క్లుప్తంగా

పురుగుల మందు తాగి ఒకరి ఆత్మహత్య

బెజ్జూర్‌: కుటుంబ కలహాలతో జీవితంపై విరక్తితో ఒకరు పురుగుల మందు తాగి ఆత్మహత్యకు పాల్పడినట్లు ఎస్సై ప్రవీణ్‌కుమార్‌ తెలిపారు. ఆయన కథనం ప్రకారం.. మండలంలోని కుంటలమానెపల్లికి బోర్‌కుట్టే ఎమ్మాజీ (48) వ్యవసాయం చేసి జీవనం సాగిస్తున్నాడు. ఈయనకు భార్య రుక్మాబాయి, నలుగురు సంతానం. భార్యభర్తల మధ్య తరుచూ గొడవలు జరుగుతుండేవి. ఈక్రమంలో శనివారం రాత్రి ఇంట్లో ఎవరూ లేని సమయంలో గుర్తుతెలియని పురుగుల మందు తాగాడు. చుట్టూపక్కల వారు గమనించి కుటుంబీకులకు సమాచారం అందించారు. వారు అతన్ని ప్రభుత్వ ఆస్పత్రికి తరలిస్తుండగా మార్గమధ్యలో మృతిచెందాడు. భార్య ఫిర్యాదుతో కేసు దర్యాప్తు చేస్తున్నట్లు ఎస్సై తెలిపారు.

ఇసుక ట్రాక్టర్‌ పట్టివేత

జన్నారం: జన్నారం అటవీ డివిజన్‌, ఇందన్‌పల్లి రేంజ్‌ కవ్వాల్‌ అటవీ సెక్షన్‌, లోతొర్రె బీట్‌లో అక్రమంగా శనివారం అర్ధరాత్రి స మయంలో తరలిస్తున్న ఇసుక ట్రాక్టర్‌ను ప ట్టుకున్నట్లు రేంజ్‌ అధికారి కారం శ్రీనివాస్‌ తెలిపారు. కవ్వాల్‌ సెక్షన్‌లో పెట్రోలింగ్‌ నిర్వహిస్తుండగా ఇసుక తరలిస్తున్న ట్రాక్టర్‌ కనిపించడంతో పట్టుకుని సీజ్‌ చేసి రేంజ్‌ కార్యాలయానికి తరలించినట్లు పేర్కొన్నా రు. పట్టుకున్న ట్రాక్టర్‌ యజమాని మహిపాల్‌రెడ్డిగా తెలిసిందన్నారు. టైగర్‌ జోన్‌ ప్రాంతంలో అక్రమంగా ఇసుక తరలిస్తే చట్టపరమైన చర్యలు తప్పవని హెచ్చరించారు.