బైక్‌ బోల్తా పడి మహిళ దుర్మరణం

బైక్‌ బోల్తా పడి మహిళ దుర్మరణం

సీతంపేట: అందరిలాగే ఆ కుటుంబం కూడా పిక్నిక్‌లో భాగంగా ఆదివారం ఆడలి వ్యూపాయింట్‌ను సందర్శించి ఆనందంగా గడిపింది. ఆ అనందంలో తేలియాడుతున్న లోగానే మృత్యువు ఆ కుటుంబంలోని మహిళను కబళించింది. భర్త, పిల్లలకు గాయాలయ్యాయి. ఈ ప్రమాదం వివరాలిలా ఉన్నాయి. పాలకొండకు చెందిన దుప్పాడ దుర్గారావు, భార్య భారతి, పిల్లలు మేఘన, పల్లవిలు ద్విచక్రవాహనంపై సీతంపేట ఏజెన్సీలో మారుమూల ఉన్న పర్యాటక ప్రదేశమైన ఆడలి వ్యూపాయింట్‌కు వెళ్లారు. తిరుగుప్రయాణంలో ఘాట్‌రోడ్‌ బిడిందిగూడ మలుపు వద్దకు వచ్చేసరికి బైక్‌ అదుపుతప్పి లోయలో పడడంతో భారతి (33) అక్కడికక్కడే దుర్మరణం చెందింది. భర్త దుర్గారావుకు తీవ్రగాయాలు, పిల్ల లకు గాయాలు కావడంతో పాలకొండ ఏరియా ఆస్పత్రికి తరలించారు. ఇదే ఆస్పత్రికి భారతి మృతదేహాన్ని పోస్టుమార్టం నిమిత్తం తరలించినట్లు ఎస్సై వై.అమ్మన్నరావు తెలిపారు. ఫిర్యాదు మేరకు కేసునమోదు చేసి దర్యాప్తు చేస్తున్నామని ఎస్సై చెప్పారు.

భర్త, పిల్లలకు గాయాలు

ఆడలి ఘాట్‌రోడ్డులో ప్రమాదం