సీనియర్స్‌ కబడ్డీ పోటీలకు జిల్లా జట్ల ఎంపిక పూర్తి

సీనియర్స్‌ కబడ్డీ పోటీలకు జిల్లా జట్ల ఎంపిక పూర్తి

విజయనగరం: రాష్ట్రస్థాయిలో జరగనున్న సీనియర్స్‌ సీ్త్ర, పురుషుల కబడ్డీ పోటీల్లో పాల్గొనబోయే జిల్లా జట్ల ఎంపిక పోటీలు ఆదివారం పూర్తయ్యాయి. జిల్లా కబడ్డీ అసోసియేషన్‌ ఆధ్వర్యంలో నగరంలోని రాజీవ్‌ క్రీడామైదానంలో నిర్వహించిన ఎంపిక పోటీల్లో జిల్లా నలుమూలల నుంచి 100మందికి పైగా క్రీడాకారులు తలపడ్డారు. ఆద్యంతం ఉత్కంఠభరితంగా సాగిన ఎంపిక పోటీల్లో ఉత్తమ ప్రతిభ కనబరిచిన 16 మంది పురుషులు, 16 మంది మహిళా క్రీడాకారులు విజయనగరం జిల్లా జట్లకు అర్హత సాధించారు. ఎంపికై న క్రీడాకారులకు మంగళవారం నుంచి రాజీవ్‌క్రీడామైదానంలో కోచింగ్‌ క్యాంప్‌ నిర్వహించిన అనంతరం అందులో మెరుగైన ఆట తీరును కనబరిచే 12 మంది క్రీడాకారులను ఒక్కో జట్టులోకి ఎంపిక చేయనున్నారు. తుది జట్టుకు ఎంపికై న క్రీడాకారులు వచ్చే నెల 5 నుంచి 8వ తేదీ వరకు ప్రకాశం జిల్లా సంతనూతలపాడులో జరగనున్న అంతర్‌ జిల్లాల సీనియర్స్‌ కబడ్డీ చాంపియన్‌షిప్‌లో విజయనగరం జిల్లా జట్టు తరఫున ప్రాతినిధ్యం హించనున్నారు. ఎంపిక పోటీలను జిల్లా కబడ్డీ అసోసియేషన్‌ చైర్మన్‌ ఐవీపీ రాజు, జిల్లా క్రీడాభివృద్ధి అధికారి ఎస్‌.వెంకటేశ్వరరావు, అసోసియేషన్‌ కార్యదర్శి కేవీ ప్రభావతి, ఆర్గనైజింగ్‌ కార్యదర్శి నడిపేన లక్ష్మణరావు, కోశాధికారి శివకుమార్‌, పలువురు వ్యాయామ ఉపాధ్యాయులు పర్యవేక్షించారు.