ఫ్యాక్టరీలో పేలుడు, ఇద్దరు కార్మికులు మృతి

ఫ్యాక్టరీలో పేలుడు, ఇద్దరు కార్మికులు మృతి

తుమకూరు: ఆయిల్‌ ట్యాంక్‌ పేలి ఇద్దరు కార్మికులు మరణించారు. మరో ముగ్గురు కార్మికులకు తీవ్రంగా గాయలయ్యాయి. ఈ ఘటన తుమకూరు శివార్లలోని అంతసరనహళ్లి పారిశ్రామికవాడలో జరిగింది. వివరాలు.. పరిమళ ఆగ్రో ఫుడ్‌ ఇండస్ట్రీస్‌లో విత్తనాల నుంచి నూనెను తీస్తారు. ప్రత్యక్ష సాక్షుల ప్రకారం ఇద్దరు కార్మికులు ఎత్తైన బాయిలర్‌ మీద వెల్డింగ్‌ పని చేస్తున్నారు. పక్కనే ఇంకో ఆయిల్‌ ట్యాంక్‌ నుంచి పెద్ద పేలుడు శబ్ధం వచ్చింది. ఈ సమయంలో వెల్డింగ్‌ చేస్తున్న కార్మికులు 40 అడుగుల ఎత్తు ఉన్న బాయిలర్‌ నుంచి కిందకు పడిపోయారు. దీంతో తీవ్రగాయాలతో మరణించారు. ఇద్దరూ కూడా బిహార్‌కు చెందిన కార్మికులు చందన్‌, శర్మ అని తెలిసింది. ముగ్గురు కార్మికులకు గాయాలయ్యాయి. క్షతగాత్రులను తుమకూరు జిల్లాస్పత్రికి తరలించారు. జిల్లా ఎస్పీ అశోక్‌ కె.వెంకట్‌ చేరుకుని పరిశీలించారు. పోలీసులు కేసు నమోదు చేసి విచారణ చేపట్టారు.