’ అని పేర్కొన్నారు.

అమలాపురం టౌన్‌(కోనసీమ జిల్లా): కోనసీమ జిల్లాకు డాక్టర్‌ బీఆర్‌ అంబేడ్కర్‌ పేరు పెట్టడాన్ని వ్యతిరేకిస్తూ అమలాపురంలో ఈ నెల 24న విధ్వంసం సృష్టించిన ఆందోళనకారులు కొందరు అజ్ఞాతంలోకి వెళ్లిపోయారు. మరోపక్క పోలీసులు ఆధునాతన సాంకేతికత పరిజ్ఞానంతో సీసీ కెమెరా ఫుటేజ్‌లు, కాల్‌ డేటాలతో ఆందోళనకారులను గుర్తిస్తున్నారు. ఇప్పటికే 19 మందిని అరెస్ట్‌ చేశారు. 46 మందిపై కేసులు నమోదు చేశారు. మరో 23 మందిని అదుపులోకి తీసుకుని, కేసుల నమోదుకు సిద్ధమవుతున్నారు. పోలీసులు దాదాపు 150 మందిని అనుమానితులుగా గుర్తించడంతో ఆందోళనకారుల్లో వణుకు పుడుతోంది. చదవండి: జనసేన, టీడీపీ, బీజేపీ కుమ్మక్కు.. కుట్ర బట్టబయలు పోలీసుల కంట పడకుండా అజ్ఞాతంలోకి వెళ్తున్నారు. కొందరు సొంత ఫోన్లను స్విచ్‌ ఆఫ్‌ చేసేస్తే.. మరికొందరు ఫోన్‌ కాల్స్‌ వస్తున్నా లిఫ్ట్‌ చేయకుండా మిన్నకుండిపోతున్నారు. మరికొందరు హైదరాబాద్‌తో పాటు ఇతర రాష్ట్రాలకు వెళ్లి తలదాచుకున్నట్లు తెలిసింది. విధ్వంస కాండకు పాల్పడిన వారిలో అధిక శాతం టీడీపీ, జనసేన, బీజేపీలకు చెందిన క్రియాశీలక కార్యకర్తలే ఉన్నారు. కేసులు నమోదైన ముగ్గురు బీజేపీ నాయకులు, ఇద్దరు టీడీపీ, ఆరుగురు జనసేన కార్యకర్తలు అజ్జాతంలోకి వెళ్లిపోయారు. అజ్ఞాతంలోకి వెళ్లిన ఆందోళనకారుల ఫోన్‌ నంబర్ల కాల్‌ డేటా, ఫోన్లు ఏ టవర్‌ పరిధిలో ఉన్నాయో పోలీసులు ఆధునిక టెక్నాలజీతో పసిగడుతున్నారు. ఆ రెండు పార్టీ నేతల్లో గుబులు  విధ్వంసకర ఘటనల్లో ఎక్కువ మంది టీడీపీ, జనసేన, బీజేపీ నాయకులు, కార్యకర్తలు, సానుభూతిపరులు ఉన్నారు. దీంతో ఆయా పార్టీల నేతల గుండెల్లో రైళ్లు పరుగెడుతున్నాయి. పోలీసు విచారణలో తమ పేర్లు ఎక్కడ బయట పడతాయోనని పలువురు గుబులు చెందుతున్నారు. తమ ఫోన్లు ట్రాప్‌ చేస్తున్నారేమోనన్న అనుమానంతో ఆ పార్టీల నేతలు సొంత ఫోన్లకు బదులు కొత్త ఫోన్లు, నంబర్ల నుంచి మాట్లాడుతున్నారు. ఇంకా నిఘా నీడలోనే.. విధ్వసంకర ఘటనలతో అట్టుడికిన అమలాపురం పూర్తిగా కుదుటపడింది. జిల్లా వ్యాప్తంగా పోలీసు నిఘా మాత్రం కొనసాగుతోంది. దాదాపు వెయ్యి మంది పోలీసులు ముఖ్య కూడళ్ల వద్ద పహారా కాస్తున్నారు. రోడ్లపై వాహనాల విస్తృత తనిఖీలకు పోలీసులు శనివారం నుంచి తెర వేశారు. ఆందోళనకారులను దీటుగా కట్టడి చేసేందుకు తగిన బందోబస్తుతో పోలీసు శాఖ సంసిద్ధమై ఉంది. 

ఆధునిక యుగంలో మనిషి జీవితానికి, విద్యుత్‌కు ఉన్న అనుబంధం విడదీయలేనిది. క్షణం పాటు విద్యుత్‌ సరఫరా నిలిచిపోయినా.. భరించలేని పరిస్థితి. పదుల సంఖ్యలో విద్యుత్‌ ఉపకరణాలు లేని ఇల్లు ఉండదంటే అతిశయోక్తి కాదు. ఇంతటి ప్రాముఖ్యత ఉన్న విద్యుత్‌కు ప్రస్తుతం ప్రపంచవ్యాప్తంగా కొరత ఏర్పడుతోంది. బొగ్గు సంక్షోభం గతేడాది పలు దేశాలను చీకట్లోకి నెట్టేసింది. జల, సౌర, పవన, అణు, గ్యాస్‌ తదితర మార్గాల్లో విద్యుత్‌ ఉత్పత్తి చేస్తున్నా కూడా.. మనిషి అవసరాలకు సరిపోవడం లేదు. పెరుగుతున్న జనాభా, వారి అవసరాలకు అనుగుణంగా విద్యుత్‌ ఉత్పత్తిని భారీగా పెంచాల్సిన పరిస్థితి ఏర్పడింది. ఈ దిశగా ప్రపంచవ్యాప్తంగా పరిశోధనలు, ప్రయోగాలు జరుగుతున్నాయి. – సాక్షి, అమరావతి  స్కాట్లాండ్‌కు చెందిన రాడ్‌.. గాలిపటాలతో విద్యుత్‌ను పుట్టించే సరికొత్త టెక్నాలజీని కనిపెట్టారు. గాలిమరల ద్వారా విద్యుత్‌ తయారు చేస్తున్నప్పుడు.. గాలి పటాల ద్వారా ఎందుకు విద్యుత్‌ తయారు చేయకూడదని ప్రశ్నించుకున్న ఆయన.. ‘ఫ్లయింగ్‌ టర్బైన్‌’ టెక్నాలజీని ఆవిష్కరించారు. గాలి పటాలు ఎగురుతున్నప్పుడు విడుదలయ్యే శక్తిని కింద ఉండే గ్రౌండ్‌ స్టేషన్‌ విద్యుత్‌గా మారుస్తుంది. ఈ పద్ధతిలో చాలా తక్కువ కర్బన ఉద్గారాలు విడుదలవుతాయి. 10 కిలోమీటర్ల ఎత్తులోనూ గాలి పటాలు విద్యుత్‌ను జనరేట్‌ చేయగలవు. ఇవి నిరంతరం ఎగురుతూ ఉంటే ఒక ఇంటికి సరిపడే విద్యుత్‌ ఉత్పత్తి అవుతుంది. వ్యవసాయం, పరిశ్రమలు, చేపలు పట్టుకునే పడవలు, ఫ్యాక్టరీలు ఇలా అనేక చోట్ల ఈ విధానాన్ని ఉపయోగించుకోవచ్చు. క్లబ్‌లో కాళ్లు కదిపితే చాలు..  బ్రిటన్‌లోని ఒక నైట్‌ క్లబ్‌ సంస్థ.. తమ వద్దకు వచ్చి డ్యాన్స్‌ చేసే వారి శరీర ఉష్ణోగ్రతల ఆధారంగా విద్యుత్‌ తయారు చేస్తోంది. ఈ విద్యుత్‌ను అవసరమైనప్పుడు వాడుకునేలా.. భద్రపరుచుకునే ఏర్పాటు కూడా చేసింది. ఈ ఏడాది చివరి నాటికి పూర్తిస్థాయిలో విద్యుత్‌ ఉత్పత్తిని ప్రారంభిస్తామని నిర్వాహకులు తెలిపారు. దీని ద్వారా కాలుష్యాన్ని నియంత్రించి, వాతావరణ మార్పులను అరికట్టవచ్చని చెబుతున్నారు. అదేవిధంగా ఏపీలో ఇప్పటికే చెత్త నుంచి కరెంటు తయారు చేసే విధానాలకు శ్రీకారం చుట్టారు. అంతేకాకుండా మన రాష్ట్రంలో ప్రపంచంలోనే అతిపెద్దదైన నీటిలో తేలియాడే ఫ్లోటింగ్‌ సోలార్‌ ప్లాంట్‌ను ఏర్పాటు చేశారు. బొగ్గు కొరత నుంచి బయటపడటం కోసం బ్లూ హైడ్రోజన్‌ను జపాన్‌ ప్రత్యామ్నాయంగా భావిస్తోంది. జపాన్‌లోని టోక్యోలో బ్లూ హైడ్రోజన్‌ ఫ్యూయల్‌ సెల్‌తో వాహనాలు కూడా ప్రయోగాత్మకంగా నడిపారు. 

అందమైన ఫొటోలు, వీడియోలు తీయాలంటే ప్రొఫెషనల్‌ కెమెరాపర్సన్‌ అయ్యి ఉండాలా?.  చేతిలో ఫోన్‌, కెమెరాలు ఉంటే చాలూ తీసేయొచ్చు. కాకపోతే ఈరోజుల్లో  సోషల్‌మీడియాలో షేర్‌ చేయడానికి ‘జస్ట్‌ వాంట్‌ టు షూట్‌ ఏ లిటిల్‌ వీడియో’ అనుకునే వాళ్లు.. అది కచ్చితంగా అందరూ మాట్లాడుకునేలా ఉండాలని అనుకుంటున్నారు. ఇందుకోసం ‘క్వాలిటీ’ విషయంలో కాంప్రమైజ్‌ కావడం లేదు. అలాంటి వాళ్ల కోసం సినిమాటిక్‌ మోడ్‌ను అందిస్తోంది ఐఫోన్‌ 13.  పైన మీరు చూస్తున్నది మెక్సికో సిటీలో గత కొంతకాలంగా తీసిన దృశ్యాలు. ఎంత బాగున్నాయో కదా! ఏదో హాలీవుడ్‌ రేంజ్‌ వీడియోలాగా అనిపిస్తుందా? కానీ, ఇది తీసింది ఓ ఫోన్‌తో. అదీ ఐఫోన్‌ 13 ప్రోతో.  ఇందులోని సినిమాటిక్‌ మోడ్‌ వెర్షన్‌ ఇప్పుడు యూత్‌లో హాట్‌ టాపిక్‌గా మారింది.   వీడియోగ్రాఫర్‌ జె.మారిసన్, సింగర్‌ జూలియ వోల్ఫ్‌(ఫాలింగ్‌ ఇన్‌ లవ్‌ సాంగ్‌ ఫేమ్‌) మ్యూజిక్‌ వీడియోలను స్టూడియోలలో కాకుండా రోడ్ల మీద చిత్రీకరించి శబ్భాష్‌ అనిపించుకున్నాడు. దీనికి కారణం ఐఫోన్‌13 సినిమాటిక్‌ మోడ్‌ అంటాడు మారిసన్‌. ‘ఐఫోన్‌13 ప్రో నా చేతుల్లోకి తీసుకోగానే మొదట నేను ఆసక్తితో పరీక్షించింది సినిమాటిక్‌ మోడ్‌. చాలా షార్ప్‌ అనిపించింది. మీలో టాలెంట్‌ తక్కువైనా సరే, సాధారణ లొకేషన్స్‌ అయినా సరే ఖరీదైన లుక్‌ తీసుకురావచ్చు. కిట్‌ భారం లేకుండా ట్రావెల్‌ వీడియోలకు సినిమాటిక్‌ లుక్‌ ఇవ్వొచ్చు’ అంటున్నాడు మారిసన్‌. అడ్వాన్స్‌డ్‌ వీడియో రికార్డింగ్‌ ఫీచర్‌ ‘సినిమాటిక్‌ మోడ్‌’ ఐఫోన్‌13 నాలుగు మోడల్స్‌లోనూ అందుబాటులో ఉంది. చదవండి: ఐఫోన్‌-13 ప్రీ-బుకింగ్స్‌లో దుమ్మురేపిన ఇండియన్స్‌..! సెప్టెంబర్‌ 14 ‘కాలిఫోర్నియా స్ట్రీమింగ్‌ ఈవెంట్‌’ జరిగిన తరువాత యాపిల్‌ ఐఫోన్‌13 సిరీస్‌లోని లాంగర్‌ బ్యాటరీలైఫ్, హైయర్‌ స్క్రీన్‌బ్రైట్‌నెస్, మెరుగైన కెమెరాసిస్టమ్‌...ఇలా ఆసక్తికరమైన విషయాలు, ఫెంటాస్టిక్‌ అప్‌గ్రేడ్‌ల గురించి మాట్లాడుకోవడం ఎక్కువైంది. వీటిలో యూత్‌ను ఆకట్టుకుంటున్న ఫీచర్‌... సినిమాటిక్‌ మోడ్‌. డిజిటల్‌ ఫొటోగ్రఫీ శకం మొదలైన తరువాత ఆనాటి ఫిల్మ్‌కెమెరాలతో సాధ్యమైనవి సాధ్యం చేయడం తోపాటు ‘రీల్‌’కు అందని సూక్ష్మఅంశాలను కాప్చర్‌ చేయడం, పరిమితులతో కూడిన విన్‌యెటింగ్‌(రిడక్షన్‌ ఆఫ్‌ ఇమేజెస్‌ బ్రైట్‌నెస్‌) పరిధిని పెంచడం లాంటివి జరిగాయి. ఈ నేపథ్యంలో ఐఫోన్‌ వీడియో ప్రేమికులను ఆకట్టుకునే ఫీచర్లకు ప్రాధ్యానత ఇస్తుంది. తాజా ‘సినిమాటిక్‌ మోడ్‌’ హెడ్‌లైన్‌ న్యూఫీచర్‌గా నిలిచింది. ‘సినిమాటిక్‌ మోడ్‌’తో ఎలాంటి ఉపయోగాలు ఉన్నాయి అనే విషయానికి వస్తే, ముఖ్యంగా...వీడియో బ్యాక్‌గ్రౌండ్‌ను బ్లర్‌ చేయవచ్చు. ఆటో–ఫోకస్‌ సెట్‌ చేసుకోవచ్చు. పోట్రాయిట్‌ మోడ్‌ వీడియోలకు, ఫోకస్‌ పాయింట్లను ఎంపిక చేసుకోవడానికి సమర్థవంతంగా ఉపయోగపడుతుంది. ట్రెడిషనల్‌ వీడియో మోడ్‌తో పోల్చితే ‘స్పెషల్‌’ మోడ్‌గా చెప్పే దీనిలో రిజల్యూషన్, ఫ్రేమ్‌రేట్‌ మెరుగ్గా ఉంటుంది.   డెప్త్‌ ఇన్‌ఫర్‌మేషన్‌(సైట్‌లో ఉండే అబ్జెక్ట్స్‌కు కెమెరాకు మధ్య ఉండే దూరం)ను రికార్డ్‌ చేస్తుంది. ఈ సమాచారంతో వీడియో షూట్‌ చేసిన తరువాత కూడా సీన్‌లో ఫోకస్‌ను షిఫ్ట్‌ చేసుకోవచ్చు. మోడ్రన్‌ డే మూవీస్‌లో ‘డెప్త్‌ ఆఫ్‌ ఫీల్డ్‌’ కీలక పాత్ర పోషిస్తుంది. ‘డెప్త్‌ ఆఫ్‌ ఫీల్డ్‌’ను ఎడిట్‌ చేసుకోవడానికి ఇక ప్రొఫెషనల్‌ కెమెరాలు మాత్రమే అవసరం లేదు. మూవీస్‌లో కనిపించే ‘ఐకానిక్‌ విజువల్‌ ఎఫెక్ట్‌’ను సినిమాటిక్‌మోడ్‌తో పునఃసృష్టి చేసే ప్రయత్నం చేసింది ఐఫోన్‌ 13. డాల్బీ విజన్‌ హెచ్‌డీఆర్‌లో సినిమాటిక్‌మోడ్‌ వీడియోలను రికార్డ్‌ చేస్తుంది.  స్థూలంగా చెప్పాలంటే స్టూడియో లు, ప్రొఫెషనల్‌ లైటింగ్, ఖరీదైన సాంకేతిక పరికరాలు అవసరం లేకుండానే... వీడియోలకు సినిమాటిక్‌ లుక్‌ తీసుకు రావచ్చు. చదవండి: Apple iPhone 13 .. యాపిల్‌ అదిరిపోయే ఆఫర్‌

పేరు: రోజీ  వయసు: 22  పౌరసత్వం: దక్షిణ కొరియా క్వాలిఫికేషన్‌: మాంచి అందగత్తె వృత్తి: సోషల్‌ మీడియా ఇన్‌ఫ్లుయెన్సర్‌ సంపాదన :  ఏడాదికి ఎనిమిదిన్నర యూఎస్‌ డాలర్లు  మన కరెన్సీలో..  ఆరు కోట్ల రూపాయలకు పైనే.    ఇన్‌స్టాగ్రామ్‌లో దాదాపు తొంభై వేల దాకా ఫాలోవర్స్‌ ఉన్నారు ఈ చిన్నదానికి. సుమారు వందకు పైగా కంపెనీలకు బ్రాండ్‌ అంబాసిడర్‌గా వ్యవహరిస్తోంది. పైగా పైసా రెమ్యునరేషన్‌ తీసుకోదు!!.  వీటన్నింటికితోడు బోలెడంత టైమూ సేవ్‌ చేస్తోంది కూడా. సోషల్‌ మీడియాలో ఈ చిన్నదాని ఫొటోలు చూసి.. ‘అబ్బా ఫాలో అవుదాం.. ఫ్లర్ట్‌ చేద్దాం’ అనుకుంటున్నారేమో!.  రోజీతో అంత వీజీ కాదు!!.  ఇక్కడ మీరూ చూస్తున్న అందమైన అమ్మాయికి జీవం లేదు.  ఎందుకంటే అసలు మనిషే కాదు కాబట్టి.. View this post on Instagram A post shared by 로지_버추얼 인플루언서 (@rozy.gram) టెక్నాలజీ చేసిన మాయే ఇదంతా.  కృత్రిమ మేధస్సు ద్వారా సృష్టించిన సూపర్‌ మోడల్‌ ఈ రోజీ.   అనంత విశ్వంలో విశాలమైన విషయం ఏదైనా ఉందీ అంటే.. అది మనిషి బుర్రే. తన పరిధిని మించి బుర్రకు పదునుపెట్టే మనిషి.. ఒక్కోసారి ఎక్స్‌ట్రీమ్‌ ఆలోచనలతో అద్భుతమైన ఆవిష్కరణలకు కారణం అవుతుంటాడు. అలాంటిదే వర్చువల్‌ ఇన్‌ఫ్లుయెన్సర్‌ ట్రెండ్‌.  సృష్టికి ప్రతిసృష్టిలా మనిషి రూపాల్ని సృష్టించి.. వ్యాపారంలో సంచలనాలకు నెలవుగా మారుతోంది మనిషి మేధస్సు. కృత్రిమ మేధస్సు ద్వారా రోజీ లాంటి ఎన్నో క్యారెక్టర్లను సృష్టించి.. డిజిటల్‌ సెలబ్రిటీలతో ఫాలోవర్స్‌కు గాలం చేసి వ్యాపారం చేయిస్తున్నారు. ఈరోజుల్లో సోషల్‌ మీడియా ఇన్‌ఫ్లుయెన్సర్‌గా మారేందుకు ఎక్కువ మందికి ఆస్కారం ఉంటోంది. అయితే విమర్శలకు తావు లేని ఇన్‌ఫ్లుయెన్సర్‌ను సృష్టించాలనే ఆలోచన నుంచి పుట్టిందే రోజీ.  అడ్వర్టైజింగ్‌ రంగంలో, కమర్షియల్‌ స్పేస్‌లో వర్చువల్‌ ఇన్‌ఫ్లుయెన్సర్‌ అనేది ఇప్పడు సెన్సేషన్‌గా మారింది. దక్షిణ కొరియా నుంచి మొదలైన ఈ ట్రెండ్‌.. హ్యూమన్‌ ఇన్‌ఫ్లుయెన్సర్లకు గట్టి పోటీ ఇస్తోంది. మరో ప్రత్యేకత ఏంటంటే.. వాస్తవ ప్రపంచం, మనుషులతోనూ ఈ ఇన్‌ఫ్లుయెన్సర్లు సన్నిహితంగా కదిలినట్లు బిల్డప్‌ ఇవ్వడం.  View this post on Instagram A post shared by 로지_버추얼 인플루언서 (@rozy.gram) కిందటి ఏడాది అగష్టులో సిడూస్‌ స్టూడియో ఎక్స్‌.. రోజీని సృష్టించింది.  కిందటి ఏడాది డిసెంబర్‌ నుంచి రోజీ అకౌంట్‌ను యాక్టివ్‌ చేశారు.   ఈ ఒక్క ఏడాదిలోనే బిలియన్‌ వాన్‌(ఎనిమిదిన్నర లక్షల డాలర్లు) సంపాదించింది రోజీ ఏఐ సోషల్‌ మీడియా ఇన్‌ఫ్లుయెన్సర్‌.  View this post on Instagram A post shared by 로지_버추얼 인플루언서 (@rozy.gram) అడ్వాంటేజ్‌లు మనిషి కాదు.. కాబట్టి, వివాదాలకు, విమర్శలకు తావు ఉండదు.  కావాలని ఎవరైనా గోల చేస్తే తప్ప అభ్యంతరాలు వ్యక్తం కావు. బోలెడంత టైం సేవ్‌ అవుతుంది. టెక్నికల్‌ అంశాలకు తప్పించి పెద్దగా ఖర్చు చేయాల్సిన అవసరం పడకపోవచ్చు.  ఒక్కసారి క్యారెక్టర్‌ను సృష్టించడం.. అవసరమైన మార్పులు చేసుకోవడం తప్పించి పెద్ద హడావిడి ఉంటుంది.   పైగా ఎప్పుడూ యాక్టివ్‌గా ఉంటుంది.  వీటన్నింటికి తోడు జ్వరం నుంచి కరోనా లాంటి మహమ్మారులేవీ సోకలేవు. వయసు ఎప్పుడూ ఒకేలా ఉంటుంది. అవసరమైతే ఫాలోవర్స్‌ను ఎట్రాక్ట్‌ చేసేలా మార్పులు సైతం చేయొచ్చు. View this post on Instagram A post shared by 로지_버추얼 인플루언서 (@rozy.gram) దక్షిణ కొరియాలో షిన్‌హాన్‌ లైఫ్‌ ఇన్సురెన్స్‌ కంపెనీ టాప్‌ పొజిషన్‌. అలాంటి కంపెనీ రోజీని బ్రాండ్‌ అంబాసిడర్‌గా నియమించుకుంది. ఈ యాడ్‌ యూట్యూబ్‌లో 11 మిలియన్ల వ్యూస్‌ దక్కించుకుంది.  డిజిటల్‌ సెలబబ్రిటీలు..  విన్సెంట్‌.. పాతికేళ్లు దాటని కుర్రాడు. సారీ..  100 శాతం కంప్యూటర్‌ జనరేటెడ్‌ క్యారెక్టర్‌ ఇతను.  సువా కూడా సూపర్‌ మోడల్‌గా రాణిస్తోంది. రేసిజం హద్దుల్ని చేరిపేస్తూ సృష్టించిన క్యారెక్టర్‌ సూడు.. శాంసంగ్‌, బాంమెయిన్‌ లాంటి బడా బ్రాండ్‌లకు అంబాసిడర్‌గా వ్యవహరిస్తోంది.  రియా కీమ్‌.. ఎల్జీ ఎలక్రా‍్టనిక్స్‌  యాడ్స్‌ కోసం పుట్టిన క్యారెక్టర్‌.  అమెరికా ప్రముఖ కంపెనీ బ్రడ్‌..  లిల్‌ మిక్యుయెలా అనే డిజిటల్‌ సెలబ్రిటీ ద్వారా  10 మిలియన్‌ డాలర్లు సంపాదించింది గత ఏడాదిలో.. - సాక్షి , వెబ్‌డెస్క్‌ ప్రత్యేకం చదవండి: టెక్నాలజీ చేసిన ఘోర హత్య ఇది

వరుస ఫ్లాప్‌లతో కష్టాల్లో పడ్డ స్టార్‌ డైరెక్టర్ శ్రీనువైట్ల కాస్త గ్యాప్‌ తీసుకొని రవితేజ హీరోగా ఓ సినిమాను తెరకెక్కిస్తున్నారు. అమర్‌ అక్బర్‌ ఆంటోని పేరుతో తెరకెక్కుతున్న ఈ సినిమాను ఎక్కువగా ఫారిన్‌ లోకేషన్స్‌లో షూటింగ్ చేయనున్నారు. డిఫరెంట్‌ కాన్సెప్ట్‌ తో తెరకెక్కుతున్న  ఈ సినిమా కోసం శ్రీనువైట్ల సరికొత్త టెక్నాలజీలను వినియోగిస్తున్నారు. అమెరికాలోని విభిన్న వాతావరణ పరిస్థితుల్లో షూటింగ్‌ చేసేందుకు ఈ టెక్నాలజీ వాడుతున్నట్టుగా తెలుస్తోంది. అంతేకాదు అమర్‌ అక్బర్‌ ఆంటోని సినిమాను 8కె క్వాలిటీతో రూపొందిస్తున్నారు. మైత్రీ మూవీ మేకర్స్‌ సంస్థ నిర్మిస్తున్న ఈ సినిమాతో ఇలియానా టాలీవుడ్‌లో రీ ఎంట్రీ ఇస్తున్నారు. ఇటీవల నేలటిక్కెట్టు సినిమాతో రవితేజ కూడా నిరాశపరచటంతో సెట్స్‌మీద ఉన్న అమర్‌ అక్బర్ ఆంటోని హీరో హీరోయిన్లు రవితేజ, ఇలియానా దర్శకుడు శ్రీనువైట్ల కెరీర్‌కు కీలకంగా మారింది. ఈ సినిమాను మైత్రీ మూవీ మేకర్స్ సంస్థ నిర్మిస్తోంది.


 - వేలిముద్ర ఆధారంగా నేరస్తుల గుర్తింపు
 - పోలీస్‌ శాఖలో ఖాళీల భర్తీకి చర్యలు
 - రానున్న రోజుల్లో స్మార్ట్‌ పోలిసింగ్‌
 - రాయల సీమ ఐజీ శ్రీధర్‌రావు
  
 ఆదోని టౌన్‌: సీసీ కెమెరాలతో నేరాలను అదుపు చేయవచ్చని రాయలసీమ రేంజ్‌ ఐజీ ఎన్‌. శ్రీధర్‌రావు తెలిపారు. ఆదోని పట్టణంలోని పోలీస్‌ కంట్రోల్‌రూం, వ¯న్‌Œ టౌన్‌ పోలీస్‌ స్టేషన్‌లను బుధవారం.. ఎస్పీ ఆకే రవికృష్ణతోపాటు ఆయన తనిఖీ చేశారు. ట్రాఫిక్‌ కంట్రోల్‌ రూంలో సీసీ కెమెరాల పనితీరును డీఎస్పీ కొల్లి శ్రీనివాసరావు వివరించారు. ఈ సందర్భంగా ఐజీ మాట్లాడుతూ. ఆదోని పట్టణంలో రూ.30 లక్షల వ్యయంతో 60 సీసీ కెమెరాలను ఏర్పాటు చేశామన్నారు. శాంతిభద్రతల పరిరక్షణకు, ప్రజలకు రక్షణ కల్పించేందుకు.. సీసీ కెమెరాలు ఎంతో ఉపయోగపడుతున్నాయన్నారు. రాయలసీమపరిధిలోని తిరుపతిలో ఏర్పాటు చేసిన సీసీ కెమెరాలు ఫలితాన్నిస్తున్నాయన్నారు. చిత్తూరు, కడప, అనంతపురం, కర్నూలులోనూ సీసీ కెమెరాలు ఏర్పాటు చేసినట్లు వివరించారు.
  
 అధునాతన టెక్నాలజీతో థంబ్‌ (వేలిముద్ర) ఆధారంగా నేరస్తులను గుర్తించడం సులభం అవుతోందన్నారు. పోలీసు శాఖలో చాలా మార్పులు వచ్చాయని, సైబర్‌ నేరాలు, అసాంఘిక శక్తుల ఆట కట్టించడంతో పురోగతి సాధిస్తున్నామని చెప్పారు. పోలీసు శాఖలో 12 వేల పోస్టులు ఖాళీగా ఉన్నాయని, అందులో ఆరు వేల పోస్టులు భర్తీ చేసేందుకు చర్యలు తీసుకుంటున్నట్లు వెల్లడించారు. మొబైల్‌ టెక్నాలజీతోనూ కేసులను ఛేదించనున్నట్లు చెప్పారు. రానున్న రోజుల్లో స్మార్ట్‌ పోలిసింగ్‌ వ్యవస్థ వస్తుందన్నారు. ఆన్‌లైన్‌ మోసాలపై ఉక్కుపాదం మోపుతామని స్పష్టం చేశారు. 
  
 కంట్రోల్‌ రూం పోలీసులకు ప్రోత్సాహకాలు
 ట్రాఫిక్‌ కంట్రోల్‌ రూంలో పనిచేస్తున్న ఐదుగురు పోలీసులకు ఐజీ శ్రీధర్‌రావు, ఎస్పీ ఆకె రవికృష్ణలు.. ప్రోత్సాహక బహుమతులు ప్రదానం చేశారు. ఆదోని షరాఫ్‌ బజార్, బంగారం, వెండి వ్యాపారుల అసోసియేషన్‌ నిర్వాహకులు ఐజీ, ఎస్పీలను సన్మానించారు. డీఎస్పీ కొల్లి శ్రీనివాసరావు, సీఐలు ఘంటా సుబ్బారావు, చంద్రశేఖర్, దైవప్రసాద్, శంకరయ్య, గౌస్, ఎస్‌ఐలు ఈశ్వరయ్య, నల్లప్ప, సునిల్‌ కుమార్, బాబు, విజయ్, రమేష్‌బాబు తదితరులు పాల్గొన్నారు. 
  


 ⇒ లేటెస్ట్‌ టెక్నాలజీలో ముందడుగు...
 ⇒ భారతి సిమెంట్‌ మార్కెటింగ్‌ అసిస్టెంట్‌ వైస్‌ ప్రెసిడెంట్‌ ఎంసీ మల్లారెడ్డి
 
 మహబూబ్‌నగర్‌: సిమెంట్‌ తయారీలో లేటెస్ట్‌ టెక్నాలజీ పద్ధతులను వినియోగిస్తూ వినియోగదారులు కోరుకునే విధంగా నాణ్యమైన సిమెంట్‌ను అందించడంలో భారతి సిమెంట్‌ ఎప్పటికీ ముందుంటుందని ఆ కంపెనీ మార్కెటింగ్‌ అసిస్టెంట్‌ వైస్‌ ప్రెసిడెంట్‌ ఎంసీ మల్లారెడ్డి అన్నారు. శుక్రవారం మహబూబ్‌నగర్‌ జిల్లా కేంద్రంలోని సిందుహోటల్‌లో జరిగిన ఇంజనీర్ల అవగాహన సదస్సులో ఆయన మాట్లాడారు. సిమెంట్‌ తయారీ చరిత్రలో మునుపెన్నడూ లేనివిధంగా అతి తక్కువ సమయంలో లక్షలాది వినియోగదారుల మన్ననలు పొందడం సంతోషంగా ఉందన్నారు. వినియోగదారుడి అవసరాలకు ఉపయోగపడే విధంగా, మారుతున్న వాతావరణం, పర్యావరణ పరిస్థితులకు అనుగుణంగా సిమెంట్‌ను తయారు చేస్తున్న భారతి సిమెంట్‌ కంపెనీ వినియోగదారులకు మేలైన సిమెంట్‌ను అందిస్తున్నట్లు తెలిపారు.
 200 ఏళ్ల చరిత్ర కలిగిన ఆర్టిఫీషియల్‌ సిమెంట్‌ రంగమైన వికట్‌ సిమెంట్‌ కంపెనీ, భారతి సిమెంట్‌ జాయింట్‌ వెంచర్‌ ద్వారా వినియోగదారులకు మెరుగైన సేవలు అందిస్తున్నట్లు ఆయన తెలిపారు. మహబూబ్‌నగర్‌ జిల్లాలో భారతి సిమెంట్‌ను నంబర్‌ వన్‌ స్థానానికి తీసుకురావడానికి ఇంజనీర్లు సహకారం అందించాలని ఆయన కోరారు. భారతి సిమెంట్‌ అత్యున్నత స్థానానికి చేరుకోవడానికి ఇంజనీర్ల సహకారం చాలా ఉందన్నారు.
 మహబూబ్‌నగర్‌ జిల్లాలో భారతి సిమెంట్‌ గోదాం ఏర్పాటు చేశామని, వినియోగదారుడు ఆర్డర్‌ చేసిన రెండు గంటల వ్యవధిలో సిమెంట్‌ను సరఫరా చేసేందుకు కావాల్సిన అన్ని ఏర్పాట్లు చేశామన్నారు. జర్మన్‌ టెక్నాలజీ, రోబోటెక్‌ క్వాలిటీ, ఉడ్‌ ప్యాకింగ్‌ ద్వారా భారతి సిమెంట్‌ను తయారు చేస్తున్నామన్నారు. ఇలా చేయడం ద్వారా సిమెంట్‌ నాణ్యత ప్రమాణాలు దెబ్బతినకపోవడంతోపాటు, కల్తీ చేసే ఆస్కారం ఉండదని తెలిపారు. కార్యక్రమంలో జీఎం కొండల్‌రెడ్డి, సీనియర్‌ మేనేజర్‌ ఓబుల్‌రెడ్డి, మేనేజర్లు సతీష్, నరేష్, మణికంఠ, డీలర్లు విజయభాస్కర సిమెంట్‌ ఏజెన్సీస్‌ భాను, విజయభాస్కర్‌రెడ్డితోపాటు 50 మందికి పైగా ఇంజనీర్లు పాల్గొన్నారు.


 శ్రీకాకుళం (పీఎన్‌ కాలనీ): ఆధునిక పరిజ్ఞానంతో అనుసంధానం చేస్తూ రెవెన్యూ రికార్డుల్లో పెనుమార్పులు తీసుకొస్తున్నట్లు ప్రకటించిన ఈ–పాస్‌బుక్‌ విధానాన్ని రద్దు చేయాలని ఆంధ్రప్రదేశ్‌ రైతు సంఘం జిల్లా కార్యదర్శి బుడితి అప్పలనాయుడు డిమాండ్‌ చేశారు. బుధవారం పట్టణంలోని క్రాంతిభవన్‌లో అఖిలపక్ష రైతు సంఘ ఆధ్వర్యంలో రౌండ్‌ టేబుల్‌ సమావేశం నిర్వహించారు. ఈ సందర్భంగా బీజేపీ కిసాన్‌ మోర్చా రాష్ట్ర అధ్యక్షుడు పూడి తిరుపతిరావు మాట్లాడుతూ రైతులకు భూ హక్కుపై నమ్మకం కల్పిస్తూ ఎన్‌టీఆర్‌ పట్టాదారు పాస్‌ పుస్తకాలు, టైటిల్‌ డీడ్‌లను జారీ చేయగా ప్రస్తుత రెవెన్యూ వ్యవస్థలో అవినీతి కారణంగా ఆ వివరాలు అస్తవ్యస్తంగా మారాయన్నారు. ఈ–పాస్‌బుక్‌లో వివరాలు తప్పుల తడకగా ఉన్నాయని చెప్పారు. ఈ నేపథ్యంలో తక్షణమే రీసెటిల్‌మెంట్‌ సర్వే చేయాలని కోరుతూ తహశీల్దార్‌ కార్యాలయంలో విజ్ఞాపన పత్రాలు ఇవ్వాలని సమావేశంలో తీర్మానించారు. సమావేశంలో కె.మోహనరావు, అప్పారావు, ఎ.సూరిబావు తదితరులు పాల్గొన్నారు.
  


 హైదరాబాద్: రాష్ట్రంలో పేలుళ్లకు కుట్ర పన్నిన ఉగ్రమూకలు వినియోగించిన సాంకేతిక పరిజ్ఞానాన్ని చూసి జాతీయ దర్యాప్తు బృందం(ఎన్‌ఐఏ) అధికారులు ఆశ్చర్యపోతున్నారు. నిఘాకు చిక్కకుండా ఉండేందుకు ఐపీ అడ్రస్‌లను హ్యాకింగ్ చేయడం, అండర్ గ్రౌండ్ వెబ్ ద్వారా ఒక టీంను ప్రత్యేకంగా ఏర్పాటుచేయడాన్ని చూసి అధికారులు విస్తుపోయారు. కస్టడీలో భాగంగా ఉగ్రకుట్రకు దారి తీసిన విధానంపై ఎన్‌ఐఏ అధికారులు లోతుగా అధ్యాయనం చేస్తున్నారు.
 
 పేలుళ్ల కోసం ఉగ్ర సానుభూతి పరులు ఎక్కువగా సాంకేతిక పరిజ్ఞానాన్ని వినియోగిస్తుండటంపై విచారణ జరుపుతున్నారు. చాటింగ్, ఈ-మెయిల్స్ ద్వారా సమాచారాన్ని పంపితే నిఘా అధికారులు గుర్తించే అవకాశం ఉండటం వల్ల వారు ఇతరుల ఐపీ అడ్రస్ లను దొంగిలించి వాటి ద్వారా వీడియో కాలింగ్, చాటింగ్ లు చేసినట్లు అధికారులు అనుమానిస్తున్నారు. అంతేకాకుండా నిఘా వర్గాల హ్యాకింగ్ టూల్స్ కు చిక్కకుండా ఉండేందుకు ప్రత్యేకమైన అండర్ గ్రౌండ్ వెబ్ ను తయారుచేసుకున్నట్లు సమాచారం. సాధారణంగా కంప్యూటర్లలో ఉపయోగించే విండోస్ ఆపరేటింగ్ సిస్టం ద్వారా అండర్ గ్రౌండ్ వెబ్ ను హ్యాక్ చేయడం కుదరదు.
 
 ఇందుకోసం టెయిల్స్‌గా పిలిచే ప్రత్యేక ఆపరేటింగ్ సిస్టం(ఓఎస్)ను పీసీల్లో ఇన్‌స్టాల్ చేయాల్సివుంటుంది. సోషల్ మీడియాకు సంబంధించిన వివరాలను తెలుసుకోవడానికి ఈ ఓఎస్ లో కచ్చితంగా ఏదో ఒక సర్వర్ తో హోస్ట్ చేయాల్సివుంటుంది. అయితే, నిఘావర్గాలు ఉగ్రమూకలు వినియోగిస్తున్న ఈ సర్వర్ అడ్రస్ ఏమిటి? ఎక్కడి నుంచి పనిచేస్తున్నాయి? నిర్వహిస్తున్నదెవరు? అన్న విషయాలను నేషనల్ టెక్నికల్ రీసెర్చ్ ఆర్గనైజేషన్ ద్వారా తెలుసుకున్న ఎన్ఐఏ ఉగ్రమూకల వ్యూహానికి చెక్ పెట్టింది.
 
 సాంకేతిక పరిజ్ఞానం అందించిందెవరు..?
 ఉగ్ర సానుభూతిపరులకు ఇంత పెద్ద ఎత్తున సాంకేతిక పరిజ్ఞానం అందజేసిన వారిపై ఎన్‌ఐఏ దృష్టి సారించింది. పట్టుబడిన వారందరూ అంతగా నైపుణ్యం కలిగిన వారు కాకపోవడంతో వీరికి సహకారం అందించిన వారెవరు అనే కోణంలో అధికారులు లోతుగా ఆరా తీస్తున్నారు. ఇప్పటి వరకు కమ్యూనికేషన్స్ ఇన్ చార్జ్ గా భావిస్తున్న ఇబ్రహీంకు కూడా అంతగా తెలివితేటలు లేవని అంచనాకు వచ్చారు. వీరికి మధ్య ఎవరో మూడో వ్యక్తి ఉన్నారనే కోణంలో అధికారులు దర్యాప్తు చేస్తున్నారు. అంతేకాదు వాట్సప్‌లోని ఎండ్ టు ఎండ్ ఎన్ క్రిప్షన్ ద్వారా పెద్ద ఎత్తున సమాచారం మార్పిడి జరినట్లు కూడా అధికారులు అనుమానిస్తున్నారు. దీనిని పూర్తిగా కోడింగ్ విధానం ద్వారా గత కొంత కాలంగా సిరియాలోని ఐఎస్ కీలక నేత షఫీ ఆర్మర్ తరచూ చాటింగ్ చేసినట్లు సమాచారం. ఈ కోడింగ్ విధానాన్ని పూర్తిగా స్వాధీనం చేసుకున్న ఎన్‌ఐఏ అధికారులు వాటిన పరిశీలిస్తున్నారు.


 ఒకప్పుడు నాలుగు పాత్రలు, పొయ్య ఉంటే చాలు వంటావార్పు సిద్ధమయ్యేది. అయితే రానురానూ వంటల తయారీ కంటూ ప్రత్యేకంగా ఇళ్లల్లో గది ఏర్పాటు చేసుకోవడం మొదలెట్టారు. ఇక, ఈ ఆధునిక యుగంలో అంటారా.. అనేక ఇళ్లల్లో మోడరన్ కిచెన్లు దర్శనమిస్తున్నాయి. బహుళ అంతస్తుల ప్లాట్లు, విల్లాలు, డూబ్లెక్స్‌ల నిర్మాణాలు పెరగడంతో పాటుగా సొంత ఇంటితో పాటు  తమ వంట గదిని ప్రత్యేకంగా తీర్చిదిద్దేస్తున్నారు. ఇలాంటి వారిని పరిగణనలోకి తీసుకున్న అనేక సంస్థలు వినియోగ దారుల అభిరుచులకు తగ్గట్టుగా మోడరన్ కిచెన్స్‌ను నగర వాసుల ముంగిటకు తీసుకొస్తున్నాయి. ఇందులో భాగంగా  ఏర్పాటైనవే మోడరన్ కిచెన్ స్టోర్లు .  ఇందులో వంటల తయారికి ఉపయోగించే అన్ని రకాల పాత్రలు, కిచెన్ సెట్స్, అత్యాధునిక టెక్నాలజీతో తయారీచేసిన అన్ని రకాల వసతులు, సామగ్రితో కూడిన కిచెన్‌ను వినియోగదారుల అభిరుచుల్ని తలదన్నె రీతిలో, ఆకర్షించే విధంగా కొలువు దీరుస్తున్నారు.  వంద శాతం స్టెయిన్ లెస్ స్టీల్‌తో తయారుచేసిన అన్ని రకాల చిన్న, పెద్ద వస్తువుల్ని ఇక్కడ కొలువు దీర్చామని ఆయా సంస్థల సీఈవోలు వివరిస్తున్నారు.
 
 కిచెన్‌తో పాటుగా, గృహోపకరణలు, అలంకరణలు, బెడ్స్, ఫొటో ఫ్రెమ్‌ల, ఫ్లవర్ వాజ్స్‌లను  విక్రయాలకు ఉంచుతున్నారు. మోడరన్ కిచెన్‌లో అన్ని రకాల వస్తువులు, వంటకు ఉపయోగించి ప్రతి పాత్ర అత్యాధునిక హంగులతో, సరికొత్త స్టైల్స్‌తో తయారు చేస్తున్నారు. ప్రధానంగా రాజు ల కాలంలోని పాత్రల్ని తలపించే విధంగా ఎన్నో పాత్రలను అత్యంత  ఆకర్షణీయంగా రూపొందిం స్తుండడం గమనార్హం.  అలాగే, మోడరన్ కిచెన్ ఏర్పాటు నిమిత్తం తమను సంప్రదిస్తే, వినియోగదారుల అభిరుచుల్ని తలదన్నే విధంగా వారి ఇళ్లు, ఫ్లాట్లు, విల్లాల వద్దకు వెళ్లి మరీ సిద్ధం చేసేందుకు అన్ని ఏర్పాట్లు చేస్తున్నారు.                                                     - బెంగళూరు