సాక్షి క్రీడా విభాగం: ‘మేం వచ్చేసారి బలంగా తిరిగొస్తాం... అభిమానులకు ఇదే నా సందేశం’... గత ఏడాది ఐపీఎల్‌లో చెత్త ప్రదర్శనతో ఏడో స్థానంలో నిలిచిన తర్వాత ధోని చేసిన వ్యాఖ్య ఇది. జట్టుపై, తనపై ఎంత నమ్మకముంటే ధోని ఇలాంటి మాటలు చెప్పగలడు. ఎందుకంటే అతను ధోని కాబట్టి! చూస్తుంటే టీమ్‌ పరిస్థితి గొప్పగా ఏమీ లేదు. వయసు పెరిగిపోయి, ఫామ్‌ కోల్పోయి తంటాలు పడుతున్న ఆటగాళ్లతో ఈసారే కాలేదు, వచ్చే ఏడాది ఏమవుతుంది అని అన్ని వైపుల నుంచి వ్యంగ్య స్పందనలు. కానీ ఇలాంటి స్థితి నుంచి టీమ్‌ను నిజంగా విజేతగా నిలపడం అంటే అసాధారణం.  సీఎస్‌కేకు తొలి సీజన్‌ నుంచి కర్త, కర్మ, క్రియ అన్నీ ధోనినే. జట్టు గెలిచినా, ఓడినా, చాంపియన్‌షిప్‌లు సాధించినా అంతా అతని సారథ్యం అనడంలో సందేహం లేదు. టీమ్‌ మేనేజ్‌మెంట్‌ కూడా ఇదే నమ్మింది. ఇన్నేళ్ల విజయాల్లో భిన్న ఆటగాళ్లు తమదైన పాత్ర పోషించారు. కానీ మారనిది ధోని, అతని వ్యూహ చతురతే! సరిగ్గా చెప్పాలంటే ఈ సీజన్‌లో 40 ఏళ్ల ధోని బ్యాటింగ్‌ చూస్తే సూపర్‌ కింగ్స్‌ పది మంది ఆటగాళ్లు, ఒక కెప్టెన్‌తో ఆడినట్లు ఉంది. కేవలం నాయకత్వం కారణంగానే అతను టీమ్‌లో ఉన్నాడనేది వాస్తవమైతే అతను నాయకుడిగా ఉన్నాడు కాబట్టే టీమ్‌ ఇలా పురోగమించిందనేది కూడా అంతకంటే వాస్తవం!   చెన్నై టీమ్‌లో ఐదుగురు ఆటగాళ్లు 35 ఏళ్లకు పైబడిన వారు ఉన్నారు. టి20లు అనగానే ఈ విషయంలో కాస్త సంశయం కనిపిస్తుంది. అయితే బరిలోకి దిగి అద్భుతాలు చేసేందుకు వారికి వయసు అడ్డు రాలేదు. వీరంతా టీమ్‌ విజయాల్లో కీలకపాత్ర పోషించారు. 37 ఏళ్ల డు ప్లెసిస్‌ ఏకంగా 633 పరుగులతో సత్తా చాటి ఓపెనర్‌గా శుభారంభాలు అందించాడు. 38 ఏళ్ల బ్రావో 14 కీలక వికెట్లు తీసి తాను చెన్నై బృందంలో సుదీర్ఘ కాలంగా ఎందుకు కొనసాగుతున్నాడో చూపించాడు. 34 ఏళ్ల సీనియర్, అత్యంత విజయవంతమైన చెన్నై ఆటగాడు సురేశ్‌ రైనా ఫామ్‌ కోల్పోయి తంటాలు పడుతుంటే మరో 35 ఏళ్ల రాబిన్‌ ఉతప్పను తుది జట్టులోకి తీసుకొని చేసిన వ్యూహం సూపర్‌గా పేలింది. తొలి క్వాలిఫయర్‌లో మెరుపు బ్యాటింగ్‌ చేసిన ఉతప్ప, ఫైనల్లో జట్టు ఒత్తిడిలోకి వెళుతున్న సమయంలో 3 సిక్సర్లతో ఆట మార్చేశాడు. 36 ఏళ్ల రాయుడు కూడా కీలక సమయంలో రెండు అర్ధ సెంచరీలతో తనపై ఉంచిన నమ్మకాన్ని నిలబెట్టాడు. ఇక ఐపీఎల్‌ గెలిచిన తొలి ఇంగ్లండ్‌ ఆటగాడిగా నిలిచిన 34 ఏళ్ల మొయిన్‌ అలీని కూడా ధోని సమర్థంగా వాడుకున్నాడు. బ్యాటింగ్, బౌలింగ్‌లతో పాటు అతని చక్కటి ఫీల్డింగ్‌ జట్టుకు ఎంతో పనికొచ్చాయి. ఎప్పటిలాగే రవీంద్ర జడేజా తనదైన శైలిలో అన్ని రంగాల్లో రాణించడం చెన్నై బలాన్ని పెంచింది. ఇక టీమ్‌ ప్రస్థానంలో చెప్పుకోదగ్గ పేరు రుతురాజ్‌ గైక్వాడ్‌. గత ఏడాది ఐపీఎల్‌ సమయంలో అనూహ్యంగా కరోనా బారిన పడి కోలుకున్న తర్వాత ఆరంభంలో విఫలమైనా... చివరి మ్యాచ్‌లలో సత్తా చాటాడు. ఈసారి తనలోని పూర్తి స్థాయి ఆటను చూపిస్తూ సెంచరీ సహా 635 పరుగులు సాధించడం చెన్నై టైటిల్‌ విజయంలో కీలకంగా మారింది. వీరందరినీ సమర్థంగా వాడుకుంటూ ధోని నడిపించిన తీరు నాయకుడిగా అతని వన్నె ఏమాత్రం తగ్గలేదని నిరూపించింది. చివరగా... వచ్చేసారి ఐపీఎల్‌లో మెగా వేలం ఉన్న నేపథ్యంలో ఇంకా నియమ నిబంధనలు ఏమిటనేది బీసీసీఐ ఇంకా స్పష్టం చేయలేదు. అయితే విజేతలుగా నిలిచిన ఈ టీమ్‌లోని సభ్యుల్లో కూడా ఎంత మంది మళ్లీ ఐపీఎల్‌లో కనిపిస్తారనేది వేర్వేరు కారణాలతో సందేహమే. ఒకవేళ ఆడినా ఇదే సక్సెస్‌ఫుల్‌ టీమ్‌ ఒక్క చోటికి చేరడం సహజంగానే కష్టం. ఈ నేపథ్యంలో వీరు సాధించిన విజయపు ఘనత చిన్నదేమీ కాదు. చెన్నై ఫ్యాన్స్‌ మాత్రమే కాదు, సగటు క్రికెట్‌ అభిమాని కూడా... ఏం ఆడిందిరా ఈ టీమ్‌ అనేలా ఘనంగా చెన్నై ముగింపు పలికింది.  


 ►టాస్ గెలిచి ఫీల్డింగ్ ఎంచుకున్న రైజింగ్ పుణే
 కోల్ కతా: ఐపీఎల్ లో భాగాంగా కోల్ కతా ఈడేన్ గార్డెన్స్ లో జరగతున్న మ్యాచ్ లో రైజింగ్ పుణే టాస్ గెలిచి ఫీల్డింగ్ ఎంచుకుంది.  ఈ మ్యాచ్ కు కోల్ కతా బ్యాట్స్ మన్ రాబిన్ ఊతప్ప దూరమయ్యాడు. ఇతని స్థానంలో సూర్యకుమార్ యాదవ్ జట్టులోకి వచ్చాడు. హైదరాబాద్ తో ఓడిన కోల్ కతా నైట్ రైడర్స్ ఈ మ్యాచ్ గెలిచి ప్లే ఆఫ్ బెర్త్ ను ఖాయం చేసుకోవాలని భావిస్తుంది.
 ఓవరాల్‌గా పది మ్యాచ్‌లాడిన కోల్‌కతా ఏడు మ్యాచ్‌ల్లో విజయం సాధించి మూడింటిలో ఓడిపోయింది.  దీంతో 14 పాయింట్లతో ముంబై ఇండియన్స్‌ తర్వాత పట్టికలో రెండోస్థానంలో కొనసాగుతోంది. ఈ మ్యాచ్ లో ఇక గత మ్యాచ్ లో బెన్ స్టోక్స్ దూకుడు బ్యాటింగ్ తో గట్టెక్కిన రైజింగ్ పుణే జట్టులో ఎలాంటి మార్పులు లేకుండా బరిలోకి దిగుతుంది. కోల్ కతా తో నెగ్గి ప్రథమార్థంలో ఓటమికి ప్రతీకారం తీసుకోవాలని భావిస్తుంది.
  
 ►తుది జట్లు
 కోల్ కతా నైట్ రైడర్స్:సునీల్ నరైన్, గంభీర్ (కెప్టెన్), మనీష్ పాండే, యూసఫ్ పఠాన్, సూర్యకుమార్ యాదవ్, జాక్సన్, డి గ్రాండ్ హోమ్, క్రిస్ వోక్స్, కౌల్టర్ నైల్, ఉమేశ్ యాదవ్, కుల్దీప్ యాదవ్.
 రైజింగ్ పుణే: రహానే, రాహుల్ త్రిపాఠి, స్టీవ్ స్మిత్ (కెప్టెన్), ఎంఎస్ ధోని, బెన్ స్టోక్స్, తివారీ, క్రిస్టియన్, వాషింగ్టన్ సుంధర్, తాకుర్, ఉనాద్కత్, ఇమ్రాన్ తాహీర్,


 ► కోల్‌కతాపై విజయం  దినేశ్ కార్తీక్ అర్ధ సెంచరీ 
 ► వరుస పరాజయాలకు బ్రేక్
 
 కోల్‌కతా: వరుసగా మూడు పరాజయాలతో కుదేలైన గుజరాత్ లయన్స్ ఎట్టకేలకు పంజా విసిరింది. కోల్‌కతా నైట్‌రైడర్స్‌ను వారి సొంతగడ్డపైనే ఓడించి తిరిగి టాప్ పొజిషన్‌కు చేరుకుంది. ముందుగా బౌలర్లు అద్భుతంగా రాణించి ప్రత్యర్థిని ఓ మాదిరి స్కోరుకే కట్టడి చేయగా అనంతరం బ్యాట్స్‌మెన్ మిగతా పని కానిచ్చారు. ఫలితంగా ఆదివారం ఈడెన్ గార్డెన్స్‌లో జరిగిన ఈ మ్యాచ్‌లో లయన్స్ ఐదు వికెట్ల తేడాతో నెగ్గింది. టాస్ ఓడి బ్యాటింగ్ దిగిన కోల్‌కతా నైట్‌రైడర్స్ 20 ఓవర్లలో 4 వికెట్లకు 158 పరుగులు చేసింది. షకీబ్ హసన్ (49 బంతుల్లో 66 నాటౌట్; 4 ఫోర్లు; 4 సిక్సర్లు), యూసుఫ్ పఠాన్ (41 బంతుల్లో 63 నాటౌట్; 7 ఫోర్లు; 1 సిక్స్) అజేయ అర్ధ సెంచరీలు చేశారు. ‘మ్యాన్ ఆఫ్ ది మ్యాచ్’ ప్రవీణ్ కుమార్‌కు రెండు వికెట్లు దక్కాయి. అనంతరం లక్ష్య ఛేదనలో గుజరాత్ లయన్స్ 18 ఓవర్లలో 5 వికెట్లు కోల్పోయి 164 పరుగులు చేసింది. దినేశ్ కార్తీక్ (29 బంతుల్లో 51; 8 ఫోర్లు; 1 సిక్స్) అర్ధసెంచరీకి తోడు చివర్లో ఆరోన్ ఫించ్ (10 బంతుల్లో 29; 3 ఫోర్లు; 2 సిక్సర్లు) తుఫాన్ ఇన్నింగ్స్ ఆడాడు.
 కోల్‌కతా ఇన్నింగ్స్ మొత్తాన్ని యూసుఫ్ పఠాన్, ఆల్‌రౌండర్ షకీబ్ అల్ హసన్ నడిపించారు. ఆరంభంలో బౌన్సీ పిచ్‌ను సద్వినియోగం చేసుకున్న పేసర్ ప్రవీణ్ కుమార్ రెండో ఓవర్‌లో గంభీర్ (5), మనీష్ పాండేను పెవిలియన్‌కు పంపి షాక్ ఇచ్చాడు. ఆ తర్వాత రాబిన్ ఉతప్ప (10 బంతుల్లో 14; 3 ఫోర్లు)... రైనా సూపర్ క్యాచ్‌తో సూర్యకుమార్ యాదవ్ (4) కూడా అవుట్ కావడంతో పవర్‌ప్లేలో కోల్‌కతా 28 పరుగులకే నాలుగు వికెట్లు కోల్పోయింది. ఈ దశలో షకీబ్, యూసుఫ్ జోడి జట్టును అద్భుతంగా ఆడి ఆదుకుంది. ఎలాంటి నిర్లక్ష్యపు షాట్లకు పోకుండా అడపాదడపా బౌండరీలు బాదుతూ కోల్‌కతాకు గౌరవప్రద స్కోరును అందించింది.
 అనంతరం బ్యాటింగ్‌కు దిగిన లయన్స్ తమ తొలి ఓవర్‌లో కేవలం ఒక్క పరుగు మాత్రమే తీసినా ఆ తర్వాత పుంజుకుంది. రెండో ఓవర్‌లో రెండు, మూడో ఓవర్‌లో మూడు ఫోర్లతో గేరు మార్చింది. అయితే పరుగుల కట్టడికి స్పిన్నర్లను బరిలోకి దించి గంభీర్ ఫలితం సాధించాడు. దూకుడు మీదున్న డ్వేన్ స్మిత్ (18 బంతుల్లో 27; 4 ఫోర్లు; 1 సిక్స్)ను షకీబ్ బౌల్డ్ చేయగా... పీయూష్ చావ్లా బౌలింగ్‌లో భారీ షాట్ ఆడిన మెకల్లమ్ (24 బంతుల్లో 29; 3 ఫోర్లు; 2 సిక్సర్లు) క్యాచ్ అవుటయ్యాడు. అయితే తొమ్మిదో ఓవర్‌లో దినేశ్ కార్తీక్ హ్యాట్రిక్ ఫోర్లతో ఒత్తిడి తగ్గించాడు. రైనాతో కలిసి మూడో వికెట్‌కు 49 పరుగులు జత చేశాడు. 27 బంతుల్లో దినేశ్ కార్తీక్ అర్ధ సెంచరీ పూర్తి చేసుకోగా ఫించ్ వచ్చీ రావడంతోనే బౌండరీల వర్షం కురిపించడంతో లక్ష్యం చిన్నదైపోయింది.
  స్కోరు వివరాలు
 కోల్‌కతా నైట్‌రైడర్స్ ఇన్నింగ్స్: ఉతప్ప (సి) దినేశ్ కార్తీక్ (బి) కులకర్ణి 14; గంభీర్ (బి) ప్రవీణ్ 5; మనీష్ పాండే (సి) దినేశ్ కార్తీక్ (బి) ప్రవీణ్ 0; సూర్యకుమార్ యాదవ్ (సి) రైనా (బి) స్మిత్ 4; షకీబ్ నాటౌట్ 66; యూసుఫ్ పఠాన్ నాటౌట్ 63; ఎక్స్‌ట్రాలు 6; మొత్తం (20 ఓవర్లలో నాలుగు వికెట్లకు) 158.
 వికెట్ల పతనం: 1-15, 2-15, 3-21, 4-24.
 బౌలింగ్: ప్రవీణ్ 4-1-19-2; కులకర్ణి 4-0-30-1; స్మిత్ 2-0-14-1; బ్రేవో 4-0-39-0; కౌశిక్ 1-0-14-0; జడేజా 3-0-25-0; తాంబే 2-0-15-0.
 గుజరాత్ లయన్స్ ఇన్నింగ్స్: స్మిత్ (బి) షకీబ్ 27; మెకల్లమ్ (సి) పాండే (బి) చావ్లా 29; రైనా (సి) హాగ్ (బి) రసెల్ 14; దినేశ్ కార్తీక్ (స్టంప్డ్) ఉతప్ప (బి) హాగ్ 51; ఫించ్ (రనౌట్) 29; జడేజా నాటౌట్ 9; బ్రేవో నాటౌట్ 0; ఎక్స్‌ట్రాలు 5; మొత్తం (18 ఓవర్లలో ఐదు వికెట్లకు) 164.
 వికెట్ల పతనం: 1-42, 2-67, 3-116, 4-155, 5-158.
 బౌలింగ్:  రసెల్ 3-0-21-1; మోర్కెల్ 4-0-38-0; షకీబ్ 3-0-38-1; చావ్లా 4-0-30-1; హాగ్ 2-0-19-1; ఉమేశ్ 2-0-18-0.


 ► పంజాబ్‌పై ఏడు పరుగులతో నైట్ రైడర్స్‌విజయం
 ► ఉతప్ప, గంభీర్ అర్ధసెంచరీలు
 ► బంతితో మెరిసిన రసెల్
  
 అద్భుతమైన ఫామ్‌లో ఉన్న గంభీర్, ఉతప్పల క్లాసికల్ అర్ధసెంచరీలు... ఆండ్రీ రసెల్ సంచలన బౌలింగ్‌తో సొంతగడ్డపై కోల్‌కతా నైట్‌రైడర్స్ మరో విజయం సాధించింది. సీజన్‌లో తొలిసారి మ్యాక్స్‌వెల్ మెరిసినా పంజాబ్ రాత  మారలేదు. ఆడిన తొమ్మిది మ్యాచ్‌ల్లో ఆరింటిలో గెలిచిన నైట్‌రైడర్స్ పాయింట్ల పట్టికలో అగ్రస్థానానికి చేరింది.
  
  
 కోల్‌కతా: ‘సూపర్ మ్యాన్’ ఆండ్రీ రసెల్ కోల్‌కతా నైట్‌రైడర్స్ ఖాతాలో మరో విజయాన్ని చేర్చాడు. ఈసారి అద్భుతమైన బౌలింగ్‌తో పాటు మైదానం అంతా పాదరసంలా క దిలి ఫీల్డింగ్‌తోనూ ఆకట్టుకున్నాడు. రసెల్ (4/ 20) సంచలన బౌలింగ్ ప్రదర్శనతో కోల్‌కతా నైట్‌రైడర్స్ ఏడు పరుగులతో పంజాబ్ కింగ్స్ ఎలెవన్‌పై విజయం సాధించింది. ఈడెన్ గార్డెన్స్‌లో బుధవారం జరిగిన మ్యాచ్‌లో టాస్ గెలిచిన పంజాబ్ ఫీల్డింగ్ ఎంచుకోగా... కోల్‌కతా నైట్‌రైడర్స్ 20 ఓవర్లలో మూడు వికెట్లకు 164 పరుగులు చేసింది. ఓపెనర్లు ఉతప్ప (49 బంతుల్లో 70; 6 ఫోర్లు, 2 సిక్సర్లు), గంభీర్ (45 బంతుల్లో 54; 6 ఫోర్లు, 1 సిక్సర్) అర్ధ సెంచరీలు సాధించి... తొలి వికెట్‌కు 81 బంతుల్లో 101 పరుగులు జోడించారు. యూసుఫ్ పఠాన్ (16 బంతుల్లో 19 నాటౌట్; 1 సిక్సర్), రసెల్ (10 బంతుల్లో 16; 1 ఫోర్, 1 సిక్సర్) స్లాగ్ ఓవర్లలో ఆశించిన స్థాయిలో ఆడలేకపోయారు.
 
 
 పంజాబ్ కింగ్స్ ఎలెవన్ 20 ఓవర్లలో 9 వికెట్లకు 157 పరుగులు మాత్రమే చేసి ఓడిపోయింది. మ్యాక్స్‌వెల్ (42 బంతుల్లో 68; 6 ఫోర్లు, 4 సిక్సర్లు), అక్షర్ పటేల్ (7 బంతుల్లో 21; 1 ఫోర్, 2 సిక్సర్లు) మినహా అందరూ విఫలమయ్యారు. తన నాలుగు ఓవర్లలో 15 డాట్ బాల్స్ వేసిన రసెల్ నాలుగు వికెట్లు తీయగా... పీయూష్ చావ్లా రెండు వికెట్లు పడగొట్టాడు.
 
 
  ఓపెనర్ల జోరు
 ఈ సీజన్‌లో అద్భుతమైన ఫామ్‌లో ఉన్న కోల్‌కతా ఓపెనర్లు గంభీర్, ఉతప్ప మరోసారి రాణించారు. ఇద్దరూ తమ సహజశైలిలోనే ఆడటంతో అడపాదడపా బౌండరీలు వచ్చినా పవర్‌ప్లేలో 40 పరుగులు మాత్రమే వచ్చాయి. కుదురుకున్నాక ఇద్దరూ చెరో సిక్సర్ కొట్టినా ఎక్కువగా సింగిల్స్‌కే పరిమితమయ్యారు. పది ఓవర్లలో వికెట్ నష్టపోకుండా 74 పరుగులతో కోల్‌కతా పటిష్ట స్థితికి చేరింది. 42 బంతుల్లో అర్ధసెంచరీ సాధించిన గంభీర్...  ఆ తర్వాతి ఓవర్లోనే రనౌట్‌గా వెనుదిరిగాడు.
 
 గత మ్యాచ్‌లో అద్భుత ఇన్నింగ్స్ ఆడిన యూసుఫ్ పఠాన్‌తో కలిసి ఉతప్ప ఇన్నింగ్స్‌లో వేగం పెంచే ప్రయత్నం చేశాడు. 38 బంతుల్లో అర్ధసెంచరీ చేసిన ఉతప్ప... జోరు పెంచి ఓ సిక్సర్, ఫోర్ కొట్టినా రనౌట్‌గా వెనుదిరిగాడు. ఆ తర్వాత  రసెల్ క్రీజులోకి వచ్చినా... పఠాన్, రసెల్ జోడీని పంజాబ్ బౌలర్లు నియంత్రించారు. స్లాగ్ ఓవర్లలో సందీప్ శర్మ, మోహిత్ శర్మ అద్భుతంగా యార్కర్లు సంధించడంతో భారీగా పరుగులు రాలేదు. ఇన్నింగ్స్ చివరి బంతికి రసెల్ రనౌట్ అయ్యాడు.
 
 
  మ్యాక్స్‌వెల్ పోరాడినా...
  పంజాబ్ ఇన్నింగ్స్ తొలి ఓవర్లోనే స్టోయినిస్ అవుటయ్యాడు. వోహ్రా, కెప్టెన్ విజయ్ కూడా వరుస బంతుల్లో అవుట్ కావడంతో పంజాబ్ 13 పరుగులకే టాపార్డర్ మూడు వికెట్లు కోల్పోయింది. సాహా, మ్యాక్స్‌వెల్ చెరో రెండు ఫోర్లు కొట్టడంతో పవర్‌ప్లేలో పంజాబ్ 37 పరుగులు చేసింది. సాహా కూడా విఫలం కావడంతో పది ఓవర్లలో 4 వికెట్లకు 64 పరుగులు మాత్రమే చేసింది.ఈ దశలో మ్యాక్స్‌వెల్ బ్యాట్ ఝళిపించాడు. చావ్లా బౌలింగ్‌లో సిక్సర్, ఫోర్... హాగ్ బౌలింగ్‌లో సిక్సర్, రెండు ఫోర్లతో 29 బంతుల్లో అర్ధసెంచరీ పూర్తి చేసుకున్నాడు.
 
 అదే జోరులో మరో ఫోర్, సిక్సర్ కొట్టాక చావ్లా బౌలింగ్‌లో రివర్స్ స్వీప్ ఆడబోయి ఎల్బీగా వెనుదిరిగాడు. అప్పటికి పంజాబ్ విజయానికి 26 బంతుల్లో 45 పరుగులు చేయాలి. ఫామ్‌లో లేని మిల్లర్ మరోసారి నిరాశపరిచినా... రసెల్ బౌలింగ్‌లో రెండు వరుస సిక్సర్లతో అక్షర్ పటేల్ పంజాబ్ ఆశలు సజీవంగా నిలిపాడు. చివరి రెండు ఓవర్లలో విజయానికి 22 పరుగులు అవసరం కాగా... మోర్కెల్ వేసిన 19వ ఓవర్లో  10 పరుగులు వచ్చాయి. ఆఖరి ఓవర్లో రసెల్... అక్షర్‌ను రనౌట్ చేయడంతో పాటు స్వప్నిల్ వికెట్ తీసి కేవలం నాలుగు పరుగులే ఇచ్చి కోల్‌కతా విజయాన్ని పూర్తి చేశాడు.
 
 
  స్కోరు వివరాలు
 కోల్‌కతా నైట్‌రైడర్స్ ఇన్నింగ్స్: ఉతప్ప రనౌట్ 70; గంభీర్ రనౌట్ 54; యూసుఫ్ పఠాన్ నాటౌట్ 19; రసెల్ రనౌట్ 16; ఎక్స్‌ట్రాలు 5; మొత్తం (20 ఓవర్లలో 3 వికెట్లకు) 164.
 
 వికెట్ల పతనం: 1-101; 2-137; 3-164.
 బౌలింగ్: సందీప్ శర్మ 4-0-25-0; మోహిత్ శర్మ 4-0-39-0; స్టోయినిస్ 3-0-26-0; అక్షర్ పటేల్ 4-0-24-0; స్వప్నిల్ సింగ్ 3-0-29-0; గురుకీరత్ 1-0-8-0; మ్యాక్స్‌వెల్ 1-0-11-0.
 
 పంజాబ్ కింగ్స్ ఎలెవన్ ఇన్నింగ్స్: మురళీ విజయ్ (సి) షకీబ్ (బి) మోర్కెల్ 6; స్టోయినిస్ (సి) చావ్లా (బి) రసెల్ 0; వోహ్రా (సి) షకీబ్ (బి) రసెల్ 0; సాహా (బి) చావ్లా 24; మ్యాక్స్‌వెల్ ఎల్బీడబ్ల్యు (బి) చావ్లా 68; మిల్లర్ (సి) సతీశ్ (సబ్) (బి) రసెల్ 13; గురుకీరత్ రనౌట్ 11; అక్షర్ పటేల్ రనౌట్ 21; స్వప్నిల్ సింగ్ ఎల్బీడబ్ల్యు (బి) రసెల్ 0; మోహిత్ శర్మ నాటౌట్ 1; సందీప్ శర్మ నాటౌట్ 1; ఎక్స్‌ట్రాలు 12; మొత్తం (20 ఓవర్లలో 9 వికెట్లకు) 157.
 
 వికెట్ల పతనం: 1-1; 2-13; 3-13; 4-53; 5-120; 6-130; 7-154; 8-155; 9-156.
 బౌలింగ్: రసెల్ 4-0-20-4; మోర్నీ మోర్కెల్ 4-0-27-1; ఉమేశ్ యాదవ్ 3-0-26-0; షకీబ్ 3-0-21-0; పీయూష్ చావ్లా 4-0-27-2; హాగ్ 2-0-28-0.


 ► కోల్‌కతాను గెలిపించిన పఠాన్
 ► 29 బంతుల్లో 60 పరుగులు
 ► రసెల్ ఆల్‌రౌండ్ ప్రదర్శన
 ► మళ్లీ ఓడిన బెంగళూరు
  
 ఒకప్పుడు యూసుఫ్ పఠాన్ అంటే విధ్వంసానికి పక్కా చిరునామా. కానీ చాన్నాళ్లుగా అతని బ్యాట్ మూగబోయింది. అయితే ఇప్పుడు మరోసారి అతనిలోని ‘అసలు మనిషి’ బయటకు వచ్చాడు. ఐపీఎల్ సీజన్ ఆరంభం నుంచి నివురుగప్పిన నిప్పులాగే ఉండిపోయిన అతను, ఇప్పుడు ఒక్కసారిగా మండుతున్న అగ్ని కణికలా మారాడు. అసలు విజయానికి అవకాశం లేని చోట అద్భుత ప్రదర్శనతో కోల్‌కతాను విజయతీరాలకు చేర్చాడు. ఆండ్రీ రసెల్ సహకారం అతని పనిని సులువు చేసింది.
 
 కోల్‌కతా నాలుగో వికెట్ కోల్పోయిన సమయంలో విజయ లక్ష్యం 59 బంతుల్లో 117 పరుగులు... సొంతగడ్డపై బెంగళూరు బౌలర్ల క్రమశిక్షణతో ఇది అసాధ్యంగా కనిపించింది. కానీ పఠాన్, రసెల్ దీనిని సుసాధ్యం చేశారు. వీరిద్దరు ఐదో వికెట్‌కు 44 బంతుల్లోనే 96 పరుగుల జోడించి రాయల్ చాలెంజర్స్‌ను కుమ్మేశారు. ఫలితంగా మరో ఐదు బంతులు మిగిలి ఉండగానే నైట్‌రైడర్స్‌కు విజయం దక్కింది.
 
 బెంగళూరు: కోల్‌కతా నైట్‌రైడర్స్ లక్ష్య ఛేదనలో మరోసారి సత్తా చాటింది. రెండు వరుస పరాజయాల తర్వాత మళ్లీ గెలుపు బాట పట్టింది. ఇక్కడి చిన్నస్వామి స్టేడియంలో సోమవారం జరిగిన లీగ్ మ్యాచ్‌లో కోల్‌కతా 5 వికెట్ల తేడాతో రాయల్ చాలెంజర్స్ బెంగళూరుపై విజయం సాధించింది. టాస్ ఓడి ముందుగా బ్యాటింగ్‌కు దిగిన బెంగళూరు 20 ఓవర్లలో 7 వికెట్ల నష్టానికి 185 పరుగులు చేసింది. విరాట్ కోహ్లి (44 బంతుల్లో 52; 4 ఫోర్లు), కేఎల్ రాహుల్ (32 బంతుల్లో 52; 6 ఫోర్లు, 2 సిక్సర్లు) రాణించగా, చివర్లో వాట్సన్ (21 బంతుల్లో 34; 5 ఫోర్లు, 1 సిక్స్) ధాటిగా ఆడాడు.
 
 అనంతరం యూసుఫ్ పఠాన్ (29 బంతుల్లో 60 నాటౌట్; 6 ఫోర్లు, 3 సిక్సర్లు), ఆండ్రీ రసెల్ (24 బంతుల్లో 39; 1 ఫోర్, 4 సిక్సర్లు) భారీ భాగస్వామ్యం సహాయంతో కోల్‌కతా 19.1 ఓవర్లలో 5 వికెట్లకు 189 పరుగులు చేసింది. గౌతం గంభీర్ (29 బంతుల్లో 37; 4 ఫోర్లు, 1 సిక్స్) ఫర్వాలేదనిపించాడు. ఆల్‌రౌండ్ ప్రదర్శన చేసిన రసెల్‌కు మ్యాన్ ఆఫ్ ది మ్యాచ్ అవార్డు దక్కింది.
 
  రాహుల్ దూకుడు...
  వరుస పరాజయాలతో ఇబ్బంది పడుతున్న బెంగళూరు మళ్లీ గేల్‌ను జట్టులోకి తీసుకుంది. అయితే మోర్నీ మోర్కెల్ వేసిన ఇన్నింగ్స్ రెండో ఓవర్లో భారీ సిక్సర్ కొట్టిన గేల్ (7) తర్వాతి బంతికే అవుటై నిరాశపరిచాడు. కోహ్లి, రాహుల్ నిలదొక్కుకునేందుకు సమయం తీసుకోవడంతో పవర్‌ప్లే ముగిసే సరికి జట్టు 40 పరుగులు మాత్రమే చేయగలిగింది. ఆ తర్వాత వీరిద్దరు వేగం పెంచారు. చావ్లా, నరైన్ బౌలింగ్‌లో రాహుల్ సిక్సర్లు బాది ధాటిని ప్రదర్శించగా, కోహ్లి తన సహజశైలిలో ఆడాడు. 29 బంతుల్లోనే అర్ధ సెంచరీని అందుకున్న రాహుల్, వరుసగా మూడో మ్యాచ్‌లోనూ ఈ ఘనత సాధించాడు.
 
 అయితే ఆ వెంటనే చావ్లా బౌలింగ్‌లో వెనుదిరగడంతో 84 పరుగుల రెండో వికెట్ భాగస్వామ్యానికి తెరపడింది. డివిలియర్స్ (4) కూడా విఫలం కాగా... మరోవైపు 42 బంతుల్లో కోహ్లి అర్ధ సెంచరీ పూర్తయింది. మోర్కెల్ బౌలింగ్‌లో గంభీర్ క్యాచ్ వదిలేసినా, మరుసటి బంతికే రసెల్ అందుకోవడంతో కోహ్లి ఇన్నింగ్స్ ముగిసింది.
 
 
 ఆ మూడు ఓవర్లు...
 17 ఓవర్లు ముగిసేసరికి బెంగళూరు స్కోరు 131/4 మాత్రమే. 160 పరుగులైనా చేయగలదా అనే సందేహం. అయితే ఆ జట్టుకు ‘ఆపద్బాంధవుడి’ రూపంలో కోల్‌కతా బౌలర్ ఉమేశ్ యాదవ్ వచ్చాడు. అతను వేసిన 18, 20 ఓవర్లలో కలిపి బెంగళూరు ఏకంగా 41 పరుగులు రాబట్టింది. 18వ ఓవర్లో సచిన్ బేబీ (8 బంతుల్లో 16) వరుసగా 2 ఫోర్లు, 1 సిక్స్ బాదగా, వాట్సన్ మరో ఫోర్ కొట్టాడు. తన వంతుగా ఉమేశ్ రెండు నోబాల్‌లు, వైడ్ కలిపి మొత్తం 23 పరుగులు సమర్పించుకున్నాడు. చివరి ఓవర్లో స్టువర్ట్ బిన్నీ (4 బంతుల్లో 16) వరుసగా 6, 4, 6 కొట్టడంతో మొత్తం 18 పరుగులు వచ్చాయి. అంతకుముందు రసెల్ వేసిన 19వ ఓవర్లో వాట్సన్ వరుసగా మూడు ఫోర్లతో చెలరేగడంతో ఆర్‌సీబీ 13 పరుగులు సాధించింది. ఈ మూడు ఓవర్లలోనే 54 పరుగులు చేసిన బెంగళూరు ఆఖరి ఐదు ఓవర్లలో ఈ సీజన్‌లో అత్యధిక (73) పరుగులు చేసిన జట్టుగా నిలిచింది. ఐపీఎల్-9లో కరణ్ శర్మ (4 ఓవర్లలో 57) తర్వాత  రెండో చెత్త ప్రదర్శన ఉమేశ్ యాదవ్ (56)దే.
 
 
 మెరుపు భాగస్వామ్యం...
 భారీ లక్ష్యఛేదనలో కోల్‌కతా తడబడింది. తొలి ఓవర్లోనే ఉతప్ప (1)ను బిన్నీ అవుట్ చేసి శుభారంభం అందించగా, లిన్ (15) కూడా ఎక్కువసేపు నిలవలేకపోయాడు. పవర్‌ప్లేలో జట్టు స్కోరు 37 పరుగులకే పరిమితమైంది. అనంతరం షమ్సీ వేసిన ఏడో ఓవర్లో గంభీర్ వరుసగా సిక్స్, ఫోర్ కొట్టడంతో 15 పరుగులు వచ్చాయి. అయితే మూడు పరుగుల వ్యవధిలో గంభీర్, పాండే (8) వెనుదిరగడంతో నైట్‌రైడర్స్ పరిస్థితి ఇబ్బందికరంగా మారింది. అయితే పఠాన్, రసెల్ భాగస్వామ్యం ఆ జట్టును కోలుకునేలా చేసింది. వీరిద్దరు తమదైన శైలిలో భారీ షాట్లతో విరుచుకుపడ్డారు. అప్పటి దాకా చక్కటి బౌలింగ్ చేసిన ఆర్‌సీబీ వీరిని అడ్డుకోవడంలో మాత్రం పూర్తిగా విఫలమయ్యింది. చివర్లో రసెల్ అవుటైనా, సూర్య కుమార్ (10 నాటౌట్) అండతో పఠాన్ మ్యాచ్ ముగించాడు.
 
 
 స్కోరు వివరాలు
 రాయల్ చాలెంజర్స్ బెంగళూరు ఇన్నింగ్స్: లోకేశ్ రాహుల్ (సి) యూసుఫ్ పఠాన్ (బి) చావ్లా 52; గేల్ (సి) ఉతప్ప (బి) మోర్నీ మోర్కెల్ 7; కోహ్లి (సి) రసెల్ (బి) మోర్నీ మోర్కెల్ 52; డివిలియర్స్ (ఎల్బీ) (బి) చావ్లా 4; వాట్సన్ (రనౌట్) 34; సచిన్ బేబీ (సి) అండ్ (బి) రసెల్ 16; బిన్నీ (సి) పాండే (బి) ఉమేశ్ 16; ఆరోన్ (నాటౌట్) 0; ఎక్స్‌ట్రాలు 4; మొత్తం (20 ఓవర్లలో 7 వికెట్లకు) 185.
 
 వికెట్ల పతనం: 1-8; 2-92; 3-109; 4-129; 5-167; 6-184; 7-185.
 
 బౌలింగ్: రసెల్ 4-0-24-1; మోర్నీ మోర్కెల్ 4-0-28-2; నరైన్ 4-0-45-0; ఉమేశ్ 4-0-56-1; చావ్లా 4-0-32-2.
 
 కోల్‌కతా నైట్‌రైడర్స్ ఇన్నింగ్స్: ఉతప్ప (సి) కోహ్లి (బి) బిన్నీ 1; గంభీర్ (ఎల్బీ) (బి) అరవింద్ 37; లిన్ (బి) చహల్ 15; పాండే (సి) సచిన్ (బి) వాట్సన్ 8; యూసుఫ్ పఠాన్ (నాటౌట్) 60; రసెల్ (సి) బిన్నీ (బి) చహల్ 39; సూర్య కుమార్ (నాటౌట్) 10; ఎక్స్‌ట్రాలు 19; మొత్తం (19.1 ఓవర్లలో 5 వికెట్లకు) 189.
 
 వికెట్ల పతనం: 1-6; 2-34; 3-66; 4-69; 5-165.
 బౌలింగ్: బిన్నీ 2-0-17-1; అరవింద్ 2.1-0-16-1; వాట్సన్ 3-0-38-1; చహల్ 4-0-27-2; ఆరోన్ 4-0-34-0; షమ్సీ 4-0-51-0.
  


 ► కోల్‌కతాపై ఢిల్లీ గెలుపు
 ► నాయర్, బిల్లింగ్స్ అర్ధసెంచరీలు
 ► బ్రాత్‌వైట్ ఆల్‌రౌండ్ ప్రదర్శన
 ► ఉతప్ప శ్రమ వృథా
  
 న్యూఢిల్లీ: సీజన్ ఆరంభంలో కోల్‌కతా నైట్‌రైడర్స్ చేతిలో ఎదురైన పరాభావానికి ఢిల్లీ డేర్‌డెవిల్స్ ప్రతీకారం తీర్చుకుంది. ఘనమైన ఆరంభం లభించకున్నా భారీ లక్ష్యాన్ని నిర్దేశించి... అద్భుతమైన బౌలింగ్‌తో జహీర్ ఖాన్ బృందం మ్యాచ్ గెలిచి లెక్క సరిచేసింది. దీంతో ఐపీఎల్-9లో శనివారం జరిగిన లీగ్ మ్యాచ్‌లో ఢిల్లీ డేర్‌డెవిల్స్ 27 పరుగుల తేడాతో కోల్‌కతాపై గెలి చింది. టాస్ గెలిచి కోల్‌కతా ఫీల్డింగ్ ఎంచుకోగా, ఢిల్లీ 20 ఓవర్లలో 8 వికెట్లకు 186 పరుగులు చేసింది. కరుణ్ నాయర్ (50 బంతుల్లో 68; 9 ఫోర్లు, 1 సిక్స్), బిల్లింగ్స్ (34 బంతుల్లో 54; 3 ఫోర్లు, 2 సిక్సర్లు) అర్ధసెంచరీలతో ఆకట్టుకున్నారు. తర్వాత కోల్‌కతా 18.3 ఓవర్లలో 159 పరుగులకు ఆలౌటైంది. రాబిన్ ఉతప్ప (52 బంతుల్లో 72; 6 ఫోర్లు, 2 సిక్సర్లు) మినహా మిగతా వారు విఫలమయ్యారు. కోల్‌కతా చివరి ఐదు వికెట్లను కేవలం ఎనిమిది పరుగుల వ్యవధిలో కోల్పోవడం గమ నార్హం.
 
 
 టాప్ విఫలం...
 ఆరంభంలో చెలరేగిన కోల్‌కతా బౌలర్లు.. 32 పరుగులకే ఢిల్లీ టాప్-3 బ్యాట్స్‌మెన్‌ను పెవిలియన్‌కు చేర్చారు. ముఖ్యంగా డికాక్ అవుట్ కావడం ఢిల్లీ స్కోరుపై ప్రభావం చూపింది. కానీ నాయర్, బిల్లింగ్స్ ఈ ఒత్తిడి నుంచి తొందరగానే తేరుకున్నారు. వికెట్లను కాపాడుకుంటూనే స్ట్రయిక్ రొటేషన్‌తో రన్‌రేట్‌ను పెంచారు. దీంతో పవర్‌ప్లేలో 37/3తో ఉన్న ఢిల్లీ తొలి 10 ఓవర్లు ముగిసేసరికి 70/3కు చేరింది. 12వ ఓవర్ నుంచి ఈ ఇద్దరు జోరు పెంచడంతో స్కోరు బోర్డు వేగంగా కదలింది. 17వ ఓవర్‌లో ఉమేశ్ మూడు బంతుల తేడాలో నాయర్, మోరిస్ (0)లను అవుట్ చేసి ఝలక్ ఇచ్చాడు. నాయర్, బిల్లింగ్స్ నాలుగో వికెట్‌కు 105 పరుగులు జత చేశారు. ఈ దశలో వచ్చిన బ్రాత్‌వైట్ (11 బంతుల్లో 34; 3 ఫోర్లు, 3 సిక్సర్లు) భారీ షాట్లతో విరుచుకుపడ్డాడు. సిక్సర్లు, బౌండరీలు బాదడంతో ఆరో వికెట్‌కు కేవలం 12 బంతుల్లోనే 37 పరుగులు జతయ్యాయి. ఓవరాల్‌గా చివరి నాలుగు ఓవర్లలో 55 పరుగులు రావడంతో ఢిల్లీ భారీ స్కోరు చేసింది.
 
 ఉతప్ప మినహా....
 లక్ష్య ఛేదనలో ఓ ఎండ్‌లో ఉతప్ప మెరుగ్గా ఆడినా.. రెండో ఎండ్‌లో సహచరులు పెవిలియన్ బాటపట్టారు. మూడో ఓవర్‌లో గంభీర్ (6)తో మొదలైన వికెట్ల పతనం చివరి వరకు కొనసాగింది. 8 ఓవర్లు ముగిసేసరికి నైట్‌రైడర్స్ 58 పరుగులకు మూడు వికెట్లు కోల్పోవడంతో కోలుకోలేకపోయింది. ఈ దశ లో సూర్యకుమార్ (13 బంతుల్లో 21; 1 ఫోర్, 1 సిక్స్) కాసేపు ఆడే ప్రయత్నం చేశాడు. ఉతప్పతో కలిసి నాలుగో వికెట్‌కు 36 పరుగులు జత చేశాడు. 13వ ఓవర్‌లో వంద పరుగులకు చేరుకున్న కోల్‌కతా ఆ తర్వాత వరుస విరామాల్లో వికెట్లు చేజార్చుకుంది. 15వ ఓవర్‌లో భారీ సిక్సర్‌తో అర్ధసెంచరీ పూర్తి చేసిన ఉతప్పకు తోడుగా రసెల్ బ్యాట్ ఝుళిపించాడు.ఇక 24 బంతుల్లో 51 పరుగులు చేయాల్సిన దశలో ఐదు బంతుల తేడాలో రసెల్ (12 బంతుల్లో 17; 2 ఫోర్లు, 1 సిక్స్), హోల్డర్ (0), ఉతప్ప అవుటయ్యారు. దీంతో విజయసమీకరణం 12 బంతుల్లో 31గా మారింది. 19వ ఓవర్‌లో వరుస బంతుల్లో నరైన్ (4), ఉమేశ్ (2) అవుట్‌కావడంతో 9 బంతులు మిగిలి ఉండగానే ఢిల్లీ విజయాన్ని అందుకుంది. బ్రాత్ వైట్, జహీర్ చెరో మూడు వికెట్లు పడగొట్టారు.
  
  
 స్కోరు వివరాలు
 ఢిల్లీ డేర్‌డెవిల్స్ ఇన్నింగ్స్: డికాక్ (సి) హాగ్ (బి) రసెల్ 1; శ్రేయస్ ఎల్బీడబ్ల్యు (బి) రసెల్ 0; శామ్సన్ ఎల్బీడబ్ల్యు (బి) నరైన్ 15; కరుణ్ నాయర్ ఎల్బీడబ్ల్యు (బి) ఉమేశ్ 68; బిల్లింగ్స్ (బి) ఉమేశ్ 54; మోరిస్ (బి) ఉమేశ్ 0; బ్రాత్‌వైట్ (సి) నరైన్ (బి) రసెల్ 34; పంత్ రనౌట్ 4; షమీ నాటౌట్ 0; ఎక్స్‌ట్రాలు 10; మొత్తం: (20 ఓవర్లలో 8 వికెట్లకు) 186.
 
 వికెట్ల పతనం: 1-1; 2-2; 3-32; 4-137; 5-137; 6-174; 7-182; 8-186.
 బౌలింగ్: రసెల్ 4-0-26-3; హోల్డర్ 4-0-35-0; నరైన్ 3-0-22-1; ఉమేశ్ 3-0-33-3; హాగ్ 4-0-39-0; చావ్లా 2-0-24-0.
 
 కోల్‌కతా నైట్‌రైడర్స్ ఇన్నింగ్స్: ఉతప్ప (సి) నాయర్ (బి) మోరిస్ 72; గంభీర్ (సి) శ్రేయస్ (బి) జహీర్ 6; చావ్లా ఎల్బీడబ్ల్యు (బి) జహీర్ 8; యూసుఫ్ పఠాన్ (సి) మిశ్రా (బి) బ్రాత్‌వైట్ 10; సూర్యకుమార్ (సి) శ్రేయస్ (బి) బ్రాత్‌వైట్ 21; సతీష్ (సి) మోరిస్ (బి) బ్రాత్‌వైట్ 6; రసెల్ (సి అండ్ బి) మిశ్రా 17; హోల్డర్ రనౌట్ 0; ఉమేశ్ (సి) మోరిస్ (బి) జహీర్ 2; నరైన్ రనౌట్ 4; హాగ్ నాటౌట్ 0; ఎక్స్‌ట్రాలు 13; మొత్తం: (18.3 ఓవర్లలో ఆలౌట్) 159.
 
 వికెట్ల పతనం: 1-21; 2-33; 3-58; 4-94; 5-107; 6-151; 7-152; 8-153; 9-159; 10-159.
 బౌలింగ్: జహీర్ 3.3-0-21-3; షమీ 4-0-33-0; మోరిస్ 3-0-19-1; బ్రాత్‌వైట్ 4-0-47-3; మిశ్రా 4-0-36-1.


 ►  సీజన్ మారినా మారని రాత  తొలి మ్యాచ్‌లో చెత్త ప్రదర్శన 
 ► 9 వికెట్లతో కోల్‌కతా ఘన విజయం 
 ► ఐపీఎల్-9లో గంభీర్ సేన శుభారంభం
  
 గత మూడేళ్లలో ఐపీఎల్‌లో ఢిల్లీ డేర్‌డెవిల్స్ జట్టు 10 మ్యాచ్‌లు గెలిస్తే, 32 మ్యాచ్‌లు ఓడింది. ప్రతీ సీజన్‌కు ఆ జట్టు ఆట తీసికట్టుగా మారింది. దాంతో ఈసారి సమూల మార్పులు అంటూ సగం జట్టును మార్చి పడేశారు. యువ ఆటగాళ్లను భారీ మొత్తాలు చెల్లించి తీసుకున్నారు. మెంటార్‌గా ద్రవిడ్ మార్గనిర్దేశనం కూడా ఉంది. ఇక దూసుకెళ్లడమే తరువాయి అనిపించింది.
  
 కానీ రూపు మారినా జట్టు రాత మారలేదు. 2016 ఐపీఎల్‌ను ఆ జట్టు మరింత అధ్వాన్నంగా ప్రారంభించింది. కోల్‌కతా నైట్‌రైడర్స్‌తో జరిగిన ప్రారంభ మ్యాచ్‌లో 98 పరుగులకే చాపచుట్టేసిన ఢిల్లీ కనీసం 18 ఓవర్లు కూడా ఆడలేకపోయింది. ఏ దశలోనూ కనీస ప్రదర్శన ఇవ్వలేక ఆ జట్టు కుప్పకూలిపోయి లీగ్ చరిత్రలో ఎవరికీ సాధ్యం కాని విధంగా ఏడోసారి  వంద లోపే ఆలౌటయింది.
  
  
 కోల్‌కతా: ఐపీఎల్-9లో మాజీ చాంపియన్ కోల్‌కతా నైట్‌రైడర్స్ శుభారంభం చేసింది. ఆదివారం ఇక్కడి ఈడెన్ గార్డెన్స్ మైదానంలో జరిగిన లీగ్ మ్యాచ్‌లో కోల్‌కతా 9 వికెట్ల తేడాతో ఢిల్లీ డేర్‌డెవిల్స్‌పై విజయం సాధించింది. టాస్ ఓడి ముందుగా బ్యాటింగ్‌కు దిగిన ఢిల్లీ 17.4 ఓవర్లలో 98 పరుగులకే ఆలౌటైంది. బ్రాడ్ హాగ్ (3/19), రసెల్ (3/24), హేస్టింగ్స్ (2/6) ఢిల్లీని దెబ్బ తీశారు. అనంతరం నైట్‌రైడర్స్ 14.1 ఓవర్లలో వికెట్ నష్టానికి 99 పరుగులు చేసింది. గౌతం గంభీర్ (41 బంతుల్లో 38 నాటౌట్; 5 ఫోర్లు), రాబిన్ ఉతప్ప (33 బంతుల్లో 35; 7 ఫోర్లు)  రాణించారు. రసెల్‌కు ‘మ్యాన్ ఆఫ్ ద మ్యాచ్’ అవార్డు దక్కింది.
 
 
  అందరూ అందరే...
 తొలి 14 బంతుల్లో 24 పరుగులు... ఢిల్లీ డేర్‌డెవిల్స్ ఓపెనింగ్ భాగస్వామ్యమిది. అంతే... ఆ తర్వాత పరుగులు తీయడమే చేతకాక అంతకుమించిన పార్ట్‌నర్‌షిప్ నెలకొల్పడం జట్టు బ్యాట్స్‌మెన్ వల్ల కాలేదు. డి కాక్ (10 బంతుల్లో 17; 1 ఫోర్, 1 సిక్స్) చేసిన పరుగులే ఆ జట్టులో అత్యధిక స్కోరు కావడం పరిస్థితిని సూచిస్తోంది. నైట్‌రైడర్స్ చక్కటి బౌలింగ్ ముందు ఒక్క బ్యాట్స్‌మన్ కూడా క్రీజ్‌లో నిలవలేకపోయాడు.
 
 రసెల్ వేసిన ఇన్నింగ్స్ మూడో ఓవర్లో డి కాక్, శ్రేయస్ అయ్యర్ (0) అవుట్ కావడంతో ఢిల్లీ పతనం ప్రారంభమైంది. తన తర్వాతి ఓవర్లోనే అతను మయాంక్ అగర్వాల్ (9)ను కూడా పెవిలియన్ పంపించాడు. ఆ వెంటనే మెయిడిన్ ఓవర్ వేసిన హేస్టింగ్స్... కరుణ్ నాయర్ (3) వికెట్ కూడా తీశాడు. ఆ తర్వాత పడిన ఐదు వికెట్లను స్పిన్నర్లు హాగ్, పీయూష్ చావ్లా పంచుకున్నారు. చావ్లా తన వరుస ఓవర్లలో కార్లోస్ బ్రాత్‌వైట్ (6), క్రిస్ మోరిస్ (11)లను పెవిలియన్ పంపించగా... పవన్ నేగి (11), శామ్సన్ (13 బంతుల్లో 15; 2 ఫోర్లు), అమిత్ మిశ్రా (3)లను హాగ్ అవుట్ చేశాడు. కెప్టెన్ జహీర్ ఖాన్(4)ను హేస్టింగ్స్ అవుట్ చేయడంతో మరో 14 బంతులు మిగిలి ఉండగానే డేర్‌డెవిల్స్ ఇన్నింగ్స్ ముగిసింది.
 
 అలవోకగా...
 స్వల్ప లక్ష్య ఛేదనలో ఉతప్ప, గంభీర్ ఎక్కడా తడబడలేదు. జహీర్ వేసిన రెండో ఓవర్లో మూడు ఫోర్లతో 16 పరుగులు రావడంతో వీరి జోరు మొదలైంది. ఢిల్లీ బౌలర్లను సునాయాసంగా ఎదుర్కొని పరుగులు రాబట్టిన ఈ జోడి తొలి వికెట్‌కు 58 బంతుల్లో 69 పరుగులు జతచేసింది. ఈ క్రమంలో వీరిద్దరు ఐపీఎల్‌లో అత్యధిక పరుగులు జోడించిన ఓపెనర్ల జాబితాలో రెండో స్థానానికి చేరగా... ఉతప్ప లీగ్‌లో 3 వేల పరుగులు పూర్తి చేసుకున్న ఆరో ఆటగాడిగా నిలిచాడు. కోల్‌కతా విజయం దిశగా సాగుతున్న దశలో భారీ షాట్‌కు ప్రయత్నించి ఉతప్ప అవుటైనా, మనీశ్ పాండే (12 బంతుల్లో 15 నాటౌట్; 3 ఫోర్లు) సహకారంతో మరో 5.5 ఓవర్లు మిగిలి ఉండగానే గంభీర్ మ్యాచ్‌ను ముగించాడు.
 
 
  వరుసగా ఐదో సిక్సర్...
  సరిగ్గా వారం రోజుల క్రితం ఇదే మైదానంలో అతనేంటో ప్రపంచానికి తెలిసింది. నాడు ప్రపంచ కప్ ఫైనల్లో వరుసగా నాలుగు సిక్సర్లతో దుమ్ము రేపిన బ్రాత్‌వైట్ అదే ఈడెన్ గార్డెన్స్‌లో ఆదివారం దానిని కొనసాగించినట్లు కనిపించాడు. ముగించిన చోటే మొదలు పెట్టినట్లు చావ్లా ఓవర్లో తాను ఎదుర్కొన్న తొలి బంతికే అతను భారీ సిక్సర్ బాదాడు. ఇక్కడ అతనికి ఇది వరుసగా ఐదో సిక్సర్ కావడం విశేషం. అయితే ఏడో స్థానంలో బ్యాటింగ్‌కు దిగిన బ్రాత్‌వైట్ ఈ జోరు మళ్లీ చూపించలేక నాలుగో బంతికే ఎల్బీగా వెనుదిరిగాడు.
 
  ►ఢిల్లీ టాప్ ఆర్డర్‌ను కుప్పకూల్చిన కోల్‌కతా బౌలర్లు హేస్టింగ్స్, రసెల్
  
 స్కోరు వివరాలు
 ఢిల్లీ డేర్‌డెవిల్స్ ఇన్నింగ్స్: అగర్వాల్ (సి) హాగ్ (బి) రసెల్ 9; డి కాక్ (సి) పఠాన్ (బి) రసెల్ 17; అయ్యర్ (ఎల్బీ) (బి) రసెల్ 0; నాయర్ (సి) పాండే (బి) హేస్టింగ్స్ 3; శామ్సన్ (సి) ఉతప్ప (బి) హాగ్ 15; నేగి (స్టంప్డ్) ఉతప్ప (బి) హాగ్ 11; బ్రాత్‌వైట్ (ఎల్బీ) చావ్లా 6; మోరిస్ (బి) చావ్లా 11; కూల్టర్ నీల్ (నాటౌట్) 7; మిశ్రా (సి) గంభీర్ (బి) హాగ్ 3; జహీర్ (సి) పాండే (బి) హేస్టింగ్స్ 4; ఎక్స్‌ట్రాలు 12; మొత్తం (17.4 ఓవర్లలో ఆలౌట్) 98.
 
 
 వికెట్ల పతనం: 1-24; 2-25; 3-31; 4-35; 5-55; 6-67; 7-84; 8-84; 9-92; 10-98.
 బౌలింగ్: రసెల్ 3-0-24-3; ఉమేశ్ యాదవ్ 3-0-21-0; హేస్టింగ్స్ 2.4-1-6-2; మున్రో 1-0-7-0; హాగ్ 4-1-19-3; చావ్లా 4-0-21-2.
 
 కోల్‌కతా నైట్‌రైడర్స్ ఇన్నింగ్స్: ఉతప్ప (సి) మోరిస్ (బి) మిశ్రా 35; గంభీర్ (నాటౌట్) 38; పాండే (నాటౌట్) 15; ఎక్స్‌ట్రాలు 11; మొత్తం (14.1 ఓవర్లలో వికెట్ నష్టానికి) 99.
 
 వికెట్ల పతనం: 1-69.
 బౌలింగ్: కూల్టర్‌నీల్ 4-0-32-0; జహీర్ 2.1-0-24-0; మోరిస్ 4-0-21-0; బ్రాత్‌వైట్ 2-0-9-0; మిశ్రా 2-0-11-1.
  


 ముంబై: భారత పేసర్ ధావల్ కులకర్ణి గురువారం పెళ్లి పీటలెక్కాడు. ఫ్యాషన్ కోఆర్డినేటర్‌గా పనిచేస్తున్న శ్రద్ధా ఖర్పుడేను తను వివాహం చేసుకున్నాడు. మహారాష్ట్ర సంప్రదాయాలకు అనుగుణంగా జరిగిన ఈ వేడుకలకు ఇరువురి కుటుంబ సభ్యులతో పాటు వారి సన్నిహితులు హాజరయ్యారు. వీరిద్దరికి నాలుగేళ్ల నుంచి పరిచయం ఉంది. సహచర ముంబై ఆటగాడు రోహిత్ శర్మ ట్విట్టర్‌లో కులకర్ణికి శుభాకాంక్షలు తెలిపాడు.
 
  టెన్నిస్ క్రీడాకారిణిని పెళ్లాడిన ఉతప్ప
 భారత జట్టులో స్థానం కోల్పోయిన క్రికెటర్ రాబిన్ ఉతప్ప కూడా ఓ ఇంటివాడయ్యాడు. తన ప్రియురాలు, టెన్నిస్ క్రీడాకారిణి అయిన శీతల్ గౌతమ్‌ను గురువారం పెళ్లాడాడు. గతేడాది నవంబర్‌లో వీరి ఎంగేజ్‌మెంట్ జరిగింది. వివాహానికి పేసర్ ఇర్ఫాన్ పఠాన్, బాలీవుడ్ నటి జూహీచావ్లా  హాజరయ్యారు.
  


 కోల్‌కతా: ఐపీఎల్-8 మ్యాచ్ సందర్భంగా రాయల్ చాలెంజర్స్ బెంగళూరు ఆటగాడు సర్ఫరాజ్తో గొడవ పడిన కోల్కతా నైట్ రైడర్స్ ఓపెనర్ రాబిన్ ఊతప్పను కోల్కతా కెప్టెన్ గంభీర్ వెనకేసుకొచ్చాడు. ఐపీఎల్ వంటి ఉత్కంఠభరిత టోర్నీలో  ఇలాంటి సంఘటనలు మామూలేనంటూ గంభీర్ తేలికపరిచే ప్రయత్నం చేశాడు. ఈ ఘటనలో తప్పేమీలేదని అన్నాడు.
 
 శనివారం కోల్‌కతా, (బెంగళూరు)ల మధ్య మ్యాచ్ ముగిశాక ఉతప్ప.. సర్ఫరాజ్‌ కాలర్ పట్టుకుని తిట్టినట్లు వచ్చిన వార్తలపై గౌతీ స్పందించాడు. ఇలాంటి ఘటనలకు ప్రాధాన్యత ఇవ్వరాదంటూ గౌతీ మీడియాని కోరాడు. ఇదిలావుండగా, సర్ఫరాజ్తో ఊతప్ప గొడవ పడిన విషయం తన దృష్టికి రాలేదని మ్యాచ్ రెఫెరీ, మాజీ పేసర్ జవగళ్ శ్రీనాథ్ చెప్పాడు. కోల్కతా జట్టు అధికారులు కూడా ఈ వార్తలను ఖండించారు. 


  కోల్‌కతా: ఈడెన్‌గార్డెన్స్‌లో శనివారం మ్యాచ్ తర్వాత ఉతప్ప (కోల్‌కతా), సర్ఫరాజ్ (బెంగళూరు)ల మధ్య స్వల్ప ఘర్షణ చోటు చేసుకున్నట్లు సమాచారం. మ్యాచ్ ముగిశాక సైట్ స్క్రీన్ వెనక... ఉతప్ప 17 ఏళ్ల సర్ఫరాజ్‌ను కాలర్ పట్టుకుని తిట్టినట్లు సమాచారం. ఇది గమనించిన బెంగళూరు క్రికెటర్లు డివిలియర్స్, దిండా పరిగెడుతూ వెళ్లి విడిపించారట. గొడవ ఎందుకు జరిగిందనే వివరాలు మాత్రం బయటకు రాలేదు. అయితే ఈ విషయం తన దృష్టికి రాలేదని ఆ మ్యాచ్‌కు రిఫరీగా వ్యవహరించిన శ్రీనాథ్ చెప్పారు. ‘రెండు జట్ల నుంచి నాకు ఎలాంటి ఫిర్యాదూ రాలేదు’ అని శ్రీనాథ్ చెప్పారు.