చీర గురించి ఎన్ని పాటలు రాసినా రాయాల్సినవి ఎన్నో మిగిలే ఉంటాయి. అందమైన చీరకట్టును చూస్తే పంటచేలో పాలకంకి, పల్లకిలో పిల్ల ఎంకీ నవ్వినంత అందంగా, అద్భుతంగా ఉంటుంది. డిజైనర్‌ నివేదిత సంజయ్‌ ప్రభు వినూత్నంగా డిజైన్‌ చేసిన చీరల ఛాయాచిత్రాలు నెటిజనులను ఆకట్టుకుంటున్నాయి. కేరళ కసువు శారీ (వైట్‌ కాటన్‌ శారీ విత్‌ గోల్డెన్‌ జరి బార్డర్‌) రకరకాల వేడుకలకు క్లాసిక్‌ ఫేవరేట్‌గా పేరు పొందింది. డిజైనర్‌ నివేదిత సంజయ్‌ ప్రభు ఈ చీరకు సంబంధించి పురాతన టెక్నిక్‌లను మాన్యువల్‌ స్క్రీన్‌  ప్రింటింగ్‌ ద్వారా తిరిగి తీసుకువచ్చింది. ప్రతి ప్రింట్‌ ఒక అందమైన కథ చెబుతుంది. అరటిఆకుల నుంచి ఇంగ్లీజ్‌ రోజ్, చెంబూర్‌ ఫ్లవర్‌ వరకు ప్రకృతిలోని ఎన్నో అందాలు కసువు చీరెలో కనిపించి కనువిందు చేస్తాయి.


 సోలార్ ప్యానెల్స్ గురించి, సౌరశక్తి గురించి మనమిప్పటికే చాలాసార్లు చదువుకుని ఉంటాం. ఇవన్నీ ఇళ్లు, భవనాల పైకప్పులకు, విశాలమైన ప్రాంతాలకూ పరిమితమైనవి. మరి ఇళ్లు, భవనాల్లోపల కూడా ట్యూబ్‌లైట్ల వెలుతురును విద్యుత్తుగా మార్చగలిగితే? ఆ అద్భుతమైన ఆలోచనకు ఆచరణ రూపం ఈ ఫొటోలో కనిపిస్తున్న సోలార్ సెల్ ! ఈయన వర్జీనియా టెక్ శాస్త్రవేత్త కాంగ్‌కాంగ్ వూ. ఈయన చేతుల్లో ఉన్నదే సోలార్ సెల్. కిటీకీ, తలుపు తెరల్లో, లేదంటే గోడలకు అతికించే వాల్‌పేపర్లలోనూ ఈ సెల్స్‌ను ఏర్పాటు చేసుకుంటే పగలు సూర్యకాంతితో... రాత్రవగానే ట్యూబ్‌లైట్ కాంతితో విద్యుత్తు ఉత్పత్తి చేస్తాయివి. అరమిల్లీమీటర్ కంటే తక్కువ మందమున్న ఈ సెల్స్ ఒకొక్కటి (అరచేతి సైజుండేవి) 75 మిల్లీవాట్ల విద్యుత్తును ఉత్పత్తి చేయగలవు.
 
 సాధారణమైన స్క్రీన్ ప్రింటింగ్ టెక్నాలజీ సాయంతోనే వీటినీ ముద్రిస్తారు కాబట్టి... పెద్దగా ఖర్చు కాదు. సిలికాన్ సెల్స్‌తో పోలిస్తే వీటిని చాలా తక్కువ ఉష్ణోగ్రతల వద్దే తయారు చేయవచ్చునని, కాబట్టి తయారీకి అవసరమైన పరికరాలూ తక్కువ ఖర్చుతోనే అందుబాటులోకి వస్తాయని ఈ ప్రాజెక్టుకు నేతృత్వం వహిస్తున్న శాస్త్రవేత్త శశాంక్ ప్రియ అంటున్నారు. కావాల్సినప్పుడు కావాల్సినంత మోతాదులో ఈ సెల్స్‌ను ప్రింట్ చేసుకోవచ్చు. ప్రస్తుతానికి ఈ సోలార్ సెల్స్‌తో మిక్సీలు, గ్రైండర్లు, రిఫ్రిజిరేటర్లను నడపలేకపోవచ్చు. ఫోన్లను రీఛార్జ్ చేసుకోవడం మాత్రం సాధ్యమే. ప్రస్తుతం ఈ సోలార్ సెల్స్ తాము అందుకునే కాంతిలో పది శాతాన్ని విద్యుత్తుగా మార్చగలవు. భవిష్యత్తులో ఈ సామర్థ్యాన్ని మరింత పెంచగలిగితే.. ఎన్నో ఉపయోగాలుంటాయి. మనం ధరించే దుస్తుల్లోనూ వీటిని చొప్పించే అవకాశం కూడా ఉండటం వల్ల భవిష్యత్తులో స్మార్ట్‌ఫోన్ ఛార్జర్లకు గుడ్‌బై కూడా చెప్పేయవచ్చు.