సీన్‌ విలియమ్స్‌ అజేయ సెంచరీ.. భారీ స్కోర్‌ దిశగా జింబాబ్వే

బులవాయో: జింబాబ్వే పర్యటనకు వచ్చిన అఫ్గానిస్తాన్‌కు తొలి టెస్టులో ఆతిథ్య బ్యాటర్ల నుంచి సవాళ్లు ఎదురయ్యాయి. గురువారం మొదలైన ఈ మ్యాచ్‌లో ముందుగా బ్యాటింగ్‌కు దిగిన జింబాబ్వే తొలి ఇన్నింగ్స్‌లో 85 ఓవర్లలో 4 వికెట్లకు 363 పరుగులు చేసింది. ఓపెనర్‌ బెన్‌ కరన్‌ (74 బంతుల్లో 68; 11 ఫోర్లు), వన్‌డౌన్‌ బ్యాటర్‌ కైటానో (115 బంతుల్లో 46; 4 ఫోర్లు, 1 సిక్స్‌) రెండో వికెట్‌కు 49 పరుగులు జతచేశారు. కరన్‌ నిష్క్రమించాక వచ్చిన సీన్‌ విలియమ్స్‌ (161 బంతుల్లో 145 నాటౌట్‌; 9 ఫోర్లు, 3 సిక్స్‌లు) అఫ్గాన్‌ బౌలర్లపై వన్డేను తలపించే ఇన్నింగ్స్‌ ఆడాడు. విలువైన భాగస్వామ్యాలతో జట్టు భారీస్కోరుకు బాటలు వేశాడు.

కైటానోతో కలిసి మూడో వికెట్‌కు 78 పరుగులు, అనంతరం మైయెర్స్‌ (27; 3 ఫోర్లు)తో నాలుగో వికెట్‌కు 50 పరుగులు జోడించారు. తర్వాత విలియమ్స్, కెప్టెన్‌ ఇర్విన్‌ (94 బంతుల్లో 56 బ్యాటింగ్‌; 6 ఫోర్లు)తో కలిసి జట్టు స్కోరును 300 పరుగులు దాటించాడు. ఈ క్రమంలో 115 బంతుల్లోనే విలియమ్స్‌ సెంచరీ పూర్తి చేసుకున్నాడు. మరోవైపు ఇర్విన్‌ కూడా అర్ధసెంచరీ సాధించడంతో ఇద్దరు అబేధ్యమైన ఐదో వికెట్‌కు 143 పరుగులు జోడించారు. అఫ్గాన్‌ బౌలర్లలో ఘజన్‌ఫర్‌ 2, నవీద్‌ జద్రాన్, జహీర్‌ ఖాన్‌ చెరో వికెట్‌ తీశారు.