నేటి నుంచి రాష్ట్ర స్థాయి రగ్బీ పోటీలు

నేటి నుంచి రాష్ట్ర స్థాయి రగ్బీ పోటీలు

కమలాపురం: స్థానిక సీఎస్‌ఎస్‌ఆర్‌ అండ్‌ ఎస్‌ఆర్‌ఆర్‌ఎం డిగ్రీ, పీజీ కళాశాల క్రీడా ప్రాంగణంలో శనివారం నుంచి 68వ రాష్ట్ర స్థాయి రగ్బీ స్కూల్‌ గేమ్స్‌ క్రీడా పోటీలు నిర్వహించనున్నట్లు ఫిజికల్‌ డైరెక్టర్లు అరుణ కుమారి, తిరుపాల్‌రెడ్డి, శివ శంకర్‌ రెడ్డి తెలిపారు. శనివారం వారు రగ్బీ క్రీడా పోటీలు నిర్వహిస్తున్న క్రీడా మైదానాన్ని కళాశాల కరస్పాండెంట్‌ రాజగోపాల్‌రెడ్డితో కలసి పరిశీలించారు. కాగా క్రీడల నిర్వహణకు, 13 ఉమ్మడి జిల్లాల నుంచి వచ్చిన క్రీడాకారులకు వసతులు, సౌకర్యాలు అన్ని ఏర్పాట్లు సిద్ధం చేశారు.

ఐపీబీబీ అకౌంట్ల ఓపెన్‌కు ప్రత్యేక శిబిరాలు

కడప వైఎస్‌ఆర్‌ సర్కిల్‌: ఐపీబీబీ అకౌంట్లను తెరిచేందుకు ఈనెల 15న ప్రత్యేక శిబిరాలను నిర్వహించనున్నట్లు కడప డివిజన్‌ పోస్టల్‌ సూపరింటెండెంట్‌ రాజేష్‌ పేర్కొన్నారు. శుక్రవారం నగరంలోని కడప డివిజన్‌ పోస్టల్‌ ప్రధాన కార్యాలయంలో ఆయన విలేకరులతో మాట్లాడారు. తపాలాశాఖ, రాష్ట్ర ప్రభుత్వం సంయు క్తంగా ఇండియా పోస్ట్‌ పేమెంట్స్‌ బ్యాంకు ద్వారా కొత్త ఖాతాలను తెరిచి ఆధార్‌కు లింకులను సులభతరం చేయడానికి లబ్ధిదారుల కోసం శిబిరాలను నిర్వహిస్తున్నామని వెల్లడించారు. కొత్త ఐపీబీబీ ఖాతాలను తెరవడం, ఇప్పటికే ఉన్న ఐపీబీబీ అకౌంట్లకు ఆధార్‌ లింకు చేయడం , మ్యాపింగ్‌ చేయడం వంటివి తమ లక్ష్యమన్నారు. జిల్లా వ్యాప్తంగా నిరుపయోగంగా ఉన్న 2.65 లక్షల అకౌంట్లు పునరుద్ధరిస్తామని వివరించారు.