* పంచలోహ విగ్రహాల చోరీ ముఠా అరెస్ట్
 * రూ. కోటి సొత్తు స్వాధీనం
 * మల్లూరు ఆలయ గోపురంపై విగ్రహాలను ఎత్తుకెళ్తూ పోలీసులకు చిక్కిన నిందితులు
 వరంగల్ క్రైం : పంచలోహ విగ్రహాల చోరీలకు పాల్పడుతున్న ఇద్దరు సభ్యుల ముఠాను వరంగల్ సీసీఎస్ పోలీసులు మంగళవారం అరెస్టు చేశారు. వారి నుంచి సుమారు కోటి రూపాయల విలువ చేసే పంచలోహ విగ్రహాలను స్వాధీనం చేసుకున్నారు. ఈ మేరకు హన్మకొండ పోలీస్  హెడ్‌క్వార్టర్స్‌లో ఏర్పాటుచేసిన విలేకరుల సమావేశంలో సీపీ సుధీర్‌బాబు నిందితుల వివరాలు వెల్లడించారు.
 
 ములుగు గణపురం మండలం బస్వరాజుపల్లి గ్రామానికి చెందిన దాసి ప్రవీణ్ ఇంటర్ మధ్యలోనే ఆపేసి 2013లో ట్రాక్టర్‌ను కొనుగోలు చేశాడు. ట్రాక్టర్‌తో ఇసుక తరలిస్తుండగా రెవెన్యూ అధికారులు సీజ్ చేసి పోలీస్ స్టేషన్‌కు తరలించారు. ట్రాక్టర్ ఎనిమిది నెలల వరకు రిలీజ్ కాకపోవడంతో అతడికి ఆదాయం తగ్గి అప్పులు ఎక్కువయ్యాయి. ఈ సమయంలో పురాతన దేవాలయంలో పంచలోహ విగ్రహాలతోపాటు దేవాలయాల్లో లభించే నిధులకు అంతర్జాతీయ మార్కెట్‌లో అధిక మొత్తంలో డబ్బులు వస్తాయని కొందరు వ్యక్తుల ద్వారా తెలుసుకున్నాడు. దీంతో పంచలోహ విగ్రహాలను చోరీ చేసి అమ్మాలని ప్రణాళిక సిద్ధం చేశాడు.
 
 ఇందులో భాగంగా ప్రవీణ్ నిర్మానుష్యంగా ఉండే దేవాలయాలపై దృష్టి సారించాడు. మంగపేట మండలం మల్లూరు నరసింహస్వామి దేవాలయ గోపురంపై ఉన్న సుదర్శన చక్రంతో ఉన్న శ్రీకృష్ణుడి పంచలోహ విగ్రహాన్ని చోరీ చేసేందుకు ప్రణాళిక రచించాడు. ఇందుకు తన చిన్ననాటి మిత్రుడైన భూపాలపల్లి మం డలంలోని కొంపెల్లి గ్రామానికి చెందిన జంగా మధుకర్ సహకారం తీసుకున్నాడు. మూడు రోజుల క్రితం ఇద్దరు కలిసి మల్లూరు నరసింహస్వామి దేవాలయంతోపాటు పరిసర ప్రాంతాల్లో రెక్కీ నిర్వహించారు.
 
 సోమవారం అర్ధరా త్రి సమయంలో దేవాలయం గోపురం మీద సుదర్శన చక్రంతో ఉన్న శ్రీకృష్ణుడి పంచలోహా విగ్రహాన్ని చోరీ చేశారు. మంగళవారం ఉదయం తాము చోరీ చేసిన విగ్రహాల విలువ తెలుసుకునేందుకు హన్మకొండ వైపు బైక్‌పై వస్తుండగా పెద్దమ్మగడ్డ బ్రిడ్జి సోదాలు చేపట్టిన పోలీసులకు చిక్కారు. వారిని విచారించగా నిం దితులు మల్లూరు నరసింహస్వామి దేవాలయంలో చోరీకి పాల్పడినట్లు ఒప్పుకున్నారు. నిందితులను అరెస్టు చేసి, కోటి రూపాయల విలువైన శ్రీకృష్ణుడి పంచలోహ విగ్రహంతోపాటు పంచలోహ సుదర్శన చక్రంను స్వాధీనం చేసుకున్నారు.
 
 ఇదిలా ఉండగా, పంచలోహ విగ్రహాలను స్వాధీనం చేసుకోవడంలో ప్రతిభ కనబరిచిన క్రైం ఏసీపీ ఈశ్వర్‌రావు, సీసీఎస్ ఇన్‌స్పెక్టర్ శ్రీధర్, ఏఎస్సై సంజీవరెడ్డి, హెడ్‌కానిస్టేబుల్ శ్రీనివాసరాజు, కానిస్టేబుళ్లు మహమ్మద్ అలీ, రవి, జంపయ్య రాజును సీపీ సుధీర్‌బాబు ప్రత్యేకంగా  అభినందించారు. సమావేశంలో హన్మకొండ ఏసీపీ శోభన్‌కుమార్, క్రైం ఏసీపీ  ఈశ్వర్‌రావు, తది తరులు పాల్గొన్నారు.


 భద్రాచలం: భద్రాచలం కేంధ్రంగా పెద్దఎత్తున దొంగ నోట్లు ముద్రిస్తున్న ముఠాను శుక్రవారం వరంగల్ సీసీఎస్ పోలీసులు అరెస్టు చేశారు. భద్రాచలం పట్టణంలో ఇంత పెద్దమొత్తంలో దొంగనోట్ల ముద్రణ జరుగుతున్న విషయాన్ని ఇక్కడి పోలీసులు, నిఘా వ్యవస్థ దృష్టికి రాకపోవటం కూడా చర్చనీయూంశమైంది. భద్రాచలంలోని కొత్తపేట కాలనీకి చెందిన కందుల పవన్ కుమార్ రెడ్డి రూ.16 లక్షల నకిలీ కరెన్సీని హన్మకొండలోని పెట్రోల్ బంకు వద్ద ఓ ప్రవేటు హాస్టల్‌లో దిడిగం మనోజ్‌కుమార్ అనే వ్యక్తికి ఇచ్చి, 90వేల రూపాయల అసలు నోట్లు తీసుకుంటుండగా వరంగల్ సీసీఎస్ పోలీసులు అదుపులోకి తీసుకున్నారు.
 
 వారు ఇచ్చిన సమాచారంతో పోలీసులు భద్రాచలం చేరుకున్నారు. పవన్‌కుమార్ రెడ్డి ఇంట్లో పూర్తిస్థాయిలో సోదాలు చేశారు. దొంగ నోట్ల ముద్రణలో భాగస్వాముడైన భద్రాచలానికి చెందిన మరో వ్యక్తి పెద్దినేని రవిప్రసాద్‌ను కూడా అదుపులోకి తీసుకున్నారు. కొత్తపేటలోగల పవన్‌కుమార్ రెడ్డి ఇంట్లోని నకిలీ కరెన్సీ స్వాధీనపర్చుకున్నారు. మొత్తంగా రూ.43.17 లక్షల నకిలీ కరెన్సీ, వాటిని ముద్రించేందుకు ఉపయోగించిన సామాగ్రిని వరంగల్ సీసీఎస్ పోలీసులు స్వాధీనపర్చుకున్నారు. ఈ ముగ్గురిని అరెస్ట్ చే సి కోర్టుకు రిమాండ్ చేస్తున్నట్టు చెప్పారు.
  
 వారపత్రిక ముసుగులో...
 బూర్గంపాడుకు  చెందిన పెద్దినేని రవిప్రసాద్  భద్రాచలం కేంద్రంగా ఓ స్వచ్ఛంద సంస్థను స్థాపించాడు. ఐటీసీ ఇచ్చే నిధులతో గిరిజన గ్రామాల్లో వివిధ కార్యక్రమాలు చేపడుతున్నాడు. ఇటీవలనే ఓ వారపత్రికను కూడా స్థాపించాడు. ఇదే పత్రికలో పనిచేస్తున్న పవన్‌కుమార్ రెడ్డి, తన కున్న కంప్యూటర్ పరిజ్ఙానంతో నకిలీ కరెన్సీ నోట్ల తయారు చేస్తున్నాడని, ఇతనికి రవిప్రసాద్ సహకరిస్తున్నాడని పోలీసుల విచారణలో వెల్లడైంది. సులువుగా డబ్బు సంపాందించాలనే అత్యాశతో రూ.100, 500, 1000 నోట్లను ముద్రించి చెలామణికి సిద్ధమైనట్టుగా చెప్పారు.
  
 భద్రాద్రిలో నిఘా నిద్రపోతోందా..?
 భద్రాచలం కేంద్రంగా పెద్దఎత్తున దొంగ నోట్లు చెలామణి అవుతున్నట్టుగా కొంతకాలంగా ప్రచారం సాగుతోంది. ఖమ్మం జిల్లాలో ఎక్కడ దొంగనోట్ల కేసు నమోదైనా భద్రాచలంతో సంబంధాలు ఉంటున్నట్టుగా గతంలో అనేకమార్లు వెల్లడైంది. ఇటీవలి కాలంలో పొరుగునగల ఛత్తీసగఢ్ వ్యాపారస్తులు, సరిహద్దుల్లో ఉన్న సంతలు, అమాయక ఆదివాసీలను టార్గెట్‌గా చేసుకున్న కొంతమంది పెద్దఎత్తున దొంగనోట్ల చెలామణి చేస్తున్నారనే ప్రచారం కూడా ఉంది.
 
 ఈ నకిలీ తయూరీదారులను కనిపెట్టడంలో నిఘా వ్యవస్థ విఫలమైందనే విమర్శలు వెల్లువెత్తుతున్నాయి. దొంగ నోట్ల ముద్రణలో భాగంగా వరంగల్ పోలీసులకు పట్టుబడిన పెద్దినేని రవిప్రసాద్‌కు భద్రాచలంలోని ఓ పోలీస్ అధికారితో కూడా సత్పసంబంధాలు ఉన్నాయనే ప్రచారం కూడా ఉంది. ఈ మొత్తం పరిణామాలతో ఇక్కడి పోలీసులు ఉదాసీనంగా వ్యవహరించటంతోనే వరంగల్ సీసీఎస్ పోలీసులు.. ఇక్కడి పోలీసులు కూడా సమాచారం లేకుండా దొంగ నోట్ల ముఠాను తీసుకెళ్లటం చర్చకు దారితీసింది.