చెప్పుకోలేక.. కన్నీళ్లు దిగమింగలేక!

ఆసుపత్రి ఎదుట డివైడర్‌పై అచేతన స్థితిలో సత్యనాగరాజు

కన్నబిడ్డలు ఉన్నారో లేరో తెలియదు.. భారమై వదిలించుకున్నారో, తానే వాళ్లకు భారమనుకున్నాడో చెప్పుకోలేడు.. పరువు బజారున పడుతుందనుకున్నాడో.. ఎక్కడో ఒకచోట ఈ ప్రాణం ఇలా వదిలేద్దామనుకున్నాడో.. ముదిమి వయస్సులో మండుటెండలో జీవశ్చవమయ్యాడు. కాళ్లు కదపలేడు, కన్నీటిని ఆపుకోలేడు.. ఊరు పేరు తప్ప వివరాలకు ఉబికి వచ్చే కన్నీళ్లే సమాధానం. ఈ 70 ఏళ్ల శరీరం నగరం నడిబొడ్డున, ప్రభుత్వాసుపత్రి ఎదుట మంగళవారం మధ్యాహ్నం దిక్కులు చూస్తూ.. దేవుడిపైనే భారం వేసింది. రోడ్డు మధ్యనున్న పచ్చని డివైడర్‌లో ఈ ‘పెద్దరికం’ మోడుబారి పడుకుంది. – కర్నూలు(హాస్పిటల్‌)

(ఇతని పేరు సత్యనాగరాజు. ఊరు విజయవాడ. ఈ వివరాలు తప్ప మరో మాట మాట్లాడని ఈయన దయనీయ స్థితికి కర్నూలు నగరం కన్నీరు పెట్టింది. విషయం తెలుసుకున్న ప్రభుత్వాసుపత్రి సూపరింటెండెంట్‌ కె.వెంకటేశ్వర్లు చలించిపోయారు. రాత్రి 8 గంటల సమయంలో 108ను పంపి ఆయనను క్యాజువాలిటీలో అడ్మిట్‌ చేయించారు. )