ఇలాంటి అద్భుత విజయాన్ని ఎప్పుడూ చూడలేదు : మోదీ

ఢిల్లీ : కాంగ్రెస్‌ తాను మునిగిపోవడంతో పాటు తన మిత్ర పక్షాల్ని ముంచుతోందని విమర్శించారు ప్రధాని మోదీ. దేశంలో విడుదలైన ఎన్నికల ఫలితాల్లో బీజేపీ,దాని మిత్ర పక్షాలు ఘన విజయాన్ని సాధించాయి. ఈ తరుణంలో బీజేపీ ప్రధాన కార్యాలయంలో విజయోత్సవ వేడుకలు జరిగాయి. ఈ వేడుకల్లో ప్రధాని మోదీతో పాటు ఇతర అగ్ర నాయకులు పాల్గొన్నారు.

ఈ సందర్భంగా ప్రధాని మోదీ మాట్లాడుతూ.. మహరాష్ట్రలో అద్భుత విజయాన్ని సాధించాం. ఈ విజయంతో గత రికార్డ్‌లను బద్దలు కొట్టాం. బీజేపీకి వరుసగా మూడుసార్లు ప్రజలు పట్టం కట్టారు. ఎన్‌డీఏ అంటేనే గుడ్‌ గవర్నెన్సీ. జార్ఖండ్‌లో మరింత కష్టపడాల్సింది. కాంగ్రెస్‌ కుల రాజకీయాలను ప్రోత్సహించింది. ఇండియా కూటమి ఇచ్చిన హామీలను మహరాష్ట్ర ప్రజలు తిరస్కరించారు. కాంగ్రెస్‌ తాను మునిగిపోవడంతో పాటు తన మిత్ర పక్షాల్ని ముంచుతోంది.  

విభజన రాజకీయాలకు ప్రజలు గుణపాఠం నేర్పించారు.రిజర్వేషన్లు ఎత్తేస్తారని రాజ్యాంగం పేరుతో  అబద్ధాలు ప్రచారం చేశారు.ఎస్సీ ఎస్టీ బీసీలను విభజించాలని కుట్ర చేశారు. ఈ కుట్రలను మహారాష్ట్ర ప్రజలు తిప్పి కొట్టారు. కులం పేరుతో విభజించే కుట్రలను తిరస్కరించారు. సమాజంలోని అన్ని వర్గాలు ఎన్డీఏకు మద్దతు పలికాయి. సామాజిక న్యాయం మేము ఆచరణలో  చేసి చూపించాం. రాబోయే ఐదేళ్లలో మహారాష్ట్ర అభివృద్ధిని పరుగులు పెట్టిస్తాం.

కాంగ్రెస్ కూటమి ప్రజా తీర్పును జీర్ణించుకోలేక పోతుంది.ఓటర్లు ఇచ్చిన తీర్పును తప్పుపడుతున్నారు.తెలంగాణ, కర్ణాటక, హిమాచల్ ప్రదేశ్‌లో  కాంగ్రెస్ ప్రజలను మోసం చేసింది. జమ్మూ కాశ్మీర్లో ఆర్టికల్ 370ని మళ్లీ  తెరపైకి తీసుకొచ్చేందుకు కాంగ్రెస్ ప్రయత్నం చేస్తుంది. దేశంలో రెండు రాజ్యాంగాలు తీసుకొచ్చే ప్రయత్నాలకు ప్రజలు చెంప దెబ్బ కొట్టారు.ప్రపంచంలోనే ఏ శక్తి ఆర్టికల్ 370 ని మళ్ళీ తీసుకురాలేరు’ అని వ్యాఖ్యానించారు.