ఉపాధ్యాయ ఎమ్మెల్సీ ఎన్నికల షెడ్యూల్‌ విడుదల

ఉపాధ్యాయ ఎమ్మెల్సీ ఎన్నికల షెడ్యూల్‌ విడుదల

శ్రీకాకుళం పాతబస్టాండ్‌: ఉత్తరాంధ్ర( శ్రీకాకుళం, విజయనగరం, విశాఖపట్నం ఉమ్మడి జిల్లాలు) ఉపాధ్యాయ శాసన మండలి ఎన్నికలకు ఎన్నికల కమిషన్‌ బుధవారం షెడ్యూల్‌ విడుదల చేసింది. రాష్ట్రంలో మూడు నియోజకవర్గాల్లో ఉపాధ్యాయ ఎమ్మెల్సీ ఎన్నికలు జరగనుండగా అందులో ఉత్తరాంధ్ర ఒకటి. ప్రస్తుతం ఉత్తరాంధ్ర ఉపాధ్యాయ ఎమ్మెల్సీగా పాకలపాటి రఘువర్మ ఉన్నారు. ఈయన పదవీ కాలం మార్చి 29తో ముగియనుంది. బుధవారం ఎన్నికల షెడ్యూలు విడుదల చేసిన నాటి నుంచే ఎన్నికల కోడ్‌ అమల్లోకి వచ్చింది.

నోటిఫికేషన్‌: 2025 ఫిబ్రవరి 3

నామినేషన్లు చివరితేదీ: ఫిబ్రవరి 10

నామినేషన్ల పరిశీలన: ఫిబ్రవరి 11

నామినేషన్ల ఉపసంహరణ: ఫిబ్రవరి 13

పోలింగ్‌: ఫిబ్రవరి 27(ఉదయం 8 నుంచి సాయంత్రం 4 గంటల వరకు)

లెక్కింపు: మార్చి 3

కుంభమేళాకు

ప్రత్యేక బస్సులు

శ్రీకాకుళం అర్బన్‌ : ఉత్తరప్రదేశ్‌ రాష్ట్రం ప్రయాగరాజ్‌లో జరుగుతున్న కుంభమేళాకు శ్రీకాకుళం ఆర్టీసీ కాంప్లెక్స్‌ నుంచి ప్రత్యేక సూపర్‌ లగ్జరీ బస్సులు ఏర్పాటు చేస్తున్నట్లు జిల్లా ప్రజా రవాణా అధికారి ఏ.విజయకుమార్‌ తెలిపారు. ఈ మేరకు బుధవారం పోస్టర్‌ను ఆవిష్కరించారు. ఈ సందర్భంగా ఆయన మాట్లాడుతూ ఫిబ్రవరి 8వ తేదీ రాత్రి 8 గంటలకు శ్రీకాకుళం బస్‌స్టేషన్‌ నుంచి బయలుదేరి మార్గమధ్యలో పూరీ జగన్నాథ ఆలయం, కోణార్క్‌ సూర్య దేవాలయం, భువనేశ్వర్‌ లింగరాజ్‌ ఆలయ దర్శనం అనంతరం ప్రయాగ్‌రాజ్‌ చేరుకుంటుందని చెప్పారు. అక్కడ పుణ్యస్నానం తర్వాత తిరుగు ప్రయాణంలో కాశీ, గయ, బుద్ధగయ దర్శింపచేసి శుక్రవారం రాత్రికి శ్రీకాకుళం చేరుతుందని తెలిపారు. ఉదయం, రాత్రి అల్పాహారం, మధ్యాహ్నం భోజనం ఉంటుందని పేర్కొన్నారు. 7 రోజుల్లో 7 క్షేత్రాల దర్శనం నిమిత్తం భోజన సౌకర్యంతో కలిపి ఒకరికి రూ.9500గా టికెట్‌ ధరగా నిర్ణయించినట్లు తెలిపారు. కార్యక్రమంలో శ్రీకాకుళం ఆర్టీసీ 1–2వ డిపో మేనేజర్లు, హనుమంతు అమరసింహుడు, రవి శంకర్‌ శర్మ, అసిస్టెంట్‌ మేనేజర్లు వి.రమేష్‌, ఎ.గంగరాజు, రాజు, సత్యనారాయణ తదితరులు పాల్గొన్నారు. వివరాలకు 99592 25608, 99592 25609 నంబర్లను సంప్రదించవచ్చని పేర్కొన్నారు.

క్రీడాకారులకు అభినందనలు

శ్రీకాకుళం క్రైమ్‌ : జాతీయ బ్యాడ్మింటన్‌ పోటీల్లో సత్తాచాటిన జిల్లా క్రీడాకారిణులు సింగూరు నందిని, ముంత గాయిత్రి, బెండి జ్యోత్స్నలను ఎస్పీ కె.వి.మహేశ్వరరెడ్డి అభినందించారు. మహారాష్ట్రలోని నాగపూర్‌లో ఈ నెల 7 నుంచి 21 వరకు పోటీలు జరగ్గా.. ఆంధ్రప్రదేశ్‌ ద్వితీయ స్థానంలో నిలిచి సిల్వర్‌ మెడల్‌ సాధించింది. ఆ జట్టులో సభ్యులుగా మన విద్యార్థినులుండటంతో ఎస్పీ బుధవారం వారిని పిలిపించి ప్రశంసాపత్రాలు, మెమెంటోలతో సత్కరించారు. మరిన్ని విజయాలు సాధించాలని ఆకాంక్షించారు.

ఆలివ్‌ రిడ్లే తాబేళ్ల

మృత్యువాత

ఎచ్చెర్ల క్యాంపస్‌: ఆలివ్‌ రిడ్లే తాబేళ్ల కళేబరాలు కలకలం సృష్టిస్తున్నాయి. వాతావరణ కాలుష్యం, ఇతరత్రా కారణాల వల్ల మృతి చెందిన తాబేళ్లు ఎచ్చెర్ల మండలం బుడగుట్లపాలెం తీరానికి కొట్టుకొస్తున్నాయి. దీంతో పర్యావరణ వేత్తలు ఆందోళన చెందుతున్నారు.

1/2

ఉపాధ్యాయ ఎమ్మెల్సీ ఎన్నికల షెడ్యూల్‌ విడుదల

2/2

ఉపాధ్యాయ ఎమ్మెల్సీ ఎన్నికల షెడ్యూల్‌ విడుదల