అదిగో వాళ్లు నటిస్తున్నారు అంటే కాదు ఇదిగో వీళ్లు ఎంపిక అయ్యారంటూ ఇండస్ట్రీలో చాలా మంది జోస్యం చెబుతున్నారు ‘ఆర్‌ఆర్‌ఆర్‌’ సినిమా గురించి. రామ్‌చరణ్, ఎన్టీఆర్‌ హీరోలుగా రాజమౌళి దర్శకత్వంలో తెరకెక్కనున్న ఈ మల్టీస్టారర్‌ మూవీ గురించి మంగళవారం ఓ వార్త షికారు చేసింది. అయితే ఈ సినిమాలో కథానాయికగా నటించే చాన్స్‌ను సమంత తిరస్కరించారన్నది ఆ వార్త. కానీ ఇందులో ఎంత మాత్రం నిజం లేదని తెలిసింది. ఈ విషయం గురించి ‘సాక్షి’ సమంతను అడగ్గా– ‘‘ఇప్పటివరకు ‘ఆర్‌ఆర్‌ఆర్‌’ టీమ్‌ సభ్యులెవరూ నన్ను సంప్రదించలేదు. అలాంటప్పుడు నేనెలా తిరస్కరిస్తాను. రిజెక్ట్‌ చేశానన్న వార్త పూర్తిగా అవాస్తవం’’ అని అన్నారు. ‘రంగస్థలం, మహానటి, అభిమన్యుడు’ చిత్రాలతో ఆల్రెడీ ఈ ఏడాది సిల్వర్‌ స్క్రీన్‌పై సందడి చేశారు సమంత. ఆమె నటించిన ‘సీమరాజా, యు–టర్న్, సూపర్‌ డీలక్స్‌’ సినిమాలు రిలీజ్‌కు రెడీగా ఉన్నాయి. ‘సీమరాజా, యు టర్న్‌’ సినిమాలు సెప్టెంబర్‌ 13నే రిలీజ్‌ కానుండటం విశేషం.  

మాటల మాంత్రికుడు త్రివిక్రమ్ శ్రీనివాస్ ప్రస్తుతం పవన్ కళ్యాణ్ హీరోగా అజ్ఞాతవాసి సినిమాను తెరకెక్కిస్తున్నాడు. ఈ సినిమా సంక్రాంతి కానుకగా జనవరి 10న రిలీజ్ అవుతోంది. ఈ సినిమా తరువాత ఎన్టీఆర్ హీరోగా సినిమాను ప్రారంభించనున్నాడు త్రివిక్రమ్. ఇప్పటికే మహేష్, త్రివిక్రమ్ కాంబినేషన్ లో మరో సినిమా రాబోతోందని చాలా రోజులుగా ప‍్రచారం జరుగుతోంది. తాజాగా వెంకటేష్ పుట్టిన రోజు సందర్భంగా త్రివిక్రమ్ దర్శకత్వంలో సినిమా ఉంటుందని పోస్టర్ కూడా రిలీజ్ చేశారు. ఈ కాంబినేషన్ పై టాలీవుడ్ సర్కిల్స్ లో ఆసక్తికర చర్చ జరుగుతోంది. ఎన్టీఆర్ తరువాత త్రివిక్రమ్ చేయబోయే సినిమా మల్టీ స్టారర్ అన్న ప్రచారం జరుగుతోంది. ఈ సినిమాలో వెంకటేష్, మహేష్ బాబులు హీరోలుగా నటించనున్నారట. గతంలో ఈ ఇద్దరు హీరోలుగా తెరకెక్కిన సీతమ్మ వాకిట్లో సిరిమల్లె చెట్టు ఘనవిజయం సాధించిన నేపథ్యంలో మరోసారి ఆ కాంబినేషన్ ను రిపీట్ చేసేందుకు రెడీ అవుతున‍్నారట. ఈ కాంబినేషన్ పై క్లారిటీ రావాలంటే మాత్రం అధికారిక ప్రకటన వరకు వెయిట్ చేయాల్సిందే.


 
 ప్రస్తుతం మురుగదాస్ దర్శకత్వంలో స్పైడర్ సినిమాలో నటిస్తున్న సూపర్ స్టార్ మహేష్ బాబు, ఆ తరువాత చేయబోయే సినిమాలను కూడా ఫైనల్ చేశాడు. మురుగదాస్ సినిమా తరువాత కొరటాల శివ దర్శకత్వంలో 'భరత్ అను నేను' అనే పొలిటికల్ థ్రిల్లర్లో నటించనున్నాడు. ఆ తరువాత తన 25వ సినిమాను వంశీ పైడిపల్లి దర్శకత్వంలో చేసేందుకు అంగీకరించాడు. అశ్వనిదత్, దిల్ రాజు సంయుక్తంగా నిర్మించనున్న ఈ సినిమాకు సంబంధించిన ఇంట్రస్టింగ్ అప్డేట్ ఒకటి టాలీవుడ్ సర్కిల్స్లో వినిపిస్తోంది.
 
 వంశీ పైడిపల్లి దర్శకత్వంలో మహేష్ బాబు నటించనున్న సినిమా మల్టీ స్టారర్ అన్న టాక్ వినిపిస్తోంది. ఇప్పటికే సీనియర్ హీరో వెంకటేష్తో కలిసి సీతమ్మ వాకిట్లో సిరిమల్లె చెట్టు సినిమాలో నటించాడు మహేష్. ఈ సారి ఓ యంగ్ హీరోతో స్క్రీన్ షేర్ చేసుకునేందుకు రెడీ అవుతున్నాడట. వంశీ డైరెక్ట్ చేయబోయే సినిమాలో మహేష్ బాబుతో పాటు కామెడీ హీరో అల్లరి నరేష్ కీలక పాత్రలో నటించనున్నాడన్న ప్రచారం జరుగుతోంది. ప్రస్తుతానికి అఫీషియల్ గా కన్ఫామ్ చేయకపోయినా.. మహేష్ సినిమాలో నరేష్ నటించటం ఖాయంగానే కనిపిస్తోంది.


 
 బాహుబలి సినిమాతో నేషలన్ లెవల్లో గుర్తింపు తెచ్చుకున్న టాలీవుడ్ హీరో ప్రభాస్. బాహుబలి రెండు భాగాలు బాలీవుడ్లో కూడా ఘన విజయం సాధించటంతో ప్రభాస్తో స్ట్రయిట్ హిందీ సినిమా చేసేందుకు అక్కడి స్టార్ డైరెక్టర్ ప్రయత్నాలు చేస్తున్నారు. కరణ్ జోహార్ లాంటి నిర్మాతలు ప్రభాస్తో సినిమా చేస్తున్నట్టుగా వార్తలు వినిపించినా... ఇంత వరకు అఫీషియల్ ఎనౌన్స్మెంట్ మాత్రం రాలేదు.
 
 తాజాగా బాలీవుడ్ కమర్షియల్ డైరెక్టర్ రోహిత్ శెట్టి, ప్రభాస్తో ఓ భారీ మల్టీ స్టారర్ను ప్లాన్ చేస్తున్నాడన్న ప్రచారం జరుగుతోంది. మాస్ మసాలా ఎంటర్టైనర్లు, యాక్షన్ కామెడీలు రూపొందించే రోహిత్ శెట్టి.. సల్మాన్ ఖాన్, ప్రభాస్లు హీరోలుగా భారీ చిత్రాన్ని ప్లాన్ చేస్తున్నాడట. అయితే ఈ ఇద్దరు హీరోలు ప్రస్తుతం ఫుల్ ఫాంలో ఉండటంతో బడ్జెట్ సమస్య తలెత్తే అవకాశం ఉందని భావిస్తున్నారు. మరి ఈ మెగా మూవీని నిర్మించడానికి ఏ నిర్మాతైన ముందుకొస్తాడేమో చూడాలి.


 టాలీవుడ్ సర్కిల్స్ లో మరో ఇంట్రస్టింగ్ న్యూస్ వినిపిస్తోంది. తెలుగు తెరమీద మరో భారీ మల్టీ స్టారర్ కు రంగం సిద్ధమవుతుందన్న వార్త ఫిలిం నగర్ లో చక్కర్లు కొడుతోంది. ఇప్పటికే కళ్యాణ్ రామ్, సాయి ధరమ్ తేజ్ కాంబినేషన్ లో ఓ మల్టీ స్టారర్ సినిమా రెడీ అవుతుండగా, మరో మెగా, నందమూరి మల్టీ స్టారర్ కు రంగం సిద్ధమవుతుందన్న టాక్ వినిపిస్తోంది. అది కూడా ఎన్టీఆర్, అల్లు అర్జున్ లాంటి స్టార్ హీరోలతో కావటంతో అభిమానుల్లో మరింత ఆసక్తి నెలకొంది.
 
 స్టార్ డైరెక్టర్ పూరి జగన్నాథ్ దర్శకత్వంలో ఈ భారీ మల్టీ స్టారర్ సినిమా తెరకెక్కనుందట. గతంలో అల్లు అర్జున్ హీరోగా దేశముదురు, ఇద్దరమ్మాయిలతో.. ఎన్టీఆర్ హీరోగా ఆంద్రావాలా, టెంపర్ లాంటి సినిమాలను తెరకెక్కించిన పూరి, ఈ ఇద్దరు హీరోల కాంబినేషన్ లో సినిమా చేసేందుకు ప్లాన్ చేస్తున్నాడు. ఇప్పటికే బన్నీ, ఎన్టీఆర్ కు కథ కూడా వినిపించాడన్న టాక్ వినిపిస్తోంది. మరి ఇంత భారీ చిత్రాన్ని నిర్మించాడానికి ఏ నిర్మాత ముందుకు వస్తాడో చూడాలి.


 యంగ్ జనరేషన్ హీరోలు ఈగోలను పక్కన పెట్టి మల్టీ స్టారర్ సినిమాలకు రెడీ అవుతున్నారు. అందుకే దర్శకులు కూడా క్రేజీ కాంబినేషన్లలో మల్టీ స్టారర్ సినిమాలు తెరకెక్కించేందుకు రెడీ అవుతున్నారు. అదే బాటలో భలేమంచి రోజు సినిమా ఫేం శ్రీరాం ఆదిత్య దర్శకత్వంలో ఓ ఇంట్రస్టింగ్ ప్రాజెక్ట్ పట్టాలెక్కనుంది.
 
 ఇప్పటికే జ్యో అచ్యుతానంద సినిమాలో కలిసి నటించిన నారా రోహిత్, నాగశౌర్యలతో పాటు సందీప్ కిషన్లు హీరోలుగా ఓ సినిమా తెరకెక్కించేందుకు రెడీ అవుతున్నాడు. ఇప్పటి వరకు ఎక్కువగా ఇద్దరు హీరోలు చేసిన మల్టీ స్టారర్ సినిమాలు మాత్రమే రాగా, శ్రీరాం ముగ్గరు హీరోలకు సరిపోయే ఇంట్రస్టింగ్ కథను సిద్దం చేశాడట. ఇప్పటికే కథ విన్న నారా రోహిత్, నాగశౌర్య, సందీప్ కిషన్లు ఈ ప్రాజెక్ట్కు అంగకరించారన్న టాక్ వినిపిస్తోంది. త్వరలోనే ఈ సినిమాపై అధికారిక ప్రకటన వెలువడనుంది.


 తెలుగు తెర మీద మరో భారీ ఫ్యామిలీ మల్టీ స్టారర్కు రంగం సిద్ధమవుతోందా..? ప్రస్తుతం ఈ వార్తకు సంబందించి ఆసక్తికర చర్చ జరుగుతోంది. అక్కినేని ఫ్యామిలీ అంతా కలిసి చేసిన మనం ఘనవిజయం సాధించటంతో ఇతర ఫ్యామిలీల నుంచి కూడా అలాంటి సినిమాలనే ఆశిస్తున్నారు ఫ్యాన్స్. ముఖ్యంగా మెగా, నందమూరి ఫ్యామిలీల నుంచి ఈ తరహా సినిమాల కోసం ఫ్యాన్స్ ఎదురుచూస్తున్నారు.
 
 అయితే నందమూరి ఫ్యామిలీ నుంచి త్వరలోనే ఓ భారీ మల్టీ స్టారర్ తెరకెక్కే అవకాశం ఉందన్న టాక్ వినిపిస్తోంది. తాజాగా ఎన్టీఆర్ట్స్ బ్యానర్పై 'బ్రదర్స్' అనే టైటిల్ను రిజిస్టర్ చేయించారన్న వార్త వినిపిస్తోంది. ఈ టైటిల్ ఎన్టీఆర్, కళ్యాణ్ రామ్లు కలిసి చేయబోయే సినిమా కోసమే అంటున్నారు.  ఇప్పటికే బ్రదర్స్ పేరుతో సూర్య హీరోగా ఓ సినిమా వచ్చింది. దీంతో నందమూరి హీరోలు చేసే సినిమాకు ఏదైనా ట్యాగ్ లైన్ యాడ్ చేసే అవకాశం ఉంది.
 
 ఎన్టీఆర్, కళ్యాణ్ రామ్లు అన్నదమ్ములుగా నటిస్తారని భావిస్తున్నారు. జనతా గ్యారేజ్ సినిమా తరువాత ఎన్టీఆర్ ఇంతవరకు ఏ సినిమాను ఎనౌన్స్ చేయలేదు. ఈ నెల 5న జరగబోయే ఇజం ఆడియో వేడకలో ఎన్టీఆర్ నెక్ట్స్ సినిమాపై ప్రకటన వచ్చే అవకాశం ఉంది. అది నందమూరి మల్టీస్టారర్ అయి ఉండాలని ఆశిస్తున్నారు ఫ్యాన్స్.


 ప్రస్తుతం టాలీవుడ్లో మల్టీస్టారర్ సినిమాల ట్రెండ్ నడుస్తోంది. సీనియర్ హీరోలతో పాటు యంగ్ హీరోలు కూడా మల్టీ స్టారర్ సినిమాలు చేయడానికి ఆసక్తి చూపిస్తున్నారు. ఇదే బాటలో ప్రస్తుతం మంచి ఫాంలో ఉన్న ఇద్దరు యంగ్ హీరోలు, ఓ మల్టీ స్టారర్ సినిమాకు రెడీ అవుతున్నారు. వారాహి చలనచిత్ర బ్యానర్ నిర్మిస్తున్న 'జ్యో అచ్యుతానంద' సినిమా కోసం క్రేజీ కాంబినేషన్ను సెట్ చేస్తున్నాడు, దర్శకుడు అవసరాల శ్రీనివాస్.
 
 సాయి కొర్రపాటి నిర్మాణంలో నారా రోహిత్ హీరోగా 'జ్యో అచ్యుతానంద' సినిమాను ప్రారంభించారు. అయితే సినిమా మొదలైనప్పుడు,జ్యోతి, అచ్యుతరావు, ఆనందరావు అనే ముగ్గురు వ్యక్తుల మధ్య కథ అని చెప్పాడు దర్శకుడు. దీంతో మరో హీరో కోసం అప్పటినుంచే వేట ప్రారంభించారు. ఫైనల్గా వారాహి బ్యానర్లో హీరోగా సక్సెస్ అయిన నాగశౌర్యను ఈ క్యారెక్టర్ కోసం ఎంపిక చేశారు.
 
 ప్రస్తుతం సావిత్రి, రాజా చెయ్యివేస్తే సినిమాల్లో నటిస్తున్న రోహిత్ ఈ రెండు సినిమాలు పూర్తవ్వగానే జ్యో అచ్యుతానంద టీంతో జాయిన్ అవుతాడు. నాగశైర్య కూడా మెగా వారసురాలు నిహారిక వెండితెరకు పరిచయం అవుతున్న ఒక్క మనసు సినిమాలో నటిస్తున్నాడు. దీంతో జ్యో అచ్చుతానంద సినిమా సెట్స్ మీదకు వెళ్లడానికి ఇంకా మూడు నాలుగు నెలల సమయం పట్టే అవకాశం ఉంది. ఈలోగా హీరోయిన్ ఎంపికతో పాటు ఇతర నటీనటులు సాంకేతిక వర్గ ఎంపిక కూడా పూర్తి చేయాలని భావిస్తున్నారు చిత్రయూనిట్.


 యంగ్ హీరో రాజ్ తరుణ్ జోరు పెంచుతున్నాడు. ఇప్పటికే ఉయ్యాల జంపాల, సినిమా చూపిస్త మామ సినిమాలతో వరుస సూపర్ హిట్స్ అందుకున్న ఈ యంగ్ హీరో, త్వరలో కుమారి 21ఎఫ్ సినిమాతో ఆడియన్స్ ముందుకు రానున్నాడు. సుకుమార్ స్కూల్లో తెరకెక్కిన ఈ సినిమాపై భారీ అంచనాలే ఉన్నాయి. ఇప్పటికే రిలీజ్ అయిన ఆడియో, టీజర్లకు మంచి రెస్పాన్స్ రావటంతో, చిత్ర విజయంపై చాలా నమ్మకంగా ఉన్నారు.
 
 ప్రస్తుతం రాజ్ తరుణ్ చేతిలో రెండు మూడు సినిమాలు ఉన్నాయి. ఇవి సెట్స్ మీద ఉండగానే మరో క్రేజీ ప్రాజెక్ట్ను అంగీకరించాడు రాజ్. మంచు విష్ణు హీరోగా చేస్తున్న ఓ సినిమాలో రాజ్ తరుణ్ను మరో హీరోగా ఎంపిక చేశారన్న టాక్ వినిపిస్తోంది. పంజాబీలో సూపర్ హిట్ అయిన ఓ కామెడీ ఎంటర్టైనర్ రీమేక్ రైట్స్ను చాలా కాలం క్రితమే తీసుకున్నాడు మంచు విష్ణు. అయితే అప్పటినుంచి ఈ సినిమా డిలే అవుతూ వస్తోంది. తాజాగా ఈ ప్రాజెక్ట్ను సెట్స్ మీదకు తీసుకురావాలని ప్లాన్ చేస్తున్నాడు విష్ణు.
 
 విష్ణు కెరీర్లోనే బిగెస్ట్ హిట్గా నిలిచిన దేనికైనా రెడీ సినిమాను డైరెక్ట్ చేసిన జి.నాగేశ్వరరెడ్డి దర్శకత్వంలో ఈ సినిమాను తెరకెక్కించాలని ప్లాన్ చేస్తున్నారట. ఇద్దరు హీరోలు ఉండే ఈ సినిమా కోసం విష్ణుతో పాటు రాజ్ తరుణ్ను మరో హీరోగా సెలెక్ట్ చేసుకున్నారు. ప్రస్తుతం సుశాంత్ హీరోగా ఆటాడుకుందాం రా సినిమాను తెరకెక్కిస్తున్న నాగేశ్వరరెడ్డి. ఆ సినిమా పూర్తయిన తరువాత విష్ణు, రాజ్ తరుణ్ల కాంబినేషన్లో తెరకెక్కే సినిమా పని మొదలెట్టనున్నాడు.


  ఇద్దరు హీరోలు ఒకేసారి తెరపై కనిపించడం, ఒకే హీరో ఇద్దరులా మారిపోయి అలరించడం.. నిజంగా ప్రేక్షకులకు భలే కిక్కిచ్చే విషయాలు. ముఖ్యంగా అభిమానులకైతే.. కన్నులపంటే. ఓ వైపు మల్టీస్టారర్లు, మరో వైపు ద్విపాత్రాభినయాలు.. ఒకప్పుడు ఇండస్ట్రీ వీటితో కళకళలాడిపోతూ ఉండేది. ఓ ఇరవైఏళ్లుగా వీటి హవా పెద్దగా లేదనే చెప్పాలి. హీరోలందరూ సింగిల్‌గానే  చక్రం తిప్పడం మొదలుపెట్టారు.
 
 భూమి గుండ్రంగా ఉంటుంది అన్నట్లుగా.. ఇప్పుడిప్పుడే మళ్లీ పాత పరిస్థితులు పునరావృతం అవుతున్నాయి. శుభసూచకంగా ముందు తెలుగునాట మల్టీస్టారర్లు ఊపందుకుంటున్నాయి. మరోవైపు తమిళనాట ద్విపాత్రాభినయాలు హవా సాగిస్తున్నాయి. ఈ ఇంటికి ఆ ఇల్లు ఎంతదూరమో... ఆ ఇంటికి ఈ ఇల్లూ అంతే దూరం కదా! ఈ ట్రెండ్ అటు... ఆ ట్రెండ్ ఇటు మారడానికి బహుశా ఎంతో సమయం పట్టదేమో! ప్రస్తుతం దక్షిణాదిన ద్విపాత్రాభినయాల హవా ఎలా ఉందో చూద్దాం..
 
   కొచ్చడయాన్-రాణాగా...
  
 ‘కొచ్చడయాన్’... అంటే పొడవాటి జుట్టుగలవాడని అర్థం. ఎనిమిదో శతాబ్దానికి చెందిన ప్రసిద్ధ పాండ్యరాజు పేరు అది. పేరుకు తగ్గట్టే అద్భుత శక్తిగా ఇందులో రజనీకాంత్ కనిపిస్తారట. ఈ సినిమాలో ‘రాణా’ అనే మరో పాత్రలో కూడా కనిపిస్తారు సూపర్‌స్టార్. ద్విపాత్రాభినయం రజనీకి కొత్తేం కాదు. అయితే... రెండు పాత్రలు ఒకేసారి తెరపై వినోదాన్ని పంచుతాయా? లేక విడివిడిగా కనిపించి అలరిస్తాయా? అనేది తెలియాల్సి ఉంది. త్రీడీలో మోషన్ క్యాప్చర్ కంప్యూటర్ యానిమేటెడ్ టెక్నాలజీతో రజనీ కుమార్తె సౌందర్య తెరకెక్కించిన ఈ చిత్రం ‘విక్రమసింహ’గా తెలుగులో విడుదల కానుంది. తమిళనాట రజనీ అభిమానులు... ‘కొచ్చడయాన్’ ఘనవిజయాన్ని సాధించాలనీ రజనీ ఆరోగ్యం మరింత మెరుగుపడాలనీ ఆకాంక్షిస్తూ అప్పుడే పాద యాత్ర కూడా మొదలుపెట్టారట. వచ్చే నెలలోనే సినిమా విడుదల కానున్నట్లు సమాచారం.
  రంగస్థల నటునిగా, సినిమా హీరోగా...
 
  కమల్‌హాసన్ అంటే.. ప్రయోగశాల. ప్రతి సినిమాలోనూ తన పాత్ర ద్వారా ఏదో ఒక కొత్తదనాన్ని చూపించాలని తపిస్తారాయన. త్వరలో ‘విశ్వరూపం-2’తో ప్రేక్షకుల ముందుకు రానున్నారు కమల్. ఈ సినిమా తర్వాత కమల్ నటించే సినిమా ‘ఉత్తమ విలన్’. రమేశ్ అరవింద్ దర్శకుడు. కమల్ ఇందులో ద్విపాత్రాభినయం చేస్తున్నారు. తన కెరీర్‌లో లెక్కకు మించి ద్విపాత్రాభినయాలు చేసిన ఘనత కమల్‌ది. ఇక ‘దశావతారం’ గురించి సరేసరి. తాజాగా ఆయన నటిస్తున్న ‘ఉత్తమ విలన్’ విషయానికొస్తే... 8వ శతాబ్దానికి చెందిన రంగస్థల నటునిగా, 21వ శతాబ్దానికి చెందిన సినిమా హీరోగా రెండు పాత్రల్లో కనిపించనున్నారాయన. కాబట్టి... ఈ రెండు పాత్రలూ తెరపై ఒకేసారి కనిపించడం బహుశా జరగదేమో! క్రిస్మస్ కానుకగా ఈ చిత్రం విడుదల అవుతుందని సమాచారం.
 
  మళ్లీ విలన్‌గా, హీరోగా...
 
  తమిళనాట రజనీకాంత్ తర్వాత మళ్లీ అంతటి మాస్ ఫాలోయింగ్ ఉన్న హీరో అజిత్. ‘వీరమ్’ విజయంతో మంచి జోష్‌మీదున్నారాయన. తర్వాత అజిత్ చేసే సినిమా గౌతమ్ వాసుదేవ మీనన్‌ది. త్వరలోనే సెట్స్‌పైకి వెళ్లనున్న ఈ చిత్రంలో అజిత్ హీరోగా, విలన్‌గా ద్విపాత్రాభినయం చేస్తారని సమాచారం. విలన్‌గా, హీరోగా అజిత్ ద్విపాత్రాభినయం చేసిన తమిళ చిత్రాలు ‘వాలి, విలన్’ అక్కడ ఘన విజయం సాధించాయి. సో... ఇది ఆయనకు బాగా కలిసొచ్చిన ఫీట్. ముచ్చటగా మూడోసారి కూడా అజిత్ నాయకునిగా, ప్రతినాయకునిగా కనిపించనుండటం ఆయన అభిమానుల్లో ఆసక్తిని రేకెత్తిస్తున్న అంశం. అయితే.. ఈ సమాచారంలో నిజంలేదని కొట్టి పడేసేవారు కూడా ఉన్నారు.
 
 రెండూ స్టైలిష్‌గానే...  కమల్‌హాసన్ తర్వాత ప్రయోగాలను అమితంగా ఇష్టపడే కథానాయకుడు సూర్య. అందుకే... అనతికాలంలోనే తెలుగు ప్రేక్షకుల అభిమానాన్ని కూడా పొందగలిగారాయన. ‘పేరళ గన్’ (తెలుగులో ‘సుందరాంగుడు’), వేల్, వారణమ్ ఆయిరమ్(తెలుగులో ‘సూర్య సన్నాఫ్ కృష్ణన్’), ‘7ఆమ్ అరివు’(తెలుగులో ‘సెవెన్త్ సెన్స్), ‘మాట్రాన్’(తెలుగులో ‘బ్రదర్స్’)... సూర్య ద్విపాత్రాభినయం చేసిన సినిమాలు. ఈ తరంలో ఇంత తక్కువ కాలంలో ఇన్ని ద్విపాత్రాభినయాలు చేసిన హీరో సూర్య ఒక్కరే. ప్రస్తుతం ఆయన నటిస్తున్న చిత్రం ‘అంజాన్’. లింగుస్వామి దర్శకుడు. ఇందులో కూడా సూర్యది ద్విపాత్రాభినయమే. అయితే... ఇప్పటివరకూ రెండు పాత్రల్లోనూ సాధ్యమైనంత వరకూ వ్యత్యాసాన్ని చూపించిన సూర్య... ఈ దఫా మాత్రం రెండు పాత్రల్లోనూ స్టైలిష్‌గానే సందడి చేస్తారట.
 
  అమలాపాల్ డబుల్ ధమాకా
 
  ఇప్పుడున్న కథానాయికల్లో ద్విపాత్రాభినయాలు ఎక్కువగా చేసిన ఘనత అనుష్క సొంతం. ‘అరుంధతి, పంచాక్షరి, వర్ణ’ చిత్రాల్లో డ్యూయెల్‌రోల్స్ చేశారామె. ‘అమ్మాయి బావుంది’లో మీరా జాస్మిన్, ‘చారులత’ చిత్రం కోసం ప్రియమణి కూడా ద్విపాత్రాభినయాలు చేశారు. ఇప్పుడు అమలాపాల్ వంతు వచ్చింది. సముద్రఖని దర్శకత్వంలో రూపొందనున్న ‘కిట్‌నా’(పరిశీలనలో ఉన్న పేరు) సినిమా కోసం ఆమె ద్విపాత్రాభినయం చేయనున్నారు.
  జానపదంలో ద్విపాత్రాభినయం
  
 ఇక మన తెలుగు సినిమా విషయానికొస్తే.. నేటి యువహీరోల్లో ఎక్కువ ద్విపాత్రాభినయాలు చేసిన హీరో ఎన్టీఆర్. ఆంధ్రావాలా, అదుర్స్, శక్తి చిత్రాల్లో ఆయన డ్యూ యెల్ రోల్స్ చేశారు. ఈ విషయంలో ఆయన తర్వాతి స్థానం రామ్‌చరణ్‌ది. మగధీర, నాయక్ చిత్రాల్లో డ్యూయెల్‌రోల్స్ చేశారాయన. ప్రస్తుతం ఈ ఫీట్‌ని ‘బాహుబలి’ చిత్రం కోసం ప్రభాస్ చేస్తున్నారు. ఇందులో బాహుబలి, శివుడు పాత్రల్లో కనిపిస్తారాయన. ఇవి తండ్రీకొడుకుల పాత్రలు కావడం గమనార్హం.  ఓ జానపద చిత్రంలో హీరో ద్విపాత్రాభినయం చేయడం అనేది దాదాపు పాతికేళ్ల తర్వాత జరుగుతున్న ముచ్చట.
 
  అంజలి డ్యూయెల్ రోల్
 
  వీరితో పాటు తెలుగమ్మాయి అంజలి కూడా ద్విపాత్రాభినయం చేస్తుండటం విశేషం. కథ నచ్చడంతో వెంటనే డ్యూయెల్ రోల్‌కి పచ్చజెండా ఊపేశారట అంజలి. పైగా ఇది లేడీ ఓరియెంటెడ్ మూవీ కావడం విశేషం. ఓ కొత్త దర్శకుడు ఈ చిత్రాన్ని తెరకెక్కిస్తున్నారు.
  సముద్రఖని దర్శకత్వం వహించిన ‘జెండాపై కపిరాజు’ సినిమా కోసం నాని కూడా ద్విపాత్రాభినయం చేసిన విషయం తెలిసిందే. త్వరలో ఈ సినిమా విడుదల కానుంది.
 
  ప్రస్తుతం కోలీవుడ్, టాలీవుడ్‌లలో ద్విపాత్రాభినయం చేస్తున్న తారలు, సదరు చిత్రాల వివరాలివి. ఈ జాబితా ముందు ముందు మరింత పెరగొచ్చు. రొటీన్ కథలతో విసిగిపోయిన ప్రేక్షకులకు కాస్తంత కొత్తదనంతో పాటు, వినోదాన్ని కూడా అందించాలంటే... రచయితలు, దర్శకులు,  హీరోలు ఈ మాత్రం రిస్క్‌లు చేయాల్సిందే. వీరు ఆ విధంగా ముందుకెళితే... మున్ముందు మరిన్ని మంచి సినిమాలొచ్చే అవకాశం ఉంటుంది. ఏమంటారు?


  ప్రస్తుతం మల్టీస్టారర్‌ల చిత్రాలకు ఆదరణ పెరుగుతోంది. దీంతో మరిన్ని మల్టీస్టారర్ చిత్రాలను తెరకెక్కించడానికి దర్శకులు సిద్ధం అవుతున్నారు. ముఖ్యంగా కోలీవుడ్‌లో ఇటీవల శింబు, భరత్ నటించి న వానం, ఆర్య, జయ్ నటించిన రాజారాణి, అజిత్, ఆర్య నటించిన ఆరంభం వంటి చిత్రాల సక్సెస్ మల్టీస్టారర్ చిత్రాలకు మళ్లీ ఊపిరి పోసిందనే చెప్పాలి. తాజా గా అజిత్, విధార్థ్ నటించిన వీరం చిత్రం విడుదలకు సిద్ధం అవుతోంది. లేటెస్ట్‌గా ఆర్య, విజయ్‌సేతుపతి హీరోలుగా పురంబోకు చిత్రం తెరకెక్కనుంది. ఇదే కోవ లో మరో భారీ మల్టీస్టారర్ చిత్రానికి శ్రీకారం చుట్టనున్నారు. ఈ చిత్రంలో అజిత్, శింబు కలిసి నటించనున్నారన్నది తాజావార్త. దీని కి గౌతమ్‌మీనన్ దర్శకత్వం వహించనున్నారు.
  ప్రముఖ నిర్మాణ సంస్థ నిర్మించనున్న ఈ చిత్ర షూటింగ్ ఫిబ్రవరిలో ప్రారంభం కానుందని తెలిసింది. దర్శకుడు గౌతమ్‌మీనన్ అజిత్ కు కథ వినిపించినప్పు డు అందులో ఒక పాత్రను శింబు పోషిస్తే బాగుంటుందనే అభిప్రాయాన్ని వ్యక్తం చేశారట. అందుకు గౌతమ్‌మీనన్ అంగీకరించడంతో వెంటనే అజిత్ శింబుకు ఫోన్ చేసి తనతో కలిసి నటించాలని కోరారట. అజిత్ వీరాభిమానినని తరచూ చెప్పుకునే శింబు ఇప్పుడు ఆయనతో కలిసి నటించే అవకాశం రావడంతో మరో మాట లేకుండా ఓకే చెప్పేశారట. ఈ క్రేజీ కాంబినేషన్ గురించి మరిన్ని వివరాలు వెలువడాల్సి ఉంది.