మొబైల్ యూజర్లలో చాలామంది రెండు సిమ్ కార్డులను ఉపయోగిస్తుంటారు. ఈ రెండూ యాక్టివేట్‌లో ఉండాలంటే తప్పనిసరిగా రీఛార్జ్ చేసుకోవాలి. ఇది యూజర్లకు భారమవుతోంది. దీనిని దృష్టిలో ఉందుకుని ట్రాయ్ కొత్త రూల్ తీసుకొచ్చింది. దీని ప్రకారం కేవలం 20 రూపాయలు రీఛార్జ్ చేసుకుని సిమ్ కార్డును 120 రోజులు యాక్టివ్‌గా ఉంచుకోవచ్చు.సిమ్ కార్డును కాల్స్, ఎస్ఎమ్ఎస్ లేదా డేటా వంటి వాటి కోసం ఉపయోగించకుండా, ఎటువంటి రీఛార్జ్ చేసుకోకుండా 90 రోజులు పక్కన పెడితే.. అది ఆటోమేటిక్‌గా డిస్‌కనెక్ట్‌ అవుతుంది. ఆ తరువాత సిమ్ కార్డును (నెంబర్) టెలికాం ఆపరేటర్లు వేరేవారికి కేటాయిస్తారు. ఆలా జరగకుండా ఉండాలంటే.. రూ. 20తో రీఛార్జ్ చేసుకుంటే సరిపోతుంది.టెలికాం రెగ్యులేటరీ అథారిటీ ఆఫ్ ఇండియా (TRAI) నిబంధనల ప్రకారం, మీరు 90 రోజులు సిమ్ కార్డును ఉపయోగించకుండా ఉంటే.. మీ ప్రీపెయిడ్ బ్యాలెన్స్ నుంచి 20 రూపాయలు కట్ అవుతుంది. మరో 30 రోజులు యాక్టివ్‌గా ఉంటుంది. ప్రతినెలా ఇలా రీఛార్జ్ చేసుకుంటే నెంబర్ యాక్టివ్‌గా ఉంటుంది. ఈ కొత్త రూల్ జియో, ఎయిర్‌టెల్, బీఎస్ఎన్ఎల్, వోడాఫోన్ ఐడియా (VI) వంటి అన్ని సంస్థలకు వర్తిస్తుంది.ఇదీ చదవండి: ఎయిర్‌టెల్ రీఛార్జ్ ప్లాన్‌లలో మార్పు: వివరాలివిగో..సమయానికి మీరు 20 రూపాయలతో రీఛార్జ్ చేయనప్పుడు గ్రేస్ పీరియడ్ 15 రోజులు లభిస్తుంది. ఆ తరువాత కూడా రీఛార్జ్ చేయకపోతే టెలికాం కంపెనీ సిమ్ కార్డును డీయాక్టివేట్ చేస్తుంది. ట్రాయ్ ప్రవేశపెట్టిన ఈ రూల్ కొత్తది కాదు. 2013 మార్చిలోనే టెలికాం రెగ్యులేటరీ అథారిటీ ఆఫ్ ఇండియా ఈ నియమాన్ని తీసుకొచ్చింది. కానీ దీనిని టెలికాం ఆపరేటర్లు పెడచెవిన పెట్టారు. కానీ ఇప్పుడు తప్పకుండా అన్ని సంస్థలు ఈ రూల్ పాటించాల్సిందే అంటూ ట్రాయ్ ఆదేశించింది.

సాక్షి, హైదరాబాద్‌: చనిపోయిన ఓ రిటైర్డ్‌ ఉద్యోగి సిమ్‌ కార్డుతో సైబర్‌ కేటుగాళ్లు రూ. లక్షలు కొట్టేశారు. ఈ మోసంలో కీలక నిందితుడు మహ్మద్‌ ఆసిఫ్‌ పాషాను కరీంనగర్‌ సైబర్‌ క్రైం పోలీసులు అరెస్టు చేసినట్టు టీజీ సైబర్‌ సెక్యూరిటీ బ్యూరో డైరెక్టర్‌ శిఖాగోయల్‌ తెలిపారు. ఈ మేరకు మంగళవారం ఆమె ఒక ప్రకటన విడుదల చేశారు. అందులోని వివరాల ప్రకారం.. పాత పరిచయాన్ని వాడి...ఇరిగేషన్‌ విభాగంలో సూపరింటెండెంట్‌గా పనిచేసి 2013లో పదవీ విరమణ చేసిన ఎండీ సమీఉద్దీన్‌ 2022లో చనిపోయారు. సమీఉద్దీన్‌కు చెందిన ఎస్‌బీఐ, కెనరా బ్యాంక్‌ ఖాతాలతోపాటు అతడి సోదరి సబిహా సుల్తానా ఎస్‌బీఐ ఖాతాకు సైతం సమీఉద్దీన్‌ ఫోన్‌నంబర్‌ లింక్‌ చేసి ఉంది. ఇరిగేషన్‌ విభాగంలో సమీఉద్దీన్‌ పనిచేసే సమయంలోనే జహంగీర్‌కు పాత పరిచయం ఉంది. దీంతో ఆయన వ్యక్తిగత విషయాలు తెలుసుకున్నాడు. సమీఉద్దీన్‌ చనిపోయిన తర్వాత అతడికి సంబంధించి వ్యక్తిగత వివరాలు తన వద్ద ఉండడంతో జహంగీర్‌ ఓ కుట్రకు తెరతీశాడు. మహ్మద్‌ ఆసిఫ్‌ పాషాకు ఈ విషయాలు చెప్పాడు. దీంతో మహ్మద్‌ ఆసిఫ్‌ పాషా ఈ ఏడాది జూన్‌లో సమీఉద్దీన్‌ ఎయిర్‌టెల్‌ సిమ్‌కార్డును బ్లాక్‌ చేయించాడు. తప్పుడు ధ్రువపత్రాలు సృష్టించి వాటితో మళ్లీ తన పేరిట ఆ సిమ్‌కార్డును రీ యాక్టివేట్‌ చేయించాడు. ఆ తర్వాత బ్యాంక్‌ ఖాతాలకు లింక్‌ అయి ఉన్న ఆ ఫోన్‌నంబర్‌తో ఫోన్‌పే, పేటీఎం, గూగుల్‌పే వంటి బ్యాంకింగ్‌ యాప్‌లు ఇన్‌స్టాల్‌ చేశాడు. వీటి ద్వారా సమీఉద్దీన్, ఆమె సోదరి సబిహా సుల్తానాల బ్యాంకు ఖాతాల నుంచి మొత్తం రూ.20,18,557 తమ ఖాతాల్లోకి నిందితులిద్దరూ ట్రాన్స్‌ఫర్‌ చేసుకున్నారు. క్రెడిట్‌కార్డు బిల్లులు సైతం చెల్లించారు. సబిహా సుల్తానా ఫిర్యాదుతో... తమ బ్యాంకు ఖాతాల నుంచి డబ్బు పోతుండడంతో సబిహా సుల్తానా కరీంనగర్‌ సైబర్‌ క్రైం పోలీస్‌స్టేషన్‌లో ఫిర్యాదు చేసింది. ఈ మొత్తం వ్యవహారంపై దర్యాప్తు చేసిన సైబర్‌క్రైం పోలీసులు ఈ కేసులో ఏ–1గా ఉన్న మహ్మద్‌ ఆసిఫ్‌ పాషాను ఈనెల 23న అరెస్టు చేశారు. అతడి వద్ద నుంచి రూ.18 లక్షల నగదు, సెల్‌ఫోన్, క్రెడిట్‌ కార్డు, క్రెడిట్‌ కార్డు బిల్లులు స్వాదీనం చేసుకున్నారు. పరారీలో ఉన్న ఏ–2 జహంగీర్‌ కోసం గాలిస్తున్నట్టు అధికారులు తెలిపారు. డీఎస్పీ నర్సింహారెడ్డి నేతృత్వంలోని కరీంనగర్‌ సైబర్‌ క్రైం పోలీస్‌స్టేషన్‌ సిబ్బందిని టీజీ సీఎస్‌బీ డైరెక్టర్‌ శిఖాగోయల్‌ అభినందించారు. ప్రజలెవరూ బ్యాంకు ఖాతాలకు లింక్‌ అయి ఉన్న ఫోన్‌ నంబర్లు ఇతరులకు చెప్పవద్దని ఆమె హెచ్చరించారు.

మొబైల్‌లో సిమ్‌ లేకుండా మెసేజ్‌ చేయడం సాధ్యమవుతుందా..? ఎందుకు అవ్వదు.. వై-ఫై ద్వారా వీలవుతుంది కదా అంటారా. మరి వై-ఫై లేకపోయినా మెసేజ్‌చేసే అవకాశం ఉంటే ఎలా ఉంటుందో ఆలోచించండి. ఒకేవేళ మారుమూల ప్రదేశాలు, అడవులు, కొండలు, సముద్రాలు.. వంటి ప్రాంతాల్లో కూడా మన సమాచారాన్ని ఇతరులకు చేరేవేసే అవకాశం ఉంటే అదిరిపోతుంది కదా. ఇలాంటి కొత్త టెక్నాలజీను ప్రపంచ ప్రఖ్యాత సంస్థ యాపిల్‌ ప్రవేశపెడుతుంది. కాలిఫోర్నియాలోని సంస్థ ప్రధానకార్యాలయంలో జరుగుతున్న వరల్డ్‌వైడ్‌ డెవలపర్స్‌ కాన్ఫరెన్స్‌ 2024లో ఇలాంటి కొత్త ఫీచర్లను ఆవిష్కరిస్తుంది. ఈ ఏడాది చివరినాటికి విడుదలచేసే ఐఓఎస్‌ 18 వర్షన్‌లో ఈ ఫీచర్లను అందుబాటులో ఉంచనున్నట్లు కంపెనీ వర్గాలు తెలిపాయి.యాపిల్ ఐఫోన్‌లో శాటిలైట్ మెసేజింగ్ సామర్థ్యాలను విస్తరిస్తోంది. కొత్త iOS 18 వర్షన్‌ ద్వారా సాటిలైట్‌ సేవలను వినియోగించుకుని ఎమర్జెన్సీ మెసేజ్‌లను పంపించేలా ఏర్పాటు చేస్తున్నారు. సెల్యులార్, వై-ఫై కనెక్షన్‌లు అందుబాటులో లేనప్పుడు శాటిలైట్ ద్వారా సందేశాలు పంపే టెక్నాలజీను తీసుకొస్తున్నారు. ఇది ఎండ్-టు-ఎండ్ ఎన్‌క్రిప్షన్‌ను కలిగి ఉంటుందని కంపెనీ తెలిపింది. 2022లో విడుదల అయిన ఐఫోన్‌14తోపాటు దాని తర్వాత మార్కెట్‌లోకి వచ్చిన యాపిల్‌ ఫోన్‌లలో ఈ సదుపాయాన్ని వినియోగించుకోవచ్చని చెప్పింది. ఈమేరకు ఆయా ఫోన్‌ల్లోని యాంటెన్నాలు ఉపగ్రహాల ప్రత్యేక ఫ్రిక్వెన్సీని చేరుకునేలా ఇప్పటికే హార్డ్‌వేర్‌ సిద్ధంగా ఉన్నట్లు తెలిపింది. అందుకు అనువుగా నిర్దిష్ట సాప్ట్‌వేర్‌, అల్గారిథమ్‌లను రూపొందించినట్లు యాపిల్‌ పేర్కొంది. ఈ కొత్త ఫీచర​్‌తో ఐఫోన్ వినియోగదారులు ఐమెసేజ్‌, ఎస్‌ఎంఎస్‌ల ద్వారా టెక్స్ట్‌లు, ఎమోజీలు పంపవచ్చని వివరించింది.ఇదీ చదవండి: విదేశాలకు వెళ్తున్నారా..? ప్రయాణబీమా తీసుకున్నారా..?యాపిల్‌ శాటిలైట్ కనెక్టివిటీ కాంపోనెంట్ కోసం అమెరికాకు చెందిన గ్లోబల్‌స్టార్‌ కంపెనీతో భాగస్వామ్యం కుదుర్చుకుంది. గ్లోబల్‌స్టార్ సంస్థ స్పేస్‌టెక్నాలజీ అందిస్తున్న ఎండీఏతో ఈమేరకు ఒప్పందం చేసుకుందని కంపెనీ వర్గాలు తెలిపాయి.

బనశంకరి: భారత సిమ్‌కార్డును వినియోగించి విదేశాల్లో నుంచి సైబర్‌ మోసాలకు పాల్పడుతున్న ముఠా సమాచారాన్ని బెంగళూరు ఈశాన్య విభాగం సైబర్‌క్రైం పోలీసులు ఛేదించారు. వంచక ముఠాకు సిమ్‌ కార్డులను సరఫరా చేస్తున్న విశాఖపట్టణానికి చెందిన వ్యక్తిని అరెస్టు చేశారు. ముఠా నేరగాళ్లు నకిలీ ఆధారాలను అందించి ఏజెంట్ల ద్వారా వివిధ కంపెనీల సిమ్‌కార్డులను కొనుగోలు చేశారు. బెంగళూరు, చైన్నె, విశాఖపట్టణంతో పాటు దేశంలోని వివిధ మహా నగరాల నుంచి సిమ్‌కార్డులను కొని, యాక్టివేట్‌ చేసి వియత్నాం, కాంబోడియాకు కొరియర్‌ ద్వారా పంపించేవారని పోలీసులు తెలిపారు. నిందితుడు విశాఖపట్టణం నుంచి బెంగళూరుకు వచ్చి ఇక్కడి నుంచి కాంబోడియాకు సిమ్‌కార్డులు పంపించేవాడు.మోసాలు ఇలా చేసేవారుఆ సిమ్‌కార్డుల ద్వారా వాట్సాప్‌ ఉపయోగించి మోసగాళ్లు వంచనకు తెగబడుతున్నారు. దేశంలోని పౌరులకు కాల్‌ చేసి, తప్పుడు వివరాలున్న లింకులను పంపి డబ్బు దోచుకునేవారు. షేర్‌ మార్కెట్‌ పెట్టుబడి, ఇంట్లో కూర్చుని చేసే పార్ట్‌టైమ్‌ ఉద్యోగాలు అందిస్తామని మెసేజ్‌లు పంపేవారు. భారత మొబైల్‌ నంబర్లతోనే ఉండడంతో జనం అనుమానించేవారు కాదు. వాటిని నమ్మి లింక్‌ ఓపెన్‌ చేసి, ఓటీపీ షేర్‌ చేస్తే చాలు బాధితుల బ్యాంకు ఖాతాల నుంచి వంచకులు నగదు కాజేస్తారు. విశాఖపట్టణం వాసిని అరెస్టు చేసి విచారణ చేపట్టారు.

ప్రస్తుతకాలంలో చాలామంది ఒకటికంటే ఎక్కువ ఫోన్లు వాడుతున్నారు. వాటిలో రెండు కంటే ఎక్కువ సిమ్‌కార్డులు వినియోగిస్తున్నారు. అయితే గతంలో మీపేరుతో ఎప్పుడో ఒకపుడు సిమ్‌కార్డులు తీసుకునే ఉంటారు. కేంద్రం నిబంధనల ప్రకారం ఒకరి పేరుమీద గరిష్ఠంగా 9 సిమ్‌కార్డులే ఉండాలి.ప్రభుత్వ వెబ్‌సైట్‌ సంచార్‌సాతి వెబ్‌సైట్‌ ద్వారా మీరు గతంలో తీసుకున్న నంబర్లు, ప్రస్తుతం వాడుతున్న సిమ్‌కార్డుల వివరాలు తెలుసుకోవచ్చు. దీనిద్వారా గతంలో తీసుకుని వినియోగంలోలేని సిమ్‌కార్డులను నేరుగా ఆన్‌లైన్‌లోనే బ్లాక్‌ చేసుకునే సౌకర్యం ఉంది. అది ఎలాగో తెలుసుకుందాం.బ్రౌజర్‌లో https://sancharsaathi.gov.in/ వెబ్‌సైట్‌లోకి వెళ్లాలి.కింద సిటిజన్‌ సెంట్రిక్‌ సర్వీసెస్‌ కేటగిరీలో ‘Know Your Mobile Connections’ క్లిక్‌ చేయాలి. ఈ సర్వీస్‌ టెలికాం అనలిటిక్స్‌ ఫర్‌ ఫ్రాడ్‌ మేనేజ్‌మెంట్‌ అండ్‌ కన్జూమర్‌ ప్రొటెక్షన్‌(టీఏఎఫ్‌సీఓపీ) అందిస్తోంది.‘Know Your Mobile Connections’పై క్లిక్‌ చేసిన వెంటనే కొత్త విండో ఓపెనె అవుతుంది. అందులో ప్రస్తుతం వాడుతున్న మొబైల్‌నంబర్‌ను ఎంటర్‌ చేయాలి. కింద క్యాప్చా కోడ్‌ను ఇవ్వాలి. ‘వాలిడేట్‌ క్యాప్చా’ బటన్‌ ప్రెస్‌ చేయాలి.పైన ఇచ్చిన మొబైల్‌ నంబర్‌కు ఓటీపీ వస్తుంది. దాన్ని కింద తెలిపిన బ్లాక్‌లో ఎంటర్‌చేసి లాగిన్‌ అవ్వాలి. మన పేరుతో ఏ నంబర్లు రిజిస్ట్రర్‌ అయ్యాయో వాటి వివరాలతో లిస్ట్‌ వస్తుంది.ఇదీ చదవండి: రోజులో ఒకసారైనా ఓపెన్‌ చేసే ఈ యాప్‌ గురించి తెలుసా..?ఒకవేళ ఏదేని నంబర్‌ను నిలిపేయాలంటే పక్కనే ఆప్షన్లు ఉంటాయి. వాటిపై క్లిక్‌ చేసి సబ్మిట్‌ చేయాలి. చివరగా లాగ్‌అవుట్‌ చేయాలి.

దేశంలో పెరిగే పోతున్న సైబర్‌ నేరాలకు చెక్‌ పెట్టేందుకు కేంద్రం కీలక నిర్ణయం తీసుకుంది. కొత్త ఏడాది నుంచి సిమ్‌ కార్డ్‌ పొందేందుకు బయోమెట్రిక్‌ విధానాన్ని అమలు చేయనున్నట్లు తెలుస్తోంది.  ఇప్పటికే ఈ విధానాన్ని అంగీకరిస్తూ ప్రవేశ పెట్టిన టెలికమ్యూనికేషన్‌ బిల్‌-2023ను రాజ్యసభ, లోక్‌ సభ సభ్యులు ఆమోదించారు. దీనిపై రాష్ట్రపతి ద్రౌపది ముర్ము సంతకం చేయాల్సి ఉంటుంది. ఆమోద ముద్ర అనంతరం కొత్త సిమ్‌ కార్డ్‌ నిబంధనలు అమల్లోకి రానున్నాయి.        మూడేళ్ల జైలు శిక్ష టెలికమ్యూనికేషన్‌ బిల్లు అమల్లోకి వచ్చిన తర్వాత నకిలీ సిమ్‌ కార్డ్‌ తీసుకున్న వినియోగదారుల్ని కఠినంగా శిక్షలు విధించే అవకాశం ఉంది. మూడేళ్లు జైలు శిక్ష, రూ.50 లక్షల జరిమానా చెల్లించాల్సి ఉంటుంది.  కేవైసీ జనవరి 1,2024 నుంచి సిమ్‌ కార్డ్‌ను ఆన్‌లైన్‌లోనే తీసుకోవాల్సి ఉంటుంది. ఇందుకోసం  వినియోగదారులు కేవైసీ వివరాల్ని అందించాలి. ఇక సిమ్‌ కార్డ్‌ను అమ్మే డిస్ట్రిబ్యూషన్‌ సంస్థలు వెరిఫికేషన్‌ తప్పని సరి. పెద్ద సంఖ్యలో సిమ్‌కార్డ్‌లు అమ్మడాన్ని కేంద్రం నిషేధం విధించనున్నట్లు పరిశ్రమ వర్గాలు భావిస్తున్నాయి.  బయోమెట్రిక్‌ తప్పని సరి సాధారణంగా మనం ఆధార్‌ కార్డ్‌ను తీసుకునేందుకు ఎలా బయోమెట్రిక్‌ (వేలి ముద్రలు) ఇస్తామో, రాష్ట్రపతి ఆమోదం తర్వాత అమలయ్యే సిమ్‌ కార్డ్‌ నిబంధనల్లో భాగంగా ఎవరైతే సిమ్‌ కార్డ్‌ కొనుగోలు చేస్తారో వారు తప్పని సరిగా బయోమెట్రిక్‌ విధానాన్ని ఇవ్వాల్సి ఉంది. ఈ విధానంలో సైబర్‌ నేరస్తులు ఎక్కువ సిమ్‌ కార్డ్‌లను కొనుగోలు చేసే వీలుండదు.  ఆమోదం తప్పని సరి ఇకపై టెలికం ఫ్రాంచైజీ తీసుకున్నవారు, లేదంటే సిమ్‌ కార్డ్‌ డిస్ట్రిబ్యూటర్స్‌, పాయింట్‌ ఆఫ్‌ సేల్‌ ఏజెంట్లు రిజిస్ట్రేషన్‌ తప్పని సరిగా చేసుకోవాలి. లేదని నిబంధనల్ని అతిక్రమిస్తే రూ.10 లక్షల జరిమానా చెల్లించాల్సి ఉంటుంది. 

సిమ్ కార్డుల విక్రయానికి సంబంధించిన డిసెంబర్ 1 నుంచి కొత్త రూల్స్ రానున్నట్లు గత ఆగష్టు నెలలోనే కేంద్ర ప్రభుత్వం ప్రకటించిన సంగతి విదితమే. దీని ప్రకారమే ఈ రోజు (23 డిసెంబర్ 1) నుంచి ఆ కొత్త నిబంధనలు అమలులోకి రానున్నాయి. దీనికి సంబంధించిన మరిన్ని వివరాలు ఈ కథనంలో తెలుసుకుందాం. కేంద్ర ప్రభుత్వం ప్రవేశపెట్టిన కొత్త నిబంధల ప్రకారం, పీఓఎస్ ఏజెంట్లు చట్ట వ్యతిరేఖ కార్యకలాపాలకు పాల్పడకుండా ఉండటానికి టెలికామ్ సర్వీస్ ప్రొవైడర్ లేదా లైసెన్స్‌దారు ఒప్పందంపై సంతకం చేయాలి. నియమాలను అతిక్రమించిన ఏజెంట్లకు రూ. 10 లక్షల వరకు జరిమానా విధిస్తారు. అంతే కాకుండా వారి లైసెన్స్ కూడా క్యాన్సిల్ చేసే అవకాశం ఉంది. కొత్త సిమ్ కార్డు కొనుగోలు చేయాలనుకునే వినియోగదారుడు తప్పనిసరిగా వ్యక్తిగత వివరాలను అందించాలి. సిమ్ కార్డు అందించే ఏజెంట్ కొనుగోలు చేసే వ్యక్తి ఆధార్ కార్డు క్యూఆర్ స్కాన్ చేసి వివరాలు సేకరిస్తాడు. ఇక్కడ గుర్తుంచుకోవాల్సి మరో విషయం ఏమిటంటే ఒక సిమ్ డిస్‌కనెక్ట్ అయిన 3 నెలలు లేదా 90 రోజుల తర్వాత కొత్త కస్టమర్‌కు ఆ మొబైల్ నెంబర్ కేటాయించాలి. ఇదీ చదవండి: ఎయిర్ ఇండియా విమానంలో వాటర్ లీక్ - వీడియో వైరల్ కేంద్ర ప్రభుత్వ కొత్త రూల్స్ ప్రకారం ఒక వ్యక్తి, ఒక ఐడీ మీద గరిష్టంగా 9 సిమ్ కార్డులకంటే ఎక్కువ కొనుగోలు చేయకూడదు. అయితే కమర్షియల్, బిజినెస్, కార్పొరేట్ ఖాతాలకు ఈ నియమం వర్తించదు, కానీ ఎన్ని సిమ్ కార్డులు కొనుగోలు చేయవచ్చనే విషయం వెల్లడి కాలేదు.

టెక్నాలజీ ఎంత వేగంగా అభివృద్ధి చెందుతుందో సైబర్ నేరాలు కూడా అంతే వేగంగా పెరుగుతున్నాయి. డిజిటల్ ప్రపంచంలో ఎంత తెలిసినవారైనా తప్పకుండా మోసపోయిన సందర్భాలు చాలానే ఉన్నాయి. కొంతమంది మనం వాడి పడేసిన సిమ్ కార్డులను ఉపయోగించి నేరాలకు పాల్పడుతున్నారు. ఇలాంటి వాటిని ఎలా నివారించాలో ఇక్కడ తెలుసుకుందాం. నిజానికి సర్వీస్ ప్రొవైడర్లు ఇచ్చే ఆఫర్లకు ఆకర్షితులై ఒక్కొక్కరు నాలుగైదు సిమ్ కార్డులు కొనేసి.. వినియోగించిన తరువాత పడేస్తున్నారు. ఇలాంటి నంబర్లను కొనుగోలు చేసి యాక్టివేట్ చేసుకుని మోసాలకు పాల్పడుతున్నారు. ఇటీవల విజయవాడకు సంబంధించిన ఒకే వ్యక్తి కార్డుతో 658 సిమ్ కార్డులు యాక్టివేట్ అయినట్లు ఆర్టిఫీషియల్ ఇంటెలిజెన్స్ ద్వారా తెలిసింది. టెలికామ్ అధికారులు వీటిని మొత్తం బ్లాక్ చేసినట్లు సమాచారం. టెలికామ్ శాఖ కొత్త నిబంధనల ప్రకారం, ఒక ఆధార్ కార్డుపై గరిష్టంగా 9 సిమ్ కార్డులు మాత్రమే కలిగి ఉండాలని ఆదేశించించినట్లు సమాచారం. కొన్ని ప్రత్యేక సందర్భాల్లో ఎక్కువ సిమ్ కార్డులు తీసుకోవాల్సి వస్తే.. రీ వెరిఫికేషన్ చేసుకోవాలని తెలుస్తోంది. మొత్తం మీద సిమ్ కార్డుల విషయంలో చాలా జాగ్రత్తగా ఉండాలని తెలుస్తోంది. ఇదీ చదవండి: ఏం ఐడియా గురూ! డ్రైవర్ క్రియేటివిటీకి ఫిదా అవుతున్న ప్యాసింజర్లు.. టెలికామ్ సంస్థ ఒక ఆధార్ కార్డు మీద ఎన్ని సిమ్ కార్డులు ఉన్నాయని తెలుసుకోవడానికి ఓ కొత్త వెబ్‌సైట్‌ తీసుకువచ్చింది. దీంతో ఆధార్ నెంబర్ మీద ఎన్ని సిమ్ కార్డులున్నాయనే విషయం మాత్రమే కాకుండా.. మొబైల్ ఎవరైనా దొంగలించిన లేదా పోగొట్టుకున్న సమయంలో అయినా నెంబర్ బ్లాక్ చేసే అవకాశం ఉంది. ఇలా తెలుసుకోండి.. మొదట సంచార్ సతి అధికారిక వెబ్‌సైట్ (www.sancharsaathi.gov.in) ఓపెన్ చేయాలి. అందులో మీకు రెండు ఆప్షన్స్ కనిపిస్తాయి. అందులో మీ మొబైల్ నెంబర్ కనెక్షన్ తెలుసుకోండి(TAFCOP) మీద క్లిక్ చేయాలి.  కొత్త పేజీ ఓపెన్ అయిన తరువాత మీ 10 అంకెల మొబైల్ నెంబర్ ఎంటర్ చేయాలి. క్యాప్చా కోడ్‌ ఎంటర్ చేసిన తరువాత, వచ్చిన ఓటీపీ ఎంటర్ చేస్తే.. యూజర్ మీద ఎన్ని మొబైల్ నంబర్స్ ఉన్నాయో కనిపిస్తుంది. అందులో మీది కానీ నెంబర్ బ్లాక్ చేసుకునే ఆప్షన్ కూడా అక్కడే ఉంటుంది.

సాక్షి, అమరావతి: సైబర్‌ నేరగాళ్ల దోపిడీకి అడ్డులేకుండా పోతోంది. కొత్త దారుల్లో బ్యాంక్‌ అకౌంట్లలోని నగదును కొల్లగొడుతున్నారు. బడా కంపెనీల ఈ–మెయిళ్ల, వెబ్‌సైట్లను సైతం హ్యాక్‌ చేసి సమాచారాన్ని కొట్టేస్తున్నారు. మరోవైపు ఫేక్‌ కాల్స్, ఫిషింగ్‌ మెసేజిల ద్వారా కస్టమర్‌ వ్యక్తిగత విషయాల కూపీ లాగుతున్నారు. ఫేస్‌బుక్, ట్విట్టర్, ఇన్‌స్ట్రాగామ్‌ వంటి సామాజిక మాధ్యమాల్లోని ఫోన్‌ నంబర్ల సేకరించి టార్గెట్‌ చేస్తున్నారు. ముఖ్యంగా బయోమెట్రిక్, అడ్రస్‌ డేటా చౌరంతో స్విమ్‌ స్వాప్‌ చేసి హైటెక్‌ దోపిడీకి పాల్పడుతున్నారు. విశాఖకు చెందిన ఓ సాఫ్ట్‌వేర్‌ ఉద్యోగి సిమ్‌ పని చేయకపోవడంతో వేరే నంబర్‌ నుంచి కస్టమర్‌ కేర్‌కు ఫోన్‌ చేశాడు. అప్పటికే అతడి పేరిట అదే నంబర్‌తో వేరే వ్యక్తులు కొత్త సిమ్‌ తీసుకున్నట్టు తేలడంతో షాకయ్యాడు. అదే సమయంలో అతని అకౌంట్‌ నుంచి రూ.2 లక్షలు మాయమయ్యాయి. బ్యాంకు అకౌంట్‌ చూసుకుంటే గానీ అతనికి అసలు విషయం తెలియలేదు. సిమ్‌ పనిచేయకపోవడంతో ఎస్‌ఎంఎస్‌ కూడా రాలేదు. వెంటనే పోలీసులకు ఫిర్యాదు చేశాడు.  రాజమండ్రికి చెందిన ఓ ఆటో డ్రైవర్‌ ఫోన్‌లో సిగ్నల్స్‌ ఒక్కసారిగా ఆగిపోయాయి. ఫోన్‌ ఎన్నిసార్లు స్విచ్‌ ఆఫ్‌ చేసి.. ఆన్‌ చేసినా సిగ్నల్స్‌ రాలేదు. సమీపంలోని కస్టమర్‌ సెంటర్‌కు వెళ్లి విషయం చెప్పాడు. సిమ్‌కార్డు పాడైందని.. కొత్తది తీసుకోవాలన్నారు. అడ్రస్‌ ప్రూఫ్‌ తీసుకుని ఆన్‌లైన్‌లో చెక్‌ చేసిన సిబ్బంది అంతకు ముందే అదే నంబర్‌తో కొత్త సిమ్‌ యాక్టివేట్‌ అయినట్టు గుర్తించారు.  ఈ ఘటనలో ఆటోడ్రైవర్‌ అకౌంట్‌లో రూ.20 వేలు డ్రా అయ్యాయి. ఈ రెండు ఘటనల్లో జరిగింది సిమ్‌ స్వాప్‌. సైబర్‌ నేరగాళ్లు నకిలీ సిమ్‌ తీసుకుని.. బ్యాంకు అకౌంట్లను గుల్ల చేసే కొత్త ఎత్తుగడ ఇది. ఇటీవల కాలంలో పల్లెలు, పట్టణాల్లోనూ సిమ్‌ స్వాప్‌ తరహా మోసాలు  పెరిగిపోతున్నాయి. ఇలా కొట్టేస్తున్నారు ♦ సిమ్‌ స్వాప్‌ నేరాలకు పాల్పడే సైబర్‌ నేరగాళ్లు ఒక వ్యక్తి ఫోన్‌ నంబర్‌తో అతనికి తెలియకుండానే మరో సిమ్‌కార్డు తీసుకుంటున్నారు.  ♦ నేరగాళ్లు ముందుగానే బాధిత వ్యక్తి అడ్రస్, పుట్టిన తేదీ, ఈమెయిల్‌ వంటి వివరాలను సంపాదిస్తున్నారు. ♦ వాటి ఆధారంగా సిమ్‌కార్డు పోయిందంటూ టెలికాం సర్వీస్‌ ప్రొవైడర్‌ నుంచి డూప్లికేట్‌ సిమ్‌ కార్డు తీసుకుంటారు.  ♦ఆ విషయం అసలు వ్యక్తికి తెలిసేలోపే ఆ ఫోన్‌ నంబర్‌కు లింక్‌ అయిన బ్యాంక్‌ ఖాతాల్లోని సొమ్మును అదే ఫోన్‌ నంబర్‌కు వచ్చే ఓటీపీ ద్వారా తమ ఖాతాలకు మళ్లించుకుంటున్నారు.  ♦ ఇందుకోసం ఫేక్‌ కాల్స్, ఫిషింగ్‌ మెసేజిల ద్వారా కస్టమర్‌ వ్యక్తిగత వివరాలను కూపీ లాగుతున్నారు.  ♦ ఫేస్‌బుక్, ట్విట్టర్, ఇన్‌స్ట్రాగామ్‌ వంటి సామాజిక మాధ్యమాల నుంచి ఫోన్‌ నంబర్లు సేకరించి హైటెక్‌ దోపిడీకి పాల్పడుతున్నారు. వీటిని తరచూ గమనించాలి ♦  మీ సిమ్‌ కార్డ్‌ లేదా ఫోన్‌ నంబర్‌ వేరేచోట యాక్టివేట్‌ అయిందంటే అది సిమ్‌ స్వాప్‌గా గుర్తించాలి. ♦  ఏ కారణం లేకుండా ఫోన్‌కాల్స్, మెసేజ్‌లు ఉన్నట్టుండి నిలిచిపోతే దోపిడీకి ఆస్కారం ఏర్పడినట్టు గ్రహించాలి. ♦ తరచూ భద్రతా నోటిఫికేషన్‌లు, పాస్‌వర్డ్‌లు, భద్రతా ప్రశ్నలు వంటివి, మీ ప్రొఫైల్‌ డేటా మార్పుల గురించి హెచ్చరికలు వస్తే.. సైబర్‌ నేరగాళ్లు మీ అకౌంట్‌లోకి లాగిన్‌ కావడానికి విఫలయత్నం చేశారని అర్థం. ♦  సైబర్‌ నేరస్తులు మీ సిమ్‌ను నకిలీ చేయడానికి అవసరమైన సమాచారాన్ని సేకరిస్తారు. అందుకే మీరు సందర్శించే వెబ్‌సైట్ల వినియోగంలో జాగ్రత్తగా వ్యవహరించాలి.  ♦ భద్రత ప్రమాణాలు కలిగిన వెబ్‌సైట్‌ యూఆర్‌ఎల్‌లో  https://  అని ఉంటుంది. యూఆర్‌ఎల్‌లో ‘ S ’ లేకుంటే అది కచ్చితంగా నకిలీ వెబ్‌సైట్‌ అని భావించాలి. వ్యక్తిగత డేటా విషయంలో జాగ్రత్త సిమ్‌ స్వాపింగ్‌పై ప్రతి ఒక్కరూ అప్రమత్తంగా ఉండాలి. మన వ్యక్తిగత డేటా ఎప్పుడూ బహిరంగ పరచకూడదు. భద్రతా ప్రమాణాలు కలిగిన వెబ్‌సైట్‌లనే వినియోగించాలి. సామాజిక మాధ్యమాల అకౌంట్ల పాస్‌వర్డ్‌లను ఎప్పటికప్పుడు మారుస్తూ ఉండాలి. పుట్టిన తేదీ, ఫోన్‌ నంబర్లు, ఆధార్‌ నంబర్లు వంటి వాటిని పిన్‌లుగా పెట్టకపోవడం మంచిది. తరచూ మీ సిమ్‌ మీ పేరుపైనే ఉందో లేదో చెక్‌ చేసుకుంటూ ఉండాలి. ఒక్కసారిగా మెసేజ్‌లు ఆగిపోవడం, సిగ్నల్‌ నిలిచిపోవడం, మీ అకౌంట్‌కు అవాంఛనీయ మెయిల్స్‌ రావడం సిమ్‌ స్వాప్‌కు సూచనలు. రెండంచెల ధ్రువీకరణ కోరే యాప్స్‌ను మాత్రమే వాడటం మంచింది. సిమ్‌ స్వామ్‌ జరిగినట్టు తెలిసివెంటనే సమీపంలోని పోలీస్‌ స్టేషన్‌ లేదా సైబర్‌ క్రైమ్‌ టోల్‌ ఫ్రీ నంబర్‌ 112, 181, సైబర్‌ మిత్ర వాట్సాప్‌ నంబర్‌ 11100, నేషనల్‌ సైబర్‌ క్రైం పోర్టల్‌ 1930 నంబర్‌కు ఫిర్యాదు చేస్తే సైబర్‌ నేరగాళ్లను పట్టుకునేందుకు వీలుంటుంది. – అమిత్‌ బర్దర్, ఎస్పీ, సైబర్‌ క్రైమ్‌   

సాక్షి, అమరావతి: ఏదైనా కారణంతో వలంటీర్‌ మారినా.. సమాచారం విషయంలో ఆ క్లస్టర్‌ పరిధిలో ప్రజలకు ఇబ్బంది లేకుండా ఉండేందుకు ప్రభుత్వం చర్యలు చేపట్టింది. గ్రామాలు, పట్టణాలు, నగర కార్పొరేషన్లలో క్లస్టర్‌ వారీగా శాశ్వత ఫోన్‌ నంబర్‌ను కేటాయించేందుకు ప్రభుత్వం చర్యలు తీసుకుంది. రాష్ట్రంలో వలంటీర్‌ వ్యవస్థను ఏర్పాటు చేసినప్పుడే ప్రభుత్వం ప్రతి వలంటీర్‌కు మొబైల్‌ ఫోన్‌తో పాటు సిమ్‌ను కూడా అందజేసింది.  అయితే ఏ కారణంతోనైనా ఏదైనా ప్రాంతంలో వలంటీర్‌ విధుల నుంచి తప్పుకొని తనకు కేటాయించిన ఫోన్‌ నంబర్‌ తిరిగి ఇవ్వనప్పుడు ఆ క్లస్టర్‌ పరిధిలోని ప్రజలు ఇబ్బంది పడాల్సి వస్తోంది. ఇలాంటి ఇబ్బంది ఇకపై తలెత్తకుండా విధుల నుంచి తప్పుకొన్న వలంటీర్‌కు కేటాయించిన సిమ్‌ను బ్లాక్‌ చేసి, అదే నంబర్‌తో కొత్త సిమ్‌ తీసుకొని కొత్త వలంటీర్‌కు అధికారులు అందజేయనున్నారు. ఇందుకోసం వలంటీర్లకు ప్రభుత్వం కేటాయించిన ఫోను నంబర్ల వివరాలను రాష్ట్ర స్థాయి ఆన్‌లైన్‌ డేటా బేస్‌ సెంటర్‌లో నమోదు చేస్తున్నారు.  ఈ నెల పదో తేదీ కల్లా ప్రతి వలంటీర్‌ తమ మొబైల్‌ నంబర్‌ వివరాలతో పాటు సిమ్‌ కార్డు వివరాలు రాష్ట్ర స్థాయి డేటా బేస్‌ పోర్టల్‌లో నమోదు చేయాలని ఇప్పటికే గ్రామ, వార్డు సచివాలయాలకు ఆదేశాలు ఇచ్చారు. ఎక్కడైనా సరైన సిగ్నల్‌ లేక ప్రభుత్వం కేటాయించిన సిమ్‌ కాకుండా వలంటీర్లు తమ సొంత ఫోన్‌ నంబర్‌ వాడుతుంటే.. అలాంటి చోట్ల సరైన సిగ్నల్‌ ఉండే కంపెనీలకు చెందిన ఫోన్‌ నంబర్లనే వలంటీర్లకు కేటాయించేందుకు చర్యలు చేపట్టారు. (క్లిక్ చేయండి: వైద్య శాఖలో కొలువుల జాతర)

న్యూఢిల్లీ: కొత్త మొబైల్‌ కనెక్షన్ల జారీ ప్రక్రియను మరింత సులభతరం చేస్తూ టెలికం శాఖ (డాట్‌) ఆదేశాలు జారీ చేసింది. వీటి ప్రకారం కస్టమరు.. ఆన్‌లైన్‌లోనే కనెక్షన్‌ కోసం దరఖాస్తు చేసుకుని, ఆధార్‌ లేదా డిజిలాకర్‌లో భద్రపర్చిన ఇతరత్రా గుర్తింపు పత్రాలతో ధ్రువీకరణ ప్రక్రియ పూర్తి చేసుకోవచ్చు. ఆ తర్వాత ఇంటి వద్దే సిమ్‌ కార్డు పొందవచ్చు. కొత్త మొబైల్‌ కనెక్షన్‌ కోసం విశిష్ట గుర్తింపు కార్డుల ప్రాధికార సంస్థ యూఐడీఏఐకి సంబంధించిన ఆధార్‌ ఆధారిత ఈ–కేవైసీ సర్వీసులను వినియోగించుకున్నందుకు గాను కస్టమర్లు రూ. 1 చెల్లించాల్సి ఉంటుంది. కేంద్ర ప్రభుత్వం టెలికం రంగంలో ప్రవేశపెట్టిన సంస్కరణల్లో భాగంగా డాట్‌ .. తాజా ఆదేశాలు జారీ చేసింది. ప్రస్తుతం కొత్త మొబైల్‌ కనెక్షన్‌ తీసుకోవాలన్నా, ప్రీ–పెయిడ్‌ నుంచి పోస్ట్‌–పెయిడ్‌కు లేదా పోస్ట్‌ పెయిడ్‌ నుంచి ప్రీ–పెయిడ్‌ కనెక్షన్‌కు మారాలన్నా కస్టమరు కచ్చితంగా భౌతిక కేవైసీ (కస్టమరు వివరాల వెల్లడి) ప్రక్రియ పాటించాల్సి ఉంటోంది. గుర్తింపు, చిరునామా ఒరిజినల్‌ ధ్రువీకరణ పత్రాలతో రిటైల్‌ షాపునకు వెళ్లాల్సి వస్తోంది. ఆన్‌లైన్‌ వినియోగం పెరగడం, కోవిడ్‌–19 కారణంగా కాంటాక్ట్‌రహిత సర్వీసుల అవసరం నెలకొనడం వంటి పరిణామాల నేపథ్యంలో .. కొత్త విధానం సబ్‌స్క్రయిబర్స్‌కు మరింత సౌకర్యవంతంగా ఉంటుందని డాట్‌ తెలిపింది.   

టెక్నాలజీ వరల్డ్‌లో అనేక నూతన ఆవిష్కరణలకు కేరాప్‌ అడ్రస్‌గా యాపిల్‌ నిలిచింది.  ఏదైనా ఫీచర్‌ని యాపిల్‌ అందుబాటులోకి తెచ్చిందంటే మిగిలిన కంపెనీలన్నీ ఆ బాటలోనే నడుస్తాయి. మెటల్‌ బాడీ, ఫింగర్‌ ప్రింట్‌ స్కానర్‌, టాప్‌నాచ్‌ ఒకటేమిటి ఇప్పుడు పాపులర్‌ ఫీచర్లలో సగానికి పైగా యాపిల్‌ వల్లే ట్రెండింగ్‌లో ఉన్నాయి. వాటన్నింటిని మించి మరో పాత్‌ బ్రేకింగ్‌ ఫీచర్‌ని యాపిల్‌ అందుబాటులోకి తేనుందని మార్కెట్‌ వర్కాలు అంటున్నాయి.  లియోతో మార్పులు ప్రస్తుతం మనం ఉపయోగిస్తున్న మొబైల్‌ ఫోన్లు అన్నీ కూడా నెట్‌వర్క్‌ ఆధారంగా పని చేస్తున్నాయి. 2జీ మొదలుకుని ఇప్పుడు ఎల్‌టీఈ (లాంగ్‌టర్మ్‌ ఎవల్యూషన్‌),  5జీ వరకు వచ్చాం. శాటిలైట్‌ తరంగాల ఆధారంగా ప్రత్యేక ఫ్రీక్వెన్సీలో ఈ నెట్‌వర్క్‌లు పని చేస్తున్నాయి. అయితే వీటిని మించేలా భవిష్యత్తులో లియో నెట్‌వర్క్‌లు అందుబాటులోకి రాబోతున్నాయి. దీని ద్వారా లియో టెక్నాలజీలో సిమ్‌తో అవసరం లేకుండా నేరుగా హ్యండ్‌సెట్‌ ద్వారానే ఇటు కాల్స్‌, అటు డేటాకు సంబంధించి మరింత మెరుగైన కమ్యూనికేషన్‌ కొనసాగించవచ్చు.  ఐఫోన్‌ 13తో మొదలు ? లియో టెక్నాలజీని ముందుగా అందిపుచ్చుకునేందుకు యాపిల్‌ అడుగులు వేస్తోంది.  త్వరలో రిలీజ్‌ చేయబోతున్న యాపిల్‌ 13 మోడల్‌ లియో ఆధారంగా పని చేసే అవకాశం ఉందని మార్కెట్‌లో జోరుగా ప్రచారం జరుగుతోంది. అయితే మొబైల్‌ ఆపరేటర్‌కు ప్రస్తుతం చెల్లిస్తున్నట్టుగా ప్రత్యేకంగా ఏమైనా రీఛార్జీలు ఉంటాయా? లేక హ్యండ్‌సెట్‌ ధరలోనే అ‍అన్నీ పొందు పరుస్తారా అనే అంశంపై చర్చ జరుగుతోంది. ఈ మేరకు బ్లూమ్‌బర్గ్‌ మీడియాలో వార్తలు వచ్చాయి. అయితే దీనికి సంబంధించి యాపిల్‌ నుంచి ఇంకా ఎటువంటి అధికారిక ప్రకటన రాలేదు. లియో అంటే నెట్‌వర్క్‌ ఫ్రీక్వెన్సీకి సంబంధించి ప్రస్తుతం భూ వాతావరణం ఆవల ఉన్న శాటిలైట్లను ఉపయోగిస్తున్నారు. ఇకపై వాటితో సంబంధం లేకుండా భూమి నుంచి కేవలం 500 కి.మీ ఎత్తులో ఉండే లో ఎర్త్‌ ఆర్బిట్‌ (LEO) శాటిలైట్లను మొబైల్‌ కమ్యూనికేషన్‌ కోసం ఉపయోగించుకోబోతున్నారు. దీని కోసం లో ఎర్త్‌ ఆర్బిట్‌ శాటిలైట్లను ‍ ప్రయోగించేందుకు బడా సంస్థలు పోటాపోటీగా ఏర్పాట్లు చేస్తున్నాయి. ఆమెజాన్‌, ఎయిర్‌టెల్‌ , స్పేస్‌ఎక్స్‌,, టాటా, టెలిశాట్‌ వంటి కంపెనీలు ఈ పనిలో బిజీగా ఉన్నాయి. ఈ టెక్నాలజీ 90వ దశకం నుంచి అందుబాటులో ఉన్నా ప్రపంచ వ్యాప్తంగా ఇటీవలే వాణిజ్య అవసరాలకు ఉపయోగించుకునేలా అనుమతులు జారీ అవుతున్నాయి. ప్రభుత్వం తరఫున భారత్‌ బ్రాడ్‌బ్యాండ్‌ నిగమ్‌ లిమిటెడ్‌ సైతం ఇదే టెక్నాలజీపై ఆధారపడి పని చేయనుంది. చదవండి: సెల్‌ఫోన్‌ టవర్లు, కేబుళ్లు కనుమరుగు కానున్నాయా..!

హుబ్లీ: సైబర్‌ నేరగాళ్లు రెచ్చిపోతున్నారు. తాజాగా నగరంలో మరో మహిళ సైబర్‌ వంచకులు బారిన పడి రూ. లక్షన్నర పోగొట్టుకుంది. వివరాలు... ఇటీవల నగరంలోని యల్లపుర వీధికి చెందిన విజయలక్ష్మీ మొబైల్‌కు సిమ్‌బ్లాక్‌ అయినట్లు సందేశం వచ్చింది. దీనిని ఓపెన్‌ చేయాలంటే అందులో మొబైల్‌ నెంబర్‌కు ఫోన్‌ చేయాలని సారాంశం ఉంది. దీంతో సదరు మహిళ ఆ నెంబర్‌కు ఫోన్‌ చేయగా వివరాలు డౌన్‌లోడ్‌ చేసుకోవాలని వంచకులు తెలిపారు. ఆ మేరకు విజయలక్ష్మీ యాప్‌డౌన్‌లోడ్‌ చేసుకున్న క్షణాల్లోనే ఆమె ఖాతా నుంచి రూ.1.50 లక్షల నగదు నేరుగా వంచకుల ఖాతాలోకి వెళ్లిపోయింది. బాధితురాలు పోలీసులకు ఫిర్యాదు చేశారు. 

సాక్షి, సిటీబ్యూరో: ‘మీ ఎయిర్‌టెల్‌ సిమ్‌ కార్డు మరో 24 గంటల్లో బ్లాక్‌  అవుతుందని.. కేవైసీఅప్‌డేట్‌ చేసుకోవాలి’ అని బల్క్‌ మెసేజ్‌లు పంపి..   ఆ తర్వాత సిమ్‌ బ్లాక్‌ చేసి లక్షలు కాజేస్తున్న సైబర్‌ మోసాలు పెరిగాయి.  ఈ విధంగా గత 9 రోజుల్లో మియాపూర్‌కు చెందిన అప్పలనాయుడు రూ.9,20,897, గచ్చిబౌలికి చెందిన  కౌశల్‌ కిశోర్‌ మిశ్రా రూ.5,94,799, సురేశ్‌ రమణ రూ.1,03, 990లు మోసపోయారని సైబరాబాద్‌ క్రైమ్స్‌ డీసీపీ రోహిణి ప్రియదర్శిని గురువారం తెలిపారు. ‘కొన్నిరోజులుగా ఎయిర్‌టెల్‌ కస్టమర్స్‌కు సైబర్‌ నేరగాళ్లు బల్క్‌ మెసేజ్‌లు పంపిస్తున్నారు. మరో 24 గంటల్లో ఈ కేవైసీ అప్‌డేట్‌ చేయకపోతే సిమ్‌ కార్డు బ్లాక్‌ అవుతుందని సంక్షిప్త సమాచారాలు పంపిస్తున్నారు. తర్వాత కస్టమర్‌ కేర్‌ ప్రతినిధిగా  కాల్‌ చేసి సిమ్‌ కార్డు కోసం కస్టమర్‌ కేర్‌ సర్వీస్‌ నంబర్‌కు మెయిల్‌ ద్వారా పంపించాలని కోరుతున్నారు. ఆ తర్వాత ఎయిర్‌టెల్‌ నుంచి ఆటో జనరేటేడ్‌ మెసేజ్‌ను బాధితులకు పంపిస్తున్నారు. అనంతరం ఓ లింక్‌ను వారి సెల్‌ నంబర్‌కు పంపించడంతో అందులో బ్యాంక్‌ ఖాతా వివరాలు నింపడంతో నేరగాళ్లు వెంటనే ఆ సెల్‌ నంబర్‌ను బ్లాక్‌ చేస్తున్నారు. ఆ తర్వాత వీరు క్యూ ఆర్‌ కోడ్‌ సహాయంతో ఈ సిమ్‌ కార్డు యాక్టివ్‌ చేసి అందులో ఉన్న డబ్బులను ఇతర బ్యాంక్‌ ఖాతాలకు మళ్లించి లక్షలు కొల్లగొడుతున్నారు. గత తొమ్మిది రోజుల్లో రూ.16 లక్షలకుపైగా బాధితులు మోసపోయారు. 

సాక్షి, సిటీబ్యూరో: నగరంలోని సికింద్రాబాద్‌ ప్రాంతానికి చెందిన వ్యాపారి సిమ్‌కార్డ్‌ బ్లాక్‌ చేసి, ఆయనతో పాటు ఆయన కుటుంబసభ్యుల పేర్లతో ఉన్న బ్యాంకు ఖాతాల నుంచి రూ.35.89 లక్షలు కాజేసిన కేసులో నగర సైబర్‌ క్రైమ్‌ పోలీసులు కీలక ఆధారాలు సేకరించారు. ఈ గ్యాంగ్‌ ఇంటర్‌ నెట్‌ వినియోగించిన ఐపీ అడ్రస్‌లు నైజీరియా, భారత్‌లకు చెందినవి కాగా... ఆ డబ్బు కోల్‌కతాకు చెందిన బ్యాంకు ఖాతాల్లోకి మళ్లిందని, అక్కడే విత్‌డ్రా చేసినట్లు గుర్తించారు. వ్యవస్థీకృతంగా సాగిన ఈ నేరంలో సూత్రధారులు ఎవరనేది తెలుసుకోవడానికి అధికారులు దర్యాప్తు ముమ్మరం చేశారు. సికింద్రాబాద్‌కు చెందిన వ్యాపారి వినయ్‌తో పాటు అతడి తల్లి, తండ్రి పేరుతో డీసీబీ బ్యాంకులో ఓవర్‌ డ్రాఫ్ట్‌ ఖాతాలు ఉన్నాయి. ఏదైనా రుణం తీసుకున్నప్పుడు ఆ మొత్తం ఈ ఖాతాల్లోకి వచ్చి పడుతుంది. అయితే మంజూరైన మొత్తానికి, మంజూరైన రోజు నుంచి వడ్డీ పడదు. కేవలం వినియోగించుకున్న నగదుకు, ఆ రోజు నుంచి మాత్రమే వడ్డీ చెల్లించాల్సి ఉంటుంది. వీటినే సాంకేతిక పరిభాషలో ఓవర్‌ డ్రాఫ్ట్‌ ఖాతాలు అంటారు. వినయ్‌ తన వ్యాపార లావాదేవీల కోసం యాహూ మెయిల్‌ ఐడీతో పాటు రెండు ఫోన్‌ నంబర్లను అనుసంధానించారు. గత నెలలో ఈ సిమ్‌ కార్డులు హఠాత్తుగా బ్లాక్‌ అయ్యాయి. వినయ్‌కు చెందిన అధికారిక మెయిల్‌ హ్యాక్‌ చేసిన సైబర్‌ నేరగాళ్లు అందులో ఉన్న వివరాల ఆధారంగా ఆ సంస్థకు చెందిన మూడు ఓడీ ఖాతాల నెట్‌ బ్యాంకింగ్‌ వివరాలను తెలుసుకున్నారు. వీటిని వినియోగించి ఆ ఖాతాలను హ్యాక్‌ చేశారు. మరో ఐపీ నుంచి నెట్‌ బ్యాంకింగ్‌లోకి ఎవరో ప్రవేశించారనే సందేశం కూడా వినయ్‌కు చేరకుండా ఆయన సిమ్‌కార్డు బ్లాక్‌ చేశారు. దీంతో ఆ సమాచారం కేవలం వినయ్‌ వ్యాపార లావాదేవీలకు సంబంధించిన అధికారిక ఈ–మెయిల్‌కు వెళ్లింది. అప్పటికే దాన్ని సైబర్‌ నేరగాళ్లు  తమ ఆధీనంలోకి తీసుకోవడంతో ఈ మెయిల్స్‌ వినయ్‌ దృష్టికి వెళ్లకుండానే డిలీట్‌ చేయగలిగారు. ఆపై నెట్‌ బ్యాంకింగ్‌లోని ప్రొఫైల్‌ ఐడీని హ్యాక్‌ చేసిన సైబర్‌ నేరగాళ్లు పశ్చిమ బెంగాల్‌కు చెందిన ఐసీఐసీఐ, ఆర్‌బీఎస్‌ బ్యాంకులకు చెందిన ఆరు ఖాతాలను బెనిఫిషియరీలుగా యాడ్‌ చేసుకున్నారు. దీనికి సంబంధించిన ఓటీపీలు మెయిల్‌కు రావడంతో వారి పని తేలికైంది. ఇలా ‘ప్లాట్‌ఫామ్‌’ సిద్ధం చేసుకున్న వీరు ఆర్టీజీఎస్‌ ద్వారా వినయ్, ఆయన తండ్రి, తల్లి పేర్లతో ఉన్న ఓడీ ఖాతాల్లోంచి రూ.35.89 లక్షలను కోల్‌కతాకు చెందిన ఆరు బ్యాంకు ఖాతాల్లోకి మళ్లించుకుని, ఆ మొత్తాన్ని అక్కడే డ్రా చేసేశారు.  తన సిమ్‌ బ్లాక్‌ అయిన విషయం గుర్తించిన వినయ్‌ అనుమానం వచ్చి బ్యాంకు ఖాతాలు సరిచూడగా... వాటి నుంచి భారీ మొత్తం మాయమైనట్లు తేలింది. దీనిపై కేసు నమోదు చేసుకున్న సైబర్‌ క్రైమ్‌ పోలీసులు దర్యాప్తు చేపట్టారు. ఈ నేపథ్యంలోనే సైబర్‌ నేరగాళ్లు ఆయా బ్యాంకు ఖాతాలను యాక్సస్‌ చేయడానికి వినియోగించిన ఇంటర్‌నెట్‌ ఐపీలు లాగోస్‌ ఆఫ్‌ నైజీరియా, ఢిల్లీ, ముంబైలకు చెందినవిగా తేలాయి. ఈ నేపథ్యంలోనే అంతర్జాతీయ వ్యవస్థీకృత ముఠా పనిగా అనుమానిస్తున్నారు. ఈ నేరం నమోదైన రెండు రోజులకు సిటీలో ఇదే తరహాకు చెందిన మరోటి వెలుగులోకి వచ్చింది. అమీర్‌పేట ప్రాంతానికి చెందిన కన్‌స్ట్రక్షన్‌ వ్యాపారి శ్రీహర్ష సిమ్‌కార్డు బ్లాక్‌ చేసి, ఆయన మెయిల్‌ ఐడీ హ్యాక్‌ చేసిన నేరగాళ్లు అతడి బ్యాంకు ఖాతాలోని రూ.50 లక్షలు కాజేశారు. ఈ నగదు సైతం కోల్‌కతాలోని ఐసీఐసీఐ బ్యాంకు ఖాతాల్లోకి వెళ్లడంతో పాటు అక్కడే విత్‌డ్రా అయింది. దీనిని పరిగణలోకి తీసుకున్న సైబర్‌ క్రైమ్‌ పోలీసులు రెండు నేరాలు చేసిందీ ఒకే ముఠానా? అనే కోణంలో దర్యాప్తు చేస్తున్నారు. నేరగాళ్లు వినియోగించిన కోల్‌కతాలోని ఐసీఐసీఐ, ఆర్‌బీఎస్‌ బ్యాంకులకు సంబంధించిన ఖాతాలు, దానికి లింకై ఉన్న నంబర్లు సంగ్రహించడం ద్వారా అనుమానితుల్ని గుర్తించాలని నిర్ణయించారు. ఆ ప్రయత్నాలు ప్రారంభించిన అధికారులు కోవిడ్‌ ఉధృతి తగ్గిన తర్వాత ఓ ప్రత్యేక బృందాన్ని కోల్‌కతా పంపాలని నిర్ణయించారు. ఆ తర్వాతే ఈ స్కామ్‌ల సూత్రధారులపై ఓ స్పష్టత వచ్చే అవకాశం ఉంది.

భోపాల్‌: అభిమాన నాయకుడు, హీరో, హీరోయిన్లు, నచ్చిన దేవతల పేర్లు పిల్లలకు పెట్టడం మన దేశంలో చాలా సహజం. అయితే కొన్ని సార్లు ఇష్టంగా పెట్టుకున్న పేరు ఇబ్బందులకు గురి చేస్తుంది. ఇలాంటి సంఘటనే ఒకటి మధ్యప్రదేశ్‌లో చోటు చేసుకుంది. వివరాలు.. కాంగ్రెస్‌ పార్టీ మీద అభిమానమో.. లేక ఇతర కారణమో తెలీదు కానీ.. ఇండోర్‌, అఖండ్‌ నగర్‌కు చెందిన ఓ వ్యక్తికి కుటుంబ సభ్యులు రాహుల్‌ గాంధీ అని పేరు పెట్టారు. అది కాస్త అతని పాలిట శాపమయ్యింది. దాంతో ఈ యువకుడికి బ్యాంకులు రుణం ఇవ్వడానికి ముందుకు రాకపోవడమే కాక ఒక్క టెలికాం కంపెనీ కూడా అతని పేరు మీద సిమ్‌ ఇవ్వడానికి అంగీకరించలేదట. అంతేకాక ఈ పేరు వల్ల చాలాసార్లు తాను అవమానాల పాలయ్యానని వాపోతున్నాడు ఈ మధ్యప్రదేశ్‌ ‘రాహుల్‌ గాంధీ’. ఈ విషయం గురించి అతను మాట్లాడుతూ.. ‘లోన్‌ కోసం ఓ సారి బ్యాంక్‌కు వెళ్లాను. నా పేరు రాహుల్‌ గాంధీ అని చెప్పాను. దాంతో ఆ బ్యాంక్‌ అధికారి నవ్వుతూ.. రాహుల్‌ గాంధీ ఢిల్లీ నుంచి ఇండోర్‌ ఎప్పుడు షిప్ట్‌ అయ్యారని ప్రశ్నించాడు. నిజంగానే నా పేరు రాహుల్‌ గాంధీ అని చెప్పినా అతడు వినిపించుకోలేదు. పైగా నకిలీ పత్రాలతో మోసం చేయాలనుకుంటున్నావా అని ప్రశ్నించాడు. ఇలా అయితే లాభం లేదని భావించి నా పేరు మార్చుకున్నాను. రాహుల్‌ గాంధీ బదులు రాహుల్‌ మాలవియా అని పెట్టుకున్నాను. మా సామాజిక వర్గంలో మాలవియా అనే పేరు చాలా సహజం. ఇక ముఖ్యమైన డాక్యుమెంట్లలో కూడా మాలవియాగానే మార్చుకున్నాను’ అని తెలిపాడు.

తమిళనాడు, టీ.నగర్‌: నిర్లక్ష్యంగా సిమ్‌ కార్డును మరొక వ్యక్తికి కేటాయించిన ప్రైవేటు టెలికమ్యూనికేషన్‌ సంస్థ వినియోగదారునికి నష్టపరిహారంగా రూ.8.50 లక్షలు చెల్లించాలంటూ వినియోగదారుల కోర్టు ఉత్తర్వులిచ్చింది. ఈ వివరాలు సోమవారం వెలుగులోకి వచ్చాయి. చెన్నై జిల్లా ఉత్తర వినియోగదారుల కోర్టులో ఎగ్మూర్‌కు చెందిన పూజన్‌గోయల్‌ దాఖలు చేసిన పిటిషన్‌లో ఇలా పేర్కొన్నారు. చెన్నై ఐనావరంలోగల ఒక ప్రైవేటు టెలికమ్యూనికేషన్‌ సంస్థలో మొబైల్‌ ఫోన్‌ కనెక్షన్‌ తీసుకున్నానని, ఈ ఫోన్‌ సాధారణంగా రావాల్సిన బ్యాంకు లావాదేవీల వివరాలు రాలేదని తెలిపారు. దీంతో టెలికమ్యూనికేషన్‌ సంస్థను సంప్రదించగా సిమ్‌కార్డులో లోపం ఉండొచ్చని తెలిపారని పేర్కొన్నారు. దీంతో కొత్త సిమ్‌కార్డు కొని బ్యాంకు వివరాలు పరిశీలించగా తన బ్యాంకు అకౌంట్‌ నుంచి రూ.7.50 లక్షలు చోరీకి గురైనట్లు తెలిసిందన్నారు. దీనిగురించి టెలికమ్యూనికేషన్‌ సంస్థలో విచారించగా నకిలీ ధ్రువపత్రాలతో వేరొకరికి తన సిమ్‌కార్డును కొత్తగా ఇచ్చినట్లు తెలిసిందన్నారు. దీంతో సదరు సంస్థ తాను పోగొట్టుకున్న సొమ్ముతోపాటు నష్టపరిహారంగా ఆరు లక్షల రూపాయలు చెల్లించాలని కోరారు. దీనిపై విచారణ జరిపిన న్యాయమూర్తి లక్ష్మికాంతం పిటిషనర్‌కు రూ.7.5 లక్షలతోపాటు అదనంగా లక్ష రూపాయలు చెల్లించాలని ఆదేశించింది. 

న్యూఢిల్లీ: ఎయిర్‌టెల్‌ సిమ్‌ కార్డ్‌ చూసుంటాం. వొడాఫోన్, ఐడియా, జియో ఇలా వివిధ కంపెనీలకు చెందిన సిమ్‌ కార్డ్‌ల గురించి మనకు తెలుసు. రానున్న రోజుల్లో పతంజలి సిమ్‌ కార్డ్‌లనూ చూడబోతున్నాం. నిజమే!! యోగా గురు రామ్‌దేవ్‌ బాబాకు చెందిన పతంజలి ఆయుర్వేద్‌ కంపెనీ... త్వరలో సిమ్‌ కార్డుల్ని తీసుకొస్తోంది. ‘స్వదేశీ సమృద్ధి’ పేరిట ఈ సిమ్‌లను బాబా రామ్‌దేవ్‌ మార్కెట్‌లోకి విడుదల చేశారు కూడా. పతంజలి సంస్థ సిమ్‌ కార్డ్‌ సేవల కోసం ప్రభుత్వ రంగ బీఎస్‌ఎన్‌ఎల్‌తో జట్టుకట్టింది. సిమ్‌ల ఆవిష్కరణతో పతంజలి టెలికం రంగంలోకి కూడా అడుగుపెట్టినట్లయింది. పతంజలి  ప్రస్తుతం ఫుడ్, ఆయుర్వేద్‌ మెడిసిన్, కాస్మటిక్స్, హోమ్‌ కేర్, పర్సనల్‌ కేర్‌ విభాగాల్లో ఉత్పత్తులను విక్రయిస్తోంది. అలాగే Patanjaliayurved.net ప్రారంభంతో ఈ–కామర్స్‌లోకి కూడా ప్రవేశించింది. పతంజలి డైవర్సిఫికేషన్‌ ప్రణాళికలు? ఎలక్ట్రిక్‌ వెహికల్స్, స్టీల్, మొబైల్‌ చిప్‌ తయారీ కంపెనీలు తమ మద్దతును కోరినట్లు పతంజలి ఆయుర్వేద్‌ ఎండీ ఆచార్య బాలకృష్ణ తెలిపారు. కొన్ని కంపెనీలు భాగస్వామ్యాన్ని ఆశిస్తే, మరికొన్ని ఆర్థిక సహాయాన్ని కోరాయన్నారు. అయితే తాము ఇప్పటికీ డైవర్సిఫికేషన్‌కు సంబంధించి ఇంకా నిర్ణయం తీసుకోలేదన్నారు. దేశీ కంపెనీల్లోనే ఇన్వెస్ట్‌ చేస్తామని, అలాగే ఇక్కడి సంస్థలతోనే జతకడతామని తెలిపారు. ‘స్టీల్, ఎలక్ట్రిక్‌ వెహికల్, యాంటి– రేడియేషన్‌ మొబైల్‌ చిప్‌ సహా దాదాపు అన్ని రంగాలకు చెందిన తయారీదారులు మమ్మల్ని సంప్రతించారు. మేం అన్ని వ్యాపారాలూ చేయలేం. మా బిజినెస్‌కు ఏమైతే అనుకూలమో వాటినే చేస్తాం’ అని వివరించారు. అడ్వాన్స్‌ నావిగేషన్‌ అండ్‌ సోలార్‌ టెక్నాలజీస్‌ కొనుగోలుతో పతంజలి.. సోలార్‌ ఎక్విప్‌మెంట్‌ మాన్యుఫాక్చరింగ్‌ రంగంలోకి ఎంట్రీ ఇచ్చిన విషయం తెలిసిందే. అలాగే ఎడిబుల్‌ ఆయిల్‌ తయారీ కంపెనీ రుచి సోయా ఇండస్ట్రీస్‌ కొనుగోలు రేసులోనూ ముందుంది. ఆఫర్‌ ధరను రూ.4,300 కోట్లకు పెంచింది. ఇది అదానీ గ్రూప్‌ ఆఫర్‌ కంటే 30 శాతం అధికం. ఈ  ఆఫర్లపై చర్చించడానికి రుచి సోయా రుణ దాతల కమిటీ రేపు(బుధవారం) సమావేశం కావచ్చు. పతంజలి ప్రధాన బిజినెస్‌ ప్యాకేజ్డ్‌ కన్సూమర్‌ గూడ్స్‌. కంపెనీకి రిటైల్, ఎడ్యుకేషన్, హెల్త్‌కేర్‌ (ఆయుర్వేద్‌) విభాగాల్లోనూ కార్యకలాపాలున్నాయి. కంపెనీ షాంపు, టూత్‌పేస్ట్‌ నుంచి బిస్కట్లు, నూడిల్స్, బియ్యం, గోధుమ వరకు చాలా ప్రొడక్టులను విక్రయిస్తోంది. ఇతర విభాగాల్లోకి ఎందుకంటే.. పతంజలి ఆదాయాల వృద్ధి రేటు నిలిచిపోయింది. రెట్టింపు అమ్మకాలను లక్ష్యంగా నిర్దేశించుకున్నప్పటికీ పెద్ద నోట్ల రద్దు, జీఎస్‌టీ వంటి అంశాల కారణంగా కంపెనీకి సవాళ్లు ఎదురయ్యాయి. దీంతో 2017–18 ఆర్థిక సంవత్సరంలో కంపెనీ ఆదాయం దాదాపు 2016–17 ఏడాది మాదిరిగానే ఉంది. 2017 మార్చి 31తో ముగిసిన ఆర్థిక సంవత్సరంలో కంపెనీ ఆదాయం రూ.10,561 కోట్లు. అందుకే పతంజలి డైవర్సిఫికేషన్‌కు ప్రాధాన్యమిస్తోందని మార్కెట్‌ విశ్లేషకులు అభిప్రాయపడ్డారు. మరోవైపు బీ2బీ, బీ2సీ వ్యాపారాల మధ్య చాలా వ్యత్యాసాలుంటాయని విశ్లేషకులు హెచ్చరిస్తున్నారు. ఇవీ... సిమ్‌ కార్డు విశేషాలు ♦ తొలిదశలో పతంజలి ఉద్యోగులు, కార్యాలయ సిబ్బందే స్వదేశీ సమృద్ధి సిమ్‌ కార్డుల ప్రయోజనాలను పొందగలరు. ఈ స్కీమ్‌ గనక విజయవంతమైతే... వీటిని సామాన్య ప్రజలకూ అందుబాటులోకి తీసుకొస్తామని ట్విట్టర్, ఫేస్‌బుక్‌ ద్వారా సంస్థ తెలిపింది. ♦ స్వదేశీ సమృద్ధి సిమ్‌ కార్డుల ద్వారా అర్జించిన లాభాలను దేశ ప్రజల సంక్షేమానికి వినియోగిస్తామని పతంజిలి పేర్కొంది. ♦ సిమ్‌ కార్డులను పూర్తిస్థాయిలో మార్కెట్‌లోకి తెచ్చిన తర్వాత.. స్వదేశీ సమృద్ధి సిమ్‌ కార్డ్‌ తీసుకున్నవారు పతంజలి ప్రొడక్టులపై 10 శాతం డిస్కౌంట్‌ పొందొచ్చని ‘ఏఎన్‌ఐ’ వార్తా సంస్థ తెలిపింది. అలాగే ఆరోగ్య, ప్రమాద, జీవిత బీమా ప్రయోజనాలూ ఉంటాయి. ♦ స్వదేశీ సమృద్ధి సిమ్‌ కార్డ్‌పై రూ.144 రీచార్జ్‌తో అపరిమిత కాల్స్, 2 జీబీ డేటా, 100 ఎస్‌ఎంఎస్‌లు పొందొచ్చు. ఈ ప్యాక్‌ వాలిడిటీ మాత్రం వెల్లడి కాలేదు. ♦ బీఎస్‌ఎన్‌ఎల్‌కు చెందిన ఐదు లక్షల కౌంటర్ల ద్వారా త్వరలో వినియోగదారులు పతంజలి సిమ్‌ కార్డులను పొందొచ్చని రాందేవ్‌ బాబా చెప్పినట్లు ఏఎన్‌ఐ తెలిపింది. 


 సిమ్‌కార్డు.. ఓ నిండు ప్రాణాన్ని బలికోరింది. మిత్రుడే కదా అని సిమ్‌కార్డు ఇచ్చిన పాపానికి.. చివరకు అతని ప్రాణం తీశారు. ఓ హత్య కేసు నుంచి తప్పించుకునే క్రమంలో నిందితులు మరో హత్య చేశారు. ఇలా తప్పు మీద తప్పు చేసినా.. చట్టం నుంచి తప్పించుకోలేకపోయారు. చివరకు పోలీసుల వలలో చిక్కి కటకటాలు లెక్కిస్తున్నారు. బళ్లారి ఎస్పీ ఆర్‌.చేతన్‌ విలేకరులకు ఆదివారం తెలిపిన వివరాల మేరకు...  
 
 - తన భార్యను వేధిస్తున్నాడంటూ కాంట్రాక్టర్‌పై పగపెంచుకున్న రిజర్వ్‌ హెడ్‌ కానిస్టేబుల్‌
 - పార్టీకి పిలిచి ఇతర కేసుల ‘నిందితుడి’తో కలసి హతమార్చిన వైనం
 - ఆ కేసు నుంచి తప్పించుకునే క్రమంలో సిమ్‌కార్డు ఇచ్చిన పాపానికి స్నేహితుడినే చంపిన ‘నిందితుడు’
 
 బళ్లారి (కర్ణాటక) : పుట్లూరులోని జిల్లా పరిషత్‌ ఉన్నత పాఠశాల తరగతి గదిలో పెరవలి శేఖర్‌(27)ను హత్య చేసి, ఆపై మృతదేహాన్ని కాల్చివేసిన కేసులో అదే గ్రామానికి చెందిన జయరాంను కర్ణాటక రాష్ట్రం బళ్లారి పోలీసులు అరెస్టు చేశారు. శేఖర్‌, జయరాం ఇద్దరిదీ పుట్లూరు కాగా, వారిద్దరూ మంచి స్నేహితులు కూడా. బళ్లారిలో ఉంటున్న ప్రకాశం జిల్లా గిద్దలూరు తాలూకా అలసందపల్లికి చెందిన పుల్లారెడ్డి తనయుడు కాంట్రాక్టర్‌ వెంకటరామిరెడ్డి(42)ను హత్య చేయాలని అనంతపురానికి చెందిన రిజర్వ్‌ హెడ్‌కానిస్టేబుల్‌ శ్రీనివాసరెడ్డి కుట్రపన్నాడు. అందుకు జయరాం సహకారం కోరాడు. పథకం అమలులో భాగంగా కొత్త సిమ్‌ తీసుకురావాలని జయరాంను శ్రీనివాసరెడ్డి కోరాడు. దీంతో శేఖర్‌ పుట్లూరుకు వచ్చి శేఖర్‌ను కలిశాడు. తమ మధ్య ఉన్న స్నేహంతో మిత్రుడు కోరిన వెంటనే శేఖర్‌ తన సిమ్‌ కార్డును జయరాంకు ఇచ్చాడు. దాన్ని బళ్లారికి తీసుకెళ్లి శ్రీనివాసరెడ్డికి అందజేశాడు.
 
 భార్యను వేధిస్తున్నాడని కాంట్రాక్టర్‌పై పగ
 కాంట్రాక్టర్‌ వెంకటరామిరెడ్డికి అనంతపురానికి చెందిన రిజర్వ్‌ హెడ్‌కానిస్టేబుల్‌ శ్రీనివాసరెడ్డి దగ్గరి బంధువు. శ్రీనివాసరెడ్డి బళ్లారిలో వివాహం చేసుకున్నాడు. హైదరాబాద్‌లోని ఏపీ సీఎం చంద్రబాబునాయుడు నివాసంలో సెక్యూరిటీ విభాగానికి బదిలీ అయ్యాడు. దీంతో కాపురాన్ని బళ్లారిలోనే పెట్టి, విధి నిర్వహణ కోసం హైదరాబాద్‌ వెళ్లొచ్చేవాడు. ఈ క్రమంలో శ్రీనివాసరెడ్డి భార్యను వెంకటరామిరెడ్డి తరచూ ఫోన్‌ చేసి వేధించేవాడని ఎస్పీ తెలిపారు. ఈ విషయం తెలిసి రగిలిపోతున్న శ్రీనివాసరెడ్డి ఎలాగైనా వెంకటరామిరెడ్డిని చంపాలని కుట్రపన్నాడు.
 
 పార్టీకి పిలిచి.. కసితీరా చంపి..
 పుట్లూరుకు చెందిన జయరాంతో తెప్పించిన శేఖర్‌ సిమ్‌కార్డుతో గత నెల 29న వెంకటరామిరెడ్డికి శ్రీనివాసరెడ్డి ఫోన్‌ చేసి పార్టీ చేసుకుందాం రమ్మని పిలిచాడు. పీకల దాకా మద్యం తాపించి, గొడవ పెట్టుకున్నాడు. మాటామాట పెరగడంతో బీర్‌ బాటిల్‌తో వెంకటరామిరెడ్డిపై దాడి చేసి చంపేశాడు. అంతటితో అతని కసి తీరకపోవడంతో వెంకటరామిరెడ్డి మృతదేహాన్ని అతని బైక్‌పైనే ఉంచి తగులబెట్టి పరారయ్యారు.
 
 హత్య కేసు నుంచి తప్పించుకునేందుకు మరో హత్య
 వెంకటరామిరెడ్డి హత్య నేపథ్యంలో బళ్లారి పోలీసులు కేసు నమోదు చేసి దర్యాప్తు చేపట్టారు. శ్రీనివాసరెడ్డి ఉపయోగించిన సిమ్‌కార్డు ఆధారంగా పోలీసులు విచారణ మొదలుపెట్టారు. ఆ సిమ్‌ పుట్లూరుకు చెందిన శేఖర్‌ పేరిట నమోదై ఉండడంతో అతని కోసం పుట్లూరుకు వచ్చారు. ఈ విషయం తెలుసుకున్న జయరాం... ఇక అసలు విషయం పోలీసులకు తెలిసిపోతుందని భావించి శేఖర్‌ను పుట్లూరు హైస్కూల్‌ తరగతి గదిలోకి పిలిపించి హతమార్చాడు. ఆ తరువాత ఎవరూ గుర్తు పట్టకుండా ఉండేందుకు మృతదేహంపై పెట్రోల్‌ పోసి తగులబెట్టడం ఈ ప్రాంతంలో తీవ్ర సంచలనం సృష్టించింది. కేవలం వారం రోజుల వ్యవధిలోనే రెండు హత్య కేసుల మిస్టరీని పోలీసులు ఛేదించగలిగారు.


 ‘ప్రీయాక్టివేషన్‌’ దందాకు బ్రేక్‌!
 సుప్రీం కోర్టు కీలక ఆదేశాలు
 సిమ్‌కార్డు తీసుకోవాలంటే  ఆధార్‌ తప్పనిసరి   
 ‘ప్రీ పెయిడ్‌’ పక్కాగా అమలుకు ఆదేశాలు
 కేంద్రానికి ఏడాది గడువు ఇచ్చిన  న్యాయస్థానం
 
 నగరంలో యథేచ్ఛగా లభిస్తున్న ప్రీ–యాక్టివేటెడ్‌ సిమ్‌కార్డుల దుర్వినియోగానికి మచ్చుతునకలివి. పోలీసు రికార్డుల్లోకి కొన్నే ఎక్కుతున్నా... బయటపడని ఉదంతాలు ఎన్నో ఉంటున్నాయి. నేరగాళ్ళతో పాటు అసాంఘికశక్తులు, ఉగ్రవాదులకు కలిసి వస్తున్న ఈ దందాకు ఇకపై చెక్‌ పడనుంది. ఇందుకు సంబంధించి సుప్రీం కోర్టు సోమవారం కీలక ఆదేశాలు జారీ చేసింది. – సాక్షి, సిటీబ్యూరో
 
 సినిమాపై మోజుతో సాయి, రవి, మోహన్‌ అనే యువకులు టెన్త్‌ క్లాస్‌ విద్యార్థి అభయ్‌ను కిడ్నాప్‌ చేయాలని పథకం వేశారు. బేగంబజార్‌ ప్రాంతం నుంచి రెండు ప్రీ–యాక్టివేటెడ్‌ సిమ్‌కార్డులు కొన్నారు. సికింద్రాబాద్‌ రైల్వేస్టేషన్‌ వద్ద మరో రెండు ఖరీదు చేశారు. ఈ సిమ్స్‌ అన్నీ వేరే వ్యక్తుల పేర్లతో, గుర్తింపుతో ఉన్నవే. వీటిని వినియోగించే అభయ్‌ కుటుంబీకులతో బేరసారాలు చేశారు. ఆ కిడ్నాప్, హత్య కేసు దర్యాప్తు క్లిష్టంగా మారడానికి ఈ సిమ్‌కార్డులూ ఓ కారణమే.
 
 జేకేబీహెచ్‌ పేరుతో హైదరాబాద్‌తో పాటు దేశ వ్యాప్తంగా విధ్వంసాలకు కుట్రపన్నిన ఐదుగురు ఉగ్రవాద అనుమానితుల్ని జాతీయ దర్యాప్తు సంస్థ (ఎన్‌ఐఏ) అధికారులు పట్టుకున్నారు. ఈ ముష్కరులు తమ కుట్రలు అమలు చేయడంలో భాగంగా సంప్రదింపులు జరుపుకునేందుకు ప్రీ–యాక్టివేటెడ్‌ సిమ్‌కార్డుల్నే ఆశ్రయించారు. ముఠాలో కీలకంగా వ్యవహరించిన ఫహద్‌ ఈ తరహాకు చెందిన తొమ్మిది సిమ్‌కార్డుల్ని చార్మినార్‌ బస్టాప్‌ ఎదురుగా తాత్కాలికంగా ఏర్పాటు చేసిన ఔట్‌లెట్‌లో ఖరీదు చేసినట్లు ఎన్‌ఐఏ గుర్తించింది.
 
 ఫీల్డ్‌ వెరిఫికేషన్‌నూ పక్కాగా చేయాల్సిందే..
 కేవలం గుర్తింపులు తీసుకుని సిమ్‌కార్డ్స్‌ ఇచ్చే విధానం అమలైనా పూర్తి స్థాయి ఫలితాలు ఉండవన్నది పోలీసుల మాట. ప్రస్తుతం మార్కెట్‌లో అందుబాటులో ఉన్న బోగస్‌ ధ్రువీకరణల్ని తీసుకువచ్చే నేరగాళ్లు వాటి ఆధారంగా సిమ్‌కార్డుల్ని తేలిగ్గా పొందవచ్చని చెప్తున్నారు. ఈ దందాను అరికట్టాలంటే సిమ్‌కార్డ్‌ జారీ తర్వాత, యాక్టివేషన్‌కు ముందు సర్వీస్‌ ప్రొవైడర్లు కచ్చితంగా ఫీల్డ్‌ వెరిఫికేషన్‌ చేసే విధానం ఉండాలని అభిప్రాయపడుతున్నారు. పోస్ట్‌పెయిడ్‌ కనెన్షన్‌ మాదిరిగానే ప్రీ–పెయిడ్‌ను పూర్తిస్థాయిలో వెరిఫై చేసిన తరవాత యాక్టివేట్‌ చేసేలా ఉంటేనే ఫలితాలు ఉంటాయని వివరిస్తున్నారు. సుప్రీం కోర్టు ఆదేశాలను కచ్చితంగా అమలు చేయడంతో పాటు వినియోగదారుడు అందించిన ఆధార్‌ కార్డ్‌ వివరాలు, పూర్వాపరాల ను తనిఖీ చేసే మెకానిజం ఆయా సర్వీస్‌ ప్రొవైడర్లు ఏర్పా టు చేసుకోవాల్సిన అవసరం ఉందని స్పష్టం చేస్తున్నారు.
 
 నిబంధనలు పట్టించుకోని ఔట్‌లెట్స్‌..
 సెల్‌ఫోన్‌ వినియోగదారుడు ఏ సర్వీసు ప్రొవైడర్‌ నుంచి అయినా సిమ్‌కార్డు తీసుకోవాలంటే ఫొటోతో పాటు గుర్తింపు, నివాస ధ్రువీకరణ పత్రాలు తప్పనిసరిగా సమర్పించాల్సి ఉంటుంది. డిపార్ట్‌మెంట్‌ ఆఫ్‌ టెలికమ్యూనికేషన్‌ (డీఓటీ) నిబంధనలు ఈ విషయాన్ని స్పష్టం చేస్తున్నాయి. సిమ్‌కార్డులు దుర్వినియోగం కాకుండా, నేరగాళ్లకు ఉపయుక్తంగా ఉండకూడదనే ఈ నిబంధనల్ని రూపొందించారు. ప్రస్తుతం నగరానికి చెందిన అనేక మంది సిమ్‌కార్డ్స్‌ రిటైలర్లు, తాత్కాలిక ఔట్‌లెట్‌ నిర్వాహకులు తమ దగ్గరకు సిమ్‌కార్డుల కోసం వచ్చే సాధారణ కస్టమర్ల నుంచి గుర్తింపులు తీసుకుని సిమ్‌కార్డు విక్రయిస్తున్నారు. పనిలో పనిగా వారికి తెలియకుండా స్కానింగ్, జిరాక్సు ద్వారా ఆయా గుర్తింపుల్ని పదుల సంఖ్యలో కాపీలు తీస్తున్నారని స్పష్టమవుతోంది. వీటి ఆధారంగా ఒక్కో వినియోగదారుడి పేరు మీద దాదాపు 100 నుంచి 150 సిమ్‌కార్డులు (కనెక్షన్లు) ముందే యాక్టివేట్‌ చేస్తున్నారు. ఇది డీఓటీ నిబంధనలకు పూర్తి విరుద్ధం.
 
 నామ్‌కే వాస్తే చర్యలతో హడావుడి..
 దేశ భద్రతను పెనుముప్పుగా మారడంతో పాటు నేరగాళ్లకు కలిసి వస్తున్న ప్రీ–యాక్టివేటెడ్‌ సిమ్‌కార్డుల వ్యాపారం నగరంలో జోరుగా సాగుతోంది. అభయ్‌ కేసులో నిందితుల్ని అరెస్టు చేసినప్పుడు ఈ వ్యవహారాన్ని సీరియస్‌గా తీసుకుంటామని పోలీసులు ప్రకటించారు. ఆ వ్యవహారాలు సాగిస్తున్న వ్యక్తులు, ముఠాలపై స్పెషల్‌డ్రైవ్స్‌ చేపడతామనీ పేర్కొన్నారు. నాలుగైదు రోజుల పాటు శాంతిభద్రతల విభాగం అధికారులతో పాటు ప్రత్యేక విభాగాలూ రంగంలోకి దిగి, సెల్‌ఫోన్‌ దుకాణాలు, సర్వీస్‌ ప్రొవైడర్లకు చెందిన తాత్కాలిక ఔట్‌లెట్స్‌లో వరుస తనిఖీలు చేశాయి. ఈ ‘స్పెషల్‌ డ్రైవ్‌’లో ఎంతమంది అవకతవకలకు పాల్పడుతున్నట్లు గుర్తించారో తెలియదు కానీ... వారం రోజులకే ఈ విషయాన్ని మర్చిపోవడంతో అక్రమార్కులు తమ దందాను యథేచ్ఛగా కొనసాగిస్తున్నారు.
 
 అనారోగ్యకర పోటీ నేపథ్యంలో..
 సర్వీసు ప్రొవైడర్ల మధ్య ఉన్న అనారోగ్యకర పోటీతో ఈ ప్రీ–యాక్టివేటెడ్‌ సిమ్‌కార్డుల దందా మరింత పెరిగింది. రిటైలర్లతో పాటు సిమ్‌కార్డుల డిస్ట్రిబ్యూటర్లు సైతం ఈ వ్యవహారాన్ని జోరుగా సాగిస్తుండటంతో అనామకులు, నేరగాళ్ల చేతికి సిమ్స్‌ చేరుతున్నాయి. రిటైలర్లు, డిస్ట్రిబ్యూటర్ల నుంచి వచ్చే సిమ్‌కార్డు దరఖాస్తులను పూర్తిస్థాయిలో సరిచూసి, అనుమానాస్పదమైన వాటి యాక్టివేషన్‌ను 24 గంటల్లో కట్‌ చేయాల్సిన బాధ్యత సర్వీస్‌ ప్రొవైడర్లపై ఉన్నప్పటికీ వారు కూడా పట్టించుకోకపోవడమేగాక, టార్గెట్లు ఇచ్చి మరీ ప్రీ–యాక్టివేటెడ్‌ కార్డులు విక్రయానికి ప్రోత్సహిస్తున్నారనే అనుమానం వ్యక్త మవుతున్నాయి. సర్వీసు ప్రొవైడర్ల మధ్య నెలకొన్న అనారోగ్యకర పోటీనే ఇందుకు ప్రధాన కారణంగా కనిపిస్తోంది.
 
 ఏడాది గడువిచ్చిన సుప్రీం కోర్టు..
 దేశంలో సిమ్‌కార్డుల దుర్వినియోగాన్ని పరిగణలోకి తీసుకున్న సుప్రీం కోర్టు సోమవారం కీలక ఆదేశాలు జారీ చేసింది. ప్రతి మొబైల్‌ వినియోగదారులు గుర్తింపును కచ్చితంగా రిజిస్టర్‌ చేసేలా చర్యలు తీసుకోవాలని కేంద్రానికి స్పష్టం చేసింది. పోస్ట్‌ పెయిడ్‌తో పాటు ప్రధానంగా ప్రీ–పెయిడ్‌ కనెక్షన్లు ఇచ్చేందుకు, అవి కలిగి ఉన్న వారికి ఆధార్‌ నమోదు తప్పనిసరి చేయాలని స్పష్టం చేసింది. దుర్వినియోగం ఎక్కువగా ఉన్న నేపథ్యంలో ప్రీ–పెయిడ్‌ కనెక్షన్ల విషయంలో మరింత జాగ్రత్తగా వ్యవహరించేలా చర్యలు తీసుకోవాలని స్పష్టం చేసింది. కేంద్రానికి ఏడాది గడువు ఇచ్చిన అత్యున్నత న్యాయస్థానం ఈలోపు తమ ఆదేశాలను పక్కాగా అమలు చేయాలని స్పష్టం చేసింది. ఈ పరిణామంతో ప్రీ–యాక్టివేషన్‌ దందాకు పూర్తిస్థాయిలో చెక్‌ పడుతుందని దర్యాప్తు అధికారులు పేర్కొంటున్నారు.
  


 90 శాతం పనిచేయని ఆన్‌లైన్ నెట్‌వర్క్
 2జీ సిమ్ కార్డులను 3జీకి మార్చని వైనం
 వ్యక్తిగత వివరాలు చెప్పడానికి ప్రజల విముఖత
 సర్వే తమవల్ల కాదంటున్న ప్రభుత్వ ఉద్యోగులు
  
 కర్ణుడి చావుకు ఎన్నో కారణాలు అన్నట్లు జిల్లాలో ప్రారంభమైన ప్రజా సాధికార సర్వే (స్మార్ట్ పల్స్ సర్వే)పై అధికారులు చేతులెత్తేశారు. ప్రజలు వివరాలు చెప్పడానికి విముఖత చూపిస్తున్నారు. అసలు వివరాలను నమోదు చేయడానికి ఆన్‌లైన్ నెట్‌వర్క్ సరిగా రావడంలేదు. ఇలా చెప్పుకుంటూ వెళితే చాలానే ఉన్నాయి. అంతిమంగా సాధికార సర్వే మూన్నాళ్ల ముచ్చటగా తయారవుతోంది.
  
 చిత్తూరు (అర్బన్): జిల్లాలో మూడు రోజుల క్రితమే సాధికార సర్వే ప్రారంభించారు. రాష్ట్రంలోనే చిత్తూరులోనే సర్వేను తొలిసారిగా ప్రారంభించి రికార్డు సృష్టిస్తే.. అంతే వేగంగా అది తమ వల్ల కాదని అధికారులు, సిబ్బంది చేతులెత్తేస్తున్నారు. ప్రతి కుటుంబంలోని వ్యక్తుల వివరాలను నమోదు చేయడానికి ఈనెలాఖరు వరకు తొలి విడత, వచ్చేనెల 6 నుంచి 15 వరకు రెండో విడతగా సర్వే చేయడానికి తేదీలు ఖరారు చేశారు. అయితే ఆది నుంచీ సర్వేపై సరైన అవగాహన కల్పించడంలో అధికార యంత్రాంగం పూర్తిగా విఫలమైంది. వివరాలను నమోదు చేయడానికి 3 వేల మంది సిబ్బందిని నియమించి వారికి ఉన్నతాధికారులు ట్యాబ్‌లు, బయోమెట్రిక్ పరికరాలను అందచేశారు. జిల్లాలోని నివాసాలు, కుటుంబాల సంఖ్య ఆధారంగా 2,745 బ్లాకులుగా విభజించారు. ఒక్కో బ్లాకులో 400 నుంచి 500 కుటుంబాలు ఉంటాయి. అయితే సర్వేకు నియమించిన అధికారులు, సిబ్బందిలో సగం మందికి పైగా ట్యాబ్‌లను ఎలా ఉపయోగించాలో తెలియడంలేదు.
 
 దీనికి తోడు 90 శాతం ట్యాబ్‌లకు గత మూడు రోజుల నుంచి నెట్‌వర్క్ రావడంలేదు. ఇక చిత్తూరు నగరంలో అయితే నిరక్షరాస్యులైన చెత్త ఊడ్చే పారిశుధ్య కార్మికుల చేతికి ట్యాబ్‌లు ఇచ్చి పంపడమే నిదర్శనం. పల్లెల్లో సర్వేకు వెళుతున్న 30 శాతం మంది వీఆర్‌వోలకు ట్యాబ్‌ను ఉపయోగించడం తెలియడంలేదు. దీంతో ఉద్యోగులు ప్రభుత్వ తీరుపై మండిపడుతున్నారు. చేయాల్సిన పనులు వదిలేసి ఏజెన్సీల ద్వారా చేయించుకోవాల్సిన సర్వే పనులను తమకు అంటగట్టడమేంటని ప్రశ్నిస్తున్నారు.
  
 అన్నీ అడ్డకుంలే..
 సర్వే సక్రమంగా సాగకపోవడానికి సాంకేతిక కారణాలే ప్రధానంగా కనిపిస్తున్నాయి. కుటుంబంలోని ప్రతివ్యక్తి ఫోటోను ట్యాబ్‌లో తీసి దాన్ని జియో ట్యాగింగ్ చేయాలి. దీనికి తప్పనిసరిగా 3జీ నెట్‌వర్క్ కావాలి. కానీ 70 శాతం ట్యాబ్‌ల్లో 2జీ నెట్‌వర్క్ ఉండటం వల్ల ఒక్కో కుటుంబానికి గంటల సమయం పడుతోంది. అయినా సరే నెట్‌వర్క్ కనెక్టుకావడంలేదు. 3జీ సిమ్‌కార్డులు అడుగుతుంటే పట్టిం చుకునే దిక్కులేదు. మరోవైపు ప్రజల ఆధార్‌కార్డు, పేర్లు, బ్యాంకు ఖాతాలు అడగడం వరకు బాగానే ఉన్నా.. ఇంట్లో ద్విచక్రవాహ నం, టీవీ, ఫ్రిడ్జ్, కారు, సెల్‌ఫోన్ లాంటి వివరాలను సైతం నమోదు చేయాల్సి ఉండటం తో ప్రజలు ఈ వివరాలను చెప్పడానికి విముఖత చూపిస్తున్నారు. అన్ని వివరాలను చెప్పే స్తే భవిష్యత్తులో సంక్షేమ పథకాలు ఎక్కడ తమకు అందవోనంటూ ఆందోళనకు గురవుతున్నారు. మరోవైపు సర్వే చేసే ఎన్యుమరేట ర్లకు శిక్షణ ఇవ్వడం కూడా తూతూ మంత్రం గానే సాగింది. ఎక్కడా ట్యాబ్‌ను అందరి ముందు తెరచి చూపిస్తూ వివరాలను నమో దు చేయడంపై శిక్షణ ఇవ్వలేదని అధికారులు చెబుతున్నారు. ఈ అవాంతరాలను అధిగమించి జిల్లాలో సాధికార సర్వే నిర్ణీత గడువులోపు పారదర్శకంగా చేయడం అసాధ్యమని అధికారులు, సిబ్బంది పెదవి విరుస్తున్నారు. టీడీపీ నాయకులు, కార్యకర్తలచేత చేయించుకోవాల్సిన సర్వేని ఉద్యోగులకు చేత చేయిస్తున్నారంటూ గుర్రుగా ఉన్నారు.
  


 కస్టమర్ ఫొటో, ఐడీ ప్రూఫ్‌లతో క్లోనింగ్
 ఒకే పేరుతోనే అధికంగా నంబర్లు మంజూరు
 అసాంఘిక కార్యక్రమాలకు ఉపయోగిస్తున్న వైనం
  
 తిరుపతిలో నివాసముంటూ ప్రైవేటు ఉద్యోగిగా పనిచేస్తున్న ఓ వ్యక్తికి ఫోన్ కాల్ వచ్చింది. ఓ ఉద్యోగానికి మిమ్మల్ని ఎంపిక చేశాం.. అధిక మొత్తంలో జీతం వస్తుంది.. కాకపోతే మీరు ముందుగా రూ.50 వేలు నగదు చెల్లించాలని నమ్మబలికారు. చెప్పిన అకౌంట్‌లో నగదును జమచేసి ఫోన్‌చేయగా నెంబర్ స్విచ్ ఆఫ్ వచ్చింది. పోలీసులను ఆశ్రయించగా ఆ నంబర్‌ను వేరే జిల్లాలో మరో వ్యక్తి వాడుతున్నట్టు తేలింది. వ్యాపారులు అదే పేరుపై సిమ్ కేటాయించారని గుర్తించారు.
  
 తిరుపతి మంగళంలో నివాసముంటున్న యువతికి ఓ గుర్తు తెలియని నంబర్ నుంచి అసభ్యకర మెసేజ్‌లు, ఫోన్ కాల్స్ వస్తున్నాయి. బాధితురాలు వీటిపై కుటుంబ సభ్యుల సహకారంతో పోలీసులకు ఫిర్యాదు చేశారు. పోలీసులు  విచారించగా తీరా అది ఓ మహిళదేనని తేలింది. ఎవరో గుర్తుతెలియని వ్యక్తులు ఆమె పేరుతో సిమ్‌కార్డు పొందినట్టు పోలీసులు గుర్తించారు.
 
 ....ఇవన్నీ సిమ్ మాఫియాల కథ.. ఈ తరహా సమస్యలు తరచూ నగరంలో వెలుగులోకి వస్తున్నాయి. 25 నుంచి 30 శాతం మంది ఇలాంటి సమస్యలు ఎదుర్కొంటూనే ఉన్నారు. ఎందుకంటే వారు వాడే సిమ్ కార్డు ఎక్కడైనా నేరం జరిగిన సమయంలో పోలీసులు ఆరా తీస్తే గుట్టు రట్టవుతోంది. అసలు నిందితులు తప్పించుకుంటున్నారు. సిమ్‌వాడుతున్న అమాయకులు పోలీసులకు దొరికి బలైపోతున్నారు.
  
  
 తిరుపతి క్రైం: పెద్దపెద్ద నగరాలకే పరిమితమైన సిమ్‌మాయగాళ్లు ప్రస్తుతం తిరుపతి నగరంలో కూడా విజృంభిస్తున్నారు. ఎలాంటి ప్రూఫ్‌లు అవసరం లేకుండా సిమ్‌కార్డులు అమ్మే దందా జోరుగా సాగుతోంది. సిమ్ కొనుగోలుదారులు ఐడీ ప్రూఫ్‌ను పోర్జరీచేసి సిమ్‌కార్డును యాక్టివేట్ చేసి వ్యాపారులు, డీలర్లు అధిక ధరలకు విక్రయిన్నారు. వివిధ రకాల నెట్‌వర్క్ కంపెనీలకు తమ వ్యాపారులను విస్తృతపరుస్తున్నారు. ఇదే తరహాలో జిల్లావ్యాప్తంగా సాగుతున్నట్టు తెలుస్తోంది.
  
 జోరుగా అమ్మకాలు
 గతంలో కొందరు డీలర్ల వద్దే ఇలాంటి సిమ్‌కార్డులు లభ్యమయ్యేవి. ఇప్పుడు కంపెనీలు విచ్చలవిడిగా ఔట్‌లెట్లు ఏర్పాటుకు అనుమతులివ్వడంతో చిల్లర వ్యాపారులు, ఫ్యాన్సీ షాపులు, రీచార్జ్ కౌంటర్లు, రోడ్లపై టెంట్లల్లో సైతం సిమ్‌కార్డులు అమ్మకాలు జోరుగా సాగుతున్నాయి. ఆయా కంపెనీలు ఎక్కువ సిమ్‌కార్డులు విక్రయించినవారికి రాయితీలు, కానుకలు, ఇన్‌సెన్‌టివ్‌లు, కమీషన్లతో పాటు లక్ష్యాలను నిర్దేశిస్తున్నాయి. వీటికి ఆశపడి ఏజెంట్లు, డీలర్లు అడ్డదార్లు తొక్కుతూ కస్టమర్లను ఇబ్బందిపెడుతున్నారు.
  
 ఎలా జరుగుతోందంటే..
 ఏ కంపెనీ సిమ్ కావాలన్నా ట్రాయ్ నిబంధనల ప్రకారం దరఖాస్తుదారుడి ఐడీ ప్రూఫ్, అడ్రస్ ప్రూఫ్ సమర్పించాల్సి ఉంది. ఇలా సిమ్ కొనుగోలుదారుడు సమర్పించిన జిరాక్స్‌లను పెద్దసంఖ్యలో కాపీచేస్తున్నారు. వాటి ద్వారా సిమ్‌కార్డులను బ్లాక్ చేస్తున్నారు. అనంతరం కాపీ ప్రూఫ్  ద్వారా ఎలాంటి ప్రూఫ్‌లు లేకుండా ఎవరికిపడితే వారికి సిమ్‌లను అధిక ధరలకు విక్రయిస్తున్నారు.
  
 చిక్కుల్లో అమాయకులు
 వ్యాపారుల మితిమీరిన దురాశ వల్ల అమాయకులు చిక్కుల్లో పడుతున్నారు. సిమ్ జారీ అయ్యేది ఒకరిపేరుతో.. దాన్ని వాడేది మరొకరు. వారు సిమ్ కార్డును దుర్వినియోగం చేస్తే అందులో అడ్రస్‌లో ఉన్న వ్యక్తే బాధ్యత వహించాలి. పలు కేసుల్లో ఇలాంటి సంఘటనలు వెలుగులోకి వస్తున్నాయి. ఇలాంటివాటిపై పోలీసుల నిఘా తగ్గడంతో సిమ్ మాయగాళ్లు రెచ్చిపోతున్నారు. ఇప్పటికైనా పోలీసు ఉన్నతాధికారులు వీటిపై దృష్టి సారించాలని జిల్లా ప్రజలు కోరుతున్నారు.
  
  


 టీవీలో ఎన్నికల ఫలితాలు వస్తున్నాయి.. కేరళలో ఎల్డీఎఫ్ అధికారంలోకి వస్తోంది.. ఆ విషయం గురించి 16 ఏళ్ల అస్వతి అనే అమ్మాయి తన తల్లిదండ్రులతో చర్చిస్తోంది. ఫలితాల గురించిన చర్చ కాస్త వేడెక్కింది.. అంతలో ఆమె తన చేతిలో పట్టుకుని ఉన్న సిమ్‌కార్డును కాస్తా గుటుక్కున మింగేసింది!! దాంతో ఆమె తల్లిదండ్రులు ఆమెకు పళ్లు, పీచు పదార్థాలు పెట్టారు. ఎలాగోలా సిమ్ కార్డు బయటకు వస్తుందన్న ఆలోచనతో అలా చేసినా, ఫలితం కనిపించలేదు.
 
 కాసేపటి తర్వాత ఆమెకు శ్వాస తీసుకోవడం ఇబ్బందిగా మారడంతో వెంటనే ఆస్పత్రికి తీసుకెళ్లగా అక్కడ సీటీ స్కాన్ చేశారు. అందులో.. ఆ సిమ్ కార్డు ఆమె ఊపిరి తిత్తుల్లో ఇరుక్కున్నట్లు కనిపించింది. దాంతో వైద్యులు ఆమెకు ఆపరేషన్ చేసి సిమ్ కార్డు బయటకు తీశారు. సోమవారం నాడు అస్వతిని ఆస్పత్రి నుంచి డిశ్చార్జి చేశారు. వైద్యులు సీటీ స్కాన్ తీయకపోతే ఆమె ప్రాణాలు కూడా కోల్పోయేది.


 ముకేశ్ అంబానీ సారథ్యంలోని రిలయన్స్ జియో త్వరలోనే దేశవ్యాప్తంగా తన 4జి టెలికాం సేవలు ప్రారంభించేందుకు సిద్ధమవుతోంది. గత మూడునెలలుగా రిలయన్స్ గ్రూప్ ఉద్యోగులు, వారి స్నేహితులు వినియోగిస్తున్న ఈ జియో సిమ్‌ను త్వరలో వినియోగదారులకు  అందుబాటులోకి తేనున్నట్టు సంస్థ ప్రకటించింది. ఇప్పటికే రిలయన్స్ డిజిటల్ స్టోర్స్‌కు సిమ్ కార్డులు కూడా పంపించినట్టు ప్రముఖ బ్రోకరేజ్ సంస్థ క్రెడిట్ స్విస్ తెలిపింది.
  
 రూ.  200 ఖరీదు చేసే ఈ సిమ్ ద్వారా 75జీబీ 4జి డేటాతో పాటుగా 4500 నిమిషాలు ఫ్రీ కాల్స్ ఆఫర్  ఇస్తోంది. అయితే ఈ సిమ్ కార్డు  అమ్మకాలు ఎప్పటి నుంచి.. టారిఫ్  వివరాలేంటనే వివరాలు ఒక్కసారి చూద్దాం..
 
 రిలయన్స్ జియో 4జి సిమ్ కార్డు ధర ప్రారంభంలో రూ. 200 ఉంటుంది. ఖాతాదారులు మూడు నెలల పాటు ఈ సిమ్ ద్వారా ఉచితంగా వాయిస్, డేటా సేవలు పొందవచ్చు. ఈ సిమ్ కొన్నవారికి మొదటి మూడు నెలలు దాదాపు 75 జిబి 4జీ డేటా, అలాగే 4500 నిమిషాల పాటు మాట్లాడుకునే అవకాశాన్ని సంస్థ కల్పిస్తోంది. లాంచింగ్ ఆఫర్‌గా ఇస్తున్న ఈ సేవలు మూడునెలల పాటు చెల్లుబాటవుతాయి. మరి  తర్వాత టారిఫ్‌ల పరిస్థితి ఏమిటన్న దానిపై కంపెనీ ఇప్పటివరకు స్పష్టత ఇవ్వలేదు. మరోవైపు ఈ  ఆఫర్  రిలయన్స్ హ్యాండ్ సెట్లు కొన్నవారికే ఉంటుందా.. లేక 4జి సేవలను సపోర్టు చేసే ఇతర మొబైల్స్ ఉన్నవారికీ ఈ అవకాశం అందుబాటులో ఉంటుందా అన్నదానిపై స్పష్టత లేదు.
 
 జియో సిమ్ స్టాక్ లు ఇప్పటికే తమకు చేరాయని, కానీ ఎప్పటినుంచి అమ్మకాలు ప్రారంభించేదీ తమకు సమాచారం లేదని సిబ్బంది అంటున్నారు. ముంబైలో స్టోర్లలో సిబ్బందికి, వినియోగదారుల నమోదు డాక్యుమెంటేషన్ తదితరాలపై ఇప్పటికే శిక్షణ ఇచ్చినట్టు క్రెడిట్ స్విస్ తెలిపింది. జియో సిమ్ ల ప్రభావం భారతి ఎయిర్‌టెల్, ఐడియా సెల్యులార్ లాంటి భారత టెలికం ప్రత్యర్థులపై భారీగానే పడనుందనే  అభిప్రాయం వ్యక్తం చేసింది.


 ప్రశ్నిస్తున్న హరినగర్ వాసులు
 సోదాలు చేసిన నగర పోలీసులు
  
 సిటీబ్యూరో:  షాహినాయత్‌గంజ్ పోలీసుస్టేషన్ పరిధి నుంచి పదో తరగతి విద్యార్థి అభయ్‌ను కిడ్నాప్ చేసి దారుణంగా హతమార్చిన కేసులో ముషీరాబాద్ పరిధిలోని హరినగర్ తెరపైకి వచ్చింది. ఈ ఉదంతంలో కిడ్నాపర్లు అభయ్ తండ్రి రాజ్‌కుమార్‌కు ఫోన్ చేసి డబ్బు డిమాండ్ చేయడానికి ‘7842276480’ ఫోన్ నెంబర్ వాడారు. టాటా డొకోమోకు చెందిన ఈ నెంబర్ ‘బి.వీరేష్, 1-7-1022/8/9/బీ, హరినగర్, నియర్ పోచమ్మ టెంపుల్, రామ్‌నగర్, ముషీరాబాద్’ చిరునామాతో రిజిస్టర్ అయి ఉంది. దీంతో ‘సాక్షి’ ఆ ఇంటికి వెళ్లి వీరేష్ కోసం ఆరా తీసింది. ఈ నేపథ్యంలోనే ఇంటి యజమానితో పాటు చుట్టుపక్కల వాళ్లు సైతం అలాంటి పేరు గల వ్యక్తులు ఎవరూ ఇక్కడ లేరని, గతంలోనూ నివసించలేదని స్పష్టం చేశారు. బుధవారం రాత్రి నగర పోలీసులు సైతం వచ్చి సోదాలు చేసి వెళ్లారని వివరించారు. దీంతో కిడ్నాపరుల తప్పుడు వివరాలతో సిమ్‌కార్డు తీసుకుని ఉంటారని పోలీసులు చెప్తున్నారు.
 
 సిమ్‌కార్డ్ ఔట్‌లెట్స్‌పై దాడులు...
 అభయ్‌ను కిడ్నాప్ చేసిన దుండగులు ఈ కుట్రను అమలు చేయడానికి బోగస్ వివరాలతో తీసుకున్న సిమ్‌కార్డులు వినియోగించినట్లు తేలింది. ఇలాంటి సిమ్‌కార్డుల్ని ఎక్కువ ధరకు విక్రయిస్తున్న దుకాణాలతో పాటు నిందితులు సిమ్స్ ఖరీదు చేసిన దుకాణాన్నీ పోలీసుల గుర్తించారు. దీంతో నగర టాస్క్‌ఫోర్స్ పోలీసులు శుక్రవారం రాత్రి సికింద్రాబాద్‌లోని కొన్ని దుకాణాలపై దాడులు చేశారు. నలుగురిని అదుపులోకి తీసుకున్న పోలీసులు వీరిలో దుండగులకు సిమ్‌కార్డులు అమ్మిన వారు ఎవరనేది ఆరా తీస్తున్నారు.