రైలులో బిహార్‌ ప్రయాణికుడి మృతి

రైలులో బిహార్‌ ప్రయాణికుడి మృతి

రామగుండం: బెంగళూరు నుంచి బిహార్‌ వెళ్తున్న ఓ ప్రయాణికుడు రైలులో అస్వస్థతకు గురై మృతిచెందిన ఘటన ఆదివారం రామగుండంలో జరిగింది. జీఆర్పీ ఔట్‌పోస్టు ఇన్‌చార్జి తిరుపతి తెలిపిన వివరాలు.. బిహార్‌ రాష్ట్రం వైశాలి జిల్లాకు చెందిన సుఖదేవోదాస్‌(65) బెంగళూరులో సపాయి పని చేస్తూ కుటుంబాన్ని పోషిస్తున్నాడు. ఈ నేపథ్యంలో తన స్వగ్రామానికి వెళ్లేందుకు బెంగళూరులో సంఘమిత్ర ఎక్స్‌ప్రెస్‌ జనరల్‌ కోచ్‌లో ఎక్కి ప్రయాణిస్తున్నాడు. మార్గమధ్యలో వేకువజామున అస్వస్థతకు గురవడంతో బోగీలోని ప్రయాణికులు రైల్వే పోలీసులకు సమాచారం అందించారు. రామగుండం రైల్వేస్టేషన్‌కు రైలు చేరుకోగానే డాక్టర్‌ పరీక్షించగా అప్పటికే మృతిచెందినట్లు ధ్రువీకరించారు. మృతుడి వద్ద లభ్యమైన చిరునామా ఆధారంగా కుటుంబసభ్యులకు సమాచారం అందజేసినట్లు జీఆర్పీ తిరుపతి పేర్కొన్నారు.